Ẹzịra 1 - FỊAFỊA BAỊBỤLỤ

Sayịrọsị Tọn Juu-ḅẹ-apụ Ma Pịrịm In Pịkịma-soo

¹ Sayịrọsị Pasịya ḅẹ amadaḅọ ḅe tarị kụra ḅụ, mịẹtẹ KỊNỊNYANAḄỌ ḅe ẹkwẹn-ḅịḅị mẹ tẹ Jerimaya ḅịḅị ḅụ kọn ye mẹ paka ḅarị ḅara, KỊNỊNYANAḄỌ ḅe nwẹnị Sayịrọsị Pasịya ḅẹ amadaḅọ ḅe tẹmẹ sịn saakị, tẹ ọ̀ nwẹnị ḍuko wasa ori ama-da kụrọ mẹmgba ikelema-koro, pịkị anị kẹ ḍiri sọ kẹẹ.

² “Mị-ḅara mie Sayịrọsị Pasịya ḅẹ amadaḅọ ḅe ḍuko yee, KỊNỊNYANAḄỌ ḅe, So-ḅio ḅẹ Tamụnọ ḅe tomi kiri mẹ ḅẹ ama-da kụrọ mamgba kẹ ị̀ pịrị tẹ, tẹ tọn ị̀ pịrị tẹ à Jeruselemu, Juda ḅụ simearị ama mẹ ḅio gbọrụ warị nama ọ̀ pịrị.

³ Ori atomi mamgba ḅụ ḅẹḅọ-ḅẹḅọ tẹ ọmịna ogboku ḅụ sime ḅo sime ḅọ, yee KỊNỊNYANAḄỌ ọ̀ Tamụnọ ḅe ori na sime tẹ yee mḅọ iwo Jeruselemu mu Juda ḅụ simearị ama mẹ, tẹ siin KỊNỊNYANAḄỌ, Izirẹlịapụ tẹkẹarị Tamụnọ ḅe warị mẹ nama — ori anie Tamụnọ ḅe tẹ Jeruselemu ḅụ simearị ḅọ ḅe;

⁴ anịsakị yee ḍumo sime-ḅọ sime-ḅọ, ọ̀ bịan anga bịan anga ḅụ simearị apụ ma, kịnị tọn pịrị-a ḅara ḅẹ agbamịẹ-aị tẹ sime Tamụnọ warị mẹ tẹ Jeruselemu ḅụ simearị ye mẹ pịrị ye sikima, seleḅa na, golu na, ngọ na, nama na, kẹ ḅarasụa mḅọ pịrị.”

⁵ Anịtẹso Juda na Benijamịnị na ḅụ, ḍa awarị-warị asịḅịdapụ ma na, agbamịẹapụ ma na, Livayị furo-ḅẹ-apụ ma na, ḅẹḅọ-ḅẹḅọ tẹ Tamụnọ tẹmẹ sịn saakị tẹ iwo mu siin KỊNỊNYANAḄỌ ḅe warị mẹ tẹ Jeruselemu ḅụ simearị ye mẹ nama ḅẹḅọ-ḅẹḅọ saakịm.

⁶ Tẹ kịnị tọn pịrị-a agbamịẹ-aị sikima ini na sime apụ mamgba seleḅa ẹfẹrẹ na, golu na, ngọ na, yedogi-nama na, yela aḍiepịrị-aị kẹ gburo-gburoma ḅarasụa ịn pịrịm.

⁷ Sayịrọsị amadaḅọ ḅe pịkị KỊNỊNYANAḄỌ ḅe warị ḅẹ ẹfẹrẹ ma tẹ Nebukadineza Jeruselemu ḅụ dogi-so tẹ kẹ ori atamụnọ warị mẹ ḅio koroma aị ma ọkị-ḅom.

⁸ Sayịrọsị Pasịya ḅẹ amadaḅọ ḅe Mitirẹdatị ye kokoḅọ ḅe ḅara ḅụ ma aị ma pakama-ḅom, oriḅe tẹ arị kịẹn pakama Juda ḅụ amadaḅọ owiḅọtụḅọ Sesibaza pịrị ḅọ ḅe.

⁹ Anịsakị mie arịḅẹ kịẹn-ḅịḅị golu-golu opu apanị maa ẹndẹ oyia asi finji (1,000), seleḅa-seleḅa opu apanị maa ẹndẹ oyia asi finji (1,000), kụnụaị dọkịma ẹfẹrẹ gberie fa suei,

¹⁰ golu-golu abọlị suei, seleḅa-seleḅa abọlị sonio ẹndẹ na oyi abọlị na (2,410), pịkị ja ḅara ḅẹ ẹfẹrẹ maa ẹndẹ oyia asi finji (1,000) na.

¹¹ Golu na, seleḅa na ẹfẹrẹ mamgba gboloma oyi tẹra ẹndẹ finji na gberie fa ngei asi finji na (5,469). Arịmgba Sesibaza ọkị-ḅom, omoni ḅara-ḅio sime apụ ma Babịlọnị ḅụ so Jeruselemu mu sakị.