Fịrịmẹnjịapụ 28 - FỊAFỊA BAỊBỤLỤ

In Mu Mọlịta Lam

¹ Wa dein ḅara kẹ mu kiri la tẹso, mie wa gbela nimi ye mịnẹ Mọlịta anie anị sọọ mẹ ẹrẹ.

² Ama nyana apụ ma ikia ḅara kẹ wa daa-ọkịm. Ene koro tẹ oḅoku ḅo koro tẹso, ịn nwẹnị fịnị tọnọ tẹ temi. Wamịnị sọ ịn ḍụkụ tẹ wa ini na sọ tẹ fịnị mẹ temim.

³ Tẹ Pọlụ sanga kolokolo kobirima tẹ kẹ fịnị mẹ ḅio suuarị ogbo fịnị ọwụ mẹ deema pakama ḅo gbọrụ ododo nwẹnị Pọlụ ḅara fịnama.

⁴ Ododo ḅe ọkọ kẹ Pọlụ ḅara lọkụ-lọkụarị mẹ mịẹtẹ ama nyana apụ ma nwẹnị jụmọ-jụmọ ḅẹẹ, “Ḅieḅe arịḅọ ḅa; abajị ḅio ọ̀ fa-a so tẹso, kụma ọ̀ kọn tẹ iri-mịẹye mẹ paa ọ̀ ḅaa ḅẹ tẹ ò ḍukamẹnjịarị.”

⁵ Kụma Pọlụ nwẹnị ododo ḅe gugu fịnị mẹ ḅio suu, tẹ gberie-sọ ọ̀ la-a.

⁶ Ọkọ la sakị ama nyana apụ ma nwẹnị Pọlụ foin kanakana, anịanịa fuku-gbeima-koro tẹ fịị ḅẹ tọrụ kẹ ò ḍiki. In ḍiki-ḍiki-siḅiya gberie-sọ ọ̀ la-a ḅẹ sakị, ini ịna ḅioḅẹngbọ ḍima tẹ ḅẹẹm, “Ḅieḅe oruu!”

⁷ Wa sime anga mẹ, sọ mẹ daarị alaḅọ ḅe kiri na kpekim, ori ẹrẹ Pọbịlịyọsị. Ori iḅi ḅara kẹ wa daa-ọkịm, tẹ tẹra aḍin na gbasị ye wa nwẹn kẹ ori na simem.

⁸ Tẹ akọm na ḅịla na Pọbịlịyọsị ḅe ḍa kun koromam tẹ Pọlụ ò simearị ḅio sọ mu tẹ tẹkẹ, tẹ ḅara kẹ ori ọgọnọ gbana tẹ ọ̀ gwọm.

⁹ Miemẹ mịẹ tẹso, kiri mẹ ḅụ sime ja obiapụ mamgba sọ ḅo tẹ gwọm.

¹⁰ Ịn tọnwa aị kẹ ḍie wa pịrịm, tẹ wa arụ ḅụkụlọ tẹ so ḅẹ sakị ịn pịkị tọrụ-minji wa ḅii ḅẹ aị kẹ arụ sẹịn wa pịrịm.

Wa Mọlịta Ḅụ So Mu Romu Lam

¹¹ Tẹra akalụ ḅọrọ tẹso, wa nwẹnị Alẹkịzanịdịrịya ḅụ ḅo gbọrụ arụ, tẹ ịn kẹ “Ịpaso Oru” sịn arụ tẹ bebe okiringa sakị mẹ kẹ anị sọọ mẹ ḅụ ḅụụ kikima sime arụ mẹ ḅụkụlọ tẹ dọkụ-so.

¹² Wa mu Sirakusu opu ama mẹ la tẹ anịanga ḅụ tẹra aḍin simem.

¹³ Wa anịanga arụ sin tẹ mu Regiyọmụ ama la tẹso, ene ḅaa, abajị fẹrụ fiem; tẹ jen maa ḍin la sakị wa ḅo Puteholi la tẹ.

¹⁴ Anịjụ wa ẹrị Kịrayịsị minini apụ nwẹnị sọnọma aḍin kẹ wa dasịẹma; anịtẹso wa nwẹnị ḅo Romu la.

¹⁵ Romu ḅụ sime Kịrayịsị minini apụ ma wa ḅoarị ye naa tẹ nwẹnị ḅo nwenii ḅo ịn kẹ Apịyọsị Fẹẹ na Agba-ḅọrọ Tẹra Awarị nwẹn-sịn ama ma jụjụ-ḅio wamịnị na bịama. Tẹ Pọlụ ini ẹrị sakị ọ̀ nwẹnị ịmịẹtẹ kẹ Tamụnọ ḅẹẹ, tẹ kpọma ịwọ ịnyọ sụa lama.

Romu Ḅụ

¹⁶ Wa ḅo Romu la sakị ịn Pọlụ wẹrịso tẹ gbọrụ ọmụḅọ tọrụ kẹ ọ̀ ḅụ wẹrịtẹ ori ngẹrị angam.

¹⁷ Tẹra aḍin ḅọrọ tẹso, Pọlụ nwẹnị anịjụ sime Juu-ḅẹ-apụ sịḅịdapụ ma sịn kobiri tẹ ịn ḅẹẹ, “Ị̀ amịnapụ, Izirẹlị awọmẹ, à kẹ wamịna amịnapụ ma na, wamịna atẹngịapụ ma ama-anganga-ḅara mẹ na iri ye ofori ḅẹsọ, Jeruselemu jụ ini ikoliḅọ ḅara kẹ ì kun tẹ ị̀ kẹ Romu ḅẹ apụ ma pịrịm.

¹⁸ Ini ịn kẹ ì ḅii na-iḅi aị kẹ ì ḅii tẹ in gotẹ ị̀ ḅaa ḅẹ ye ẹrị-a sakị, Romu ḅẹ apụ ma ị̀ ḅụụ ḅara-siin ḅẹ ḅiim.

¹⁹ Kụma Juu-ḅẹ-apụ ma ḍụkụ-a. Jen mịẹ-mịẹ ḅara ofori sakị, à kẹ ị̀ ama ḅẹ apụ ma ọgọnọ gbana ḅẹ ye ofori sọ, à ḅẹrẹ mẹ iwoma Romu Tomikiri mẹ daarị ḅọ ḅe fịrịmam.

²⁰ Mie à ḍuko ọ́ pịrị ḅẹ tẹ fịrịma ọ́ sịn ye. Ye ḅẹ karakara ḅụ, Izirẹlịapụ kẹ ḅiokpọmaḅọ tẹ ịn tọrụ kẹ ḍikiarị ḅọ ḅe anie ịn gotẹ ma ikoli ma kẹ ị̀ sụa wararị.”

²¹ Ịn nwẹnị ọ̀ ḅẹẹ, “Judiya ḅụ í gboloma ḍiri amụ ḅo wa la-a, tẹrẹmẹ mịnapụ ma ḅụ ḅo ị́ ḅụụ ḅẹ siye, anịanịa jen ịba-fị wa pịrị tẹ ḅọ sọ pịkị ofori.

²² Anịsọ wa paa í kuroma sime aị naa ḅẹ ḅii ḅa, kẹ gotẹ ọkọ ḅẹẹarị, anga na, anga na ḅụ mie í simearị ogbo mẹ tomi anị ḅụ iḅiye ḍuko-a.”

²³ Mie ḅụ ịn nwẹnị Pọlụ na ene pẹlẹ, tẹ ene mẹ laa tẹso, ini ikutẹ ḅara kẹ Pọlụ sime anga mẹ sọ ḅinm, tẹ dede-ḅio ọkị mu ḅoḅiri la ọ̀ nwẹn kẹ Tamụnọ Ama-da mẹ sime-ḅara puu-finji tẹ anị ḅẹ ẹkwẹn kọn ịn pịrịm. Ọ̀ pịkị Mozizi Oloko mẹ na ịkịankoroapụ ma na kẹẹ koroma aị ma na kẹ tọnma, tọnma tẹ mịẹtẹ in Jizọsị gbolomaye mẹ minini ḅẹ ḍọkịm.

²⁴ Ori ẹkwẹn mẹ ini ḅẹ ja apụ ḅioḅẹngbọ sọm, kụma ja apụ minini ḍụkụ-a.

²⁵ Mie ḅụ ịn nwẹnị so, tẹ in soarị sakị Pọlụ kọn gbọrụ ẹkwẹn mie ịn kẹ ye-nụnụa ma-so ye. Ori mẹẹ, “Fịafịa Tẹmẹ ḅe ịkịankoro Ayịzaya ḅụ ḅọrọ tẹ kọn ọmịna atẹngịapụ ma pịrị ẹkwẹn mẹ karakara lamam!”

²⁶ Ori mẹẹ, “Mu mịna atomi ma ḅẹẹ: Ó poki ḅara, poki ḅara, ọmịnị anị fiearị ye naa ḅịa; ó ḍiki ḅara, ḍiki ḅara, ọmịnị ẹrị ḅịa,

²⁷ kẹ gotẹ ọkọ ḅẹẹarị, mịna atomi ma ịna aḅioḅẹngbọ ikiri tẹ, tẹ ini ịna aḅeri suke pụnma tẹ; ịn pịkị ịna tọrụngbọ gbaịn tẹ. Anie ofori ịna atọrụngbọ ḅofa ye ẹrị, tẹ ịna aḅeri ye naa, tẹ ịna ḅioḅẹngbọ ye fie ye nimi, tẹ ịn pịkị ị̀ da tẹ arị ịn gwọ.”

²⁸ Ḍuko gbaịn ḅụ Pọlụ ḅẹẹm, “Ọkọẹrẹsị ó nimii mịnẹ, Tamụnọ ḅọrọma oku mẹ, ịn kẹ Ja asịẹ ḅẹ apụ ma fịrịma tẹ, tẹ ini anị poki ḅa.” [

²⁹ Ori ọkọ ḅẹẹ tẹso, Juu-ḅẹ-apụ ma nwẹnị ini-ini-ini ogboku anị kẹ kpọma ye-nụnụa ma so.]

³⁰ Maa akụra Pọlụ nwẹn kẹ ori ḅarana ọkọ warị ḅụ angam, tẹ ḅo ori ẹrị ḅẹ tẹ ọ̀ daa-ọkịa ḅọ ofori.

³¹ Tẹ ọ̀ nwẹnị Tamụnọ Ama-da mẹ gboloma ye ḍuko, pịkị KỊNỊNYANAḄỌ Jizọsị Kịrayịsị gboloma ye toluma, ḅiokpọ ḅara, kịnị pịkị ò kiki-a ḅara ḅụ.