Ẹzịra 3 - FỊAFỊA BAỊBỤLỤ

Sunsin Siin Saakịm

¹ Anị ḅo sọnọma karama akalụ mẹ la sakị, Izirẹlịapụ ma ama-ama sọ tẹ emi, tomi ma nwẹnị amịna ḅụụ kobiri tẹ gbọrụ ḅụụ ḅụ Jeruselemu ḅo.

² Anịtẹso Jozadakị owiḅọtụḅọ Jọsụwa nwẹnị saakị, ò pembe agbamịẹapụ Zerubabẹlị, Sẹlịtẹlị owiḅọtụḅọ ḅe na, ori amịnapụ na nwẹnị ọ̀ ḅụụ sọ, tẹ in Izirẹlịapụ tẹkẹarị Tamụnọ ḅe agbamịẹ-anga mẹ namam anị wẹrịtẹ Mozizi Tamụnọ tomḅọ ḅe oloko mẹ ḅio kẹẹ wararị ḅara ḅụ ini anị ọgọnọ dọkịma-agba mịẹ ḅarị ḅara.

³ Agbamịẹ-anga mẹ nama anga ḅụ mie ini anị nama ye, gbala ama mẹ ḅẹ atomi ma ḍiki-ḅalafa ịna ḅụụ emi ẹrẹsị, tẹ ịn nwẹnị dọkịma-agba mịẹ KỊNỊNYANAḄỌ ḅe pịrị dede na, ḅoḅiri na ḅụ.

⁴ Ịn “Sịḅị-kikima-aị Alalị” ḅẹ afịaị ma fịm anị wẹrịtẹ kẹẹ wararị ḅara, tẹ kụrọ ḅara-ḅio sime apụ ma tọnm ene-ene ḅụ mịẹ ḅarị dọkịma-agba kịẹn-ḅịḅị mẹ mịẹm, ene-ene ḅii ḅara ḅụ.

⁵ Anie mẹ ḅọrọ tẹso, ini ịn mịẹ-mịẹ dọkịma-agba ịwọ akalụ agba ma mịẹm na, fị KỊNỊNYANAḄỌ ḅe pịrị ḅẹ kopini afịaị alalị ma tẹ ịn tọn aị mamgba fịm, pịkị ḅẹḅọ-ḅẹḅọ mịẹ KỊNỊNYANAḄỌ ḅe pịrị kịnị tọn pịrị-a agba ma mịẹm.

⁶ Sọnọma akalụ karama akalụ mẹ ḅẹ tarị ene mẹ ḅụ ịn saakị dọkịma-agba ma mịẹ KỊNỊNYANAḄỌ ḅe pịrịm. Kụma KỊNỊNYANAḄỌ ḅe Tẹkẹ warị mẹ ḅẹ sukutarị-ḍụḅarị mẹ amụ paa koroma-a.

In Siin Tamụnọ-warị Mẹ Nama Mẹ Saakịm

⁷ Anieḅụ ịn nwẹnị igbigi, kẹ ḍụḅarị awarị nama apụ na, akanịapụ na pịrị, tẹ fịye na, iru na, pulo na kẹ Sidọnị ḅẹ apụ na, Taya ḅẹ apụ na pịrị ịn kẹ Lẹbanọnị ḅụ ịn kẹ sida sịn-arị opu asịn ma pẹlẹ tẹ tọrụ-minji ḅụ arị kẹ Jọpa ḅo Sayịrọsị Pasịya ḅẹ amadaḅọ wẹrịtẹ kụrọ pịrị tẹ ḅara.

⁸ Ini ḅẹ Jeruselemu ḅụ Tamụnọ warị mẹ ḅo ḅẹ maaịn karama kụra mẹ ḅẹ maaịn karama akalụ mẹ ḅụ Zerubabẹlị, Sẹlịtẹlị owiḅọtụḅọ ḅe na Jọsụwa, Jozadakị owiḅọtụḅọ ḅe na, ịna mịnapụ ḅụụ kirikọn-apụ ma agbamịẹapụ ma na, Livayị furo-ḅẹ-apụ ma na inimgba tẹ kun-ḅara mẹ ḅio paka-ḅo Jeruselemu la apụ mamgba na nwẹnị ịna aḅụụ sọ tẹ in gboloma tẹ anị saakị. Ịn Livayị furo-ḅẹ-apụ ma ḅụụ si kụra sịḅị ḅụ ḅọrọtẹ apụ ḅụụ saakị iwo tọnm ini tọrụ kẹ KỊNỊNYANAḄỌ ḅe warị mẹ ḅẹ kọrịnama mẹ ḍiki.

⁹ Jọsụwa na, ori owiapụ-awọmẹ na, ori amịnapụ na, Kadimiyẹlị na ori owiapụ-awọmẹ Hodavaya owiapụ-awọmẹ ma na gboloma tẹ tọrụ kẹ Tamụnọ-warị mẹ ḅẹ kọrịnama kọrị apụ ma ḍiki, Enadadi owiapụ-awọmẹ ma na, Livayị furo-ḅẹ-apụ ma na, ịna owiapụ-awọmẹ na ịna amịnapụ na ịna ḅụụ sọ.

¹⁰ Warị nama apụ ma KỊNỊNYANAḄỌ ḅe warị mẹ ḅẹ sukutarị-ḍụḅarị mẹ koroma tẹso, agbamịẹapụ ma nwẹnị ịna agbamịẹ akapa sụa tẹ ịna ọdụ na ḅo, Livayị furo-ḅẹ-apụ ma na, Asafụ owiapụ-awọmẹ ma na, pịkị ịna saịn-saịn-aị ọkịm kẹ Devidi, Izirẹlị ḅẹ amadaḅọ ḅe wẹrịtẹ daa-karakarama ḅara ḅụ kẹ KỊNỊNYANAḄỌ ḅe tokini ḅẹ ḅara.

¹¹ Ịn nume-sunm, tẹ inweni-mamgba su pẹlẹ anga mẹ su-su tẹ KỊNỊNYANAḄỌ ḅe tokini-tokini tẹ ịmịẹtẹ kẹ ọ̀ ḅẹẹ tẹ ḅẹẹm: Gbala ori iḅim! kẹ gotẹ ọkọ ḅẹẹarị, ò jike-a ḅẹlẹma sime Izirẹlị pịrị gbamasom. Tomi mamgba nwẹnị ịn KỊNỊNYANAḄỌ ḅe tokiniarị sakị ḅụ opu pọkọ kẹ oloku-oloku pakama; ịn kẹ gotẹ ọkọ mịẹarị ye ịn KỊNỊNYANAḄỌ ḅe warị mẹ ḅẹ sukutarị-ḍụḅarị mẹ koromam ẹrẹsị.

¹² Tọnwa apụ ịn mị warị mẹ suku tarị ḍụḅarị mẹ koroma ye mẹ ẹrịtẹ ḅioḅẹlẹ ḅụ oloku-oloku ḍerekum. Kụma agbamịẹapụ ma na, Livayị furo-ḅẹ-apụ ma na, ḍa awarị-warị asịḅịdapụ ma na, omongiapụ ma na ḅẹ tọnwa-apụ tẹ tarị warị mẹ ḅẹ sukutarị-ḍụḅarị mẹ koroma sakị ẹrị apụ kpọma pọkọ saakị tẹ tẹmẹ-la ḅara kẹ owum.

¹³ Anieḅụ tomi inetẹ ḅioḅẹlẹ oloku pọkọ na, owu pọkọ na lekiri-a, kẹ gotẹ ọkọ ḅẹẹarị, tomina oloku pọkọ gburo-gburo lamam ẹrẹsị ala-jụjụ-ḅio ḅụ kịnị ịna apọkọ naam.