Fịrịmẹnjịapụ 27 - FỊAFỊA BAỊBỤLỤ

Pọlụ Vala Arụ Ḅụkụlọ Romu Mum

¹ In ḅo wa kẹ Italị fịrịma ḅẹ ye ḍuko pẹlẹ tẹso ịn Pọlụ na ja ikoliapụ na saḅama Julịyọsị nwẹn-sịn ọmụ-alaḅọ pịrịm, ori anie Romu ḅẹ apụ gbọrụ ọmụ-ogbo tẹ ịn kẹ Romu Tomikiri mẹ daarị ḅọ ḅe ọmụ-ogbo sịn ye mẹ sịḅịdaḅọ.

² Adiramitihumu ḅẹ arụ, tẹ so Esiya ibe mu ḅẹ arụ mie wa ḅụkụlọ ye. Arisitakọsị, Masidoniya ḅẹ ḅọ ḅe, Tẹsalonika nwẹn-sịn ama mẹ ḅụ sime tẹ ḅo ḅọ, sọ wamịnị na simem.

³ Anị ḅẹ ene-ḅaa ḅụ wa ḅo Sayịdọnị la tẹso, Julịyọsị kẹ Pọlụ ọkị iḅi ḅara gotẹ, ọ̀ nwẹnị minini ọ̀ pịrị mịnẹ ò koro mu ori ikiapụ la tẹ ịna ḅara ọ̀ ḅụụ-fụkamarị aị ọkị.

⁴ Wa anịjụ arụ sin sakị, wa fẹrụ tụḅụrụ daarị gotẹ wa Sayịpụrọsị akaka ḅụ fẹrụ mẹ dein wararị anga ḅọrọm.

⁵ Wa nwẹnị Silisiya na Pamụfiliya na pakịrị tọrụ mẹ saḅa mu Lisiya ibe ḅụ Mayịra nwẹn-sịn ama la.

⁶ Anịanga ḅụ ọmụ-alaḅọ ḅe nwẹnị Alẹkịzanịdịrịya ḅẹ arụ tẹ Italị muarị ye ẹrị, tẹ wa kẹ sẹịn.

⁷ Tọnwa aḍin wa nwẹn kẹ kẹlẹkẹlẹ dọkụ ma kpọma tọrụsiẹrị tẹ mu Nidusi na dama anga lam. Fẹrụ mẹ ḅarị ḍụkụ tẹ wa wa muarị anga da-a gotẹ, wa nwẹnị Salimọnị ịkụkụ mẹ anda tẹ Kiriti akaka fẹrụ mẹ fie kụrọ-a anga ḅọrọ.

⁸ Wa nwẹnị ḅo saakị kirianga, kirianga da dọkụ tẹ, opu tọrụsiẹrị ḅụ mu Lisiya ama na kpeki anga, tẹ ịn kẹ Fẹrụ la-a Ewere sịn-arị anga mẹ la.

⁹ Anịjụ wa tọnwa aḍin simem, tẹ wa nwẹnị ḅo ẹrị mịnẹ wa paa dọkụ muarị kụma anị iḅiye dogi-ḅo ḅịa, gbala anị sakị kụra mẹ ḅụ ama agba mịẹ-mịẹ sakị mẹ sọ ḅọrọ tẹ. Mie ḅụ Pọlụ mị ḅeri nụnụ ẹkwẹn mẹ kọn ịn pịrịm:

¹⁰ “Ì iḅi atomi, à kẹ ye ẹrịarị ḅara, wamịna mu-ye mẹ, mịanga ḅụ ọkị mu, anị ḅarị iḅiye dogi-ḅo ḅịa; opu fa paka ḅa, arụ mẹ ḅio simearị ngọ ma na arụ mẹ na ḅụ, pịkị tomina ḍumo ḅụ sọ.”

¹¹ Kụma ọmụ-alaḅọ ḅe arụ da ḅọ ḅe na, arụ nyana apụ ma na ḍuko ye minini lamam, tẹ Pọlụ ḍuko ye mẹ ọkị-a.

¹² Anị ewere mẹ okiringa sakị kẹ sime, sime anga-a ẹrẹsị tomi ma ḅẹ opu anga ḅẹẹm ini arụ mẹ sikima tọrụ pịrị tẹ ḅụụkụrọma mu Finikisi laa, anị inetẹ ọkọ mịẹ ḅarị ḅẹḅẹ, tẹ ini anịanga sime tẹ okiringa sakị mẹ ḅọrọ. Finikisi anie Kiriti ḅẹ ewere, anị finji abajị na ọgọnọ-jụ na da wararị.

Abajị Ḅio Ḅẹ Erise

¹³ Abajị fẹrụ saakị kẹlẹkẹle fie tẹso, tomi ma ọkịm anị ḅo ịn tọn ḅara na kura tẹ, mie ḅụ ịn nwẹnị lụmọ nụnụ tẹ Kiriti kirianga dọkụ ma-mu.

¹⁴ Tẹ ala-a kụma ịrụa-saakịarị-anga mẹ ḅẹ ọgọnọ-jụ ḅo kụrọ fẹrụ sọ mẹ ḅụ ideri-ḅo tẹ.

¹⁵ Tẹ anị kẹ arụ mẹ dogi ḅara wa ẹrịm dasịẹma sịẹma ọkụ ofori ḅẹ sakị wa wẹrịso tẹ anị arụ mẹ dogi-som.

¹⁶ Wa ḅo ịn kẹ Kahuda sịn kala sọ mẹ ḅẹ suku-jụ la sakị wa ḅo fẹrụ dein anga la tẹ; wa nwẹnị ḅụụkụrọma tẹ opu arụ mẹ ḅẹ kala arụ mẹ kẹ anị ḅụ kpọọ kụrọma.

¹⁷ Tẹ ịn ḅo anị nụnụ opu arụ mẹ ḅio sẹịn tẹso ịn nwẹnị ḍiki ọkị tẹ kẹ opu arụ mẹ ikelema tẹ kpọọ palị. Ịn ḅalafaam mịnẹ arụ mẹ mu Libiya kpeki ḅụ mịmọ ọgọnọ gbana ḅarị ḅoto ḅẹ ye ḅụ, ini arụ mẹ ḅụ vala ma sin tẹ fẹrụ mẹ ngẹrị arụ mẹ dogi mẹnjịm.

¹⁸ Opu erise mẹ paa fie ma mum, ene-ḅaa tẹso, ịn nwẹnị arụ mẹ ḅio sime ngọ ma ḅẹ jaị kẹ minji gbin,

¹⁹ tẹ jen ene ḅo ḅaa ḅụ ịn pịkị arụ mẹ ḅio ịn kẹ kọrịnama kọrịarị aị ḅẹ jaị sọ kẹ minji gbinm.

²⁰ Tẹ tọnwa aḍin ḅọrọm wa ịrụa na lolia na ẹrị-a, kụma erise mẹ paa fie, fie kụrọmarị. Kunoma ḅụ wa ḅụụ sin koroma fịị pịrịm.

²¹ Tomi ma ye fị-a ḍima, fị-a ḅaama, nwenii tẹso, Pọlụ nwẹnị ịna tọrọkọ sịẹ tẹ ḅẹẹ, “Ị̀ amịnapụ, anị sakị kẹ ọmịnị ị̀ ḅịḅị ọkị tẹ Kiriti jụ ḅụ arụ sin-a namịna, mimgbe nwẹn sime ye gulugulu na fa na paka ḅịa.

²² Kụma mịọkụ àrị ọ́ tẹkẹm, ó ḅiokpọọ. Ọmịna ḅụụ gbọrụḅọ-sọ fịị ḅịa, arụ mẹ ngẹrị mịẹ fa ḅarịye.

²³ À kẹ gotẹ ọkọ ḍukoarị, mị ḍin ị̀ nyana tẹ à tẹkẹarị Tamụnọ ḅe enjẹlị ḅo

²⁴ ị̀ ḅẹẹm, ‘Pọlụ, ḅalafa ma, í mu Romu Tomikiri mẹ daarị ḅọ ḅe tọrọkọ sịẹ ḅa. Tẹ Tamụnọ nyana ị́ pịrị ḍiki-ḅụụjịrị ḅụ, ori ị́ na muarị apụ mamgba aḍumo ḅọrọma tẹ.’

²⁵ Ọkọẹrẹsị, owiapụ, ó ḅiokpọọ; à Tamụnọ ḅe mininim mịnẹ à ḍuko ọ́ pịrị ḅara mẹ mie anị pịkị paka ḅarị ḅara.

²⁶ Kụma wa ikelekele mu gbọrụ sọ jei ḅa.”

²⁷ Wa tọrụ-minji ngei aḍin fa jei sime tẹ erise mẹ wa dogi ikelekelem Mẹdịterenanị nwẹn-sịn tọrụ mẹ ḅụ, tẹ anị ḅo ngei aḍin fa jei karama ḍin mẹ la sakị, ḍin-ogbo ḅiri ḅụ, arụ asawọ ma ḅụụ kẹ kịẹnma tẹ mịnẹ wa kiri kpeki tẹ.

²⁸ Mie ḅụ ịn nwẹnị ikuye kẹ ḍiki ḅụ kpọọ tẹ kẹ tọrụ mẹ ḅụ gbin tẹ kẹ anị pokolo la ḅiri tọn ḍiki. Ịn tarị tọn ye sii kuḅu lam; maaịn karama ye ḅo jei akuḅu lam.

²⁹ Tẹ ịna ḅala nwẹnị fa mịnẹ arụ mẹ mu ịkụ ọgọnọ gbana ḅarị ḅoto, tẹ ịn nwẹnị ḍukuno ḅẹ ini alụmọ ma gbin, tẹ tẹkẹ mịnẹ finji ene paa fọnya ḅoo.

³⁰ Anịtẹso arụ asawọ ma arụ mẹ koroma mangị-so ḅẹ ḍọkịarị gotẹ, ịn nwẹnị epele tii; gbala in mu kụlọ-jụ ḅẹ lụmọ mẹ gbin ḅẹ ḅara kẹ kala arụ mẹ koromarị ogbo

³¹ Pọlụ nwẹnị ọmụ-alaḅọ ḅe na ọmụapụ ma na ḅẹẹ, “Arụ asawọ ma arụ mẹ koroma som ḅẹḅẹ gbọrụḅọ-sọ ḅọrọ ḅịa.”

³² Anie ḅụ ọmụapụ ma nwẹnị mu ḍiki mẹ pẹlẹ, tẹ kala arụ mẹ nwẹnị tẹịn-faa.

³³ Ḅaaso ḅio mie Pọlụ inimgba tẹkẹ ye mịnẹ in fịye fị. Ori mẹẹ, “Mie ngei aḍin fa jei tẹ amụ ó fịye fị-a.

³⁴ Sisi, ọ́ paa fịye kala ye kẹ ḅịḅị lama anị ịnyọ kẹ ọ́ pịrị, ọmịna sịḅị-ḅẹ-inume ḅẹ gberie-sọ faa ḅịa.”

³⁵ Pọlụ ọkọ ḅẹẹ tẹso, ọ̀ nwẹnị fịturu ọkị, tẹ ịmịẹtẹ kẹ Tamụnọ ḅẹẹ tẹ inimgba tọrọkọ anị paịn fị.

³⁶ Anị ḅẹ ḅiokpọ ḅụ ọrụḅọ-ọrụḅọ fịye ọkị fịm.

³⁷ Wamịna arụ mẹ ḅio sime apụ si inia apụ finji ofori kịnị jeia si.

³⁸ Inimgba ye fị fama tẹso, ịn nwẹnị mbịaka mamgba tan minji gbin, tẹ arụ mẹ feke-fekema.

Pọlụ Amẹẹ Sime Arụ Mẹ Tọrụ-minji Puu Tẹ Ḅilem

³⁹ Ene finji koro tẹso, arụ asawọ ma inetẹ kiri mẹ lekiri-a, kụma ịn gbọrụ ọpọ na pọkụ na ẹrịarị, tẹ tọnm mịnẹ ini inetẹ kụma ini ịna arụ mẹ kẹ mu anịjụ gbanama ḅa.

⁴⁰ Mie ḅụ ịn nwẹnị lụmọ mẹ pẹlẹ minji pịrị tẹ ḍukuno-fẹịn ajụẹịn ma fima sin, tẹ nwẹnị kụlọ ḅẹ vala mẹ sịẹma tẹ fẹrụ mẹ nwẹnị arụ mẹ sukuruma tẹ wa kiri da-mum.

⁴¹ Kụma arụ mẹ mu mịmọ ọgọnọ gbana tẹ kụlọ mẹ onwin ḅio ḍiḅi tẹ ḅarị paka-ḅo-a sakị ọnụngọ nwẹnị ḍukuno mẹ ḅakụ kpakpa sara.

⁴² Ọmụapụ ma nwẹnị ḅiya mịnẹ ini ikoliapụ mamgba ḅaa ḅa, anieofori ini ḅẹ ja apụ ḅofa okin so.

⁴³ Kụma ọmụ-alaḅọ ḅe Pọlụ ḅọrọma ḅẹ ḍọkịarị gotẹ minini ịn pịrị-a. Anie nakara ori okin ḍin apụ ma ḅẹẹm ini tarị minji koro tẹ okin mu kpongbo kpọlịị;

⁴⁴ kirikọn-apụ ma sọ in ḍuka-mum, ḍụḅọ apakịrị na, arụ mẹ ḅụ kpakpa so aị ma na ọgọnọ tẹịn mu kiri la ḅụ. Mị-ḅara mie wamịnị-mgba fa-a tẹ mu kpongbo kpọlị ḅara.