Ẹsịta 8 - FỊAFỊA BAỊBỤLỤ

In Juu-ḅẹ-apụ Ma Ḅẹẹm In ḅụụ Ḍụa Owu Sọọ

¹ Anị ene mẹ ḅụ, Amadaḅọ Ayasụrọsị Juu-ḅẹ-apụ ma na fịya-a Emanị ḅe warị mẹ kẹ Ama-da ẹrẹḅọ Ẹsịta pịrịm. Tẹ Mọdịkaya nwẹnị Amadaḅọ ḅe tọrọkọ ḅo, anị kẹ gotẹ ọkọ mịẹ ye, Ẹsịta ori á ḅụụ ḅụ sime-ḅara ḍuko ọ̀ pịrị tẹ.

² Amadaḅọ ḅe nwẹnị ọ̀ ḅara-tụngbalị elekima emi gulu mẹ tẹ ori Emanị ḅara ọkị ye mẹ kẹ Mọdịkaya pịrị. Ẹsịta nwẹnị Emanị warị mẹ kẹ Mọdịkaya pịrị ḍikiḍiki.

³ Anịtẹso Ẹsịta nwẹnị pịkị siin ẹkwẹn kẹ Amadaḅọ ḅe pịrị; arị ọ̀ ḅụọ-suku ḅụ ḅịkị tẹ owu tọrụ kẹ ọ̀ tẹkẹm ori Emanị, Egagị ḅẹ ḅọ ḅe mịẹ koroma siye mẹ na, ḅaa-ḅẹrẹ mẹ tẹ ò ḅiya koroma Juu-ḅẹ-apụ ma pịrị ye mẹ na bẹkẹlẹma ḅẹ ḅara.

⁴ Amadaḅọ ḅe nwẹnị ò golu-golu kụrọ mkpara mẹ ọlọ pakama Ẹsịta da, tẹ Ẹsịta nwẹnị saakị sịẹ tẹ Amadaḅọ ḅe tọrọkọ sịẹsime.

⁵ Á nwẹnị ḅẹẹ, “Anị nwẹnị Amadaḅọ ḅe ḅụụ-ḅẹlẹ, tẹ arị ò ḍiki-tọrụ ḅụ ḍiki-ḅụụjịrị ḍọkị-ẹrị-ẹrị, tẹ ye mẹ nwẹnị Amadaḅọ ḅe tọrọkọ ḅụ kura, tẹ ori ị̀ ẹrị ḅara ḅụ arị ọ̀ ḅụụ ḅẹlẹ-ḅẹlẹ, yee Emanị Egagị ḅẹ ḅọ Amịdata owiḅọtụḅọ kẹẹ aḍiri ma tẹ kẹ Juu-ḅẹ-apụ mamgba tẹ Amadaḅọ ḅe itu ma ḅụ simearị apụ ma ḅaa ḅẹ ye mẹ bẹkẹlẹma ḅẹ kụrọ ḍiri kẹẹ paka-ḅo.

⁶ Kẹ gotẹ ọkọ ḅẹẹarị, à tọ-ḅara kẹ inetẹ ị̀ atomi ma la ḅẹ ḅoarị ḅụụ-fụka mẹ ẹrị tẹ inema ḅẹ? Anịanịa à tọ-ḅara kẹ inetẹ ì furo fịị mẹ ẹrị tẹ anị inema ḅẹ?”

⁷ Anịtẹso Amadaḅọ Ayasụrọsị nwẹnị Ama-da ẹrẹḅọ Ẹsịta na Mọdịkaya, Juu-ḅẹ-ḅọ ḅe na ḅẹẹ, “Ḍikii, àrị Emanị warị mẹ kẹ Ẹsịta pịrị tẹẹ, tẹ in kịnị-kpọḅaaye ọgọnọ ọ̀ kpọọ ḅaa tẹ, ò Juu-ḅẹ-apụ ma ḅaa ḅẹm ẹrẹsị.

⁸ Í inetẹ Juu-ḅẹ-apụ ma gboloma ye ḅụ í ḅụụ ḅẹlẹ ye kẹẹ ḅa Amadaḅọ ḅe ẹrẹ ḅụ, tẹ Amadaḅọ ḅe gulu mẹ kẹ anị pono ḅa, kẹ gotẹ ọkọ ḅẹẹarị, Amadaḅọ ḅe ẹrẹ ḅụ kẹẹ tẹ Amadaḅọ ḅe gulu kẹ pono wararị oloko kịnị inetẹ anị bẹkẹlẹma ḅịa”.

⁹ In nwẹnị anị sakị mẹ ḅụ tẹra akalụ karama akalụ ịn kẹ Sivani sịn akalụ mẹ ḅẹ si tẹra aḍin finji karama ene mẹ ḅụ Amadaḅọ ḅe aḍiri kẹẹ apụ ma sịn kobiri; tẹ in nwẹnị Juu-ḅẹ-apụ ma gboloma ye ḅụ Mọdịkaya tọn ḅara mamgba kẹ oloko ḍiri kẹẹ tẹ kẹ Amadaḅọ ḅe na simetẹ ḅẹrẹtọn-arị apụ ma na ḅẹrẹtọn-apụ ma na, itu-itu ma ḅẹ sịḅịdapụ ma na fịrịma; Indiya ḅụ ọkị mu Ẹtịyopịya la tẹra itu ofori itu sonioa si oyi finji. Itu goyegoye soku-ḅẹ ḍiri kẹẹ ḅara na, tomi ma oru in soku-ḅẹ ama-ḅịḅị ḅụ mie ịn kẹ ḍiri mẹ kẹẹ ye, tẹ pịkị Juu-ḅẹ-apụ ma sọ ḍiri kẹẹ ḅara ḅụ ịna soku-ḅẹ ama-ḅịḅị ḅụ kẹẹ kẹ ịn fịrịmam.

¹⁰ Amadaḅọ Ayasụrọsị ẹrẹ ḅụ in ḍiri mẹ kẹẹm tẹ Amadaḅọ ḅe gulu kẹ anị ponom. Fiin ḅara kẹ mangịarị tẹ ịn kẹ Amadaḅọ ḅe fịrịmẹnjịarị, Amadaḅọ asụ ḍikiḍiki anga ḅụ ini ọkọ kẹ ḍikiḍiki pakama ḅo asụ dọkụarị karakara ḅara kẹ fọnya oku-mẹnjịapụ ḅara ḅụ mie ḍiri ma fịrịma ye.

¹¹ Mịna aị ma ḅụ Amadaḅọ ḅe minini Juu-ḅẹ-apụ ma tẹ opu ama goyegoye ḅio sime apụ ma pịrịm mịnẹ in kobiri tẹ ịna ḍumo ḍụa tẹ ḅẹ ọmụ-ogbo, ọmụ-ogbo tẹ owu kẹ ini na, ịna awọmẹ na ịna ereme na paka ḅẹ apụ ḅaa, nini kẹ in kọn, ịna atọrụ fama, tẹ ịna ngọ fọịn.

¹² Oyi maa akalụ finji karama akalụ, ịn kẹ Adà sịn akalụ mẹ ḅẹ oyi tẹra aḍin finji karama ene mẹ, anị gbọrụ ene mẹ ḅụ Amadaḅọ Ayasụrọsị itu mamgba ikelema-koro ḅụ anie miemẹ kiri ọkị ḅarịye.

¹³ In kẹẹ wararị ḍiri mẹ ḅẹ gberie in nwẹn kẹ oloko sọma tẹ kẹ kpo-kpo gbolo tomi mamgba pịrị ḅa itu goyegoye ḅụ, anịsakị Juu-ḅẹ-apụ ma ịna ḅụụ tẹlẹma anị ene mẹ ḅụ ini na fịya-a apụ ma ḅụụ ịna gbẹẹfị ḅii ḅa.

¹⁴ Anieḅụ karakara ḅara kẹ fọnya oku-mẹnjịapụ ma fiin ḅara kẹ mẹnjịarị ịna asụ ma tẹ kẹ Amadaḅọ ḅe fịrịmẹnjịarị asụ ma kpọlị tẹ dọkụ pakam fọnya ḅara ḅụ Amadaḅọ ḅe tọn ye mẹ wẹrịtẹ in sukuruma ḅara ḅụ. Tẹ Suza sịḅịda ama mẹ ḅio oloko mẹ nwẹnị paka-ḅo.

¹⁵ Anịtẹso Mọdịkaya nwẹnị Amadaḅọ ḅe tọrọkọ bulo-bulo tọrụ na, pịna-pịna tọrụ na sụa amadapụ vọrọrọ-akapa ma sụa, gburo-gburotẹ golu-golu ama-da sun sure tẹ pọpụlụ nwẹn-sịn tọrụ sụa iḅi lọkọ-ḅịtẹ kẹ mie ḅara finji tẹ opu kapa sụa tẹ mẹnjị paka, Suza opu ama mẹ nwẹnị oloku-oloku tẹ ḍerekum.

¹⁶ Juu-ḅẹ-apụ ma nwẹnị ḅụụ feke-feke na, ḅioḅẹlẹ na, ḍereku na, kụn na nyana.

¹⁷ Itu goyegoye na, opu ama goyegoye na ḅụ Amadaḅọ ḅe tọn ye mẹ na, ori oloko mẹ na ḅo la anga, la anga ḅioḅẹlẹ na, ḍereku na Juu-ḅẹ-apụ ma ogbo ḅio pakam, tẹ in kopini afịaị fị-fị tẹ ịnyọsaram, Tẹ opu sịẹ mẹ ḅẹ tọnwa tomi nwẹnị amịna ḅụụ ḍie-pakama ini Juu-ḅẹ-apụ, anị kẹ gotẹ ọkọ mie ye, Juu-ḅẹ-apụ ma ḍiki-ḅalafa mẹ ḅo ịna ọgọnọ gbana tẹ ẹrẹsị.