Filimọnị 1 - FỊAFỊA BAỊBỤLỤ

¹ Pọlụ, Kịrayịsị Jizọsị sịḅị ẹrẹsị ikoli sọ wararị ḅọ ḅe, na wamịna iyimbere Timoti na ḅara ḅo, Wamịna ikiaḅọ pịkị wamịna pembema kọrịnama-kọrịḅọ Filimọnị na,

² ị́ warị kobiri-kobiri sọsị mẹ na, Afaya, wamịna ịyịmbara ma na, wamịna pembema ọmụḅọ Akịpọsi na pịrị ḍiri:

³ Yee Tamụnọ, wamịna Ḍaḅọ ḅe na, KỊNỊNYANAḄỌ Jizọsị Kịrayịsị na, ḍiki-ḅụụjịrị na dein na kẹ ị́ pịrị.

Filimọnị Ḅẹlẹma na Minini na

⁴ Mbire Filimọnị, à tẹkẹarị sakị goyegoye, arị í gotẹ sụa tẹ ịmịẹtẹ kẹ ị̀ Tamụnọ ḅẹẹarị.

⁵ Kẹ gotẹ ọkọ ḍukoarị, àrị ị́ nyana Tamụnọ atomi mamgba pịrị ḅẹlẹma na, KỊNỊNYANAḄỌ Jizọsị ḅụ ị́ nyana minini na gboloma ye naa tẹ.

⁶ Ị̀ tẹkẹ anie, minini apụ ḅara ḅụ, wa ọmịnị na nyana gboloma mẹ pokolo yefieye naa ọkị-ḅo ḅa ḅẹ boma, boma tẹ wamịna ḍumo ḅụ wa Kịrayịsị na gbọrụ ḅụ sime ye ḅụ nyana ye mẹ.

⁷ Ì iḅi mịnaḅọ, ị́ ḅẹlẹma mẹ opu ḅioḅẹlẹ na ḅakatẹ ḅiokpọ na dogi-ḅo ị̀ pịrị tẹ! Ị́ Tamụnọ atomi mamgba aḅioḅẹngbọ feke-fekema tẹ.

Ḅii Onisimọsị Pịrị Ye

⁸ Miemẹ ẹrẹsị, àrị inetẹ ḅiokpọmatẹ, Kịrayịsị ḅụ ị́ mịnaḅọ ḅara ḅụ, ị́ mịẹ ḅẹ ye tọn ị́ pịrị ḅa.

⁹ Kụma àrị ị́ ḅẹlẹmarị ẹrẹsị, tẹkẹ tẹ ḅii rẹ mie à mịẹarị. À miemẹ mịẹarị, tụkụmaye, yẹrị Pọlụ, Kịrayịsị ẹrẹ ḅụ sịẹ, sịẹ muarị ḅọ ḅe sọ, tẹ mịọkụ à pịkị ọ̀ sịḅị ẹrẹsị ikoli ḅio emi.

¹⁰ Mie ḅụ àrị Onisimọsị sịḅị ẹrẹsị ị́ ḅara ye ḅiiarị, anie Kịrayịsị ḅụụ ị̀ tụḅọ ḅe; kẹ gotẹ ọkọ ḍukoarị, àrị ikoli ḅio emi ogbo à tẹmẹ anga ḅẹ ḍa sọ ọ̀ pịrịm.

¹¹ Sakị ḅẹ gbọrụ sakị ḅụ, kẹ mịẹ-mịẹ ye ofori ḅara ọ̀ nwẹn sime ị́ pịrịm, kụma mịọkụ ọ̀ kẹ ye mịẹ, mịẹ ḅara ọ̀ nwẹn sime ị́yẹrị na yẹrị na pịrị tẹ.

¹² Mịọkụ àrị ọ̀ kẹ pịkị ị́ fịrịmarị, tẹ ì ḅioḅẹngbọ kẹ ori na sụa fịrịmarị.

¹³ À ḅiim àrị ọ̀ kẹ koroma tẹ ori ị̀ na mịanga sime, anie àrị iḅi-oku mẹ gotẹ ikoli ḅio emi sakị mẹ, mịẹtẹ ori í kiri ḍima tẹ ḅarasụa ị̀ pịrị ḅẹm.

¹⁴ Anị sime-ḅara, sime-ḅara sọ, à ḅii-a arị í ponoma tẹ ị́ ḅarasụa ị̀ pịrị; anie nakara à ḅii ḅa mịnẹ anị ḅarana í kuroma ḅio paka-ḅo ḅara kẹ ị́ mịẹ. Anie ḅụ à ḅii ḅịa mịnẹ à gberie mịẹ, ị́ ḅịḅị sọ-a ogbo.

¹⁵ Ẹbịsịya Onisimọsị gotẹ ị́ ḅụụ boowa sakị kẹ ḅele ye, ọ̀ pịkịma ḅo tẹ ị́ sakị mamgba kẹ ọ̀ nyana ḅẹ ḅara.

¹⁶ Tẹ mịọkụ ori ḅarị omoniḅọ kịngẹ-a; ò ḅo ḅụụ ḅụ yela mịnaḅọ sọ tẹ Kịrayịsị ḅụ. Ori ị̀ ḅụụ yela ye ḅakam! Tẹ ọ̀ kpọma pịkị ị́ ḅụụ ḅụ yela ḅaka ḅa, omoniḅọ ḅara na, KỊNỊNYANAḄỌ ḅe ḅụ ḅẹ mịnaḅọ ḅara na ḅụ!

¹⁷ Mie ḅụ, ị́ ị̀ kẹ ị́ jụ ḅẹ ḅọ ọkị-ọkịị, sin ọ̀ daa-ọkị warị suu, ị́ kẹ ị̀ daa-ọkị ḅarị gbọrụ ḅara mẹ.

¹⁸ Ò kura-aye kẹ ị́ mịẹtẹ ḅẹḅẹ, anịanịa ori ị́ ḅara fị saa emi-emii, anị kẹ yẹrị ị́ ḅara fị saa kịẹn.

¹⁹ Mịanga à ḅarana ị̀ ḅara kẹ kẹẹ ḅa: Yẹrị Pọlụ anị kẹ ị́ gbẹẹ ḅa. (Ye sime-ḅara ḅụ à kẹ í ḅio kuroma na-iḅi-a, mịnẹ í ḅioju anie ị́ ị̀ ḅara fị saa.)

²⁰ Mie ḅụ, ị̀ mịnaḅọ, sisi mị iḅi mẹ kẹ ị̀ mịẹ KỊNỊNYANAḄỌ ḅe sịḅị ẹrẹsị; Kịrayịsị ḅụụ ḅẹ mịnaḅọ ḅara ḅụ, ị̀ ḅioḅẹngbọ feke-fekemaa.

²¹ À ḅio-maaịn-tọn nyana-a, à miemẹ kẹẹarị sakị, mịnẹ à ḅiiarị ye mẹ ị́ ḍụkụ tẹ mịẹ ḅa — karakaraye ḍuko ḅụ, à nimi wararị mịnẹ ọkọ nẹngị ye sọ ị́ mịẹ ḅa.

²² Jen tẹ à ḍukoarị ye anie, sime-anga tẹlẹma ị̀ pịrịị, à ḅiokpọ wararị mịnẹ Tamụnọ ọmịnị-mgba kọn-arị atẹkẹ ma naa tẹ, ini ị̀ pakama-ḅo ị́ pịrị ḅa ẹrẹsị.

Kunoma Ḅii-ḅịḅị

²³ Ẹpafarasị, Kịrayịsị Jizọsị sịḅị ẹrẹsị, ị̀ na ikoli ḅio emi ḅọ ḅe, ḅii-ḅịḅị kẹ ị́ fịrịmam,

²⁴ ị̀ na sọ tẹ kọrịnama kọrịarị apụ ma — Makị na, Arisitakọsị na, Dẹmasị na, Luku na sọ ọkọ mịẹm.

²⁵ Yee KỊNỊNYANAḄỌ Jizọsị Kịrayịsị ḍiki-ḅụụjịrị ọmịnị-mgba na sime.