Fịrịmẹnjịapụ 1 - FỊAFỊA BAỊBỤLỤ

¹ Tiyofịlọsị, ì iḅi-ḅọ: À tarị kẹẹ ḍiri mẹ ḅio Jizọsị kọrị aị na ò toluma aị na gboloma aị mamgba à kẹẹ koroma famam, ọ̀ tarị saakị ọ̀ kọrịnama kọrị sakị ḅụ,

² ọkị mu Tamụnọ ori ọkị iwo so mu sakị la. Tẹrẹmẹ Tamụnọ ori ọkị iwo so mu, ọ̀ tarị Fịafịa Tẹmẹ ḅe kụrọ ḅụ ọ̀ sẹlẹ-ọkị afịrịmẹnjịapụ ma mịẹ ḅẹ aị tọn ịn pịrịm.

³ Ọ̀ fịị tẹso, ḍin amesi ọ̀ nwẹn kẹ tọnwa sakị kẹ ḅụụ pakama-pakama in ḍiem, kẹ mịẹtẹ in nimi mịnẹ, piki-pikiye-ofori ḅara ḅụ, ò ḍumo wararị. Ini ori ẹrị tẹ ọ̀ pịkị ini na Tamụnọ Ama-da mẹ gboloma ye ḍukom.

⁴ Tẹ ịn ḅo kobiri tẹso, ọ̀ mị oloko mẹ sụa ịn pịrịm: “Ó Jeruselemu koroma-so ma, tẹ koru nwenii tẹ Ḍaḅọ ḅe minini ọ́ pịrị tẹ à ḍuko ọ́ pịrị ye mẹ ḅo ọmịna ḅara la sakị la.

⁵ Jọnị papaa minji kẹ ọ́ saram, kụma boowa aḍin sakị ḅụ ịn Fịafịa Tẹmẹ ḅe kẹ minji kẹ ọ́ sara ḅa.”

Tamụnọ Jizọsị Ọkị Iwo So Mum

⁶ Fịrịmẹnjịapụ ma na Jizọsị na ḅo gboloma tẹso ịn nwẹnị ò gbela: “KỊNỊNYANAḄỌ, mie ị́ Ama-da mẹ saḅama Izirẹlị pịrị ḅẹ sakị mẹ anị?”

⁷ Jizọsị nwẹnị ịn ḅẹẹ: “Ị̀ Ḍa anie sakị mẹ na mịẹ ḅẹ aị ma na kụrọ nyanaḅọọ. Anị ọmịna kiri-a mịna aị ma mịẹ ḅẹ sakị nimi.

⁸ Kụma Fịafịa Tẹmẹ ḅe ḅo ọmịna ọgọnọ gbana sakị, kụrọ ọmịna ḅụụ ḅio ḅin tẹ, ó Jeruselemu ḅụ na, Judiya ḅụ na, Sameriya ḅụ na, bebe tomikiri mẹ ḅụ na ị̀ ḅụụ ḅẹ aḅẹrẹ ma ḍuko-ḍuko tomi pịrị ḅa.”

⁹ Ò miemẹ ḍuko fama tẹso, Tamụnọ nwẹnị ori ọkị iwo so mu, tẹ oḅuto nwẹnị ḅo ọ̀ gbaịn-koro, tẹso, ịn ḅarị ori ẹrị-a.

¹⁰ Ori so tẹ ini paa bio-bioma So-tọrụ ḍikiarị ogbo, abịlala ḅiri maa atomi, ḅiotọn-a ḅara, kẹ ḅo ịna akaka sịẹ tẹ

¹¹ ịn ḅẹẹm, “Galili ḅẹ apụ, ó tiegotẹ anịanga sịẹ tẹ So-tọrụ ḍikiarị? Ḅị gbọrụ Jizọsị ḅe tẹ Tamụnọ ọmịna ḅụ ọkị so mu tẹ ḅọ ḅe, ọ̀ pịkịma ḅo ḅa, ọmịnị ori ẹrị tẹ ori iwo so mu gbọrụ ḅara mẹ ḅụ.”

Judasị Kiri Ọkị Ḅọ

¹² Anịtẹso ịn nwẹnị Olivu Tụndụ mẹ ḅụ pịkịma-so Jeruselemu mu, etela mẹ gbọrụ tombi pembe ye kẹ opu ama mẹ ḅụ ḅelem.

¹³ Ini opu ama mẹ ḅio sọ sakị ịn nwẹnị iwo mu in sime-sime warị mẹ ḅẹ ḅio mẹ sọ, Pita na, Jọnị na, Jemusị na, Anduru na, Filipu na, Tọmọsị na, Batolomiyo na, Matiyo na, Alịfịyọsị tụḅọ Jemusị na, Sayịmọnị, Ama ḅẹlẹmaḅọ ḅe na, Jemusị tụḅọ Judasị na.

¹⁴ Sakị sakị ḅụ ịn gbarịma-a ḅara kẹ gboloma tẹ tẹkẹ tẹkẹm, ereme ma na, Jizọsị iyingi Meri na, ori owiapụ-amịnapụ ma na sọ ịna ḅụ simem.

¹⁵ Boowa aḍin ḅọrọ tẹso, Jizọsị minini apụ ma, kịnị sonioa si pembe ye, nwẹnị kobiri, tẹ Pita nwẹnị saakị sịẹ tẹ ẹkwẹn.

¹⁶ Ori mẹẹ, “Ị̀ amịnapụ, Fịafịa Ḍiri mẹ Devidi ḅụụ ḅọrọ tẹ kẹẹ ye mẹ paka tẹ, anie Fịafịa Tẹmẹ ḅe Judasị, kịnị kẹ mu tẹ in Jizọsị kun ḅọ ḅe, ḅụụ ḍukoye mẹ.

¹⁷ Ori Judasị ḅe, ò ḍumo wararị sakị, wamịna ḅụ ḅẹ gbọrụḅọọ, gbala ori na wamịnị na anie Jizọsị sẹlẹ tẹ kẹ mị fịrị mẹ pịrị ye.”

¹⁸ (Judasị, ò si ḅọkọ ḅụ nyana ḅo igbigi kẹ kiri fẹm, anị ḅụ anie ọ̀ ḅịkị-koro tẹ fịị ye. Ọ̀ nwẹnị sun kanakana tẹ kan, tẹ ò furo ḅẹ ịla mamgba sara paka-ḅo.

¹⁹ Jeruselemu ḅụ sime tẹ miemẹ naa-a ḅọ ofori, anie ịn pịkị gotẹ ịna ama ḅẹ ḅịḅị ḅụ Akalịdama kẹ anị sịn ye, anie fiearị ye “Ọmbie Kiri.”)

²⁰ Kẹ gotẹ ọkọ ḍukoarị Devidi Nume ḍiri ḅio anị kẹẹ koro wararị, Yee ọ̀ warị ḅio sime aị mamgba faa, yee gbọrụḅọ-sọ anị ḅio anga ma. Anị pịkị kẹẹ koro wararị, Yee jụmọ ọ̀ kọrịnama kiri ọkị.

²¹ “Ọkọẹrẹsị, anị mịẹ na-iḅi ye mịnẹ wa wa Nyanaḅọ Jizọsị wamịna ogboku sime tẹ wamịnị na sọ na, paka na sime kụra-ḅio sime gbọrụḅọ sẹlẹ,

²² anie Jọnị minji-sara ḅụ saakị mu Tamụnọ Jizọsị kẹ iwo so mu sakị la, tẹ mḅọ wamịna ḅụụ sọ tẹ KỊNỊNYANAḄỌ Jizọsị fị-ḅụ-saakị ye mẹ ḍuko tomi pịrị.”

²³ Anịtẹso ịn nwẹnị maa apụ gotẹ, Josẹfụ (ịn pịkị Basabasị na Josịtọsị na sọ kẹ ọ̀ sịn sịnm) na Matayasị na.

²⁴ Anịtẹso ịn nwẹnị tẹkẹ, “KỊNỊNYANAḄỌ, anie tomi kuromarị aị mamgba nimi ḅọ, mịna maa apụ ma ḅụ ị́ sẹlẹ-ọkị tẹ ḅọ kẹ wa ḍie, tẹ mḅọ

²⁵ Judasị anị gbẹẹ-a ẹrẹsị koroma tẹ mu ọ̀ gbẹẹ anga mu tẹ ḅọ ḅe kiri mẹ ọkị, fịrịmẹnjịḅọ ḅara ḅụ.”

²⁶ Anịtẹso ịn nwẹnị maa apụ ma kẹ apịan sụa, tẹ anị nwẹnị Matayasị ọlọ, tẹ ịn nwẹnị ọ̀ kẹ oyi gbọrụḅọ finji ma ḅụ sụa.