Fịrịmẹnjịapụ 7 - FỊAFỊA BAỊBỤLỤ

Sitivini Kọn Ẹkwẹn

¹ Sịḅịda-Agbamịẹḅọ ḅe nwẹnị Sitivini gbela, “Ọkọ paka?”

² Sitivini nwẹnị pakịrị, “Mịnapụ na, ḍapụ na, ọmịnị ì pokii! Ebube nyana Tamụnọ ḅe ḅụụ kẹ wamịna atẹngịḅọ Ebira-amụ ḍiem ò Mẹsopotemịya ḅụ sime, sime sakị, tẹrẹmẹ ọ̀ saakị mu Eranị ḅụ anga,

³ tẹ nwẹnị ọ̀ ḅẹẹ, ‘Í furo-ḅẹ-apụ na ị́ ama na koroma-so tẹ ḅo à kẹ í ḍie ḅarị ama muu.’

⁴ Tẹ mie ḅụ Ebira-amụ nwẹnị ori ama koroma so tẹ mu Eranị ḅụ anga. Tẹ Ebira-amụ ḍa fịị tẹso, Tamụnọ nwẹnị pịkị ọ̀ kẹ ḅo mịọkụ ọmịnị angarị ama mẹ ḅụ koroma.

⁵ Anị sakị ḅụ ama mẹ ḅẹ gbọrụ pakịrị sọ Tamụnọ amụ kẹ Ebira-amụ pịrị tẹ anị ò nye sọ-a, gbọrụ ḅụọ nangwọ kịngẹ sọ ò nye-a. Kụma Tamụnọ minini ọ̀ pịrịm anị ori na ò furo-ḅẹ-apụ na nye sọ ḅa. Tamụnọ miemẹ minini sakị Ebira-amụ amụ ori awọ iyi-a.

⁶ Mie Tamụnọ kẹ ọ̀ ḅẹẹ ye: ‘Í furo-ḅẹ-apụ igoni ama anga ḅa, tẹ ama nyana apụ ma kụra gbọrụ ẹndẹ kẹ ịn kẹ omoni sọma tẹ si anga kẹ ini na kọn ḅa.

⁷ Kụma à ḅẹrẹ-pẹlẹ ini omoni fịrị mẹnjị pịrị ḅẹ atomi ma ọgọnọ gbana ḅa, tẹ anịtẹso sakị ini anị ama mẹ koroma-so tẹ ḅo mịanga ị̀ tẹkẹ ḅa.’

⁸ Anịtẹso Tamụnọ nwẹnị tarị-ḅụụ sin elekima mẹ kẹ Ebira-amụ na ọḅọkụ fị, anie mịẹtẹ Ayịzịkị iyi tẹ ninea aḍin karama ene ḅụ Ebira-amụ ọ̀ tarị-ḅụụ siinm; Ayịzịkị pịkị ọ̀ tụḅọ Jekọbụ tarị-ḅụụ siinm, tẹ Jekọbụ sọ ori oyi maa awọmẹ finji ma, tomi ẹrẹ naa tẹ apụ ma sọ, tarị-ḅụụ siinm.”

⁹ “Jekọbụ owiapụ-awọmẹ nwẹnị afana tẹmẹ nyana Josẹfụ pịrị, tẹ ọ̀ kẹ dẹrị, tẹ ori Ijiputi ḅụ omoni sọ. Kụma Tamụnọ na ori na simem

¹⁰ tẹ ori ḅụụ-fụka mamgba ḅio ọ̀ pakama ḅo famam. Tẹ Josẹfụ mu Ijiputi ḅẹ amadaḅọ, Fero, tọrọkọ la sakị, Tamụnọ nwẹnị nimi na ḅụụ-ḅẹlẹma iḅi ḍumo na kẹ ọ̀ pịrị, tẹ Fero nwẹnị Josẹfụ kẹ ama mẹ na, ọ̀ warị-kpo na ḍikiḍiki ọ̀ pịrị ḅọ na mịẹ.

¹¹ Anịtẹso ḅuru-ḅa ḅo bebe Ijiputi mẹ na Kenanị na gbaịn tẹ, kpọma tomi kẹ tọrụsiẹrịmam. Wamịna atẹngịapụ ma fị-fị gberie-sọ ini ẹrị-a,

¹² tẹ Jekọbụ ḅo Ijiputi ḅụ fịye emi naa tẹso, ọ̀ nwẹnị ori owiapụ-awọmẹ, anie wamịna atẹngịapụ ma, kẹ fịrịma. Anie ịna aḅụọ tarị Ijiputi la.

¹³ Ịn maaịn karama mu ogbo ḅụ Josẹfụ nwẹnị ḅụụ pakama ori owiapụ-amịnapụ ma pịrị, tẹ Fero sọ ḅo Josẹfụ furo-ḅẹ-apụ nimim.

¹⁴ Mie ḅụ Josẹfụ nwẹnị oku kẹ ọ̀ ḍa Jekọbụ fịrịma, mịnẹ ori na bebe warị-kpo mẹ na Ijiputi ḅoo, tẹ ini sọnọ apụ ofori kịnị inia si la apụ mamgba nwẹnị saakị Ijiputi mu.

¹⁵ Anịtẹso Jekọbụ nwẹnị mu Ijiputi la, tẹ anịanga mie ori na ori owiapụ-awọmẹ ma na sime tẹ fịị ye.

¹⁶ Sẹkẹmụ ḅụ, Ebira-amụ Hamọ furo-ḅẹ-apụ ḅara igbigi kẹ fẹẹ ḍuḅu mẹ ḅio mie inimgba ḍiḅi ye.”

¹⁷ “Tamụnọ ò minini Ebira-amụ pịrị ye mẹ mịẹ ḅẹ sakị mẹ ḅo kpeki sakị wamịna atomi kịẹn-ḅịḅị Ijiputi ḅụ ḍụḅa lama tẹ.

¹⁸ Kunoma ḅụ Josẹfụ gbolomaye nimi-a amadaḅọ saakị Ijiputi dam.

¹⁹ Ori oḅori kẹ wamịna atẹngịapụ ma sịn, tẹ pịkị kụrọ-kụrọ ḅara kẹ ini na mịẹm. Ọ̀ pịkị kụrọ ḅara kẹ ịna ndo-kụma-a awọmẹ pakamam ịna warị ḅụ, ịn fịị ḅẹ ḅara.

²⁰ Mị sakị mẹ ḅụ mie in Mozizi iyi ye, iḅi-fịtẹ tụḅọ! Tẹra akalụ ò iyingi nwẹn kẹ warị ḅio ò ḍikiḍikim,

²¹ tẹ ini ọ̀ warị ḅụ ọ̀ pakama tẹso, Fero ada nwẹnị ori ọkị á tụḅọ sọma ḍikiḍiki.

²² Ijiputi ḅẹ nimi tẹ ịn kẹ ò toluma kọnma ye ofori. Ori ẹkwẹn na ori amịẹaị na ḅụ ori pịkị opu tomḅọọ.”

²³ “Kụra amesi Mozizi sịḅị ḅọrọ tẹso, ọ̀ tọn-pẹlẹm mịnẹ ọ̀ ḍọkị-nimi ḅa ịn tọ-ḅara kẹ ori amịnapụ Izirẹlịapụ ma mịẹarị ḅoto.

²⁴ Ọ̀ nwẹnị ini ḅẹ gbọrụḅọ ẹrị Ijiputi-ḅẹ-ḅọ si ḅara kẹ ori na mịẹarị, mie ḅụ Mozizi mu ḅarasụa ọ̀ pịrịarị ogbo nwẹnị Ijiputi-ḅẹ-ḅọ ḅe fomu ḅaa.

²⁵ (Ọ̀ sịịnm ori ama ḅẹ apụ ma nimi ḅarị ḅoto, mịnẹ Tamụnọ ọ̀ kẹ omoni ḅara-ḅio ịn pakama-ḅo ḅẹ ḅara, kụma in lekiri-a.)

²⁶ Anị ḅẹ ene-ḅaa ḅụ ọ̀ nwẹnị Izirẹlị ḅẹ maa apụ ẹrị ini owu sọarị, tẹ ọ̀ ḅụụkụrọma tẹ ịn kọrị deinma ḅẹ ḍọkịm. Ori mẹẹ, ‘Owiapụ, sisi ó pokii: ọmịnị maa apụ ma kọkọ Izirẹlịapụ; ọ́ ḅọrọ tiegotẹ mị ḅara kẹ owu sọarị?’

²⁷ Kụma ini maa apụ ma ḅụ si ḅara kẹ osi ḅọ na mịẹ sime ḅọ ḅe nwẹnị Mozizi sukuruma ḅelema tẹ ḅẹẹ: ‘Tụḅọ ị́ kẹ ḅẹrẹtọnḅọ na ḅẹrẹkọnḅọ na sọma wa pịrị?

²⁸ Í ḅiiarị ḅịẹịn ị́ ị́ kẹ anị Ijiputi-ḅẹ-ḅọ ḅe ḅaa ḅara kẹ yẹrị sọ ḅaa?’

²⁹ Mozizi miemẹ naa tẹso, ori Ijiputi koroma mangị mu Midiyanị ama ḅụ angam. Anịanga ọ̀ maa owiapụ-awọmẹ iyim.”

³⁰ “Mozizi anịanga kụra amesi sime tẹso, enjẹlịḅọ kọrịarị piri-ḅio ḅụ ḅụụ pakama ò ḍiem, Sayịnayị tụndụ kpeki ịkpa mẹ ḅio ḅụ.

³¹ Mozizi ẹrị ye mẹ ọ̀ ḅụụ-buama tẹ ọ̀ nwẹnị kpeki tẹ iḅiọkụ piri mẹ ḍiki ḅẹ mu. Kụma KỊNỊNYANAḄỌ ḅe pọkọ rẹ mie ọ̀ naa ye:

³² ‘Yẹrị anie í atẹngịapụ ma sịḅị-tuu pịrị Tamụnọ ḅee; Ebira-amụ na Ayịzịkị na pịkị Jekọbụ na sịḅị-tuu pịrị Tamụnọ ḅee.’ Mozizi oju nwẹnị sẹkị, ḅalafa ḅụ, tẹ ọ̀ ḅarị ḅiokpọ tẹ kọrị-fịnị mẹ ḍiki-a.

³³ KỊNỊNYANAḄỌ ḅe nwẹnị ọ̀ ḅẹẹ: ‘Ị́ ḅụọ ḅẹ okuro ma siin, ị́ fịafịa kiri ḅụ sịẹ wararị.

³⁴ Ị̀ atomi ma Ijiputi ḅụ ẹrịarị opu tọrụsiẹrị mẹ arị ẹrị tẹ. Ịn kọn-arị iningi mẹ sọ ì ḅeri la tẹ, mịọkụ à koro ḅo ịn pakama-ḅo ḅẹ tẹ omoni ḅara-ḅio. Ḅoo mịọkụ; arị ị́ kẹ Ijiputi fịrịma ḅa.’ ”

³⁵ “Mozizi anie Izirẹlị awọmẹ ma sịkị ḅọ ḅee. In gbelam. ‘Tụḅọ ị́ kẹ ḅẹrẹtọnḅọ na ḅẹrẹkọnḅọ na sọma wa pịrị?’ Ori anie Tamụnọ kẹ fịrịma ḅọ, mịnẹ ò mu ḅẹrẹtọn tomi ma pịrị, tẹ omoni ḅara-ḅio ịn pakama ḅo, kọrịarị piri ḅụ amịna ḅụụ pakama ò ḍie enjẹlịḅọ ḅe ḅarasụa ḅụ.

³⁶ Ò tomi ma tọrọkọ-sụn tẹ Ijiputi ḅụ Izirẹlị awọmẹ ma pakama-ḅom, ḅụụ-buama-aị na ḅụụ-gbiripuma aị na mịẹ ḅụ, anie Ijiputi na Awụ Tọrụ mẹ ḅụ na, pịkị ịkpa mẹ ḅio ḅụ sọ, kụra amesi na gbasị ye ḅụ.

³⁷ Mozizi anie Izirẹlị ḅẹ awọmẹ ma ḅẹẹ ḅọ ḅe, ‘Tamụnọ ịkịankoroḅọ kẹ ọ́ fịrịma ḅa, ọ̀ wẹrịtẹ ị̀ kẹ fịrịma ḅara, tẹ ọmịna ḅụ ḅẹ ḅọ mie ọ̀ kẹ fịrịma ḅarịye.’

³⁸ Ori anie Izirẹlị ḅẹ awọmẹ ma kobiri-ogbo mẹ na sime ḅọ ḅe ịkpa mẹ ḅio ḅụ; ori anie wamịna atẹngịapụ ma na enjẹlị ḅe na sime ḅọ ḅe, anie Sayịnayị Tụndụ ọgọnọ ẹkwẹn ọ̀ pịrị enjẹlị ḅe, tẹ ori anie pịkị Tamụnọ ḅịḅị paka-ḅo ḍumo wararị oku mẹ daḅọrọma wa pịrị ḅọ ḅee.”

³⁹ “Kụma wamịna atẹngịapụ ma Mozizi ḅịḅị poki ḍụkụ-a; ini ò sukuruma anga pịrị tẹ ḅiim ịn pịkịma so Ijiputi mu.

⁴⁰ Mie ḅụ ịn nwẹnị mu Erọnị ḅẹẹ, ‘Sisi oru-atamụnọ tẹmẹ wa pịrị ịn wamịna tọrọkọ-sụn, Ijiputi ḅụ wa pakama-ḅo, Mozizi ḅe ọ̀ la tẹ ye wa nimi-a.’ ”

⁴¹ Anị sakị ḅụ mie ịn nambulo kịka oru tẹmẹ tẹ agba mịẹ anị pịrị, tẹ alalị fị tẹ kụn kẹ ini ḅarana tẹmẹ ye mẹ pịrị ye.

⁴² Mie ḅụ Tamụnọ nwẹnị in ḍiki-tọrụsin, tẹ ịn nwẹnị So-tọrụ ḅẹ alolia ma tẹkẹ, anie ịkịankoroapụ ma ḍiri ḅio anị kẹẹ ḅara: Izirẹlị ḅẹ awọmẹ, ọ́ kụra amesi kẹ ịkpa mẹ ḅio sime sakị, ọ́ nama ḅaa tẹ mịẹ agba mẹ, ọ́ mịẹ ị̀ pịrị-a.

⁴³ Molẹkị, ọmịna oru ḅe akpụrụ-warị mie ó dogi yee, na Rẹfani, ọmịna lolia oru ḅe fụḅara mẹ na, mịna oru ma mie ọ́ tẹkẹ ḅẹ tẹ tẹmẹ ye. Ọkọẹrẹsị arị ọ́ kẹ Babịlọnị ama ḅọrọ mu koroma omoni sọma ḅa.

⁴⁴ “Tamụnọ na wamịna atẹngịapụ ma na emi ye mẹ ḍie-pakama Akpụrụ-warị mẹ mie ini na sime ye ịkpa mẹ ḅio. Tamụnọ ḍuko Mozizi pịrị ḅara mie ịn pịkị kẹ anị nama ḅara, ọ̀ kẹ Mozizi ḍie gbọrụ ḅara mẹ.

⁴⁵ Sakị ḅọrọ tẹso, wamịna atẹngịapụ ma ịna aḍapụ ḅara akpụrụ-warị mẹ daa-ọkịm, tẹ anị dogi tẹ Jọsụwa na mẹnjị mu Tamụnọ dee-siin apụ ma ama ma ọkị ịna nye sọmam. Anịanga anị sime nwenii mu Devidi ḅụọ lam.

⁴⁶ Tamụnọ ọ̀ ḅẹlẹmam, tẹ ọ̀ nwẹnị Tamụnọ ḅara ḅii mịnẹ ò minini ọ̀ pịrị tẹ ọ̀ warị nama Jekọbụ Tamụnọ ḅẹ pịrị.

⁴⁷ Kụma Sọlọmọnị mie warị nama Tamụnọ pịrị ye.”

⁴⁸ Kụma Geletẹịn Tamụnọ ḅe ò tomi nama warị ḅio anga, anga-a; anie ịkịankoroḅọ ḅe ḍuko ḅara,

⁴⁹ KỊNỊNYANAḄỌ ḅe ḅẹẹm, so mẹ anie ì emine, kiri mẹ mie à kẹ ḅụọ gbanamarị ịkasiye. Ọ́ tọ-ḅara sime warị nama ị̀ pịrị ḅẹ? Yẹrị sọ tẹ anga ḅẹ anga tọ-anga?

⁵⁰ Ma mamgba yẹrị arị tẹmẹ-a?

⁵¹ Sitivini paa ẹkwẹn ma mu tẹ ḅẹẹm, “Ọmịnị kpọma sịḅịḅio kụrọtẹ atomii! Ọmịna aḅioḅẹngbọ ma oru nimi apụ aḅioḅẹngbọ sime-ḅara simem, anie mịẹ ẹrẹsị ó ḅeri-iningima Tamụnọ oku mẹ pịrịm. Ọmịna atẹngịapụ ma sime gbọrụ ḅara mẹ mie ọmịnị sọ simearị ḅara. Sakị mamgba ọmịnị sọ Fịafịa Tẹmẹ ḅe dasịẹma tẹ!

⁵² Ịkịankoroapụ ma ḅụ ọmịna atẹngịapụ ḅaa-ḅọkọ kẹ ḍọkị-a ḅọ emi? Tamụnọ oku-mẹnjịapụ ma tẹ iḅere-iḅerea kụra-ḅio ọ̀ karakara mịẹ Fịrịmẹnjịḅọ ḅe ḅo ḅa ḅẹ ye ḍuko apụ mamgba ịn ḅaa sin famam. Tẹ mịọkụ ọ́ kọkọ ọ̀ kẹ dẹrịma tẹ ọ̀ ḅaa tẹ.

⁵³ Ọmịnị anie enjẹlị apụ Tamụnọ ḅara da ḅo oloko mẹ ḅara ḅio sọ apụ, kụma ọmịnị anị ḍuko ḅara mịẹ-a!”

Ịn Ḍụḅarị Kẹ Sitivini Gbin Ḅaam

⁵⁴ Sịẹ-Kobiri mẹ ḅẹ apụ ma Sitivini poki sakị, ori ẹkwẹn mẹ kpọma ini ịganịma lamam, tẹ ịn nwẹnị aka-fanga ọ̀ pịrị.

⁵⁵ Kụma Fịafịa Tẹmẹ ḅe Sitivini ḅụụ ḅio ḅin ḅara ḅụ ọ̀ nwẹnị tọrụ saakị so ḍiki tẹ Tamụnọ ebube ẹrị; ọ̀ pịkị Jizọsị ẹrịm ọ̀ Tamụnọ ama-ḅara anga sịẹ wararị.

⁵⁶ Ọ̀ nwẹnị ḅẹẹ: “Ḍikii, arị ẹrịarị, so mẹ finji tẹ anị ḅio Jizọsị, Tomḅọ Tụḅọ ḅe, Tamụnọ ama-ḅara anga sịẹ wararị!”

⁵⁷ Sịẹ-Kobiri mẹ ḅẹ apụ ma nwẹnị oloku pakama tẹ ḅara kẹ ịna aḅeri gbaịn. Anịtẹso, gbọrụ ḅụ ḅụ, inimgba anị-gbọrụ-kirikiri mangị mu ọ̀ lam,

⁵⁸ tẹ ama mẹ ḅio ò sukuruma pakama tẹ ḍụḅarị kẹ ò gbin. Kiri ḅụ sime apụ ma nwẹnị ịna akapa kẹ mu Sọlụ nwẹn-sịn gbọrụ asatụḅọ ḅara sụa.

⁵⁹ Ini ḍụḅarị tan, tan ò gbin-arị sakị Sitivini KỊNỊNYANAḄỌ ḅe sịn olokuarị, “KỊNỊNYANAḄỌ Jizọsị, ị̀ tẹmẹ ọkịị!”

⁶⁰ Ọ̀ nwẹnị kparakị tẹ kụrọma oloku, “KỊNỊNYANAḄỌ! Mị si mẹ kẹ ịn gbẹẹ ma.” Ò miemẹ ḅẹẹ tẹ nwẹnị fịị. Tẹ ini ọ̀ ḅaa ye mẹ ḅụ Sọlụ ḅịḅị sọ sọm.