Fịrịmẹnjịapụ 3 - FỊAFỊA BAỊBỤLỤ

Pita Ekeliḅọ Gwọm

¹ Gbọrụ ene ḅụ,, tẹra so ḅẹ tẹkẹ kọn, kọn sakị ḅụ, Pita na Jọnị na Tamụnọ-warị mẹ ḅio tẹkẹ ḅẹ mum.

² Tẹ anịanga, ịn kẹ “Iḅi Ogigo-ḅọkọ” sịn ḅọkọ mẹ akaka iyi kụra-ḅio amụ mẹnjị-a gbọrụḅọ ịn nwẹn dogi-mu koroma wararị. Ene-ḅaaene-ḅaaene ini ò dogi-mu anịanga koroma tẹ ọ̀ ḅọrọ Tamụnọ-warị mẹ ḅio sọ muarị apụ ḅara igbigi ḅii, ḅiim.

³ Pita na Jọnị na sọ-muarị tẹ ori ini ẹrị tẹso, ọ̀ nwẹnị ịna ḅara ye ḅii.

⁴ Ịn nwẹnị da-da tomḅọ ḅe ḍiki tẹ, Pita nwẹnị ḅẹẹ, “Wa ḍikii!”

⁵ Mie ḅụ tomḅọ ḅe nwẹnị ye gbọrsịḅị ọ̀ ḅara la ḅẹ tẹ ḅara kẹ ḅiotọn tẹ in ḍiki.

⁶ Kụma Pita ọ̀ ḅẹẹm, “Gbọrụ igbigi sọ à nyana-a, kụma à nyana ye mie à kẹ ị́ pịrị ḅarịye. Nazarẹtị ḅẹ Jizọsị Kịrayịsị ḅe ẹrẹ ḅụ, yẹrị ị́ ḅẹẹarị, saakị mẹnjịị.”

⁷ Anịtẹso ọ̀ nwẹnị tomḅọ ḅe ama-ḅara ọlọ tẹ ḅarasụa ọ̀ pịrị tẹ ọ̀ saakị sịẹ. Anị gbọrụ sakị ḅụ tomḅọ ḅe aḅụọ na ḅụọ-ịkarị ma na nwẹnị kụrọ.

⁸ Ọ̀ nwẹnị ḍosi gele tẹ ori ama ḅụọ ma kẹ sịẹ tẹ saakị mẹnjị ma ḅọrọ. Anịtẹso ọ̀ nwẹnị ini na mẹnjị Tamụnọ-warị mẹ ḅio sọ-mu, ọ̀ mẹnjịarị, ò ḍosiarị, pịkị Tamụnọ tokiniarị.

⁹ Anịanga sime atomi ma ọ̀ mẹnjị-mẹnjị tẹ Tamụnọ tokiniarị ḅara mẹ kẹ ori ẹrịm.

¹⁰ Tẹ in ḅo lekiri tẹ mịnẹ Tamụnọ-warị mẹ ḅẹ “Iḅi Ogigo-ḅọkọ” mẹ ḅụ sime tẹ ye ḅii, ḅii ḅọ ḅe ḅẹ sakị, paka ye mẹ nwẹnị ịna ḅụụ-buama, gbala mịẹ mịẹ-a ye ọkụ.

Tamụnọ-warị Mẹ Ḅio Pita Kọn Tamụnọ Ẹkwẹn

¹¹ Tomḅọ ḅe kẹ Pita na Jọnị na ḅụ so ḍụkụ-a ḅara mẹ nwẹnị tomi ma ḅụụ-buama, tẹ ịn nwẹnị mangị ịn dama-mu, ini ịn kẹ “Sọlọmọnị Sịḅị kikima Anga” nwẹn-sịn anga mẹ ḅụ, simearị ogbo.

¹² Pita ọkọ kẹ tomi ma ẹrị tẹso, ọ̀ nwẹnị ịn ḅẹẹ, “Ì pembema Izirẹlịapụ, pakaye mẹ tiegotẹ ọmịna ḅụụ mịẹ mịẹ-a ye sọarị, tẹ ọ́ nwẹn kẹ bio-bioma wa ḍikiarị? Ọ́ sịn-arị wamịna kụrọ anịanịa wa kẹ Tamụnọ nimi la ḅara mie wa kẹ ḅị tomḅọ ḅe mịẹtẹ ọ̀ mẹnjị ye?

¹³ Ebira-amụ na Ayịzịkị na pịkị Jekọbụ na sịḅị-tuu pịrị Tamụnọ ḅe, anie wamịna atẹngịapụ ma sịḅị-tuu pịrị Tamụnọ ḅe anie ebube kẹ ọ̀ Fịrịmẹnjịḅọ Jizọsị pịrị yee. Kụma ọmịnị ọ̀ saakị kụrọ-ḅara ḅụ simearị apụ ma pịrị, tẹ Payịleti tọrọkọ ọ̀ sịkịm, ori ḅioju sọ tọn-pẹlẹ tẹ ori ọ̀ ḅụụ ḅara-siin tẹ ò so ḅa.

¹⁴ Ori ḅe fịafịa na iḅi na ḅọọ, kụma ọmịnị ọ̀ sịkịtẹ Payịleti ḅara kịnị-ḅaḅọ rẹ ḅiim, mịnẹ ori ọ̀ ḅụụ ḅara-siin ọ́ pịrị tẹ ò mu ọ̀ mịẹarị aị ma mịẹ ma-mu.

¹⁵ Ọ́ nwẹnị ḍumo pịrị ḅọ ḅe rẹ ḅaa, kụma wamịnị-mgba kiri yọ sime tẹ ẹrị ḅara ḅụ, Tamụnọ fịị ḅụ ọ̀ saakịmam.

¹⁶ Ori ẹrẹ mẹ ḅẹ kụrọ mẹ mie ịnyọ kẹ ḅị ekeliḅọ ḅe pịrị ye. Ọmịnị ẹrị tẹ nimi tẹ ye mẹ, ori ẹrẹ ḅụ minini nyana ḅụ anị mịẹm; Jizọsị ḅụụ minini nyana mie mịẹtẹ ori oju iḅi ye, ọmịnị-mgba inetẹ ẹrịarị ḅara ḅụ.

¹⁷ “Tẹ mịọkụ, ị̀ amịnapụ, à nimim, mịnẹ ọmịnị na ọmịna sịḅịdapụ ma na kẹ Jizọsị mịẹ ye mẹ, nimi-a ḅụ ọ́ mịẹm.

¹⁸ Iḅere-iḅerea kụra-ḅio Tamụnọ ịkịankoroapụ ma ḅụụ ḅọrọ tẹ ḍukom mịnẹ ọ̀ Mẹsaya ḅe tọrụsiẹrị ḅa, tẹ ọ̀ mịẹtẹ anị mị-ḅara paka tẹ.

¹⁹ Ọkọẹrẹsị ọmịnị ọmịna asi ḅụ ḅara-siin, tẹ pịkị Tamụnọ daa, tẹ ori ọmịna asi wẹrịso ọ́ pịrị ḅarị ḅara. Ọmịnị ọkọ mịẹ-mịẹ,

²⁰ tẹmẹ ḅụ ḅẹ ịnyọ nyana sakị ḅo ḅa, KỊNỊNYANAḄỌ ḅe ḅara ḅụ, tẹ ọ̀ pịkị Jizọsị kẹ fịrịma ḅa, anie Mẹsaya ḅe tẹ ọ̀ sẹlẹ wẹrị ọ́ pịrị ḅọ ḅe.

²¹ Tamụnọ fịafịa ịkịankoroapụ ma, ala lamatẹ sakị ḅụ ḍumo-sime apụ ma, Anịngẹ-kụraḅio ḍuko wasama ḅara ḅụ, ò So-ḅio sime nwenii Tamụnọ ye goyegoye mịẹ ịwọma ḅẹ sakị la ḅa.

²² Mozizi kọkọ ḅẹẹ, ‘KỊNỊNYANAḄỌ, ọmịna Tamụnọ ḅe ịkịankoroḅọ kẹ ọ́ fịrịma ḅa, ori ị̀ kẹ fịrịma ḅara, tẹ pịkị ọmịna ḅụụ ḅẹ ḅọọ. Ó ḍuko ḅara, ḍuko ḅara ọmịnị ọkọ ḍiki mịẹ.

²³ Anị ịkịankoroḅọ ḅe ḍuko ḅara mịẹ-a ḅọ, mịẹ-a ḅọ, Tamụnọ atomi ma ḅụ mḅọ pẹlẹ so tẹ, ịn pịkị ịn mḅọ ḅaa guluguluma ḅa.’

²⁴ Ịkịankoroapụ mamgba, Samụwẹlị na ori ọḅụjụ ḅo apụ ma na kẹ sụa, pịkị mịọkụ pakarị aị ma ḍuko wasamam.

²⁵ Ori ịkịankoroapụ ma ḅụ Tamụnọ ḅọrọ tẹ minini tomi pịrị aị ma sime ọ́ pịrịm, tẹ Tamụnọ ọmịna atẹngịapụ ma na fị ọḅọkụ mẹ ọmịnị sọ anị ḅụ ḍiekiri nyana wararị. Anie ori Ebira-amụ ḅẹẹ ḅara, ‘Ị́ furo-ḅẹ-apụ ḅụ mie à ḅọrọ tẹ tomikiri simearị atomi mamgba boma ḅarịye.’

²⁶ Mie ḅụ Tamụnọ nwẹnị ọ̀ sẹlẹ-ọkị tẹ Fịrịmẹnjịḅọ ḅe kẹ tarị ọ́ fịrịma, tẹ ó boma ḅẹ ḅara, mịẹtẹ ọrụḅọ-ọrụḅọ mḅọ si-sịḅịḅio-sụa etela ma ḅụ pịkị ḅụ.”