Fịrịmẹnjịapụ 20 - FỊAFỊA BAỊBỤLỤ

Pọlụ So Masidoniya Na Akaya Na Mum

¹ Ama mẹ dein tẹso, Pọlụ minini apụ ma sịn kobiri tẹ ẹkwẹn ịna ḅiokpọma tẹ ḅaaḅaa kẹ ịn ḅẹẹ tẹ so Masidoniya mum.

² Ori anị iri mẹ ḅụ mu ibe, ibe la tẹ tọnwa ḅara kẹ ẹkwẹn tomi ma ḅiokpọmam. Anịtẹso ò ḅo Akaya la tẹ,

³ anịanga tẹra akalụ simem. Ọ̀ kẹlẹkẹlẹ ḅụụ kẹ Siriya mu ḅẹ ḅara wẹrịarị ogbo ori ịba naam mịnẹ Juu-ḅẹ-apụ ma ḅẹrẹ-ḅiya ọ̀ pịrị tẹ. Mie ḅụ ọ̀ mẹnjị mẹ tọn pịkị tẹ Masidoniya etela ọkịm.

⁴ Ori na sọ tẹ mu apụ anie Pirọsị tụḅọ Sopeta, Bereya ḅẹ ḅọ ḅe na, Arisitakọsị na Sẹkọnịdọsị na, Tẹsalonika ḅẹ apụ ma na, Dabi ḅẹ Gayọsị na, Tịkịkọsị na Tirofimọsị na, Esiya ibe ḅụ ḅo apụ ma, na Timoti na.

⁵ Ini nwẹnị tarị mu Torohasị ḅụ wa koru.

⁶ Sun-a Fịturu Alalị mẹ ḅọrọ tẹso, wa nwẹnị Filipayị ḅụ arụ sin tẹ Torohasị mu, tẹ anịanga sọnọma aḍin sime, sọnọ aḍin wa nwẹn kẹ tọrụ minji sime tẹ mu lam.

Pọlụ Kunoma Ye Kẹ Torohasị Lam

⁷ Satọde ḅoḅiri wa gboloma fịye mẹ fị ḅẹ tẹ kobirim. Ene ḅaa ò so ḅẹm gotẹ Pọlụ ẹkwẹn tomi ma pịrị ḅo ḍin-ogbo lam.

⁸ Ḅekin-warị ọgọnọ-jụ wa kobiri ḅio mẹ ḅụ tọnwa atọnjọ ịn nwẹn tọnjịm.

⁹ Gbọrụ asatụḅọ, Yutikọsị nwẹn-sịn ḅọ, ikiḅa-ḅọkọ ọgọnọ lẹgị-simem, tẹ Pọlụ ẹkwẹn-arị sakị Yutikọsị ḅe nwẹnị sịngẹ nwenii gbọrsịḅị mono ḅọrọ so, tẹ nwẹnị tẹra dẹkị karama ye mẹ tẹ wa kobiri anga mẹ ḅụ ḅịkị ḅo kiri la. Ini ọ̀ saakị sakị ọ̀ fịị tẹ.

¹⁰ Kụma Pọlụ koro-mu tẹ tuu tẹ ọ̀ fịnama, tẹ ḅẹẹm, “Ọ́ ḅalafa ma, ò ḍumo wararị!”

¹¹ Anịtẹso ọ̀ nwẹnị pịkị kpọlị iwo tẹ fịturu paịn tẹ fị. Pọlụ na ini na ẹkwẹn alama mu ene finji, mu ịrụa paka so lam; tẹ ọ̀ nwẹnị so.

¹² In ḍumo ḅụ asatụḅọ ḅe na mu warị la ye mẹ nwẹnị kpọma ḅio-dein kẹ ịn pịrị.

Torohasị Ḅụ Mu Milẹtọsị La

¹³ Wamịnị tarị arụ ḅụkụlọ tẹ so mu Asọsị lam. Anịanga mie Pọlụ ḅụkụlọ ḅẹ ye. Ori ḅẹẹm wa ọkọ mịẹ, tẹ ori kiri ọgọnọ ḅọrọ.

¹⁴ Asọsị ḅụ ọ̀ wamịnị na bịama sakị wa ọ̀ sẹịn tẹ so Mitilini mum.

¹⁵ Anịanga wa arụ sin tẹso, ene-ḅaa wa ḅo Kịọsị na dama ḅẹ tọrụ-ogbo lam. Jen ene-ḅaa ḅụ wa ḅo Samọsị la, tẹ pịkị jen ene-ḅaa kẹ ḅo Milẹtọsị lam.

¹⁶ Pọlụ tọn-pẹlẹ tẹ mịnẹ ọ̀ dọkụ Ẹfisọsị ḅọrọ ḅa, ó ḅii-a ori Esiya ibe ḅụ sakị fama, ọ̀ fọnya mu Jeruselemu la tẹrẹmẹ Pẹnitikọsị ḅo la ḅẹ ḅara, anị inetẹ ọkọ mịẹ ḅarị ḅẹḅẹ.

Pọlụ Kọn Ẹfisọsị Ḅẹ Omongiapụ Pịrị Kunoma Ẹkwẹn

¹⁷ Milẹtọsị ḅụ Pọlụ fịrịma mu Ẹfisọsị sọsị mẹ ḅẹ omongi apụ sịnm in ḅo ori na ẹrịya.

¹⁸ In ḅo la sakị ori ịn ḅẹẹm, “Yẹrị ḅe tarị ḅụọ kẹ mị Esiya mẹ lama ḅụ à kẹ ọmịna ogboku ḍumo kọn ḅara ó nimi wararị.

¹⁹ Ḅụụ-iderima ḅara na, owu atọrụ na mie à kẹ KỊNỊNYANAḄỌ ḅe fịrịmẹnjịḅọ ḅara ḅụ ị̀ kọrịnama kọrị ye, Juu-ḅẹ-apụ ma ị̀ kẹ ḅiya aḅẹrẹ ma ḅẹ ḅụụ-fụka ḅo ị̀ la asakị ma ḅụ.

²⁰ Ọ́ nimi wararị mịnẹ, anị ḅọrọ etela-ogbo-o, ḅọrọ ọmịna awarị ḅio-o, arị ẹkwẹn ọ́ pịrị-pịrị tẹ ye kẹ ó tolumarị sakị, kẹ ḅarasụa ọ́ pịrị na-iḅi tẹ à kikima ye ofori.

²¹ Gbọrụ ḅara mie à kẹ Juu-ḅẹ-apụ na Ja asịẹ ḅẹ apụ na ḅeri nụnụ ye, mịnẹ ini ịna asi ḅụ pịkị Tamụnọ daa, tẹ Wa nyanaḅọ Jizọsị ḅe mininii.

²² Tẹ mịọkụ, Fịafịa Tẹmẹ ḅe ḅẹẹ ḅara mịẹ ḅụ, à Jeruselemu muarị, anịanga ị̀ ḅụụ paka ḅarị ye nimi-a ḅara ḅụ.

²³ Yẹrị nimi ye anie, ama-ama ḅụ Fịafịa Tẹmẹ ḅe ì ḅeri nụnụ ḅụ ḍuko tẹ mịnẹ ikoli na ḅụụ-fụka na ì koruarị.

²⁴ Kụma à nwẹnị paa inetẹ Tamụnọ ḍiki-ḅụụjịrị mẹ ḅẹ Iḅi Oku mẹ ḍuko mẹ, anie KỊNỊNYANAḄỌ Jizọsị ḅe kẹ ị̀ fịrịma fịrị mẹ mẹnjị fama kụma, ì ḍumo à kẹ gberie-sọ sịn-a.”

²⁵ “À nimi wararị mịnẹ ọmịnị à mẹnjị-mẹnjị tẹ Tamụnọ Ama-da mẹ ḅẹ ẹkwẹn mẹ kọn pịrị sime apụ mamgba, gbọrụḅọ-sọ ḅarị jen kẹ ị̀ ẹrị ḅịa.

²⁶ Ọkọẹrẹsị, mịmgba à tẹmẹ-la ḅara kẹ ḍuko finji ọ́ pịrịarị mịnẹ, ọmịna ḅụ iri-faa ḅọ, fa ḅọ ị̀ ḅara ḅo-a.

²⁷ Kẹ gotẹ ọkọ ḍukoarị, Tamụnọ kẹ ye tọn ḅara ḅụ à kẹ ó kikima tẹ ḍuko pakama ọ́ pịrị-a gberie-sọ ofori.

²⁸ Mie ḅụ, ọ́ tọrụ kẹ ọmịna aḅụụ wẹrịị, ọ́ pịkị iḅị-tọrụ kẹ Fịafịa Tẹmẹ ḅe kẹ ọmịna ḅarasụa wararị anana ogbo mẹ ḅụ wẹrịị. Ọ́ Tamụnọ ọ̀ Tụḅọ ḅe fịị tẹ mịẹ agba mẹ ḅụ kẹ ò nye sọma wararị sọsị mẹ ḍikiḍiki kpaịnmaa.

²⁹ À nimi wararị mịnẹ arị ó koroma so sakị anana kun pẹị-pẹị si anama ọmịna ogboku ḅo ḅa, tẹ papaa anana ma wẹrịso ḅịa.

³⁰ Sakị ḅo ḅa, tẹ ọmịna ḅụ ḅẹ apụ iruo aị kẹ minini apụ ma toluma ọkị tẹ ini ịn ḍukamẹnjị ḅa.

³¹ Ọkọẹrẹsị ọmịnị ẹbịị; ó ḅiokoromaa mịnẹ tẹra kụra à nwẹn kẹ owu atọrụ ḅụ ḍin na eneḅaka na kẹ ye kẹ ó tolumam.

³² “Tẹ mịọkụ arị ọ́ kẹ Tamụnọ ḅara sụam, pịkị ò ḍiki-ḅụụjịrị mẹ ḅẹ oku mẹ ḅụ na, anị mie inetẹ ọ́ mịẹ kụrọma tẹ ori ọ̀ kẹ ori atomi mamgba wẹrịma aboma ma kẹ ọ́ pịrị ḅarịye.

³³ Gbọrụḅọ-sọ golu, anịanịa seleḅa, anịanịa kapa amụ ị̀ pọkọ sọlịma-a.

³⁴ Ọmịnị sọ nimi ḅara, ma ị̀ aḅara ma mie à kẹ kọrị, kọrị tẹ ị̀ na ḅo apụ na ị̀ na kẹ anga ye.

³⁵ Ḅẹẹye-ḅẹẹye ḅụ, à kẹ ó ḍiem mịnẹ ịnyọ kpọma kọrịnama kọrị ḅụ mie wa inetẹ ḅọrọ tẹ ḅarasụa ịnyọ ofori apụ pịrị ḅarịye. Ọ́ KỊNỊNYANAḄỌ Jizọsị ḅarana kọn ẹkwẹn mẹ kẹ ḅiokoromaa, ‘Ye ḍie jụmọ pịrị boma nyana jụmọ ḅara ye daa-ọkị nẹngịm.’ ”

³⁶ Pọlụ ẹkwẹn fama tẹso, ọ̀ nwẹnị kparakị tẹ ini na tẹkẹ.

³⁷ Inimgba owu-owu tẹ ḅẹlẹma ḅara ḅụ ekpe kẹ ọ̀ fịnama tẹ ḅaaḅaa! kẹ ọ̀ ḅẹẹm.

³⁸ Ori mẹẹ ịn ḅarị jen kẹ ori ẹrị ḅịa ḅẹẹ ye mẹ mie sụntẹ in kururuma lama ye. Tẹ ịn nwẹnị ọ̀ ḅọrọma mu arụ ḅio sẹịn.