Fịrịmẹnjịapụ 10 - FỊAFỊA BAỊBỤLỤ

Pita Na Kọnilọsị Na

¹ Anị sakị ḅụ Romu ḅẹ ọmụ-ogbo tẹ ịn kẹ “Italị Ọmụ-ogbo” sịn ye mẹ sịḅịdaḅọ, Kọnilọsị nwẹn-sịn ḅọ simem Sizariya ḅụ.

² Ori Tamụnọ nimi tomḅọ, tẹ ori na ò bebe warị-kpo mẹmgba na sakị mamgba Tamụnọ tẹkẹ tẹkẹm. Ọ̀ pịkị ḅẹlẹma ḅarasụa Juu-ḅẹ igoin-apụ pịrị, pịrịm, tẹ sakị mamgba Tamụnọ tẹkẹ, tẹkẹm.

³ Gbọrụ ene ḅụ,, tẹra so ḅiri ḅụ, ọ̀ nwẹnị ḍawọ-jụ pembe ḅara, ḅụ Tamụnọ enjẹlị ẹrị, ò ḅo gbọịnma ori ẹrẹ sịnm, “Kọnilọsị!”

⁴ Ḅalafa ḅụ ọ̀ nwẹnị tọrụ finji gegema tẹ enjẹlị ḅe ḍiki tẹ ḅẹẹ, “Ị̀ Nyanaḅọ, tiye paka?” Enjẹlị ḅe nwẹnị ọ̀ pakịrị, “Tamụnọ ị́ atẹkẹ naa tẹ; ḅarasụa mịẹ ḅẹ ọkụ ofori apụ pịrị akọrịnama ma tẹ ị́ kọrịarị aị ma sọ ori ẹrị tẹ, tẹ arị ó ḅioḅẹlẹmarị ọ̀ pịkị tẹlẹma tẹ í boma ḅẹ tẹ.

⁵ Mịọkụ kịnị kẹ Jọpa fịrịma in mu Sayịmọnị Pita nwẹn-sịn ḅọ sịn ḅo.

⁶ Anị ama nama oju apara tẹlẹma kọrịnama kọrịarị, tẹ ịn kẹ Sayịmọnị sịn-arị ḅọ, warị mie ọ̀ bịan wararị ye, tọrụ akaka mie ọ̀ warị simearị ye.”

⁷ Enjẹlị ḅe so tẹso, Kọnilọsị nwẹnị ọ̀ warị ḅẹ fịrịmẹnjị maa apụ na ò suku-ḅio sime, Tamụnọ nimi wararị tẹ ò ḍikiḍikiarị apụ ma ḅẹ gbọrụ ọmụḅọ na, sịn tẹ

⁸ ye paka ḅara ḍuko ịn pịrị tẹ ịn kẹ Jọpa fịrịma.

⁹ Anị ḅẹ ene-ḅaa ḅụ oku mu apụ ma mu Jọpa mẹ kpeki sakị, Pita sọ pịkị mu warị isun ọgọnọ eneḅaka ogbo ḅẹ tẹkẹ kọn ḅẹ mu tẹ.

¹⁰ Ḅuru ọ̀ tarị tẹ ò ye fị ḅẹ ḍọkịarị, tẹ in fịye mẹ sọarị ogbo, ọ̀ nwẹnị mono-a ḅara kẹ ḍawọ.

¹¹ Ori ẹrịm so finji tẹ inia ịkọlị nyana gbọrụ ye koro-ḅoarị, gbala kịnị anị ọlọ tụkụma tẹ iderima kiri-ḅio koromarị ye pembe ḅara.

¹² Tẹ anị ḅio kịrị-kịrị anama na, ikiriarị aị na, So-tọrụ ḅẹ afeni na emi.

¹³ Tẹ gbọrụ pọkọ nwẹnị ọ̀ ḅẹẹ, “Pita, saakịị; ḅaa tẹ pẹị!”

¹⁴ Kụma Pita ḅẹẹm, “KỊNỊNYANAḄỌ, gbala-gbala ọkọ-a, jene-jene pilema tẹ ye, anịanịa fịafịa-a ye amụ ị̀ ḅịḅị la-a.”

¹⁵ Pọkọ mẹ nwẹnị sin ẹkwẹn ọ̀ pịrị, “Tamụnọ mịẹ fịafịama tẹ ye kẹ fịafịa-a ye sịn ma.”

¹⁶ Tẹra asakị anị nwẹn kẹ ọkọ mịẹm, anịtẹso ịn nwẹnị anị ọkị pịkịma iwo so mu.

¹⁷ Pita ori ẹrị ye mẹ fiearị ye kẹ ḅiokoromarị sakị, Kọnilọsị kẹ fịrịma apụ ma Sayịmọnị warị mẹ gbela nimi tẹ ḅo warị mẹ ḅẹ onu-ḅọkọ la tẹ.

¹⁸ Ịn nwẹnị gele pọkọ kẹ gbela, “Mị warị Sayịmọnị Pita nwẹn-sịn igoniḅọ emi?”

¹⁹ Pita paa ori ẹrị ye mẹ fiearị ye nimi ḅẹ ḍọkịarị ogbo Tẹmẹ ḅe ọ̀ ḅẹẹm, “Pokii! Tẹra apụ mịanga emi, ini ị́ ḍọkịarị.

²⁰ Tẹlẹma tẹ koro mu tẹ sarasarama ini na soo, ḅio maaịn, maaịn tọn nyana ma, kẹ gotẹ ọkọ ḍukoarị, yẹrị ịn kẹ fịrịmam.”

²¹ Mie ḅụ Pita nwẹnị koro mu tẹ tomi ma ḅẹẹ, “Yẹrị anie ọ́ ḍọkịarị tomḅọ ḅee. Ndẹẹ ó ḅo ḅara?”

²² Ịn nwẹnị pakịrị, “Ọmụ-alaḅọ Kọnilọsị wa kẹ fịrịmam. Ori ḅe iḅi tomḅọọ, pịkị Tamụnọ tẹkẹarị ḅọ, tẹ Juu-ḅẹ-apụ mamgba sọ kẹ ye-sịn lama wararị ḅọ. Tamụnọ enjẹlị ọ̀ ḅẹẹm ori ị́ sịn ọ̀ warị ḅoo, tẹ í ḍuko ḅẹ ye pokii.”

²³ Pita nwẹnị tomi ma sịn warị suu, tẹ ịn ḅẹẹ tẹ ini anịanga mono ene-ḅaamam. Anị ḅẹ ene-ḅaa ḅụ ọ̀ tẹlẹma tẹ ini na mum, tẹ Jọpa ḅụ sime Jizọsị minini apụ ma ḅẹ ja apụ sọ ọ̀ ḅụụ sọ tẹ mum.

²⁴ Anị ḅẹ ene-ḅaa ḅụ in mu Sizariya la sakị, Kọnilọsị na, ori amịnapụ na, ọ̀ sịn ḅo ọ̀ ḅụụ yela ikiapụ na dẹẹ tẹ in koruarị.

²⁵ Tẹ Pita warị mẹ sọ mu ḅẹ-yearị ogbo Kọnilọsị nwẹnị mu ọ̀ la, tẹ ò suku kparakị tẹ sịḅị-tuu ọ̀ pịrị.

²⁶ Kụma Pita nwẹnị ọ̀ nụnụ saakị tẹ ḅẹẹ, “Saakị sịẹ, yẹrị ḅe sọ kọkọ tomḅọ.”

²⁷ Pita ẹkwẹn Kọnilọsị pịrị ma warị mẹ sọ-muarị sakị, ori ẹrịm warị ḅio tọnwa-apụ dẹẹ wararị.

²⁸ Ọ̀ nwẹnị ịn ḅẹẹ, “Ọmịnị sọ ḅarana nimi lama ḅara ḅụ, Juu-ḅẹ-ḅọ, ọ̀ Tamụnọ nimi ḅara sime-ḅara ḅụ, ḅo Ja asịẹ ḅẹ apụ ẹrị-ẹrịa, pịkị ini na gboloma nyana, nyana-a. Kụma Tamụnọ kẹ ì ḍie tẹ mịnẹ à fịafịa-a, anịanịa piletẹḅọ kẹ gbọrụḅọ-sọ sịn ma.

²⁹ Anie mịẹtẹ ị́ fịrịma ị̀ sịn sakị à nụnụa-a tẹ ḅom. Arị í gbelarị, í tiegotẹ ị̀ sịn ḅo?”

³⁰ Kọnilọsị nwẹnị ọ̀ ḅẹẹ, “Tẹra aḍin ḅọrọtẹ sakị ḅụ, paa nwẹn pembe sakị, tẹra so ḅiri ḅụ, arị ị̀ warị ḅio sime tẹ tẹkẹarị ogbo, ḅịyarị kapa sụa gbọrụḅọ nwẹnị ḅo ị̀ tọrọkọ sịẹ.

³¹ Ọ̀ nwẹnị ḅẹẹ, ‘Kọnilọsị, Tamụnọ ị́ tẹkẹ naa tẹ, pịkị ị́ kẹ mịẹ ḅẹ ọkụ ofori apụ mịẹarị iḅi mẹ sọ ẹrị tẹ.

³² Fịrịma mu Jọpa ḅụ Sayịmọnị Pita nwẹn-sịn ḅọ sịn ḅoo, ori igoni kẹ tọrụ akaka anga tẹ nama oju apara tẹlẹma kọrịnama kọrịarị, Sayịmọnị nwẹn-sịn ḅọ, warị bịan wararị.’

³³ Anị gbọrụ sakị ḅụ mie à kịnị kẹ ị́ fịrịma ye, ị́ pịkị kẹ ye-sịn tẹ ḅo ḅara iḅi lamam. Mịọkụ ị́ nwẹn wa ẹrị ḅara mẹ, wamịnị-mgba Tamụnọ tọrọkọ emi tẹ KỊNỊNYANAḄỌ ḅe ị́ fịrịma tẹ í ḍuko wa toluma ḅẹ ye koruarị.”

Pita kọn Ẹkwẹn

³⁴ Pita nwẹnị saakị ẹkwẹn: “Karakara-ḅara-ḅụ mịọkụ mie à nimi tẹ ye mịnẹ Tamụnọ gbọrụ ḅara mie ọ̀ kẹ tomḅọ nwẹn sịn tẹ tomḅọ ọkịarị.

³⁵ Ḅẹḅọ-ḅẹḅọ tẹ Tamụnọ tẹkẹarị, tẹ karakara mịẹarị ḅọ, mḅọ paka anga, paka anga sọ, ori mḅọ daa-ọkịarị.

³⁶ Tamụnọ kẹ Izirẹlịapụ fịrịma oku mẹ, tẹ Jizọsị Kịrayịsị, kịnị mamgba Nyanaḅọ ḅe ḅụ ḅọrọ tẹ ḍuko wasamarị dein Iḅi-Oku mẹ, ọ́ paa nimi tẹẹ.

³⁷ Anị opu mịẹye mẹ tẹ bebe Izirẹlị sịẹ mẹ kana-koro ye mẹ, anie Jọnị minji sara Oku mẹ ḅọrọ tẹso, Galili ḅụ saakị ye mẹ, ó nimi tẹ.

³⁸ Nazarẹtị ḅẹ Jizọsị ḅe gbolomaye mẹ, anie Tamụnọ ọ̀ Fịafịa Tẹmẹ ḅe na kụrọ na kẹ ori ọgọnọ ọsụma sara ye mẹ sọ, ó nimi tẹ. Ò mu la-a anga ofori, tẹ iḅi mịẹ, pịkị Ekwesu ḅe kẹ omoni sọma sime apụ ma gwọm, Tamụnọ ori Jizọsị ḅe na emi ẹrẹsị.

³⁹ Wa tọrụngbọ kẹ bebe Izirẹlị sịẹ mẹ na Jeruselemu mẹ na ḅụ ọ̀ mịẹ ye, mịẹ ye ẹrịm. Anịtẹso ini ọ̀ kẹ ẹngbẹsẹ-sịn ḅụ ḅakụ ḅaam.

⁴⁰ Kụma tẹra aḍin karama ene ḅụ Tamụnọ fịị ḅụ ọ̀ saakịma tẹ mịẹtẹ tomi ori ẹrịm,

⁴¹ ḅẹḅọ-ḅẹḅọ ori ẹrị-a, kụma wamịnị Tamụnọ sẹlẹ wẹrịm ori ẹrị nwẹn ḅẹẹ apụ ma ori ẹrị tẹ pịkị ọ̀ fị-ḅụ-saakị tẹrẹmẹ ori na fị-na-ḅuu-nam.

⁴² Ori tọn wa pịrịm mịnẹ wa Iḅi-Oku mẹ ḍuko tomi pịrịị, tẹ pịkị mịẹtẹ in nimi mịnẹ ori anie Tamụnọ kẹ ḍumo wararị apụ na fịtẹ-apụ na kọn ḅẹ ḅọ sọma tẹ ḅọ ḅee.

⁴³ Ịkịankoroapụ mamgba ò gbolomaye ḍukom, mịnẹ ò minini ḅọ, minini ḅọ ini mḅọ asi wẹrịso mḅọ pịrị ḅa, ori ẹrẹ mẹ ḅẹ kụrọ ḅụ.”

Ja asịẹ Ḅẹ Apụ Ma Fịafịa Tẹmẹ Ḅe Nyanam

⁴⁴ Pita paa ẹkwẹn-arị ogbo Fịafịa Tẹmẹ ḅe koro ḅo ò poki sime apụ mamgba ọgọnọ gbanam.

⁴⁵ Juu-ḅẹ-apụ tẹ Jizọsị minini apụ ma, tẹ Jọpa ḅụ Pita ḍuka-ḅo apụ ma nwẹnị ḅụụ-bua, mịnẹ Tamụnọ Fịafịa Tẹmẹ ḅe ḍiepịrịye mẹ ịn kẹ Ja asịẹ ḅẹ apụ sọ pịrị tẹ.

⁴⁶ Gbala ịn naam in jene amụ ịn naa-a ama ḅẹ aḅịḅị kẹ ẹkwẹn tẹ Tamụnọ opu mẹ tokinim. Pita nwẹnị ẹkwẹn pakama:

⁴⁷ “Mịna apụ ma Fịafịa Tẹmẹ ḅe nyana tẹ, wamịnị sọ nyana gbọrụ ḅara mẹ. Mie ḅụ tiye pịkị ịn kiki ḅẹ minji kẹ ịn sara ḅụ?”

⁴⁸ Mie ḅụ ọ̀ nwẹnị tọn tẹ in Jizọsị Kịrayịsị ẹrẹ ḅụ minji kẹ ịn saram. Anịtẹso ịn nwẹnị ḅii mịnẹ ori ini na boowa aḍin simee.