Filipayị 4 - FỊAFỊA BAỊBỤLỤ

Ịn Mịẹ Ḅẹ Aị

¹ Ọkọẹrẹsị, ị̀ amịnapụ, ọ́ kpọma ị̀ ḅụụ yela lamam, anie à pịkị ó gotẹ ḅio-sẹsẹarị ḅara! Ọ́ kẹ ì ḅioḅẹlẹmarị ye ḅakam, anịsakị à pịkị ọ́ kẹ ḅụụ-tọn lamarị. Ị̀ iḅi amịnapụ, miemẹ ẹrẹsị, KỊNỊNYANAḄỌ ḅe ḅụ ọ́ kọn-arị ḍumo mẹ ḅụ ọ́ sịẹ-kụrọ na-iḅim.

² Yodiya na Sinitiki na, sisi àrị ọ́ tẹkẹm, KỊNỊNYANAḄỌ ḅe ḅụ, mịnapụ ḅara ḅụ, ọ́ ḅụụkụrọma tẹ gbọrụ-ḅịḅị-fie.

³ Ị́yẹrị sọ, ị̀ na gbọrụ ḅụ kọrịnama kọrịarị karakara tomḅọ, à ḅiiarị ị́ ḅarasụa mịna ereme ma pịrị. Kẹ gotẹ ọkọ ḍukoarị, ini ị̀ ḅụ sọ tẹ kpọma kụrọ kọrịnama kọrị tẹ, iḅi-oku mẹ ḍuko wasama mẹ ḅụ, Kịlẹmẹtị sọ ịna ḅụụ sọm, na osi wamịnị na kọrị gbolomarị apụ mamgba na, anie ẹrẹ Tamụnọ ḍumo wararị apụ ẹrẹ kẹ sụarị ḍiri mẹ ḅio emi apụ ma.

⁴ Sakị mamgba ó ḅioḅẹlẹẹ, ọ́ KỊNỊNYANAḄỌ ḅe na gbọrụ ḅụ emi ye mẹ ḅụ. À siin ḍukoarị, ó ḍerekuu!

⁵ Ó gbene ḅara kẹ ḅẹḅọ-ḅẹḅọ na mịẹ. KỊNỊNYANAḄỌ ḅe ḅo kpeki tẹ.

⁶ Ó gberie-sọ gotẹ ḅụụ-ḅalaḅala ma, kụma ọmịna tẹkẹ mamgba ḅụ, ọ́ Tamụnọ ḅara ọmịna ḅụụ-fụkamarị aị ma ḅii, tẹ sakị mamgba ịmịẹtẹ ḅẹẹarị ḅioḅẹngbọ kẹ ḅii.

⁷ Anịsakị, Tamụnọ, ò dein, tẹ tomina nimi saḅa ḅọrọ fa wararị ye mẹ, kẹ ọmịna aḅioḅẹngbọ na ọmịna akuroma na koko kpaịnma ḅa, Kịrayịsị Jizọsị na gbọrụ ḅụ sime ḅụ.

⁸ Kunoma ye, ị̀ amịnapụ, ọmịnị arị iḅi-aị ma tẹ tokini gbẹẹ aị ma kẹ ọmịna akuroma ḅụ sụa ḅinmaa: arị aị ma tẹ karakara na, iḅi-yemịẹ-ḅara na, kura na, fịafịa na, ḅụụ-ḅẹlẹma na, pịkị kụn na nyana wararị aị ma.

⁹ Ọmịnị ị̀ ḅara ḍawọ tẹ aị ma na ọ́ daa-ọkị tẹ aị ma na, anie arị ẹkwẹn ọ́ pịrị tẹ aị ma, à mịẹ tẹ aị ma na ḅụ, ọ́ kẹ mịẹye ḅụ suu. Tẹ dein kẹ wa pịrịarị Tamụnọ ḅe ọmịnị na sime ḅa.

Pọlụ Ịn Kẹ Ọ̀ Pịrị Ye Ḅẹ Ịmịẹtẹ Ḅẹẹarị

¹⁰ À Kịrayịsị na gbọrụ ḅụ sime ḅụ kọn-arị ḍumo mẹ ḅụ, anị kpọma opu ḅioḅẹlẹma ye sọ ị̀ pịrị tẹ, mịnẹ ḅọkọ pịkị sin foo ọ́ pịrị tẹ ọmịnị, ọmịnị ị̀ balarị nwẹn ḅẹẹ ye ḍie-pakamarị ye mẹ. À fie-a mịnẹ ọ́ ḅarị ị̀ bala ḅẹ ḅii-a — anị sime-ḅara, amụ ọ́ ḅọkọ ẹrị tẹ anị ḍie-pakama-a.

¹¹ Anịsakị àrị ọkịarị ọmịnị ì ḍiki-tọrụsin tẹ ḅẹ ẹrẹsị à miemẹ ḍuko-a, kẹ gotẹ ọkọ ḍukoarị, àrị à nyana ye ị̀ na iḅi ḅẹ ḅara ḍawọ tẹ.

¹² Ye tomḅọ na kụrọ-kụrọ na, tomḅọ ye nyana wama na fiearị ye à nimi wararị. À mị ḅọị ye mẹ nimi tẹ, mịẹtẹ, à sime anga, sime anga sọ, ḅẹẹ-sakị ḅẹẹ-sakị sọ, ị̀ na iḅi wararị, à fị furo ḅinma-o, ḅuru ị̀ tarị-o, à nyana wama-o, ịrụ ḅaka ye-o, ị̀ ḅụ ḅẹrẹ-a.

¹³ Kịrayịsị kẹ ị̀ pịrịarị kụrọ ḅụ, àrị ịnyọ nyana tẹ kẹ ḅo ị̀ laarị aị mamgba da-tolu ḅa.

¹⁴ Kụma ọ́ mịẹ iḅi ḅakam, ị̀ ḅụụ-fụka ma ḅụ ọ́ nyana ị̀ pịrị ḅarasụa mẹ ḅụ.

¹⁵ Ọmịnị Filipayị ḅẹ apụ, ó nimi lama wararị ḅara, à tarị Iḅi Oku mẹ ḍuko ma-ḅọrọ sime ene ma ḅụ, à Masidoniya ḅụ sime tẹ so sakị, ọmịna sọsị ngẹrị mie ḅarasụa ị̀ pịrị apụ; ọmịnị ngẹrị mie ị̀ na sọ tẹ ị̀ asọaị ma na fa ma na nyana apụ.

¹⁶ Gbọrụ sakị nẹngị ye ọ́ nwẹn kẹ ḅarasụa ị̀ pịrịm à Tẹsalonika ḅụ simearị tẹ ye ị̀ ḅụụ-fụkama sakị; ọ́ kẹ ị̀ sẹmam.

¹⁷ Anị fie-a mịnẹ à ḍiepịrị-aị ḅiiarị; anie nakara, à ḅiiarị mịnẹ arị ọ́ mịẹ ye mẹ ḅẹ sọye kẹ sụa ọ́ pịrị.

¹⁸ Ọkọẹrẹsị, mie gbala ḅọrọ ọ́ kẹ ị̀ pịrị ye goyegoye ḅo ị̀ ḅara la tẹ nwẹn ḅẹẹ ḍiri. Anị waa ḅara sime tẹ! Ẹpaforoditosị da ḅo ị̀ pịrị ḍiepịrị-aị ma mịẹtẹ mịọkụ ị̀ ḅụụ-fụkamarị aị mamgba à nyana fama tẹ. Arị kịkarị ye anie, iḅiọkụ kụnụarị dọkịma-agba tẹ mịẹ Tamụnọ pịrị ye, ọkị na-iḅi tẹ ò ḅioḅẹlẹmarị ye.

¹⁹ Tẹ ọ̀ Kịrayịsị Jizọsị ḅụ ḅọrọ tẹ kọn sara wararị mana-mana ngọ mamgba ḅụ, ị̀ Tamụnọ ḅe ó ḅiiarị aị mamgba kẹ ọ́ pịrị ḅa.

²⁰ Ebube sime wamịna Tamụnọ, pịkị Ḍaḅọ, ḅe pịrị mu ḅẹẹ-sakị ḅẹẹ-sakị la! Amẹnị.

Kunoma Ḅii-ḅịḅị

²¹ Ọ́ Tamụnọ atomi ma tẹ Kịrayịsị Jizọsị ḅụ simearị apụ ḅụ gbọrụḅọ, gbọrụḅọ ḅii. Mịnapụ ma tẹ ị̀ na mị anga simearị apụ ma ó ḅiim.

²² Tamụnọ atomi mamgba tẹ mịanga simearị apụ ma ó ḅiim, jen-a jen-a Romu Tomikiri mẹ daarị ḅọ ḅe warị ḅẹ apụ ma.

²³ Yee KỊNỊNYANAḄỌ Jizọsị Kịrayịsị ḅẹ ḍiki-ḅụụjịrị mẹ ọmịnị-mgba na sime.