Fịrịmẹnjịapụ 15 - FỊAFỊA BAỊBỤLỤ

Jeruselemu Ḅẹ Kobiri Mẹ

¹ Judiya ḅụ sime tẹ so Anịtọkụ mu ja atomi saakị ye kẹ Jizọsị minini apụ ma toluma tẹ ḅẹẹm, “Ọmịnị inetẹ ḅọrọma nyana ḅịa ó Mozizi Oloko ḅii ḅara ḅụ ọmịna atarị-ḅụụ sin sikima tẹ.”

² Pọlụ na Banabasị na anị kẹ ini na kpọma ye-nụnụa lamam. Mie ḅụ ịn nwẹnị tọn-pẹlẹ mịnẹ Pọlụ na, Banabasị na, Anịtọkụ ḅẹ sọsị ḅẹ apụ ma ḅẹ ja apụ na mu mie mẹ kẹ Jeruselemu ḅụ fịrịmẹnjịapụ ma na omongiapụ ma na laa.

³ Sọsị mẹ mie ịn fịrịma pakama ye, tẹ ịn nwẹnị Fonisiya na Sameriya na ḅụ mẹnjị-ḅọrọ, tẹ ḍuko ịn pịrị mịnẹ Ja asịẹ ḅẹ apụ ma pịkị tẹ Tamụnọ minini tẹ ḅara; mie mẹ nwẹnị kpọma minini apụ ma ḅioḅẹlẹma.

⁴ In mu Jeruselemu la sakị sọsị mẹ iḅiọkụ ịn daa-ọkịm anie fịrịmẹnjịapụ ma na omongiapụ ma na, tẹ ịn Tamụnọ ịna ḅụụ ḅọrọ tẹ kọrị aị ma ḍuko pịrị apụ ma.

⁵ Kụma minini apụ ma ḅụ Farịsiiapụ ogbo mẹ ḅẹ apụ nwẹnị saakị tẹ ḅẹẹ, “Ja asịẹ ḅẹ apụ ma ini ịna atarị-ḅụụ sin tẹ wa pịkị ịn ḅẹẹ ḅa in Mozizi Oloko mẹ kokoo.”

⁶ Fịrịmẹnjịapụ ma na omongi apụ ma na nwẹnị mie mẹ gotẹ kobiri.

⁷ Ịn kpọma anị kẹ ẹkwẹn alama tẹso, Pita nwẹnị saakị tẹ ḅẹẹ, “Ị̀ amịnapụ, ó nimi ḅara ḅụ, alatẹ sakị ḅụ Tamụnọ ọmịna ogboku ị̀ sẹlẹm à mu Iḅi Oku mẹ ḍuko Ja asịẹ ḅẹ apụ ma pịrị, mịẹtẹ ini inetẹ naa tẹ minini ḅẹ ḅara.

⁸ Tẹ Tamụnọ, ọrụḅọ-ọrụḅọ akuroma nimi ḅọ ḅe, Ja asịẹ ḅẹ apụ ma daa-ọkị ye mẹ ḍie-pakamam, ori ọ̀ Fịafịa Tẹmẹ ḅe kẹ wa pịrị gbọrụ ḅara mẹ kẹ ini sọ pịrị ḅụ.

⁹ Wamịnị na ini na ogboku ọ̀ kịrị pakama-a, in mininim ẹrẹsị ori ịna si-wẹrịso ịn pịrịm.

¹⁰ Mie ḅụ, ó tiegotẹ Tamụnọ daaḍiki ḅẹ ḍọkịarị, tẹ wamịna atẹngịapụ ma na wamịnị na sọ inetẹ dogi-a ikuye mẹ kẹ mịọkụ minini apụ ma ponoma ḅẹ ḍọkịarị?

¹¹ Ọmịnị ọkọ mịẹ ma! Wa mininim tẹ KỊNỊNYANAḄỌ Jizọsị ḍiki-ḅụụjịrị mẹ ḅụ ḅọrọmam, anị gbọrụ ḅara mẹ mie anị sime ini sọ pịrị ḅara.”

¹² Anịtẹso Pọlụ na Banabasị na ḅo Tamụnọ ịna ḅụụ ḅọrọtẹ Ja asịẹ ḅẹ apụ ma ogboku kọrị ḅụụ-buama-aị na, ḅụụ-gbiripuma aị mamgba na, ḍukoarị sakị, inweni-ogbo mẹ nwẹnị yaụ-sime tẹ poki.

¹³ Ini ẹkwẹn fama tẹso, Jemusị ẹkwẹn pakama tẹ ḅẹẹm: “Mịnapụ, ọmịnị ì pokii!

¹⁴ Sayịmọnị tarị ḍuko wa pịrị ḅọrọma tẹ mịnẹ Tamụnọ kẹ wa ḍie tẹ, ọ̀ wẹrịtẹ Ja asịẹ ḅẹ apụ ma sọ balarị ḅara, tẹ ịna ogboku kịnị pakama-ḅo tẹ, sime ọ̀ pịrị ḅẹ apụ.”

¹⁵ Ịkịankoroapụ ma ẹkwẹn ma miemẹ na gbọrsịḅị gberie mịẹ tẹ. Anie Fịafịa Ḍiri mẹ ḅẹẹarị ḅara,

¹⁶ KỊNỊNYANAḄỌ ḅe mẹẹ, miemẹ ḅọrọ saakị à pịkịma ḅo tẹ Devidi ama-da mẹ saakị sịẹma ḅa. Anị ḅụ kaan-sara tẹ anga ma à sin nama tẹ mịẹ kụrọma ḅa.

¹⁷ Tẹ anie ḅụ, kirikọn atomi mamgba ị̀ ḍọkụma-ḅo ḅa, Ja asịẹ ḅẹ apụ mamgba tẹ à sịnm ḅo ị̀ atomi sọ ḅẹ apụ ma.

¹⁸ Iḅere-iḅerea kụra-ḅio miemẹ kẹ tomi ḍie KỊNỊNYANAḄỌ ḅe ḅarana ọkọ ḍukom.

¹⁹ Jemusị paa ẹkwẹn tọrọkọ mu tẹ ḅẹẹm, “Ọkọẹrẹsị mie ị̀ ḅịḅị, mịnẹ wa Ja asịẹ ḅẹ apụ ma tẹ pịkị Tamụnọ da tẹ apụ ma ḅụụ-fụkama ma.

²⁰ Anie nakara wa mịẹ na-iḅi ye, wa ḍiri kẹẹ ịn fịrịma ḅa, mịnẹ ịn ḅarị ịn kẹ oru pịrị tẹ ẹrẹsị fịafịa-a fịye fị ma; ịn pịkị ịna aḅụụ kẹ kura-a ḅara ḅụ owiapụ na ereme na gboloma ma ḅọrọ amịẹaị mịẹ ma; ịn fangala ḅaa tẹ nama na ibirim na pẹị ma.

²¹ Anịngẹ-kụraḅio ama-awarị ma ḅio, Ịnyọsara-Ene goyegoye ḅụ, ịn Mozizi Oloko mẹ goarị, tẹ pịkị anị ḅụ sịẹ tẹ ẹkwẹn-arị ama, ama ḅụ.”

Ịn Kẹẹ Tẹ Kẹ Ja asịẹ Ḅẹ Apụ Tẹ Jizọsị Minini Apụ Ma Fịrịma Ḍiri Mẹ

²² Anịtẹso fịrịmẹnjịapụ ma na, omongiapụ ma na, bebe sọsị ogbo mẹ na nwẹnị tọn-pẹlẹ mịnẹ ịn kịnị sẹlẹ Pọlụ na Banabasị na ḅụụ sụa tẹ ịn kẹ Anịtọkụ fịrịma ḅa. Ịn sẹlẹ apụ, Judasị, ịn kẹ Basabasị sịn ḅọ ḅe na, Sayịlasị na; ini maa apụ mamgba minini apụ ma kpọma ịn kẹ ye sịnm.

²³ Ịn kẹ ịna ḅara fịrịma ḍiri mẹ mie anị: “Wamịnị, fịrịmẹnjịapụ ma na, omongiapụ ma na, ọmịna amịnapụ ma, ḅii-ḅịḅị kẹ ọmịnị wamịna mịnapụ tẹ Ja asịẹ ḅụ paka apụ tẹ Anịtọkụ na, Siriya na, Silisiya na ḅụ angarị apụ mamgba fịrịmarị.

²⁴ Wa naam, mịnẹ wamịna ḅụ ḅẹ ja apụ ḅo kọn ọ́ pịrị ẹkwẹn ọmịna ḅụụ-fụkama tẹ pịkị ọmịna ḅioḅẹngbọ pikirima tẹ; wa ọkọ sime fịrị kẹ ịn fịrịma-a.

²⁵ Anie ḅụ wa sịḅị gbolomatẹ kịnị sẹlẹ wamịna iḅi ikia apụ Banabasị na Pọlụ na ḅụ sụa tẹ kẹ ọ́ fịrịmarị,

²⁶ anie Wanyanaḅọ Jizọsị Kịrayịsị fịrị mẹ gotẹ amịna ḍumo sọ kẹ ye-sịn-a apụ ma.

²⁷ Ọkọẹrẹsị wa Judasị na Sayịlasị na kẹ ọ́ fịrịmarị, ini pịkị ḅịḅị kẹ ḍiri mẹ ḅio wa kẹẹ koroma gbọrụ aị ma ḍuko ọ́ pịrị ḅa.

²⁸ Fịafịa Tẹmẹ ḅe na wamịnị na ḅịḅị-kẹ-ogbosọ ḅụ wa iku ó ponoma ḅẹ ye kẹ ọmịnị ọgọnọ gbana ḅịa, mịna koko na-iḅi oloko ma sikima:

²⁹ ịn kẹ oru pịrị tẹ fịye ọ́ fị ma; ọmịnị ibirim pẹị ma; fangala ḅaa nama ọ́ pẹị ma; ọ́ pịkị owiapụ na ereme na kura-a ḅara kẹ gboloma ma ḅọrọ amịẹaị mịẹ ma. Ọ́ ma ma mịẹ-a kụma, ye ọmịnị na iḅi ḅa. Iḅitẹịn kuroma wa nwẹn nyana ọ́ pịrịm.”

³⁰ Ini oku mu apụ ma fịrịma pakama tẹ in mu Anịtọkụ lam, tẹ ịn nwẹnị anịanga ḅụ bebe minini apụ ma ogbo mẹ sịn kobiri tẹ ḍiri mẹ kẹ ịn pịrị.

³¹ Tomi ma ḍiri mẹ go tẹso, anị ḅio sime ḅiokpọma oku mẹ nwẹnị ịna ḅioḅẹlẹma.

³² Tẹ Judasị na Sayịlasị na, ini ma sọ ịkịankoroapụ ḅara ḅụ, nwẹnị nangwọ sakị ọkị tẹ ini na ẹkwẹn tẹ ḅiokpọ na ịnyọ na kẹ ịn pịrị.

³³ Tẹ ini anịanga kẹlẹ sime tẹso, minini apụ ma nwẹnị dein na mu kẹ ịn ḅẹẹ tẹ ịn nwẹnị pịkịma so ịn fịrịma apụ dama-mu. [

³⁴ Kụma Sayịlasị ḅiim ori anịanga sime]

³⁵ Pọlụ na Banabasị na paa Anịtọkụ ḅụ kẹlẹ sime tẹ tọnwa ja apụ na sọ tẹ ye toluma tẹ pịkị KỊNỊNYANAḄỌ ḅe ẹkwẹn mẹ kọnm.

Pọlụ Na Banabasị Na Puam

³⁶ Sakị kẹlẹ ḅọrọ tẹso, Pọlụ nwẹnị Banabasị ḅẹẹ, “Yee wa pịkịma mu mịnapụ ma tẹ ama, ama ḅụ wa KỊNỊNYANAḄỌ ḅe ẹkwẹn mẹ kọn pịrị tẹ apụ ma ẹrị, tẹ ye ini na simearị ḅara ḍọkị nimi.”

³⁷ Tẹ Banabasị ḅiim in Jọnị Makị kẹ ịna ḅụụ sụa mu,

³⁸ kụma Pọlụ ḅẹẹm ini ori na mu mẹ iḅi ḅịa. Ò gotẹ ọkọ ḅẹẹ ye, in tarị ori na mu ogbo ori ini na sime mu tuma-a tẹ Pamụfiliya ḅụ in koroma tẹ pịkị-som.

³⁹ Ịn kpọma miemẹ nụnụa lamam, tẹ anị ḅẹ kunoma ịn nwẹnị pua. Banabasị Makị ọkị tẹ Sayịpụrọsị mum,

⁴⁰ tẹ Pọlụ nwẹnị Sayịlasị sẹlẹ-ọkị so; tẹ minini apụ ma nwẹnị KỊNỊNYANAḄỌ ḅe ḍiki-ḅụụjịrị karị ịn pịrị,

⁴¹ tẹ ọ̀ nwẹnị bebe Siriya na Silisiya na ḅụ mu ịnyọ kẹ sọsị ma pịrị.