Fịrịmẹnjịapụ 25 - FỊAFỊA BAỊBỤLỤ

¹ Fẹsịtọsị ḅo anị ibe mẹ la tẹ tẹra aḍin ḅọrọ tẹso, ó Sizariya ḅụ sime tẹ Jeruselemu mum.

² Anịanga ḅụ agbamịẹapụ ma na Juu-ḅẹ-apụ ma ḅẹ sịḅịdapụ ma na nwẹnị ḅo ḅẹrẹ kẹ Pọlụ sịḅị sẹịn, tẹ ọ̀ tẹkẹ mịnẹ

³ ọ̀ paa Pọlụ kẹ Jeruselemu ḅoo, anie ini etela ḅụ Pọlụ ḅaa ḅẹ tẹ ḅiya tẹ ẹrẹsị.

⁴ Fẹsịtọsị nwẹnị pakịrị, “Pọlụ ḅe Sizariya jụ ikoli ḅio ori emi, tẹ yẹrị sọ ala-a sakị pịkịma-so anịanga mu ḅa.

⁵ Yee ọmịna sịḅịdapụ ma ị̀ na Sizariya mu, tẹ tomḅọ ḅe mịẹ siye emi-emii ini anịanga ḅụ ḍuko ọ̀ sịḅị sẹịn.”

⁶ Fẹsịtọsị nwẹnị anịanga jen nine anịanịa oyi aḍin kẹ ini na sime tẹrẹmẹ so Sizariya mu. Ò mu la tẹ ene-ḅaa ḅụ, ọ̀ nwẹnị ḅẹrẹkọn warị ḅio lẹgị-sime tẹ Pọlụ sịn ḅo.

⁷ Pọlụ mu la tẹso, Jeruselemu ḅụ sime tẹ ḅo Juu-ḅẹ apụ ma tẹ ḅẹrẹ ḍuko ọ̀ sịḅị sẹịn ḅẹ apụ ma nwẹnị sịẹ ori ikelema tẹ saakị kụrọ kụrọtẹ aḅẹrẹ tan, tan ọ̀ sịḅị sẹịn, kụma arịḅẹ karakara sọ ini inetẹ ḍuko pakama ḅo-a.

⁸ Kụma Pọlụ nwẹnị ọ̀ ḅụụ ḍụa: “À Juu-ḅẹ-apụ Oloko mẹ na tụḅụrụ gbọrụ siye sọ mịẹ-a, anịanịa Tamụnọ-warị mẹ sima ḅẹ ye, anịanịa Romu Tomikiri mẹ Daarị ḅọ ḅe na tụḅụrụ ye.”

⁹ Kụma Juu-ḅẹ-apụ ma tọrụ iḅi ọkị gotẹ Fẹsịtọsị nwẹnị Pọlụ gbela, “Í minini tẹ Jeruselemu mu ḅẹ, tẹ anịanga mịna aị ma tẹ ịn kẹ ị́ sịḅị sẹịn aị ma kẹ ị́ kọn ị̀ tọrọkọ?”

¹⁰ Pọlụ nwẹnị ḅẹẹ, “Romu Tomikiri mẹ daarị ḅọ ḅe ḅẹrẹkọn warị ḅio arị emi, anịanga mie ịn pịkị ị̀ kọn ḅarịye. Amụ à gbọrụ siye sọ kẹ Juu-ḅẹ-apụ ma mịẹ-a, sọ ḅarana nimi lama ḅara.

¹¹ Oloko kan siye tẹ à mịẹ tẹ ḅaa-ḅẹrẹ-pẹlẹ ị̀ pịrị na-iḅi ye emi ḅẹḅẹ à mangị ḅịa. Kụma ịn kẹ ị̀ sịḅị sẹịn-arị aị ma ḅụ karakara ye ofori ḅẹḅẹ, gbọrụḅọ-sọ inetẹ ị̀ saakị ịn pịrị ḅịa. Ị̀ ḅẹrẹ mẹ arị iwoma Romu Tomikiri mẹ daarị ḅọ ḅe pịrịm.”

¹² Anịtẹso Fẹsịtọsị ọ̀ palị apụ na sịḅị gboloma fama tẹso, ọ̀ nwẹnị pakịrị, “Ị́ ḅẹrẹ mẹ ị́ iwoma Romu Tomikiri mẹ daarị ḅọ ḅe pịrị tẹ ḅara, ọ̀ tọrọkọ mie ị́ pịkị mu ḅarịye.”

Ịn Pọlụ Kẹ Agiripa Na Banayịsị Na Tọrọkọ Mum

¹³ Sakị kẹlẹ ḅọrọ tẹso, Ama-da Agiripa na Banayịsị na Sizariya ḅụ alụa! kẹ Fẹsịtọsị ḅẹẹ ḅẹ tẹ ḅom.

¹⁴ Ịn tọnwa aḍin sime tẹso, Fẹsịtọsị nwẹnị ye Pọlụ na sime-ḅara ḍuko finji amadaḅọ ḅe pịrị. Ori mẹẹ, “Mịanga Fẹlịkisi kẹ ikoli-warị ḅio koroma tẹ so wararị gbọrụḅọ emi;

¹⁵ tẹ à Jeruselemu mu sakị Juu-ḅẹ agbamịẹapụ ma na omongiapụ ma na tọnwa aḅẹrẹ ḍuko ọ̀ sịḅị sẹịnm, tẹ ị̀ ḅara ḅiim à ḅẹrẹ-ḅarasii pẹlẹ ọ̀ pịrịị.

¹⁶ Kụma à ḍuko ịn pịrịm mịnẹ wamịnị Romu ḅẹ apụ wa ịn ḅẹrẹ kẹ sịḅị ḅụ sẹịn ḅọ saḅama ḅẹrẹ kẹ mḅọ sịḅị sẹịn apụ pịrị pịrị-a, ini mḅọ na dama tẹ mḅọ amịna ḅụụ ḍụa-a ogbo.

¹⁷ Mie ḅụ in ḅo mịanga la sakị à sakị fama-a tẹ, ene-ḅaa ḅụ, ḅẹrẹkọn warị ḅio lẹgị tẹ ḅẹẹ tẹ ini ọ̀ kẹ sọ ḅom.

¹⁸ Ori na ịgbanịya nyana apụ ma saakị sịẹ sakị à kuromam si-aị tẹ ọ̀ mịẹ tẹ in ḍuko ọ̀ sịḅị sẹịn ḅẹ aị ḅẹ gberie-sọ ịn ḅara lama-a.

¹⁹ Ini nyana tẹ ḍuko aị anie ịna Tamụnọ minini ḅara na gbọrụ Jizọsị nwẹn-sịn tomḅọ na gboloma aị, fịị tẹ Pọlụ ọkịm paa ḍumo wararị nwẹn ḅẹẹ ḅọ.

²⁰ À paa mịna aị ma gbolomaye nimi ḅẹ ḅara kuroma ḅo-a ḅara ḅụ, à Pọlụ ḅẹẹm ọ̀ ḅọrọ Jeruselemu mu tẹ anịanga ịn kẹ ọ̀ sịḅị sẹịn aị ma ḅụ ọ̀ kọn ḅarị ḅoto.

²¹ Kụma Pọlụ ḅẹrẹ mẹ saakị iwoma tẹ ḅiim mịnẹ ò kun-ḅara ḅio sime nwenii Romu Tomikiri mẹ daarị ḅọ ḅe ọ̀ ḅẹrẹ mẹ pẹlẹ sakị la ḅa. Mie ḅụ à tọnm mịnẹ ini ò ḍikiḍiki nwenii arị inetẹ ọ̀ kẹ Romu Tomikiri mẹ daarịḅọ ḅẹ fịrịma sakị la ḅa.”

²² Agiripa nwẹnị Fẹsịtọsị ḅẹẹ, “À ḅarana ḅị tomḅọ ḅe ḅịḅị naa ḅa.” Fẹsịtọsị nwẹnị pakịrị, “Iḅim. Ḅaa la sakị ị́ ọ̀ naa ḅa.”

²³ Anị ḅẹ ene-ḅaa ḅụ Agiripa na Banayịsị na ama-kobiri warị mẹ mu sakị ọmụ-alapụ na, ama mẹ ḅẹ opu apụ na sọ ini na gbiima mum, ori opu la ḅara na anị ḅẹ amịẹ-mịẹaị na ḅụ. Fẹsịtọsị tọn tẹ in Pọlụ kẹ sọ-ḅom.

²⁴ Fẹsịtọsị nwẹnị ḅẹẹ, “Ama-da Agiripa, na mịanga wamịnị na emi apụ mamgba na, arị ọ́ sịn tẹ: Mịanga ọmịnị ẹrịarị tomḅọ ḅe anie Juu-ḅẹ-apụ mamgba, tẹ mịanga na Jeruselemu ḅụ na emi apụ na, ḅụụ ḅụ ịna ḅụụ-ḅẹlẹ-a aị ḍuko ị̀ pịrị ḅọ ḅee. Ini oloku-oloku tẹ ḅẹẹm mịnẹ ọ̀ ḅarị ḍumo na-iḅi-a.

²⁵ Yẹrị kịngẹ kụma arị inetẹ ḅaa-ḅẹrẹ pẹlẹ ọ̀ pịrị-pịrị ye ẹrị-a. Anịsọ ori ḅarana ḅẹrẹ mẹ iwoma Romu Tomikiri mẹ daarị ḅọ ḅe pịrị tẹ ḅẹ sakị, yẹrị sọ ọkị tẹ mịnẹ àrị ọ̀ kẹ fịrịma ḅa.

²⁶ Kụma ọ̀ ḅụụ da-da à kẹ ḍiri kẹẹ tẹ kẹ Romu Tomikiri mẹ daarị ḅọ ḅe fịrịma ḅẹ ye à nyana-a. Mie à gotẹ ọ̀ kẹ ọmịna tọrọkọ ḅo yee, jen-a jen-a ị́yẹrị Ama-da Agiripa ḅe tọrọkọ, mịẹtẹ wa iḅiọkụ ọ̀ ḅẹrẹ mẹ sọkịrị ḍiki tẹ à kẹ ḍiri mẹ kẹẹ ḅẹ ye nimi.

²⁷ Kun ḅara ḅio sime ḅọ kẹ ọkọ fịrịmarị tẹ giregirema mḅọ mịẹ ye kẹẹ pakama-a mẹ ị̀ ḅụụ kura-a.”