Filipayị 1 - FỊAFỊA BAỊBỤLỤ

¹ Pọlụ na Timoti na, Kịrayịsị Jizọsị fịrịmẹnjịapụ ḅara ḅụ ḅom; Tamụnọ atomi mamgba tẹ Filipayị ḅụ Kịrayịsị Jizọsị na gbọrụ ḅụ simearị apụ ma pịrị ḍiri, ịna sịḅịdapụ na ḅarasụa ịn pịrịarị apụ sọ anị ḅụ emi:

² Yee Tamụnọ, wamịna Ḍaḅọ ḅe na, KỊNỊNYANAḄỌ Jizọsị Kịrayịsị ḅe na ḍiki-ḅụụjịrị na dein na kẹ ọ́ pịrị.

Pọlụ Kọọn Ò Ḍiri Mẹ Goo Ḅẹ Apụ Pịrị Tẹkẹ

³ Àrị ọ́ kẹ ḅiokoroma sakị goyegoye àrị ó gotẹ ịmịẹtẹ kẹ ị̀ Tamụnọ ḅẹẹarị;

⁴ tẹ à tẹkẹarị sakị goyegoye à tẹkẹ ọmịnị-mgba pịrịarị, tẹ ḅioḅẹlẹ ḅụ mie à pịkị tẹkẹarị,

⁵ anie à tarị ọmịnị na bịama ene ḅụ ọkị-ḅo mịmgba la ọ́ kẹ wẹrịtẹ iḅi-oku mẹ ḅẹ kọrịnama mẹ ḅụ ḅarasụa ị̀ pịrị tẹ ḅara gotẹ.

⁶ Tẹ à nimi lama wararị mịnẹ, ọmịna ḅụụ ḅio mị iḅi kọrịnama mẹ saakị Tamụnọ ḅe, ori anị kọrị nwenii mu Kịrayịsị Jizọsị Ene mẹ ḅụ anị kunoma ḅẹ sakị la ḅa.

⁷ Sakị mamgba ọmịnị ì ḅioḅẹngbọ emi! Anie à pịkị kuroma na-iḅi ḅara. Kẹ gotẹ ọkọ ḍukoarị, ọmịnị ị̀ na sọ tẹ mie Tamụnọ kẹ ị̀ pịrị wararị kụn mẹ ḅẹ fịrị mẹ mẹnjị tẹ, mịọkụ arị ikoli ḅio simearị sakị mẹ na, àrị ị̀ sịḅị tomḅọ ḅara kẹ iḅi-oku mẹ ḅẹ karakara mẹ ḍuko tẹ pịkị anị mịẹ kụrọma sime sakị mẹ na.

⁸ Tamụnọ nimi wararị, mịnẹ à karakaraye mẹ ḍukoarị, anie à ḅẹẹarị sakị mẹ mịnẹ à Kịrayịsị Jizọsị ḅioju ḅioḅẹngbọ ḅụ ḅo kpọma pokolotẹ iḅi tẹmẹ nyana ọmịnị-mgba pịrị wararị ye mẹ.

⁹ À tẹkẹarị mịnẹ ọmịna ḅẹlẹma mẹ ḍụḅa tọrọkọ-tọrọkọ mu, tẹ ọ́ pịkị karakara ye ḍawọ ḍin na ye ḅio lekiri na nyana,

¹⁰ mịẹtẹ ọmịnị inetẹ iḅitẹịn ye mẹ sẹlẹ-ọkị ḅarị ḅara. Anịtẹso fịafịa-a aị na tomi kẹ ọmịna sịḅị sẹịn ḅẹ aị na ọmịna ḅụ paka ḅịa ḅara Kịrayịsị Ene mẹ ḅụ.

¹¹ Karakara iḅi-yemịẹ-ḅara ọmịna ḍumo ḅụ ḅin ḅa, anie Jizọsị Kịrayịsị ngẹrị inetẹ pakama-ḅo tẹ kẹ ebube na tokini na kẹ Tamụnọ pịrịarị aị.

Ḍumo Anie Kịrayịsị

¹² Ị̀ amịnapụ, à ḅiiarị ó nimi, mịnẹ ị̀ ḅụụ paka aị ma ḅarasụa tẹ karakara-ḅara-ḅụ iḅi-oku mẹ kẹ tọrọkọ mu tẹ.

¹³ Anie mịẹtẹ sịḅịdaḅọ ḅe angarị anga mẹ ḍikiḍikiarị ọmụapụ mamgba na ja apụ tẹ mịanga simearị apụ mamgba na nimi wararị mịnẹ yẹrị Kịrayịsị fịrịmẹnjịḅọ mie à gotẹ mị ikoli-warị mẹ ḅio emi ye.

¹⁴ À sọ ikoli mẹ mịẹtẹ mịnapụ ma ḅẹ opu anga KỊNỊNYANAḄỌ ḅe ḅụ ḅiokpọ nyana ḅaka tẹ, anie mịẹtẹ ịn ḅiokpọ tọrọkọ-tọrọkọ muarị, tẹ sakị mamgba ḅalafa-a ḅara kẹ oku mẹ ḍukoarị.

¹⁵ Ye simearị ḅara ḅụ, ịna ḅụ ḅẹ ja apụ afana na kamụ-sọ na kẹ Kịrayịsị gboloma ye mẹ ḍukoarị, kụma osi apụ karakara iḅi ḅioḅẹngbọ ḅụ ḍukoarị.

¹⁶ Mịna apụ ma ḅẹlẹma ḅụ mie ini ọkọ mịẹarị, gbala in nimi wararị mịnẹ Tamụnọ iḅi-oku mẹ ḍụa kọrịnama mẹ kẹ ị̀ pịrị tẹ ẹrẹsị.

¹⁷ Osi apụ ma ịn karakara tẹmẹ kẹ Kịrayịsị ḍuko-pakama-a, kụma opu ḍọkị ḅụụ pịrị tẹmẹ mie ịn kẹ ḍukoarị; in kuromarị in jen ḅụụ-fụka kẹ sụa ị̀ pịrị ḅẹ ḅara, à simearị ikoli mẹ ḅio.

¹⁸ Anie ḅẹrẹ-a! Anị ì ḅioḅẹlẹmarị — ḅọkọ, ḅọkọ ḅụ ịn Kịrayịsị gboloma ye mẹ ḍukoarị sakị goyegoye, anị ḅọrọ kura-a ḅioḅẹngbọ ḅụ-o, kura ḅioḅẹngbọ ḅụ-o. Tẹ à paa ḅioḅẹlẹ-ḅẹlẹ-ḅẹlẹ ḅa,

¹⁹ gbala à nimi wararị mịnẹ ọmịna atẹkẹ na, Jizọsị Kịrayịsị Tẹmẹ ḅe ḅarasụa mẹ tẹ ḅo ị̀ laarị ye mẹ na ḅụ, ikoli mẹ ḅio à paka-ḅo ḅa.

²⁰ Àrị ì ḅioḅẹngbọ mẹmgba kẹ ḅii tẹ pịkị kẹ ị̀ tọrọkọ sịẹma wararị ye anie, à paa sime ị̀ pịrị kọrịnama mẹ kọrị-a ḅọ sọma; kụma sakị mamgba ḅụ, tẹ jen-a jen-a mị gbọrụ sakị mẹ ḅụ, ḅiokpọ ị̀ ḅụụ ḅio ḅin ḅa, mịẹtẹ ì bebe sime-ḅara mẹmgba ḅụ, à kụn dogi-ḅo Kịrayịsị pịrị anị ḅọrọ ḍumo tọrụ ḅụ-o, fịị ḅụ-o.

²¹ Anịsakị ḍumo ḅọrọ tiye? Yẹrị kịngẹ kụma, ḍumo anie Kịrayịsị. Ọkọẹrẹsị, fịị dogi-ḅo ḅẹ ye pịkị tẹịnm.

²² Kụma à paa ḍumo wararị tẹ à kọrị na-iḅi jen kọrịnama sime ị̀ pịrị wararị ḅẹḅẹ, ḍumo sime na fịị na ḅụ à sẹlẹ-ọkị ḅẹ ye amụ à nimi-a.

²³ Anị ḅo kịnị ama-ḅara na ere-ḅara na kẹ ị̀ nụnụarị ye kịka tẹ. À ḅii lamarị à mị tomikiri ḅẹ ḍumo mẹ koroma so mu Kịrayịsị na sime, anie iḅi osi ye nẹngị lamam;

²⁴ kụma ọmịna sịḅị gotẹ, anị kpọma kụrọ nyanam mịnẹ à ḍumo simee.

²⁵ Mie ḅụ à ḅio-maaịn-tọn nyana-a, anịẹrẹsị, à nimi ḅara ḅụ à sime ḅa. Àrị ọmịnị-mgba na sime tọrọkọ mu tẹ mịẹtẹ ọmịna minini ḅụ ọ́ tọrọkọ mu tẹ pịkị ḅioḅẹlẹma mu ḅa,

²⁶ mie ḅụ, à jen kẹ ḅo ọ́ la sakị, ó gotẹ ị̀ kẹ ḅụụ-tọn ḅẹ jen ye paka tẹ, Kịrayịsị Jizọsị na gbọrụ ḅụ sime ḅụ ọ́ kọn-arị ḍumo mẹ ḅụ.

²⁷ Mịọkụ kụrọ nyana wararị gberie emi, anie ọ́ kọn-arị ḍumo ḅara Kịrayịsị iḅi-oku mẹ ḅiiarị ḅara simee, mịẹtẹ arị inetẹ ḅo ọ́ la-o, arị inea-o, à paa naa ḅa mịnẹ ọ́ gbọrụ kuroma ḅụ sịẹ-kụrọ wararị, pịkị gberie ngẹrị nyana ḅẹ ḍọkịarị ḅioḅẹngbọ na kẹ iḅi-oku mẹ ḅẹ minini owu mẹ sọ gbolomarị.

²⁸ Ó si kẹ ọ́ tọn-arị apụ ma ḍiki-ḅalafa ma; sakị mamgba ó ḅiokpọ, miemẹ mịẹtẹ in nimi ḅa mịnẹ owu ịna ḅara si tẹ ọmịna ḅara iḅi ḅa, Tamụnọ anie owu-ḅara-iḅi kẹ ọ́ pịrịarị.

²⁹ Kẹ gotẹ ọkọ ḍukoarị, ịn fịrịmẹnjị Kịrayịsị pịrị kụn mẹ kẹ ọ́ pịrị wararị ḅẹ sakị, ọmịnị ọ̀ ḅụụ minini nyanam ngẹrị-a, kụma pịkị ò go tọrụsiẹrị na ḅụ.

³⁰ Mịọkụ ọmịnị inetẹ ị̀ ḅụ sọ tẹ ọmụ mẹ gbin ḅa. Ḅọrọ tẹ sakị ḅụ ọmịnị ị̀ ẹrị tẹ à gbin sime gbọrụ ọmụ mẹ, anie mịọkụ à paa gbin-arị tẹ ọ́ naarị ye mẹ.