Fịrịmẹnjịapụ 2 - FỊAFỊA BAỊBỤLỤ

Fịafịa Tẹmẹ Ḅe Ḅoo Mẹ

¹ Pẹnitikọsị (anie Jizọsị fị-ḅụ-saakị tẹ ḍin amesi oyi finji karama ene mẹ) ḅụ ò minini apụ ma mu gbọrụ anga kobirim.

² Ḅiotọn-a ḅara ḅụ ịn naa ḅẹ sakị So-ḅio ḍarị tẹ, kụrọ erise fẹrụ fie tẹ anị mịẹ-mịẹ ḅara, tẹ nwẹnị fie ḅo ịn lẹgị-sime sime warị mẹ ḅio sọ ḅin.

³ Anịtẹso ịn fịnị-ḅẹlẹ kịkaye ẹrị tẹ anị wasama mu inimgba, tẹ anịanga sime apụ ma ḅụ, ọrụḅọ-ọrụḅọ la tẹ.

⁴ Fịafịa Tẹmẹ ḅe nwẹnị inimgba ḅụụ ḅio sọ ḅin, tẹ ịn nwẹnị saakị kịrị-kịrị ama ḅẹ aḅịḅị fie, Fịafịa Tẹmẹ ḅe kụrọ kẹ ịn pịrịm ini ẹkwẹn nwẹn ḅẹ ḅara ḅụ.

⁵ Anị sakị mẹ ḅụ Tamụnọ nimi lama wararị Juu-ḅẹ apụ tẹ tomikiri mẹ ḅẹ kịrị-kịrị anga ḅụ sime tẹ ḅo apụ Jeruselemu ḅụ angarị.

⁶ In fiearị ye mẹ naa tẹso, tọnwa-apụ nwẹnị ḅo kobiri. Inimgba ḅụụ-buam, gbala ịna ḅụ ọrụḅọ-ọrụḅọ Jizọsị minini apụ ma ḅịḅị amịna ama ḅẹ ḅịḅị naam.

⁷ Ye mẹ kẹ ịna ḅụụ-gbiripuma ḅara ḅụ ịn nwẹnị oloku pakama, “Nwẹn ẹkwẹn-arị apụ ma Galili ḅẹ apụ wa nwẹn sịn-a!

⁸ Ọkọ kụma ndẹẹ wamịna ḅụụ ọrụḅọ-ọrụḅọ ịna ḅịḅị ḅụ amịna ama ḅẹ ḅịḅị naarị ḅara?

⁹ Wamịnị Patịya na, Midi na, Ẹlamụ na Mẹsopotemịya na, Judiya na, Kapadosiya na, Pọnịtịyọsị na, Esiya na,

¹⁰ Firijiya na, Pamụfiliya na, Ijiputi na, Libiya na Sayịrini na ḅụ ḅo apụụ. Wamịna ḅụụ ḅe ja apụ Romu ḅụ ḅom,

¹¹ Juu-ḅẹ-apụ na Juu-ḅẹ-apụ-a tẹ pịkị tẹ Juu-ḅẹ-apụ Tamụnọ tẹkẹarị apụ na, tẹ wamịna ḅụụ ḅẹ ja apụ Kiriti na Arebịya na ḅụ ḅom — anịsọ wamịnị-mgba ịn kọn-arị ẹkwẹn mẹ ḅụ wamịna ama ḅẹ ḅịḅị ḅụ Tamụnọ kọrị opu akọrịnama tẹ in ḍukoarị aị ma naarị!”

¹² Ḅụụ-bua na ḅarị mịẹ ḅẹ ḅara nimi-a na ḅụ, ịn paa jụmọ-jụmọ gbelam, “Miemẹ ḅọrọ tiye fiearị?”

¹³ Kụma ja apụ paa Jizọsị minini apụ ma kẹ kpọọtii-tii tẹ ḅẹẹarị, “Mịna atomi ma ini iru ḅuu tọrụ-ḅaama wararị!”

Pita Kọn Ẹkwẹn

¹⁴ Anịtẹso Pita nwẹnị osi afịrịmẹnjịapụ, oyi gbọrụḅọ finji ma na saakị sịẹ tẹ pọkọ saakị tẹ ẹkwẹn tomina-ogbo mẹ pịrị: “Ị̀ ama ḅẹ Juu-ḅẹ-apụ, na ọmịnị Jeruselemu ḅụ angarị apụ mamgba na, sisi ọmịnị ì pokii, tẹ à miemẹ fiearị ye ḍuko ọ́ pịrị.

¹⁵ Mịna apụ ma ini iru ḅuu tọrụ-ḅaama-a, ó kuromarị ḅara ḅụ; à kẹ gotẹ ọkọ ḅẹẹarị, mie rẹ dede ḅẹ eseni aso.

¹⁶ Anie nakara, ịkịankoro Jowẹlị ḍuko ye mẹ mie mịanga pakarị.”

¹⁷ Tamụnọ mẹẹ, “Miemẹ anie à mịẹ ḅarịye, kunoma ene ma ḅụ: à ḅaka ḅara kẹ ị̀ Tẹmẹ kẹ tomḅọ nwẹn-sịn ḅọ sịn ḅọ ḅụụ ḅio su ḅa.” Ọmịna owiapụ-awọmẹ na eremịna-awọmẹ na ì oku mẹ ḍuko wasama ḅa; ọmịna asambịrịma awọmẹ ma ịkịan ẹrị ḅa, tẹ omongiapụ ma ḍawọ kọn ḅa.

¹⁸ Inn, anị ḅo ọkọ la sakị, ị̀ afịrịmẹnjịapụ ma aḅụụ ḅio sọ, owiapụ na ereme na, à ḅintẹ ḅara kẹ ị̀ Tẹmẹ kẹ ịn pịrị ḅa, arị ene ma ḅụ, tẹ ini ị̀ oku mẹ ḍuko wasama ḅa.

¹⁹ So-tọrụ ḅụ à ḅụụ-buama-aị mịẹ ḅa, pịkị ḅụụ-gbiripuma aị na kiri ḅio. Ọmbie na, kọrị-fịnị na, kpiti tẹ onwin na paka ḅa;

²⁰ ịrụa mẹ kanakana sọ ḅa, tẹ akalụ mẹ awụ ḅịya ḅa, ọmbie ḅịya ḅara, tẹrẹmẹ KỊNỊNYANAḄỌ ḅe opu ebube Ene mẹ ḅo la ḅa.

²¹ Anịtẹso ḅarasụa ḅii ḅụ KỊNỊNYANAḄỌ ḅe ẹrẹ mẹ sịn ḅọ, sịn ḅọ ḅọrọma ḅa.

²² Ì pembema Izirẹlịapụ, ọmịna ẹkwẹn-aḅịḅị ma pokii! Nazarẹtị ḅẹ Jizọsị ḅe tomḅọọ, tẹ Tamụnọ kụrọ ọ̀ ḅụụ simem ḅẹ ye mẹ ḅụụ-buama-aị na, ḅụụ-gbiripuma aị na, tẹ Tamụnọ ọ̀ ḅụụ ḅọrọtẹ kọrị aị ma, anị ḍie pakama banabanama tẹ. Ọmịnị-mgba miemẹ nimi wararị, gbala ọmịna ogboku anie miemẹ paka ye.

²³ Tamụnọ ḅarana anịngẹ-kụraḅio tọn koroma ḅara ḅụ, in Jizọsị ḅe saḅama ọ́ pịrị tẹ ọmịnị ọ̀ ḅaa ḅa, ọ̀ kẹ si-mịẹapụ pịrị tẹ ini ọ̀ kẹ ẹngbẹsẹ-sịn ḅụ ḅakụ ḅụ

²⁴ Kụma Tamụnọ fịị ḅụ ọ̀ saakịma tẹ mịẹtẹ fịị ḅarị ọ̀ ḅụụ kụrọ nyana-a; gbala anị sime-ḅara ḅụ, fịị inetẹ ọ̀ ḅụụ kụrọ nyana tẹ ọ̀ kẹ ikoli suu wẹrị ḅịa.

²⁵ Kẹ gotẹ ọkọ ḍukoarị, Devidi ò gbolomaye ḍukom, Sakị mamgba à KỊNỊNYANAḄỌ ḅe ẹrịarị ị̀ tọrọkọ ḅụ, ori ị̀ na emi, ị̀ ḅụụ-fụkama ḅẹ ye ofori.

²⁶ Tẹ anie ḅụ ḅioḅẹlẹ ị̀ ḅụụ sọ ḅin tẹ, tẹ ị̀ ẹkwẹn ma ḍereku arị ḅụ ḅin tẹ. Tẹ ị́yẹrị fịị, fịị tomḅọọ sọ, à ḅiokpọ ḅụ ịnyọsara ḅa,

²⁷ ị́ ḍụkụ tẹ ị̀ kẹ Ḍuḅu ḅio gbin koroma ḅịa ẹrẹsị; ị́ pịkị ḍụkụ tẹ ị́ karakara fịrịmẹnjịḅọ ḅe ḍuḅu ḅio sime tẹ ḅụrụ ḅịa.

²⁸ Mẹnjị ḅọrọ mu ḍumo la-la etela ma ị́ kẹ ì ḍie tẹ, ị́ ị̀ na emi ye mẹ ì ḅioḅẹlẹma ḅa.

²⁹ “Ị̀ amịnapụ, à giregire ḅara kẹ wamịna atẹngịḅọ, tomi mamgba ẹrẹ naa tẹ Amadaḅọ, Devidi ḅe gbolomaye kẹ ẹkwẹn ọ́ pịrị ḅa. Ori ḅe, ọ̀ fịị tẹ pịkị ḍiḅi tẹ. Mịmgba sọ ò ḍuḅu paa wamịnị na emi.

³⁰ Ori ḅe ịkịankoroḅọọ, ọ̀ pịkị Tamụnọ minini ọ̀ pịrị ye nimim. Tamụnọ ye karị ḅara kẹ mininim mịnẹ ò Devidi furo ḅụ paka-ḅo kẹ ama-dama ḅa, ori Devidi ḅe sime-ḅara sime ḅọ.”

³¹ Devidi tọrọkọ-jụ ḅụ Tamụnọ mịẹ ḅẹ ye ẹrịm, anie ò gotẹ Mẹsaya ḅẹ fị-ḅụ-saakị ḅẹ ye gbolomaye ḍuko tẹ ḅẹẹ ye, Ọ̀ Ḍuḅu ḅio ḅụ ọ̀ kẹ gbin koroma-a; ori oju ḍuḅu ḅio sime tẹ ḅụrụ-a.

³² Ḅị gbọrụ Jizọsị ḅe mie Tamụnọ fịị ḅụ saakịma ḅọọ, tẹ wamịnị-mgba mị karakaraye mẹ nimi tẹ ḍuko ḅẹ apụ.

³³ Tamụnọ, ọ̀ Ḍaḅọ ḅe, ọ̀ saakị iwoma mu ori ama-ḅara anga lama tẹ; ori pịkị, ò minini wa pịrị ḅara ḅụ, Tamụnọ ḅara Fịafịa Tẹmẹ ḅe da tẹ kẹ wa fịrịma tẹẹ. Mịọkụ ọmịnị ẹrị tẹ pịkị naarị ye mẹ anie ò ḍiepịrịye mẹ tẹ ọ̀ kẹ wamịna ọgọnọ ọsụma sara ye mẹẹ.

³⁴ Devidi ḅe amụ ori iwo So mu-a ḅẹ sọ ọ̀ ḅẹẹm: KỊNỊNYANAḄỌ ḅe ị̀ Nyanaḅọ ḅe ḅẹẹm: Ị̀ ama-ḅara anga lẹgị-simee mịanga

³⁵ nwenii à si kẹ ị́ tọn apụ mamgba kẹ ị́ ḅụọ gbana ịkasiye sọma.

³⁶ “Ọkọẹrẹsị, ọmịnị Izirẹlịapụ mamgba nimi na-iḅim, mịnẹ ḅị Jizọsị ḅe, tẹ ọ́ kẹ ẹngbẹsẹ sịn ḅụ ḅakụ ḅọ ḅe, anị gbọrụḅọ ḅe, anie Tamụnọ kẹ KỊNỊNYANAḄỌ na Mẹsaya na mịẹ tẹ ḅọ ḅee!”

³⁷ Tomi ma ḅo miemẹ naa sakị ịna aḅioḅẹngbọ kpọma ịna ḅụụ-fụkamam, tẹ ịn nwẹnị Pita na osi afịrịmẹnjịapụ ma na ḅẹẹ, “Mịna apụ, mịọkụ wa ndẹndẹ mịẹ ḅẹ?”

³⁸ Pita nwẹnị ịn ḅẹẹ, “Sime ḅọ, sime ḅọ amịna asi ḅụ pịkịị, tẹ Jizọsị Kịrayịsị ẹrẹ ḅụ minji sara-a, anị sakị Tamụnọ ọmịna asi ma wẹrịso ọ́ pịrị ḅa; tẹ ọ́ pịkị Tamụnọ ḍiepịrịye mẹ nyana ḅa, anie Fịafịa Tẹmẹ ḅee.

³⁹ Tamụnọ minini ye mẹ sime ọmịnị na, ọmịna awọmẹ na, pịkị ala-jụ simearị apụ tẹ wa Nyana Tamụnọ ḅe sịn amịna ḅụụ pịrịarị apụ mamgba pịrịm.”

⁴⁰ Pita paa pịkị anị ịna ḅụụ sọ-mu ḅẹ ḅara kẹ ẹkwẹn kụrọma ịn pịrị tẹ ịn ḅẹẹm, “Si sịḅịḅio sụa apụ la ḅẹ ḅoarị fomu-ḅara mẹ, ọmịnị ọmịnị inetẹ ḅara, inetẹ ḅara mịẹ tẹ anị ọ́ lama.”

⁴¹ Tẹ ini ḅẹ tọnwa-apụ nwẹnị ò ḍuko ye mẹ minini tẹ minji sara, tẹ anị gbọrụ ene mẹ ḅụ kịnị sọnọma ẹndẹ oyia asi finji ịna ḅụụ sọm.

⁴² Tẹ ịn nwẹnị mu-mu tẹ fịrịmẹnjịapụ ma ḅara ye ḍawọ, tẹ pịkị ini na sọ tẹ ịn mịẹ ye mịẹ ye mịẹ, gboloma fịye mẹ na tẹkẹ na ḅụ sọ.

Jizọsị Minini Apụ Ma Ịna Ogboku Anga Ḅara

⁴³ Tamụnọ fịrịmẹnjịapụ ma ḅụụ ḅọrọ tẹ tọnwa ḅụụ-buama-aị na, ḅụụ-gbiripuma-aị na kọrị, kọrị tẹ ḅẹḅọ-ḅẹḅọ ḅalafaam.

⁴⁴ Jizọsị minini apụ mamgba gbọrụ ḅụ sime tẹ pịkị ịn nyana ye, nyana ye kẹ jụmọ-jụmọ na ḍiyam.

⁴⁵ Kiri na jaị na nyana apụ arị dẹrị tẹ igbigi mẹ kẹ ḅo inimgba ogboku koroma tẹ ini ọrụḅọ-ọrụḅọ ḅụụ-fụka sime-ḅara ḍiki tẹ ḅarasụa mḅọ pịrịm.

⁴⁶ Ene gbarịma-a ḅara ịn nwẹn kẹ Tamụnọ-warị mẹ ḅio gbọrụ ogbo ḅẹ apụ ḅara kẹ kobirim, tẹ nwẹnị ini anga awarị ḅụ ye fị, ḅioḅẹlẹ na ḅụụ-iderima aḅioḅẹngbọ na ḅụ.

⁴⁷ Sakị mamgba ịn Tamụnọ tokinim, tẹ tomi pịkị in ḍiki ḅioḅẹlẹm. Tẹ ene goyegoye KỊNỊNYANAḄỌ ḅe pịkị ọ̀ ḅọrọma ḅẹ apụ kẹ ịna ogbo suum.