Ẹzịra 7 - FỊAFỊA BAỊBỤLỤ

Ẹzịra Ḅo Jeruselemu La Tẹẹ

¹ Mịna aị ma ḅọrọ tẹso, Atakịzazẹsị Pasịya ḅẹ Amadaḅọ ḅe ama-da sakị ḅụ Ẹzịra nwẹn-sịn gbọrụ owiḅọ simem. Ori anie Sẹraya owiḅọtụḅọ, Azaraya owiḅọtụḅọ, Hilikaya owiḅọtụḅọ,

² Salumu owiḅọtụḅọ, Zadọkụ owiḅọtụḅọ, Ahitubu owiḅọtụḅọ,

³ Amaraya owiḅọtụḅọ, Azaraya owiḅọtụḅọ, Mẹrahọtị owiḅọtụḅọ,

⁴ Zẹraya owiḅọtụḅọ, Uzi owiḅọtụḅọ, Buki owiḅọtụḅọ,

⁵ Abisụwa owiḅọtụḅọ, Finihasi owiḅọtụḅọ, Ẹlịyeza owiḅọtụḅọ, Erọnị Sịḅịda-Agbamịẹḅọ ḅe owiḅọtụḅọ.

⁶ Ḅị Ẹzịra ḅe Babịlọnị ḅụ som. Ori anie ḍiri-kẹẹḅọ tẹ Mozizi oloko mẹ tẹ KỊNỊNYANAḄỌ Izirẹlịapụ tẹkẹarị Tamụnọ ḅe pịrị ye mẹ nimi lama wararị ḅọ; gbala KỊNỊNYANAḄỌ ọ̀ Tamụnọ ḅe ḅara ori ọgọnọ emi ẹrẹsị Amadaḅọ ḅe ori ọ̀ ḅara ḅii aị mamgba kẹ ọ̀ pịrịm.

⁷ Atakịzazẹsị Amadaḅọ ḅe ama-da tẹ sọnọma kụra karama kụra ḅụ, Izirẹlịapụ ma ḅẹ ja agbamịẹapụ na, Livayị furo-ḅẹ-apụ na, nume-suapụ na, ogigo-aḅọkọ ḍikiḍikiapụ na, Tamụnọ warị ḅẹ afịrịmẹnjịapụ na sọ so Jeruselemu mum.

⁸ Tẹ Ẹzịra ḅo Jeruselemu lam, Amadaḅọ ḅe ama-da tẹ sọnọma kụra karama kụra mẹ ḅẹ sọnọ akalụ karama akalụ ḅụ.

⁹ Tarị akalụ mẹ ḅẹ tarị ene ḅụ ọ̀ Babịlọnị ḅụ saakị mẹnjịm tẹ sọnọ akalụ karama akalụ mẹ ḅẹ tarị ene ḅụ ḅo Jeruselemu lam, gbala ọ̀ Tamụnọ ḅe iḅi ḅara mẹ ori ọgọnọ emi ẹrẹsị.

¹⁰ Gbala ori ò ḅioḅẹngbọ kẹ KỊNỊNYANAḄỌ oloko mẹ ḍawọ pịrịm, tẹ anị mịẹ ḅẹ ḅiim, tẹ Izirẹlị ḅụ ori oloko ma tẹ kẹẹ wararị aị ma na, kụrọ-ḅara ḅio sime apụ oloko ma na toluma ḅẹ ḅiim ẹrẹsị.

Ḍiri Mẹ Tẹ Atakịzazẹsị Kẹẹ Kẹ Ẹzịra Pịrị Ye Mẹ

¹¹ Mịẹ ḍiri mẹ tẹ Amadaḅọ Atakịzazẹsị kẹẹ kẹ Ẹzịra agbamịẹḅọ ḅe, ḍiri-kẹẹḅọ ḅe, KỊNỊNYANAḄỌ ḅe tọn aị ma na, ori oloko ma tẹ kẹẹ tẹ kẹ Izirẹlị pịrị wararị aị ma ḍawọ ḍịn wararị ḅọ ḅe pịrị ye:

¹² “Atakịzazẹsị, Amadapụ Amadaḅọ kẹẹ kẹ Ẹzịra, Agbamịẹḅọ ḅe, So-ḅio ḅẹ Tamụnọ oloko mẹ ḅẹ ḍiri-kẹẹḅọ ḅe pịrị ye.”

¹³ “Mịọkụ àrị oloko sụarị mịnẹ Izirẹlịapụ ma ḅụụ ḅẹḅọ-ḅẹḅọ, anịanịa ịna agbamịẹapụ, anịanịa Livayị furo-ḅẹ-apụ tẹ ì ama-da kụrọ ḅio emi ḅọ tẹ so Jeruselemu mu ḅẹ ḅiiḅọ-ḅiiḅọ yee mḅọ ini na mu.

¹⁴ Kẹ gotẹ ọkọ ḅẹẹarị, Amadaḅọ ḅe na, ori na ḅịḅị ọkịarị sọnọma apụ ma na ị́ kẹ fịrịmam, mu ị́ Tamụnọ oloko mẹ tẹ ị́ ḅara-ḅio emi ye mẹ wẹrịtẹ sime-ḅara ḅụ Juda na Jeruselemu na sọkịrị tẹ gbela nimi,

¹⁵ tẹ pịkị seleḅa mẹ na, golu mẹ na tẹ Amadaḅọ ḅe na ori na ḅịḅị ọkịarị sọnọma apụ ma na kẹ kịnị tọn pịrị-a agba mịẹ Izirẹlịapụ tẹkẹarị Tamụnọ ḅe tẹ Jeruselemu ḅụ amịna sime anga nyana ḅọ ḅe pịrịị.

¹⁶ Pịkị seleḅa na, golu na tẹ bebe Babịlọnị ḅẹ itu mẹ ḅụ ị́ daa-ọkị aị ma na pịkị kịnị tọn pịrị-a agba mịẹ aị ma tẹ tomi ma na agbamịẹapụ ma na minini ịna Tamụnọ warị mẹ tẹ Jeruselemu ḅụ simearị ye mẹ pịrị aị ma sọ kẹ sụa muu.

¹⁷ Mị igbigi mẹ, ọ́ kẹ iḅiọkụ ọ́ fẹ ḅẹ owi-nambulo ma na, ejimina ma na, asambịrịma anana ma na, arịḅẹ mgbọlụ agba mịẹ aị na, arịḅẹ iru agba mịẹ aị na fẹ ḅa, tẹ ḅa tẹ ọmịna Tamụnọ warị mẹ tẹ Jeruselemu ḅụ simearị ye mẹ ḅẹ agbamịẹ-anga mẹ ọgọnọ agba mịẹ ḅa.

¹⁸ Ị́yẹrị na ị́ amịnapụ na ḅụụ iḅi tẹ ọ́ kirikọn seleḅa mẹ na, golu mẹ na kẹ mịẹ ḅẹ ye goyegoye ọ́ kẹ mịẹ ọmịna Tamụnọ ḅe wẹrịtẹ tọn ḅara ḅụ.

¹⁹ Ẹfẹrẹ ma tẹ ini Tamụnọ warị mẹ ḅẹ fịrị gotẹ kẹ ị́ pịrị tẹ aị ma ị́ kẹ Jeruselemu ḅẹ Tamụnọ ḅe tọrọkọ koroma ḅa.

²⁰ Anịsakị jen tẹ kẹ ọmịna Tamụnọ warị mẹ ḅụ ye mịẹ na-iḅi tẹ ó ḅii-ye ḅii-ye, Amadaḅọ ḅe ngọ warị ḅụ ọmịnị anị nyana ḅa.

²¹ Anịsakị yẹrị Atakịzazẹsị Amadaḅọ ḅe tọn kẹ Opu Tọrụ itu mẹ ḅẹ ngọ-kokoapụ mamgba pịrịm mịnẹ Ẹzịra agbamịẹḅọ ḅe, So-ḅio ḅẹ Tamụnọ ḅe oloko mẹ ḅẹ ḍiri-kẹẹḅọ ḅe ọmịna aḅara ḅii-ye ḅii-ye, ọ́ sakị fama-a ḅara kẹ arị kẹ ọ̀ pịrịị, ọkị mu

²² seleḅa pakịrị tẹra puku ofori puku amesi oyia ẹndẹ finji (300,000) la, witi fịlawa opu akpa mẹ ḅẹ sọnọa si pembe ḅara, iru inia tini ofori tini esenia si pembe ḅara, pulo pịkị inia tini ofori tini esenia si la, anịsakị fụn kụma ọmịnị anị la ḅẹ ḅara gbela ma.

²³ So-ḅio ḅẹ Tamụnọ ḅe tọnye-tọnye, yee anị ḅin tẹ ḅara kẹ mịẹ Ọ̀ warị mẹ gotẹ, anieofori ori ịganị ḅofa anị Amadaḅọ ḅe ama-da sakị mẹ na, ori owiapụ-awọmẹ ma na da-paka.

²⁴ Wa pịkị mịẹtẹ í nimiarị mịnẹ sịẹ kẹ jen sịẹ gbẹẹarị igbigi-o, fịrịma-ḅo ngọ sịḅị ḅẹ igbigi-o, anịanịa opu etela mẹnjị-ḅọrọ oso igbigi-o, agbamịẹapụ ma-o, Livayị furo-ḅẹ-apụ ma-o, nume-suapụ ma-o, anịanịa Tamụnọ warị mẹ ḅẹ ja afịrịmẹnjịapụ ma ḅẹ gbọrụḅọ ḅara ḅụ sọ ọkị ma.

²⁵ Anịsakị ị́yẹrị Ẹzịra, ị́ Tamụnọ ḅe nimi mẹ tẹ ị́ ḅụụ ḅụ simearị ye mẹ la ḅara ḅụ, ḅẹrẹtọn-apụ tẹ ị́ Tamụnọ ḅe oloko ma wẹrịtẹ sime-ḅara nimi apụ tọn, inima tẹ Tọrụ ọgọnọ ḅẹ itu mẹ ḅẹ atomi mamgba kọn ḅarị apụ, anịsakị oloko ma nimi-a apụ ma ị́ kẹ in toluma ḅa.

²⁶ Ḅẹḅọ-ḅẹḅọ tẹ ị́ Tamụnọ ḅe oloko mẹ koko-a, pịkị Amadaḅọ ḅe oloko mẹ koko-a ḅọ goḅọ-goḅọ yee in tọrụ pịkị ọḅụ ḍiki-a ḅara kẹ ḅẹrẹ-pẹlẹ mḅọ pịrị anị ḅọrọ fịị-o, ama ḅio mḅọ tọrụ fama-o, mḅọ ngọ ọkị, anịanịa mḅọ kẹ ikoli su sọ.”

Ẹzịra Tamụnọ Tokinim

²⁷ Boma sime KỊNỊNYANAḄỌ wamịna ḍapụ ma Tamụnọ ḅe pịrịị, oriḅe tẹ mị-ḅara mẹ sime ye kẹ Amadaḅọ ḅe ḅioḅẹngbọ ḅụ suu kẹ KỊNỊNYANAḄỌ ḅe warị mẹ tẹ Jeruselemu ḅụ simearị ye mẹ mịẹ iḅima ḅẹ ye mẹ;

²⁸ tẹ ò jike-a ḅẹlẹma sụn ḅo ì lam Amadaḅọ ḅe na, ori na ḅịḅị ọkịarị apụ na, Amadaḅọ ḅe ḍụḅatẹ opu afịrịmẹnjịapụ mamgba na tọrọkọ ḅụ. À ḅiokpọ nyanam, kẹ gotẹ ọkọ ḅẹẹarị, KỊNỊNYANAḄỌ ì Tamụnọ ḅe ḅara mẹ ì ọgọnọ emi ẹrẹsị, à nwẹnị Izirẹlị ḅụ ḅo tọrọkọ tarị apụ ma kobiri tẹ inina so.