Fịrịmẹnjịapụ 5 - FỊAFỊA BAỊBỤLỤ

Ananayasị Na Safayịra Na Ḅụụ Paka Ye

¹ Anị sakị mẹ ḅụ Ananayasị nwẹn-sịn gbọrụ owiḅọ na ọ̀ ta Safayịra na sọ ịn nyana ye dẹrịm.

² Kụma ọ̀ ta na ori na ḅịḅị-kẹ-ogbosọ ḅụ ọ̀ nwẹnị igbigi mẹ ḅẹ pakịrị kẹ ọ̀ ḅụụ wẹrịma, tẹ kirikọn-ye kẹ mu fịrịmẹnjịapụ ma pịrị.

³ Pita nwẹnị ọ̀ ḅẹẹ, “Ananayasị, í tiegotẹ ḍụkụ Ekwesu pịrị tẹ ori í ḅioḅẹngbọ sọ tẹ ị́ mịẹtẹ í iruo Fịafịa Tẹmẹ ḅe pịrịarị, ị́ ḅara la kiri igbigi mẹ ḅẹ pakịrị kẹ wẹrị ḅụ?

⁴ Ye mẹ amụ dẹrị-a sakị anị í nye ḅara mie anị ḅụ ị́ dẹrị ḅo igbigi mẹ sọ í nye ḅara. Í tiegotẹ nwẹn sime ye tọn-pẹlẹ tẹ mịẹ? Í iruo tomi pịrị-a, Tamụnọ mie í iruo pịrị yee!”

⁵ Ananayasị miemẹ naa gbọrụ sakị mie ò fuku-koro tẹ fịị ye. Anị gbolomaye naa apụ mamgba kpọma ḅalafaam.

⁶ Tẹ anịanga sime asawọ ma sọ ḅo tẹ ọ̀ ḍụẹịn mẹ tẹlẹma tẹ dogi-mu ḍiḅim.

⁷ Sakị kẹlẹ ḅọrọ tẹso, ọ̀ ta paka tẹ ye mẹ nimi-a ḅara kẹ ḅo warị mẹ sọm.

⁸ Pita nwẹnị á gbela, “Ḍuko ị̀ pịrị, mị igbigi mẹ mie bebe í di na ị́ na kẹ ọmịna kiri mẹ dẹrị ye?” Á nwẹnị pakịrị, “Inn, anie anịmgba.”

⁹ Mie ḅụ Pita nwẹnị á ḅẹẹ, “Ndẹẹ í di na ị́ na tọn-pẹlẹ tẹ KỊNỊNYANAḄỌ ḅe Tẹmẹ ḅe daaḍiki ḅẹ ḅo ḅara? Í di ḍiḅi apụ ma ịn ḅọkọ anga emi mịọkụ, tẹ ini sọ dogi paka ḅa!”

¹⁰ Anị gbọrụ sakị ḅụ á nwẹnị ọ̀ ḅụọ-suku fuku-koro tẹ fịị. Tẹ asawọ ma nwẹnị sọ ḅo tẹ á fịtẹ ye mẹ ẹrị tẹ á dogi paka mu á di akaka ḍiḅi.

¹¹ Anị nwẹnị opu ḅalafa kẹ bebe sọsị mẹ na, ja apụ tẹ anị naa apụ, naa apụ na ḅụụ suu.

Ḅụụ-buama-aị Na Ḅụụ-gbiripuma Aị Na

¹² Fịrịmẹnjịapụ ma tọnwa ḅụụ-buama-aị na, ḅụụ-gbiripuma aị na mịẹm tomi ma ogboku. Tẹ Jizọsị minini apụ mamgba nwẹnị Sọlọmọnị Sịḅị-kikima-anga nwẹn-sịn anga mẹ ḅụ kobiri.

¹³ Karakaraye tomi ma iḅiọkụ in ḍiki gelemam ḅẹ sọ, sikima gbọrụḅọ-sọ ḅiokpọ tẹ ḅarana mu ịna ḅụụ sọ-a.

¹⁴ Kụma KỊNỊNYANAḄỌ ḅe minini tọnwa owiapụ na, ereme na, ḅo, ḅo ịna ogbo mẹ sọm.

¹⁵ Fịrịmẹnjịapụ ma kọrịnama mẹ lolo ḅara gotẹ kịnị obiapụ dogi-dogi-mu etela anga iḅila na akpalị na ọgọnọ koromam, Pita mẹnjị ḅọrọ ḅẹ sakị ọ̀ tẹmẹ kịngẹ sọ paa ịn sarama tẹ ịn gwọ ḅẹ ḅara.

¹⁶ Tẹ tọnwa atomi, ogbo, ogbo ḅụ, Jeruselemu ikelema-koro wararị ama ma ḅụ sime tẹ obiapụ anịanịa si-atẹmẹ ḅụụ ḅio sime apụ na kẹ ḅom, tẹ inimgba gwọm.

Ịn Ḅaa-ḅọkọ Kẹ Fịrịmẹnjịapụ Ma Ḍọkịm

¹⁷ Anịtẹso, Sịḅịda-Agbamịẹḅọ ḅe na ọ̀ jụ ḅẹ apụ mamgba, anie Sadusii ḅẹ apụ, tẹ anịanga sime apụ ma na, nwẹnị kpọma afana tẹmẹ nyana fịrịmẹnjịapụ ma pịrị; mie ḅụ ịn nwẹnị ịn kẹ ịn mịẹ ḅẹ ye tọn-pẹlẹ.

¹⁸ Ịn fịrịmẹnjịapụ ma kun ama ikoli-warị ḅio suum.

¹⁹ Kụma anị ḍin mẹ ḅụ KỊNỊNYANAḄỌ ḅe enjẹlị mu ikoli-warị mẹ ḅẹ ogigo-aḅọkọ ma finji tẹ fịrịmẹnjịapụ ma kẹ mẹnjị paka tẹ ịn ḅẹẹm,

²⁰ “Ó mu Tamụnọ-warị mẹ ḅio sịẹ tẹ mị ịwọ ḍumo mẹ gbolomaye mamgba ḍuko tomi ma pịrịị.”

²¹ Fịrịmẹnjịapụ ma nwẹnị ọ̀ ḅịḅị poki, tẹ ene finji tẹso, ịn nwẹnị Tamụnọ-warị mẹ mu tẹ saakị ye toluma. Sịḅịda-Agbamịẹḅọ ḅe na ọ̀ jụ ḅẹ apụ ma na nwẹnị Juu-ḅẹ omongiapụ mamgba sịn kobiri, tẹ ini na ḅintẹ Sịẹ-Kobiri nyana, tẹ fịrịma mịnẹ in mu ikoli-warị mẹ ḅio fịrịmẹnjịapụ ma ọkị tẹ ịn kẹ ịna tọrọkọ ḅoo.

²² Kụma fịrị mẹ mu apụ ma mu la sakị ịn ḅarị ikoli-warị mẹ ḅio fịrịmẹnjịapụ ma ẹrị-a. Mie ḅụ ịn nwẹnị pịkịma Sịẹ-Kobiri mẹ mu, tẹ ḍuko ịn pịrị,

²³ “Wa mu la sakị ikoli-warị mẹ ini anị ịkasị kụrọma wararị, ḅọkọ ḍikiḍikiapụ ma sọ sime tẹ koruarị, kụma wa ogigo-aḅọkọ ma finji sakị gbọrụḅọ-sọ wa ẹrị-a anị ḅio ḅụ!”

²⁴ Agbamịẹapụ ma na, Tamụnọ-warị mẹ ḍikiḍikiarị apụ ma sịḅịdaḅọ ḅe na miemẹ naa sakị, ịna aḅụụ-gbiripum, tiye ḅọrọ fịrịmẹnjịapụ ma ḅụ paka tẹ ḅoto.

²⁵ Anịtẹso gbọrụḅọ sọ-ḅo tẹ ịn ḅẹẹm, “Ó pokii! Ó kun ikoli suu apụ ma ịn Tamụnọ-warị mẹ ḅio ye kẹ tomi ma tolumarị!”

²⁶ Mie ḅụ Tamụnọ-warị mẹ ḍikiḍikiarị apụ ma sịḅịdaḅọ ḅe nwẹnị ori atomi na mu dein ḅara kẹ fịrịmẹnjịapụ ma ọkị-ḅo, ịn ḅalafaam ịn kụrọ-ḅara kẹ ini na mịẹ kụma tomi ma ḅofa ḍụḅarị kẹ in gbin.

²⁷ Ịn fịrịmẹnjịapụ ma kẹ Sịẹ-Kobiri mẹ tọrọkọ ḅo sịẹma tẹso, Sịḅịda-Agbamịẹḅọ ḅe nwẹnị ye kẹ in gbela.

²⁸ Ori mẹẹ, “Wamịnị oloko sụa ọ́ pịrịm mịnẹ ọ́ ḅarị jen kẹ ḅị tomḅọ ḅe ẹrẹ kẹ ye toluma ma ḅẹ kụma, mịọkụ ọ́ mịẹ ye ḍikii! Ọmịnị ọmịna tolumaye mẹ kẹ bebe Jeruselemu mẹ kana-koro tẹ, pịkị ọ̀ fịị mẹ kẹ wamịna sịḅị sẹịn ḅẹ-ḅiiarị!”

²⁹ Pita na osi afịrịmẹnjịapụ ma na nwẹnị pakịrị: Tamụnọ ḅịḅị sikima tẹ wa tomina ḅịḅị poki ḅịa.

³⁰ Wamịna atẹngịapụ ma Tamụnọ ḅe, fịị ḅụ Jizọsị saakịmam, ọmịnị ọ̀ kẹ ẹngbẹsẹ-sịn ḅụ ḅakụ ḅaa tẹso.

³¹ Tamụnọ ori iwoma mu amịna ama-ḅara anga lamam, Sịḅịdaḅọ na Ḅọrọmaḅọ na ḅara ḅụ, tẹ nwẹnị kiri kẹ Izirẹlịapụ pịrị ịn kẹ si ḅụ pịkị tẹ Tamụnọ ịna asi wẹrịso ịn pịrị.

³² Wamịnị na Fịafịa Tẹmẹ ḅe, tẹ Tamụnọ kẹ ọ̀ ḅịḅị pokiarị apụ pịrị, pịrị ḍiepịrịye ḅe na mie mịna aị ma ḅụ ḅẹ ḅẹrẹ-kiri sime apụ.

³³ Sịẹ-Kobiri mẹ miemẹ naa sakị, anị ini ịganịma la ḅara ḅụ, ịn fịrịmẹnjịapụ ma ḅaa ḅẹ ḍọkịm.

³⁴ Kụma ịna ḅụ ḅẹ gbọrụḅọ, tẹ Farịsiiḅọ, ori ẹrẹ Gamalịyẹlị, ori ḅe oloko tolumaḅọọ, tẹ tomi mamgba pịkị ọ̀ kụn lamarị, nwẹnị Sịẹ-Kobiri mẹ ḅụ saakị sịẹ. Ọ̀ tọnm mịnẹ ịn fịrịmẹnjịapụ ma pakamaa.

³⁵ Tẹ ọ̀ nwẹnị ẹkwẹn Sịẹ-Kobiri mẹ pịrị, “Ị̀ ama, Izirẹlị, ọ́ kẹ mịna atomi ma mịẹ ḅẹ ye, mịẹ ḅẹ ye, ọmịnị ẹbị nyana-a.

³⁶ Ọ́ kẹ ḅiokoromaa, ḅọrọtẹ gbọrụ sakị ḅụ ịn kẹ Tihudasị nwẹn-sịn ḅọ paka-ḅom, tẹ ḅẹẹm ori gbeke opu tomḅọ ḅẹẹ sakị, kịnị ẹndẹ pembe ye ọ̀ ḅụụ sọm. Kụma ini ọ̀ ḅaa tẹso, ò ḍukamẹnjịapụ mamgba gala-gala famam, tẹ ọ̀ mẹnjị mẹ sọ fịị som.

³⁷ Anịtẹso, kịnị kịẹn sakị mẹ ḅụ, Galili ḅẹ Judasị sịḅị tolumam; ori sọ tomi nyana lamam, kụma ini ọ̀ ḅaa gbọrụ sakị ò ḍukamẹnjịapụ mamgba gala-gala famam.

³⁸ Ọkọẹrẹsị mịọkụ wamịna tọrọkọ nwẹn simearị ḅẹrẹ mẹ ḅụ, à ḍuko ọ́ pịrịarị, ó gberie-sọ kẹ mịna tomi ma mịẹ ma. Ọmịnị ịn wẹrịsoo! À gotẹ ọkọ ḅẹẹarị, ịn nwẹn tọn tẹ mịẹ tẹ ye mẹ tomina ḅara ḅom ḅẹḅẹ anị ḅọrọ-so ḅa.

³⁹ Kụma anị Tamụnọ ḅara ḅom ḅẹḅẹ ọmịnị inetẹ ịn nẹngịma ḅịa. Kụma anị ḅẹ kunoma ọmịnị ẹrị ḅa Tamụnọ mie ọmịnị owu mẹ kẹ pakarị ḅọ!” Sịẹ-Kobiri mẹ nwẹnị Gamalịyẹlị ḍuko ḅara ọkị.

⁴⁰ Ịn nwẹnị fịrịmẹnjịapụ ma sịn warị suu tẹ in fomu, tẹ oloko sụa ịn pịrị mịnẹ ịn ḅarị jen kẹ Jizọsị ẹrẹ go ma; tẹ ịn nwẹnị ịna ḅụ ḅara-siin.

⁴¹ Fịrịmẹnjịapụ ma Sịẹ-Kobiri mẹ koroma-so tẹso ịn nwẹnị ḅioḅẹlẹ, mịnẹ Tamụnọ ịn kẹ Jizọsị sịḅị gotẹ tọrụsiẹrị na ḅụụ-jịrịma aị na da gbẹẹ apụ ḅara ọkị tẹ.

⁴² Tẹ ene gbarị-a ḅara Tamụnọ-warị mẹ ḅio na anga warị ḅio na ḅụ ịn paa ye toluma tẹ pịkị Jizọsị, Mẹsaya ḅe, Iḅi Oku mẹ gbolomaye ḍukom.