Fịrịmẹnjịapụ 22 - FỊAFỊA BAỊBỤLỤ

¹ “Ị̀ amịnapụ na ị̀ aḍapụ na ọmịnị ì pokii, arị ọmịna tọrọkọ ị̀ ḅịḅị ḍukoarị sakị!”

² Ori Hiburu ḅịḅị fie tẹ ịn naa sakị ịn gbọrsịḅị yaụ-sime fama tẹ, tẹ Pọlụ nwẹnị ẹkwẹn:

³ “Yẹrị Juu-ḅẹ ḅọ, Silisiya ḅẹ Tasọsị ḅụ ini ì iyim, kụma mị Jeruselemu mẹ ḅụ arị anga paka tẹ pịkị Gamalịyẹlị ḅara ye ḍawọm. Wamịna atẹngịapụ ma Oloko mẹ ḅẹ kụrọ-ḅara ḅụ ịn ye kẹ ì toluma pakama ḅom. Ọmịnị-mgba mịmgba ḅụ Tamụnọ ḅụụ sịẹ-kụrọ ḅara mie yẹrị sọ kẹ ọ̀ ḅụụ sịẹ-kụrọ ḅara.

⁴ À ḅaa-ḅọkọ kẹ mị Etela mẹ mẹnjị apụ ma ḍuka mu ḅaam; ini ḅẹ owiapụ na ereme na à nwẹn kun, kun ikoli suum.

⁵ Sịḅịda-Agbamịẹḅọ ḅe na ọ̀ Ḅẹrẹ-siri mẹ na sọ inetẹ miemẹ nimi tẹ ḍuko ḅa, mịnẹ à karakaraye ḍukoarị. Àrị ịna ḅara ḍiri da-mu wamịna ‘mịnapụ Damasịkọsị ḅẹ Juu-ḅẹ-apụ pịrịm, mịẹtẹ arị inetẹ anịjụ mị mẹnjị mẹ kọn apụ, kọn apụ kun tẹ ikoli kẹ ịn sụa tẹ ịn kẹ Jeruselemu ḅo tẹ fomu-ḅara kẹ ịn pịrị ḅẹ ḅara.

Pọlụ Ò Ḅo Jizọsị Minini Ḅara Ḍukom

⁶ “À mẹnjịma mu Damasịkọsị kpeki tẹso, eneḅaka ogbo pembe sakị ḅụ, So-ḅio ḅụ opu bele nwẹnị ḅiotọn-a ḅara ḅụ ḅịya ḅo ì ikelema.

⁷ À nwẹnị fuku kiri koro tẹ pọkọ naa, ị̀ ḅẹẹarị, ‘Sọlụ, Sọlụ, í tiegotẹ ḅaa-ḅọkọ kẹ ị̀ ḍọkịarị?’

⁸ À nwẹnị gbela, ‘KỊNỊNYANAḄỌ, ị́yẹrị tụḅọ?’ Ọ̀ nwẹnị ị̀ ḅẹẹ, ‘Yẹrị Nazarẹtị ḅẹ Jizọsị, ị́ ḅaa-ḅọkọ kẹ ḍọkịarị ḅọ ḅe.’

⁹ Ị̀ na sime atomi ma bele mẹ ẹrịm, kụma ini ẹkwẹn ị̀ pịrị sime ḅọ ḅe pọkọ mẹ naa-a.

¹⁰ À nwẹnị gbela, ‘KỊNỊNYANAḄỌ, à tiye mịẹ ḅẹ?’ KỊNỊNYANAḄỌ ḅe nwẹnị ị̀ ḅẹẹ, ‘Saakịị tẹ Damasịkọsị muu, anịanga Tamụnọ tọn ị́ pịrị tẹ ị́ mịẹ ḅẹ ye goyegoye in ḍuko ị́ pịrị ḅa.’

¹¹ Bele mẹ ḅẹ kụrọ mẹ ị̀ atọrụngbọ pụnmam, tẹ ị̀ na mu sime apụ ma nwẹnị ḅara kẹ ị̀ ọlọ mu Damasịkọsị sọ-mu.

¹² “Anị opu ama ḅụ Ananayasị nwẹn-sịn ḅọ simem; ọ̀ Tamụnọ nimim, ọ̀ pịkị wamịna Oloko mẹ kokoarị, tẹ Damasịkọsị ḅụ sime Juu-ḅẹ-apụ mamgba pịkị ọ̀ kẹ ye-sịn lamam.

¹³ Ò ḅo ị̀ akaka sịẹ tẹ ị̀ ḅẹẹm, ‘Mbire Sọlụ, siin ye ẹrịị!’ Anị gbọrụ kiri à nwẹnị saakị ye ẹrị tẹ ò ḍiki.

¹⁴ Ọ̀ nwẹnị ḅẹẹ, ‘Wamịna atẹngịapụ ma Tamụnọ ḅe ị́ sẹlẹ ọkị tẹ, mịnẹ í ò ḅiiarị ye nimii, tẹ ọ̀ Karakara Fịrịmẹnjịḅọ ḅe ẹrịị tẹ pịkị ọ̀ ḅịḅị paka-ḅo ẹkwẹn naa.

¹⁵ Ị́ ḅẹrẹ kiri sime-ḅọ sọ tẹ ị́ ẹrị ye na ị́ naa ye na ḍuko ḅẹḅọ-ḅẹḅọ pịrị ḅa.

¹⁶ Ọkọẹrẹsị ḅarị sakị fama ma, saakị tẹ minji sara-a, tẹ ị́ asi ma sịkịrị so, ọ̀ tẹkẹ ḅụ.’

KỊNỊNYANAḄỌ Ḅe Pọlụ Sịnm Ò Mu Iḅi-Oku Mẹ Ḍuko Ja asịẹ Ḅẹ Apụ Ma Pịrịị

¹⁷ “À nwẹnị pịkịma so Jeruselemu mu, tẹ à Tamụnọ-warị mẹ ḅio tẹkẹarị ogbo à nwẹnị ịkịan ẹrị,

¹⁸ à KỊNỊNYANAḄỌ ḅe ẹrịm, ori ị̀ ḅẹẹm, ‘Fọnya sarama Jeruselemu koroma-soo, mịanga ị̀ ḅụụ í ḍukoarị ye ini ọkị ḅịa gotẹ.’

¹⁹ À nwẹnị pakịrị, ‘KỊNỊNYANAḄỌ, à mu ama-awarị ma ḅio í minini apụ kun fomu, fomu-ḅara in nimi lama wararị.

²⁰ Tẹ ini ị́ ḅẹrẹ-kiri sime-ḅọ Sitivini ḅaa sakị à ḅarana sime tẹ ini ọ̀ ḅaa ye mẹ mininim, tẹ yẹrị anie pịkị ọ̀ ḅaa apụ ma akapa ḍikiḍiki ye.’

²¹ KỊNỊNYANAḄỌ ḅe nwẹnị ị̀ ḅẹẹ, ‘Muu, arị ị́ kẹ ala-jụ, Ja asịẹ ḅẹ apụ ma fịrịma ḅa!’ ”

²² Ini iḅi ḅeri kẹ Pọlụ poki nwenii ò ḅo miemẹ ḍukom, kụma anịtẹso, ịn nwẹnị saakị kụrọma oloku, “Ọ̀ kẹ mu ḅaa famaa, ò ḍumo na-iḅi-a!”

²³ Ịn nwẹnị ọkọ kẹ oloku-oloku tẹ ịna akapa kẹ fẹngụ, fẹngụ tẹ fọọn kẹ So-tọrụ wakị.

²⁴ Romu ọmụapụ sịḅịdaḅọ ḅe nwẹnị tọn ori atomi ma pịrị mịnẹ ịn Pọlụ kẹ ọmụapụ sime anga mẹ mu tẹ ò fomu nwenii ò Juu-ḅẹ-apụ ma gotẹ ọ̀ sịḅị gedegedearị ye ḍuko sakị la.

²⁵ Tẹ ini ọ̀ fịna tẹ ò fomu ḅẹ-yearị ogbo Pọlụ nwẹnị anịanga sịẹsime gbọrụ ọmụ-alaḅọ ḅẹẹ, “In Romu furo-tụḅọ kọn tẹ mḅọ mịẹ si nimi-a ogbo mḅọ fomu mẹ oloko ọkọ ḍụkụ ọ́ pịrị?”

²⁶ Ọmụ-alaḅọ ḅe miemẹ naa tẹso, ọ̀ nwẹnị mu sịḅịdaḅọ ḅe gbela, “Í tiye mịẹ ḅẹ ḍọkịarị? Anị ḅọ ḅe Romu furo-tụḅọ!”

²⁷ Mie ḅụ sịḅịdaḅọ ḅe nwẹnị Pọlụ dama-mu tẹ ò gbela, “Ḍuko ị̀ pịrị, ị́yẹrị Romu furo-tụḅọ?” Pọlụ nwẹnị pakịrị, “Inn.”

²⁸ Sịḅịdaḅọ ḅe nwẹnị ḅẹẹ, “À fama tẹ Romu furo-tụḅọ sọ igbigi ḅakam.” Pọlụ nwẹnị pakịrị, “Yẹrị kụma arị anị ḅụ iyim.”

²⁹ Anị gbọrụ sakị ḅụ ḅẹrẹ kẹ Pọlụ ḅii ḅẹ ḍọkị apụ ma nwẹnị sịḅị nụnụ ọkị; tẹ sịḅịdaḅọ ḅe ḅo Pọlụ Romu furo-tụḅọ ḅẹ ye mẹ nimi sakị ọ̀ ḅalafaam, jen-a jen-a ori ikoli kẹ ọ̀ sụa ye mẹ ḅụ.

Ịn Pọlụ Kẹ Ḅẹrẹkọn-Siri Mẹ Mum

³⁰ Sịḅịdaḅọ ḅe Pọlụ da-da mịẹ tẹ Juu-ḅẹ-apụ ma kẹ ọ̀ sịḅị sẹịn-arị ye nimi ḅẹ ḍọkịarị ye gotẹ, ene-ḅaa ḅụ ọ̀ nwẹnị ịn kẹ Pọlụ sụa ikoli ma sin, tẹ tọn mịnẹ agbamịẹapụ ma na bebe Ḅẹrẹkọn-Siri mẹ na sịn kobirii, tẹ Pọlụ kẹ ḅo ịna tọrọkọ sịẹmam.