Ẹzịra 6 - FỊAFỊA BAỊBỤLỤ

Sayịrọsị Tọn Ye Mẹ Siin Ḍọkị Paka-ḅo Tẹẹ

¹ Anieḅụ Darịyọsị Amadaḅọ ḅe nwẹnị tọn, tẹ in Babịlọnị ḅụ elemu aḍiri koko yọ mẹ ḅio in kẹẹ tẹ aḍiri koko wararị anga mẹ ḍọkịm.

² Kụma Ẹkịbatana, anie Midiya ḅẹ sịḅịda ama mẹ ḅio mịẹ in kẹẹ wararị ḍiri ḍọkị-ẹrị ye, tẹ anị ḅụ in kẹẹ wararị,

³ “Sayịrọsị Amadaḅọ ḅe ọ̀ tarị kụra ḅụ gbọrụ ḅẹrẹ tọnm: Jeruselemu ḅụ Tamụnọ warị mẹ gboloma ye, yee warị mẹ siin nama, ini agba mịẹarị, pịkị dọkịma-agba kẹ ḅoarị anga mẹ; anị inia si oyia aḅụọ-kuḅu finji (27 m) kẹ gele ḅa, pịkị inia si oyia aḅụọ-kuḅu finji (27 m) kẹ finjima ḅa.

⁴ Ḍụḅarị tẹra akpo goyegoye ḅụ gbọrụ oluku koroo; yee amadaḅọ ḍikiḍiki igbigi ḅụụ ini anị fị ḅarị igbigi mẹ gbẹẹ.

⁵ Yee Tamụnọ warị mẹ ḅẹ golu na, seleḅa na ẹfẹrẹ ma na, tẹ Nebukadineza Tamụnọ warị tẹ Jeruselemu ḅụ sime ye mẹ ḅio pakama ọkị tẹ kẹ Babịlọnị ḅo aị ma sọ, ini arị pịkịma Tamụnọ warị mẹ tẹ Jeruselemu ḅụ sime ye mẹ mu, tẹ gberie-gberie kẹ anị sime kiri ḅụ wẹrị; Tamụnọ warị mẹ ḅio ọmịnị arị kẹ koromaa.

Darịyọsị Tọnm Kọrịnama Mẹ Kọrị Tọrọkọ Mu

⁶ “Anịẹrẹsị, Tatẹnayị Opu Tọrụ mẹ akaka simearị ama ma ḅẹ gọvịna na, Sẹta-bozenayị na, ọmịnị Opu Tọrụ mẹ akaka simearị ama ma ḅẹ ḅẹrẹtọn-apụ na, mịọkụ ọ́ ḅụụ ḅelemaa;

⁷ Ọ́ mị Tamụnọ warị mẹ ḅẹ kọrịnama mẹ wẹrịsoo; yee Juu-ḅẹ ḅẹrẹtọnḅọ ḅe na, Juu-ḅẹ omongiapụ ma na siin mị Tamụnọ warị mẹ nama anị ḅẹ kiri ḅụ.

⁸ Anie sikima, arị ọ́ kọrị kẹ siin mị Tamụnọ warị mẹ nama ḅụ Juu-ḅẹ omongiapụ ma pịrị ḅẹ ye tọn ọ́ pịrị ḅa, kọrịnama mẹ la igbigi ḅin tẹ ḅara ḅụ, sakị fama-a ḅara kẹ ọmịnị anị kẹ mịna apụ ma gbẹẹ ḅa, amadaḅọ ḍikiḍiki igbigi ḅụ na Tọrụ ọgọnọ ḅẹ oso-igbigi mẹ na ḅụ.

⁹ Anịsakị Jeruselemu ḅẹ agbamịẹapụ ma kẹ dọkịma-agba mịẹ So-ḅio ḅẹ Tamụnọ ḅe pịrị ḅẹ ḅii-ye ḅii-ye — asambịrịma owi-nambulo, ejimina anịanịa anana; ịn kẹ witi sịn ye mẹ-o, fụn-o, iru-o, anịanịa pulo, yee gbarịma-a ḅara ọmịnị arị kẹ in pịrị, ene-ḅaaene-ḅaaene,

¹⁰ mịẹtẹ ịn kẹ ḅụụ ḅẹlẹma agba mịẹ So-ḅio ḅẹ Tamụnọ ḅe pịrị, tẹ tẹkẹ kẹ Amadaḅọ ḅe na, ori owiapụ-awọmẹ ma na ḍumo pịrị ḅẹ ḅara.

¹¹ À pịkị oloko sụarị, mịnẹ gbọrụḅọ mị oloko mẹ ḍima, ini mḅọ warị ḅụ oluku siin tẹ anị kịra tẹ kẹ mḅọ kpara ḅaa ḅa, tẹ mḅọ warị mẹ ini anị kẹ sara mịẹ ḅa.

¹² Yee Tamụnọ ḅe tẹ mịẹtẹ ori ẹrẹ anịjụ sime ḅọ ḅe Amadaḅọ goḅọ-goḅọ, anịanịa ḅẹẹ-atomi-atomi tẹ ḅara kẹ miemẹ ḍima ḅụ su ḅọ su ḅọ, anịanịa mị Tamụnọ warị mẹ tẹ Jeruselemu ḅụ simearị ye mẹ kanḅọ-kanḅọ nẹngịmaa. Yẹrị Darịyọsị ḅẹrẹ mẹ tọnm; yee sakị fama-a ḅara ḅụ anị mịẹ.”

Tamụnọ Warị Mẹ Finji Tẹẹ

¹³ Anịtẹso Darịyọsị Amadaḅọ ḅe wẹrịtẹ ẹkwẹn-ḅịḅị mẹ fịrịma ḅara, Tatẹnayị Opu Tọrụ mẹ akaka simearị ama ma ḅẹ gọvịna na, Sẹta-bozenayị na pịkị ịna ḅụụ sọ apụ ma na tọọn tẹ ye mẹ mịẹm, sakị fama-a ḅara ḅụ.

¹⁴ Juu-ḅẹ omongiapụ ma nwẹnị Hagayi ịkịankoroḅọ ḅe na, Zẹkaraya Ido owiḅọtụḅọ ḅe koroarị ịkịan ḅụ warị mẹ nama tẹ lolo. Izirẹlịapụ tẹkẹarị Tamụnọ ḅe tọn ḅara na, Sayịrọsị na, Darịyọsị na, Atakịzazẹsị Pasịya ḅẹ Amadaḅọ ḅe sụa oloko ḅụ ini in namarị warị mẹ nama karamam.

¹⁵ Darịyọsị Amadaḅọ ḅe ama-da tẹ sonio akụra karama kụra, ịn kẹ Adà sịn akalụ mẹ ḅẹ tẹra aḍin karama ene ḅụ in mị warị mẹ nama famam.

¹⁶ Izirẹlịapụ ma na, agbamịẹapụ ma na, Livayị furo-ḅẹ-apụ na, kirikọn omoni ḅara-ḅio paka-ḅo apụ ma na nwẹnị ḍereku kẹ mị Tamụnọ warị mẹ finji alalị mẹ fịm.

¹⁷ Mị Tamụnọ warị mẹ finji alalị mẹ ḅụ ini owi-nambulo sọnọa si na, ejimina oyia asi na, asambịrịma anana ẹndẹ na kẹ agba mịẹm, tẹ si agba mịẹ Izirẹlị mẹmgba pịrị gotẹ oyi maa ekpe-oḅori finji kẹ Izirẹlị ḅẹ furo-furo ma kịẹn-ḅịḅị wẹrịtẹ la ḅara ḅụ agba mịẹm.

¹⁸ In nwẹnị agbamịẹapụ ma kẹ ịna kpoo kpo ma ḅụ wẹrị, tẹ Livayị furo-ḅẹ-apụ ma kẹ Jeruselemu ḅụ Tamụnọ fịrị tẹ Mozizi ḍiri mẹ ḅio anị wẹrịtẹ kẹẹ wararị ḅara ḅụ ịna fịrị akiri ḅụ koromam.

Saḅaḅọrọ-Alalị Mẹ

¹⁹ Tarị akalụ mẹ ḅẹ ngei aḍin fa jei ene ḅụ, omoni ḅara-ḅio paka-ḅo apụ ma Saḅaḅọrọ-Alalị mẹ fịm.

²⁰ Gbala agbamịẹapụ ma na, Livayị furo-ḅẹ-apụ ma na gboloma tẹ amịna aḅụụ mịẹ fịafịamam ẹrẹsị; inimgba fịafịa famam. Anieḅụ in nwẹnị Saḅaḅọrọ-Alalị asambịrịma anana ḅe ḅaa kẹ omoni ḅara-ḅio pịkịma-ḅo apụ mamgba na, ịna pembe agbamịẹapụ na, ịna aḅụụ na pịrị.

²¹ Izirẹlịapụ ma tẹ omoni ḅara-ḅio paka-ḅo apụ ma na, ama mẹ ḅẹ apụ tẹ tomi ma pilema aị ma ḅụ amịna aḅụụ puu-ḅelema tẹ ini na gboloma tẹ sunsin KỊNỊNYANAḄỌ, Izirẹlịapụ tẹkẹarị Tamụnọ ḅe pịrị apụ ma na anị pẹịm.

²² In nwẹnị sọnọma aḍin kẹ ḍereku ḅụ sun-a fịturu (fịturu) kopini afịaị alalị mẹ fị; gbala KỊNỊNYANAḄỌ ḅe in mịẹtẹ in ḅioḅẹlẹm, tẹ Asiriya Amadaḅọ ḅe ḅioḅẹngbọ pịkị in pịrị, tẹ mịẹtẹ ọ̀ nwẹnị Izirẹlịapụ tẹkẹarị Tamụnọ ḅe warị ḅẹ kọrịnama mẹ ḅụ ḅarasụa in pịrị ye mẹ ẹrẹsị.