Fịrịmẹnjịapụ 19 - FỊAFỊA BAỊBỤLỤ

Pọlụ Mu Ẹfisọsị Lam

¹ Apọlọsị Kọrịntị ḅụ simearị sakị Pọlụ anị iri ma ḅụ piri ọgọnọ-jụ ḅụ ḅọrọ mu Ẹfisọsị lam. Anịjụ ọ̀ nwẹnị Jizọsị ḍukamẹnjịapụ ḅẹ ja apụ ẹrị,

² tẹ ịn gbela, “Ó ḅo minini apụ sọ sakị, ó gbeke Fịafịa Tẹmẹ ḅe daa-ọkị?” Ịn nwẹnị pakịrị, “Fịafịa Tẹmẹ nwẹn-sịn ye emi ḅara sọ jen sakị amụ wa naa-a.”

³ Pọlụ nwẹnị in gbela, “Ọkọ kụma ọ́ nwẹnị tọ-ḅara sime minji ḅara sara?” Ịn nwẹnị pakịrị, “Jọnị minji-sara.”

⁴ Pọlụ nwẹnị ḅẹẹ, “Jọnị minji-sara mẹ sime amịna si ḅụụ pịkị tẹ apụ pịrịm; tẹ ori Izirẹlịapụ ḅẹẹm mịnẹ ini ori ọḅụjụ ḅoarị ḅo ḅe minini, anie Jizọsị.”

⁵ In miemẹ naa tẹso, ịn nwẹnị KỊNỊNYANAḄỌ Jizọsị ẹrẹ ḅụ minji-sara.

⁶ Tẹ Pọlụ ḅara kẹ ịna ọgọnọ gbana tẹ Fịafịa Tẹmẹ ḅe ḅo ịna ọgọnọ gbanam; tẹ ịn kịrị aḅẹlẹ kẹ ẹkwẹn tẹ Tamụnọ Oku mẹ ḍuko-pakamam.

⁷ Inimgba kịẹn-ḅịḅị oyi maa apụ finji pembe ye.

⁸ Tẹra akalụ na gbasịye Pọlụ nwẹn kẹ ama-warị mẹ ḅio mu, mu tẹ ḅalafa-a ḅara kẹ ẹkwẹn tomi ma pịrịm, ọ̀ pịkị Tamụnọ Ama-da mẹ gboloma ye kẹ ini na ḅịḅị-ọkịyam, ịn ḍụkụ tẹ minini ḅarị ḅoto.

⁹ Kụma ịna ḅụ sịḅị-kụrọma tẹ minini ḍụkụ-a apụ sime tẹ inweni-mgba tọrọkọ ḅụ KỊNỊNYANAḄỌ ḅe Etela mẹ ḍuko-simam. Pọlụ nwẹnị ịn wẹrịso tẹ minini apụ ma na mu ene ḅaa ene, ḅaa ene Tiranọsị nwẹn-sịn ye-tolumaḅọ warị ḅio ini na ḅịḅị-ọkịya.

¹⁰ Bebe maa akụra mamgba ọ̀ nwẹn kẹ mị-ḅara mịẹm, anie mịẹtẹ Esiya ḅụ sime apụ mamgba, anị ḅọrọ Juu-ḅẹ-apụ-o, Ja asịẹ ḅẹ apụ-o, KỊNỊNYANAḄỌ ḅe ẹkwẹn mẹ naa famam.

Sikiva Owiapụ-Awọmẹ Ma

¹¹ Tamụnọ Pọlụ ḅụ ḅọrọ tẹ jene-jene kịnị amụ ẹrị-a ḅụụ-buama akọrịnama kọrịm.

¹² Ori ankịsị na ọ̀ kẹ ori ekpe kikimatẹ so ḅịtẹ na sọ ini ọkị mu obiapụ lama tẹ ịn gwọm; tẹ ịna ḅụụ ḅio sime si-atẹmẹ sọ paka-som.

¹³ Juu-ḅẹ-apụ ma ḅẹ ja apụ tẹ kịnị ḅụụ ḅio si-atẹmẹ dee-siin kọrịnama kọrị gotẹ mẹnjịma, mẹnjịma sime apụ sọ KỊNỊNYANAḄỌ Jizọsị ẹrẹ kẹ anị kọrị ḅẹ ḍọkịm. In si-atẹmẹ ma ḅẹẹm, “Pọlụ ḍuko pakamarị Jizọsị ḅe ẹrẹ ḅụ à tọn ọ́ pịrịarị.”

¹⁴ Sọnọma owiapụ-amịnapụ, tẹ Juu-ḅẹ Sịḅịda-Agbamịẹḅọ Sikiva nwẹn-sịn ḅọ awọmẹ anie miemẹ mịẹ sime ye.

¹⁵ Kụma si-tẹmẹ ḅe nwẹnị ịn ḅẹẹ, “À Jizọsị nimi wararị, à pịkị Pọlụ gbolomaye nimi wararị; kụma ọmịnị ḅọrọ tọ apụ?”

¹⁶ Si-tẹmẹ ḅe ḅụụ ḅio sime ḅọ ḅe nwẹnị owu kẹ ịn paka kụrọma tẹ inimgba nẹngịma. Ịn nwẹnị tomḅọ ḅe warị ḅụ mangị kẹ so. Ye ịn lam, tẹ ịna akapa sọ ọ̀ kan siinm.

¹⁷ Ẹfisọsị ḅụ sime Juu-ḅẹ-apụ na, Ja asịẹ ḅẹ apụ mamgba na miemẹ naa tẹ ḅalafaam; tẹ ịn nwẹnị kụn kẹ KỊNỊNYANAḄỌ Jizọsị ẹrẹ mẹ pịrị tarị ḅara nẹngịma.

¹⁸ Tẹ minini apụ ma ḅẹ tọnwa-apụ paka-ḅo inweni-mgba tọrọkọ ịn mịẹ tẹ asi minini tẹ ḍuko pakamam.

¹⁹ Majịkị mịẹ-mịẹ tọnwa-apụ ịna gotẹ aḍiri kobiri ḅo gbọrụ anga sara tẹ inweni-mgba tọrọkọ arị dọkịmam. Ini ọkọ kẹ dọkịma aḍiri mamgba la ye seleḅa pakịrị sonio apuku na sọnọa ẹndẹ na.

²⁰ Mị kụrọ nyanatẹ ḅara mẹ mie KỊNỊNYANAḄỌ ḅe ẹkwẹn mẹ kẹ wasama tẹ pịkị lolo tọrọkọ-tọrọkọ mu ḅara.

Ẹfisọsị Ama Gbolokim

²¹ Mịna aị ma mịẹ ḅọrọ tẹso, Pọlụ nwẹnị tọn kụrọma mịnẹ ọ̀ Masidoniya na Akaya na ḅio tolu-ḅọrọ mu Jeruselemu la ḅa. Ọ̀ ḅẹẹm, “Arị anịjụ la tẹ ḅẹḅẹ, mịẹ ḅara, mịẹ ḅara à Romu sọ ẹrị ḅa.”

²² Mie ḅụ ọ̀ nwẹnị ḅarasụa ọ̀ pịrị apụ ma ḅẹ maa apụ, Timoti na Ịrasịtọsị na, kẹ Masidoniya fịrịma, tẹ ori nwẹnị Esiya ibe ḅụ paa sime tọrọkọ mu.

²³ Mị sakị mẹ ḅụ KỊNỊNYANAḄỌ ḅe Etela mẹ ḅụ ḅo ye Ẹfisọsị ḅụ opu ḅẹrẹ pakamam.

²⁴ Seleḅa-tẹmẹḅọ Dẹmitirọsị nwẹn-sịn gbọrụḅọ, seleḅa kẹ Atemisi nwẹn-sịn oru-awarị kịkama tẹmẹ-tẹmẹm, tẹ ọ̀ kọrịnama mẹ kpọma sọye mịẹ namakọrịapụ ma pịrị pịrịm.

²⁵ Mie ḅụ ọ̀ nwẹnị inimgba na ịna kọrịnama mẹ kịka kọrịnama kọrị, kọrị apụ na sịn kobiri tẹ ịn ḅẹẹ, “Owiapụ, ọmịnị sọ nimi ḅara ḅụ mị kọrịnama mẹ mie wa kẹ kọn-arị ye.

²⁶ Ḅie ịn kẹ Pọlụ sịn-arị ḅọ ḅe ḍuko na mịẹarị aị na, ọmịnị ẹrị tẹ pịkị naa tẹẹ, mịnẹ tomi ḅara kẹ tẹmẹ atamụnọ gbala-gbala tamụnọ-a. Tẹ ọ̀ pịkị tọnwa atomi ẹkwẹn pịkị tẹ mị Ẹfisọsị mẹ ḅụ na kẹlẹ-fa bebe Esiya ibe mẹmgba na ḅụ.

²⁷ Ọkọ kụma, anị ḅụ simearị siye anie, mie wamịna kọrịnama mẹ si ẹrẹ fị ḅa. Anie ngẹrị-a, jen siye tẹ anị ḅụ simearị ye anie, Atimisi opu oru ḅe warị mẹ, ḅo papaaye sọ ḅa, tẹ ori opu mamgba fa fama ḅa, anie Esiya ḅụ sime ḅọ, sime ḅọ na bebe tomikiri mẹ na sunsin pịrịarị oru ḅe.”

²⁸ Tomina-ogbo mẹ mịna ẹkwẹn ma naa sakị ịn ḅarị inetẹ ịna ḅụụ ọlọ-a, tẹ ịn nwẹnị oloku, “Ẹfisọsị ḅẹ Atimisi, ị́ ḍụḅam!”

²⁹ Oloku mẹ kụrọ mẹ bebe ama mẹ gbolokim. Tẹ ịn mu Pọlụ na mẹnjị sime Masidoniya ḅẹ maa apụ, Gayọsị na Arisitakọsị na, kun mu tii kọn warị mẹ ḅio suum.

³⁰ Pọlụ sọ ḅarana paka tomi ma dama-mu ḅẹ ḅiim, kụma minini apụ ma ḍụkụ-a.

³¹ Tẹ ori ikiapụ ḅẹ ja apụ, tẹ anị ibe mẹ ḅụ kụrọ ḅara ḅụ simearị apụ, sọ ḅịḅị fịrịmam mịnẹ ini ọ̀ tẹkẹm ọ̀ sịḅị toluma ma tii-kọn-warị mẹ ḅio.

³² Mie mịẹarị sakị bebe kobiri mẹ woko-wokoarị, tọnwa-apụ in go mu kobiri ye sọ nimi-a, gbọrụ apụ mie olokuarị sakị, osi apụ jen olokuarị.

³³ Juu-ḅẹ-apụ ma Alẹkịzanịda kẹ ịna tọrọkọ-tarịma ye gotẹ ja apụ ọkịm ori ḅẹrẹ mẹ pakamam. Ọ̀ nwẹnị ḅara kẹ in dedema tẹ ọ̀ ḅụụ ḍụa ḅẹ ḍọkị.

³⁴ Kụma in ḅo lekirim mịnẹ ori Juu-ḅẹ ḅọ ḅẹẹ sakị, inimgba nwẹnị gbọrụ-ḅịḅị ḅụ oloku, “Ẹfisọsị ḅẹ Atimisi, ị́ ḍụḅam!” Miemẹ ịn kẹ sule pẹlẹ-a nwenii maa awa lam.

³⁵ Anị ḅẹ kunoma ama ḍiri-kẹẹḅọ ḅe nwẹnị inetẹ tomi ma deinma, tẹ ḅẹẹ, “Ị̀ ama ḅẹ Ẹfisọsị ḅẹ apụ! Mị Ẹfisọsị mẹ anie opu Atimisi warị mẹ na So-ḅio koro ḅo tọn-tọn ḅara sime ḍụḅarị mẹ na ḍikiḍikiarị yọ mẹ nimi-a ḅọ ofori.

³⁶ Inetẹ mịna aị ma piki-pikiḅọ ofori ẹrẹsị, ọmịnị ọmịna ḅụụ deinmaa, tẹ oloko bala-a mịẹye mịẹ ma.

³⁷ Mịọkụ ọ́ kẹ mịanga ḅo wararị atomi ma amụ ini oru awarị ḅio furu-a, amụ ịn pịkị ḅịḅị kẹ wamịna oru ḅe lama-a.

³⁸ Demitirịyọsị na ori anama-kọrịapụ na ḅẹrẹ kẹ sịḅị ḅụ sẹịn ḅẹ ḅọ emi-emii, wa kọkọ ama ḍikiḍiki apụ na ḅẹrẹ kọn, kọn ene ma na nyana wararị, ini inetẹ mu anịanga ịn kẹ mḅọ sịḅị sẹịn-arị aị ma ḍuko finji ḅa.

³⁹ Ọkọ nẹngịtẹ ọmịnị ịgbanịarị ye emi-emii ama kobiri inetẹ anị ḍuko pẹlẹ ḅa.

⁴⁰ Kẹ gotẹ ọkọ ḍukoarị, mịmgba nwẹn paka ye mẹ, ini inetẹ anị gotẹ ama fiema oloko kẹ wa ọlọ ḅa. Wa gotẹ nwẹn kẹ woko-woko ḅẹ ye ofori, wa pịkị gbọrụ iḅiye tẹ wa gotẹ ọkọ mịẹ ye sọ ḍuko ḅịa.”

⁴¹ Ò miemẹ ḍuko fama tẹso, ori ịn ḅẹẹ tẹ ịn gala-galam.