Ẹzịra 4 - FỊAFỊA BAỊBỤLỤ

Tomi siin Tamụnọ Warị Nama Mẹ Na Tụḅụrụm

¹ Juda na Benijamịnị na ḍiki-ḅioḅẹlẹ-a apụ naam mịnẹ omoni ḅara-ḅio in kun-so apụ ma pịkịma ḅo tẹ mịọkụ KỊNỊNYANAḄỌ, Izirẹlịapụ tẹkẹarị Tamụnọ ḅe Tẹkẹ warị mẹ namarị tẹso,

² in nwẹnị mu Zerubabẹlị na, ḍa awarị-warị kẹ sịḅịdapụ ma la tẹ ḅẹẹ, “Ye wa ọmịnị na sọ tẹ nama; kẹ gotẹ ọkọ ḅẹẹarị, ó sunsin ọmịna Tamụnọ pịrịarị ḅara mịẹ wamịnị sọ sunsin ọ̀ pịrịarị ḅara, anịsakị wa kẹ mị anga ḅo wararị Ẹsa-adọnị Asiriya ḅẹ Amadaḅọ ḅe ene ma kụra-ḅio wa agba mịẹ-mịẹ ọ̀ pịrịarị.”

³ Kụma Zerubabẹlị na, Jọsụwa na, Izirẹlị ḅụ kirikọn ḍa awarị-warị kẹ sịḅịdapụ ma na nwẹnị in ḅẹẹ, “Ọ́ wamịnị na gboloma tẹ mịẹ ḅẹ gberie-sọ ofori, warị nama wamịna Tamụnọ pịrị gbolomaye ḅụ; kụma wamịnị ngẹrị mịẹ warị nama KỊNỊNYANAḄỌ, Izirẹlịapụ tẹkẹarị Tamụnọ ḅe pịrị ḅarị ye, Amadaḅọ Sayịrọsị, Pasịya ḅẹ Amadaḅọ ḅe wẹrịtẹ tọn wa pịrị tẹ ḅara.”

⁴ Anịtẹso ama mẹ ḅẹ apụ ma nwẹnị Juda ḅẹ apụ ma ḅio lọkọma, tẹ in mịẹtẹ in ḅalafaa warị mẹ nama ḅụ.

⁵ In kịnị ọkọm, tẹ mịẹtẹ ini in mịẹ ḅẹ tọn ye ḅụ daasịẹm Sayịrọsị, Pasịya ḅẹ Amadaḅọ ḅe ene mamgba ḅụ, nwenii ḅo Darịyọsị, Pasịya ḅẹ Amadaḅọ ḅe ama-da sọ lam.

Tomi Siin Jeruselemu Nama Mẹ Na Tụḅụrụm

⁶ Zazẹsị ama-da suku-saakị ḅụ in ḍiri kẹẹm tẹ ye kẹ Juda na, Jeruselemu na ḅụ simearị apụ ma sịḅị sẹịnm.

⁷ Atakịzazẹsị ḅụọ ḅụ Bisilamụ na, Mitirẹdatị na Tabili na kirikọntẹ ịna ḅụ sọ apụ na Aremịya apụ ḅịḅị ḅụ ḍiri kẹẹ kẹ Pasịya ḅẹ Amadaḅọ Atakịzazẹsị fịrịmam, ini anị go ḅẹ sakị in ḅịḅị mẹ pịkị ama ḅẹ ḅịḅị ḅụ fie ḅa.

⁸ Rehumu ḅẹrẹtọnḅọ ḅe na, Simusayị ḍiri-kẹẹḅọ ḅe na Jeruselemu gbolomaye ḅụ mị-ḅara kẹ si ḍiri kẹẹ Atakịzazẹsị Pasịya ḅẹ Amadaḅọ ḅe fịrịmam:

⁹ “Rehumu ḅẹrẹtọnḅọ ḅe na Simusayị ḍiri-kẹẹḅọ ḅe na, kirikọntẹ ịna ḅụ sọ apụ na, ḅẹrẹkọn-apụ ma na, ḅẹrẹtọn-apụ ma na, fịrịmẹnjị-opuapụ ma na, Pasịya ḅẹ apụ ma na, Ẹrẹkị ḅẹ apụ na, Babịlọnị ḅẹ apụ na, Suza ḅẹ apụ anie Ẹlamụ ama ḅụ ḅo apụ ma na,

¹⁰ opu asịẹ ma ḅụ kirikọntẹ gburo-gburotẹ kụrọ nyana Asọbanipalị amịna ama ḅụ ọkị mu Sameriya ḅẹ opu ama mẹ ḅio na pịkị Tọrụ ọgọnọ-jụ ama mẹ ḅio koroma apụ ma na ḍiri mẹ kẹẹm.”

¹¹ Mịẹ mịọkụ ḍiri mẹ kẹẹ ḅara: “In kẹ Atakịzazẹsị Amadaḅọ ḅe fịrịmam: ‘Wamịnị ị́ afịrịmẹnjịapụ Tọrụ mẹ ḅẹ ọgọnọ-jụ ḅụ simearị apụ ḅii-ḅịḅị kẹ ị́ fịrịmam.

¹² Yee mịọkụ anị í nimi tẹ ye sọ mịnẹ Juu-ḅẹ-apụ tẹ ị́ ḅụụ ḅụ sime tẹ wa ḍọkụma-ḅo apụ ma in so Jeruselemu mu tẹẹ. In siin anị sịḅị kụrọ tẹ si-sịḅịḅio-sụapụ ama mẹ namarị. In sukutarị-aḍụḅarị ma tẹlẹma tẹ pịkị onu mẹ namarị.

¹³ Yee mịọkụ anị Amadaḅọ ḅe nimi tẹ ye sọ mịnẹ, in siin mị opu ama mẹ nama, tẹ onu ma nama famam ḅẹḅẹ, in ḅarị sịẹ kẹ jen sịẹ gbẹẹarị igbigi, anịanịa fịrịma-ḅo ngọ sịḅị ḅẹ igbigi anịanịa mẹnjị-ḅọrọ opu etela ḅụ gbẹẹ igbigi gbẹẹ ḅịa tẹ sọ-ḅo amadaḅọ pịrị, pịrị igbigi mẹ daasịẹ ḅa.

¹⁴ Mịọkụ, wa Amadaḅọ opu warị mẹ ḅẹ fụn taḅarị ẹrẹsị, anị ḅụụ gbẹ ḅịa wa tọrụngbọ kẹ Amadaḅọ ḅe kụn fama ḅẹ ye ẹrị, anị ẹrẹsị wa fịrịma tẹ mịẹtẹ Amadaḅọ ḅe nimiarị,

¹⁵ mịẹtẹ ini ị́ aḍapụ ye kẹẹ-kẹẹ sụarị ḍiri mẹ ḅio ḍọkị ḍiki ḅẹ ḅara. In ye kẹẹ-kẹẹ sụarị ḍiri mẹ ḅio ị́ ḍọkị-ẹrị tẹ nimi ḅa mịnẹ mị opu ama mẹ anie sịḅị-kụrọ opu ama, tẹ elemu sakị kụra-ḅio ḅụ amadapụ na itu-itu kẹ sịḅịdapụ na tụḅụrụarị opu ama. Ini ma pịkị sịḅịdaa ḅụ ḅụụ-fụkama tomi. Aniemẹ mịẹtẹ mị opu ama mẹ fa tẹ koro-sime ye.

¹⁶ Wa mịẹ tẹ Amadaḅọ ḅe nimiarị mịnẹ, In nwẹnị siin mị opu ama mẹ nama, tẹ anị ḅẹ onu ma karakara, ị́ ḅarịye nyana ḅịa Opu Tọrụ mẹ akaka simearị ama ma ḅio’ ”

¹⁷ Amadaḅọ ḅe nwẹnị pakịrị-ḅịḅị fịrịma, “Rehumu, ḅẹrẹtọnḅọ ḅe na, Simusayị, ḍiri-kẹẹḅọ ḅe na, kirikọntẹ ịna ḅụụ sọ Sameriya ḅụ simearị apụ na pịkị Tọrụ mẹ ọgọnọ-jụ ḅụ ḅẹrẹtọn ḅụụ-sarasara gotẹ opu sịẹ kẹ ḍiema wararị itu mẹ ḅụ kirikọn-apụ na, ḅii-ḅịḅị sime ọ́ pịrịị:

¹⁸ Ḍiri mẹ tẹ ọ́ kẹ wa fịrịma ye mẹ giregire ḅara kẹ anị ị̀ tọrọkọ ḅụ goo tẹ.

¹⁹ Àrị oloko sụam, in pịkị ḍọkị tẹ, anịsakị anị ḍọkị paka-ḅo tẹ mịnẹ elemu sakị ḅụ mị opu ama mẹ saakị tẹ amadapụ da paka tẹ sịḅị-kụrọ na, sịẹ ḅẹrẹtọn-apụ siin na, anị ḅio paka pakam.

²⁰ Gburo-gburotẹ opu amadapụ Jeruselemu ḅụ ama-da tẹẹ, tẹ pịkị Opu Tọrụ mẹ akaka simearị ama ma da, nwẹnị pịkị ịna aḅara sịẹ kẹ jen sịẹ gbẹẹarị igbigi na, fịrịma-ḅo ngọ sịḅị ḅẹ igbigi na, opu etela ḅụ mẹnjị-ḅọrọ gbẹẹ-gbẹẹ igbigi na daa-ọkịm.

²¹ Anị ẹrẹsị oloko sụa, kẹ mịẹtẹ mịna apụ ma daasịẹ, tẹ ḅarị siin mị opu ama mẹ nama ma, nwenii jen oloko à nwẹn sụa.

²² Anịsakị ẹbịị, tẹ mị ḅẹrẹ mẹ ḅụ ḅara foofoma ma; si kẹ Amadaḅọ ḅe mịẹ ḅẹ siye tiegotẹ paka na-iḅi?”

²³ Anịtẹso, Amadaḅọ Atakịzazẹsị ḅe Rehumu na, Simusayị ḍiri-kẹẹḅọ ḅe na, ịna ḅụụ sọ apụ ma na tọrọkọ ḅụ ḍiri mẹ go tẹso, in nwẹnị fọnya Jeruselemu ḅụ Juu-ḅẹ-apụ ma ḍọkụma-mu tẹ kụrọ ḅụ, kụrọ-ḅara kẹ in mịẹtẹ in daasịẹ.

²⁴ Anieḅụ Tamụnọ warị mẹ tẹ Jeruselemu ḅụ simearị warị mẹ ḅụ ḅẹ kọrịnama mẹ daasịẹm; anị ọkọ kẹ daasịẹ nwenii ḅo Darịyọsị Pasịya ḅẹ ama-da ḅụ maaịn karama kụra lam.