Ẹsịta 6 - FỊAFỊA BAỊBỤLỤ

Amadaḅọ Ḅe Kụn Kẹ Mọdịkaya Pịrịm

¹ Mono amadaḅọ ḅe tọrụ sọ-a anị ḍin mẹ ḅụ; ọ̀ nwẹnị tọn tẹ ịn kẹ ḅiokoroma na-iḅi amịẹaị na paka-aị na kẹẹ sụarị ḍiri mẹ ọkị-ḅo, tẹ ịn nwẹnị amadaḅọ ḅe tọrọkọ arị go.

² Ịn nwẹnị Bigitana na, Tẹrẹsị na tẹ mẹnjị-ḅọrọ-anga mẹ ḍikiḍiki amadaḅọ ḅe pootẹ maa fịrịmẹnjị-opuapụ ma tẹ Amadaḅọ Ayasụrọsị ḅaa ḅẹ tọn tẹ Mọdịkaya wẹrịtẹ anị ḍuko amadaḅọ ḅe pịrị ḅara mẹ kẹẹ wararị anga ḍọkị-ẹrị.

³ Amadaḅọ ḅe nwẹnị gbela, “Miemẹ gotẹ tọ kụn, anịanịa opu wa nwẹn kẹ Mọdịkaya sọma tẹ?” Amadaḅọ ḅe afịrịmẹnjịapụ tẹ fịrịmẹnjị ọ̀ pịrịarị apụ ma nwẹnị pakịrị, “Mịẹ ọ̀ pịrị tẹ gberie-sọ amụ ofori.”

⁴ Amadaḅọ ḅe nwẹnị gbela, “Tụḅọ sara-sime anga mẹ ḅụ emi?” Mịọkụ Emanị paa mẹnjị amadaḅọ ḅe nụngọ mẹ sọ tẹ ḅo ọ̀ tẹlẹma Mọdịkaya pịrị tẹ kịnị-kpọḅaaye mẹ ọgọnọ Mọdịkaya kpọ-ḅaa ḅẹ gboloma ye ḍuko amadaḅọ ḅe pịrị ḅẹ ḅom.

⁵ Anieḅụ amadaḅọ ḅe afịrịmẹnjịapụ nwẹnị ḍuko ọ̀ pịrị, “Emanị anịjụ sara-sime anga mẹ ḅụ sịẹ sime wararị.” Tẹ amadaḅọ ḅe nwẹnị ịn ḅẹẹ, “Yee ọ̀ sọ-ḅo.”

⁶ Anieḅụ Emanị nwẹnị sọ-ḅo, tẹ amadaḅọ ḅe nwẹnị ọ̀ ḅẹẹ, “Tiye mịẹ kẹ anị ḅo ḅe tẹ amadaḅọ ḅe kụn kẹ pịrị ḅụụ-ḅẹlẹarị ḅọ ḅe pịrị na-iḅi?” Tẹ Emanị nwẹnị amịna ḅụụ ḅẹẹ, “Amadaḅọ ḅe kụn kẹ tụḅọ pịrị ḅụụ ḅẹlẹ ị̀ nẹngị ḅẹ”?

⁷ Anieḅụ Emanị nwẹnị amadaḅọ ḅe ḅẹẹ, “Mịẹ amadaḅọ ḅe ḅụụ-ḅẹlẹtẹ ọ̀ kụn kẹ pịrị ḅarị ḅọ ḅe pịrị ḅarịye anie,

⁸ yee ini amadaḅọ ḅe sụa-sụa opu akapa na, ọ̀ kẹ dọkụ dọkụ asụ na ọkị-ḅo, tẹ ama-da sun kẹ ọ̀ sịḅị sure.

⁹ Anịtẹso yee ini opu akapa ma na asụ ḅe na kẹ amadaḅọ ḅụụ ḅụ ḍụḅatẹ yelatẹịn amadapụ owiapụ-awọmẹ ma ḅẹ gbọrụḅọ ḅara sụa, tẹ yee mḅọ arị kẹ amadaḅọ ḅe ḅụụ-ḅẹlẹtẹ kụn kẹ pịrị ḅẹ ḅọ ḅe ḅirima, tẹ asụ ọgọnọ ḅụ mḅọ kẹ tọrọkọ tarị tẹ kẹ opu ama mẹ ama-ogbo mẹ mẹnjị tolu tẹ ọ̀ tọrọkọ oloku-oloku ḍuko wasa, ‘Mị-ḅara mie anị mịẹ na-iḅi ḅara kẹ amadaḅọ ḅe ḅụụ-ḅẹlẹtẹ ọ̀ kụn kẹ pịrị ḅẹ ḅọ ḅe mịẹ na-iḅi ḅara.’ ”

¹⁰ Anịtẹso amadaḅọ ḅe nwẹnị Emanị ḅẹẹ, “Fọnya mịẹ, opu akapa ma na, asụ ḅe na ọkị, tẹ ị́ wẹrịtẹ ḅẹẹ ḅara, ọkọ kẹ Mọdịkaya Juu-ḅẹ-ḅọ ḅe tẹ amadaḅọ ḅe ogigo-ḅọkọ lẹgị-sime wararị ḅọ ḅe mịẹ. Ị́ kịẹn sara ḅara ḅụ gberie-sọ wẹrịso ma.”

¹¹ Anieḅụ Emanị nwẹnị opu akapa ma na, asụ ḅe na ọkị tẹ kẹ Mọdịkaya ḅirima, tẹ ọ̀ mịẹtẹ ori asụ ọgọnọ dọkụ opu ama mẹ ama-ogbo tolu, tẹ oloku wasa, “Mị-ḅara mie anị mịẹ na-iḅi ḅara kẹ amadaḅọ ḅe ḅụụ-ḅẹlẹ tẹ ọ̀ kụn kẹ pịrị ḅẹ ḅọ ḅe mịẹ na-iḅi ḅara.”

¹² Anịtẹso Mọdịkaya nwẹnị pịkịma so amadaḅọ ḅe ogigo mu, Kụma Emanị kururu ḅụ ḅara kẹ ọ̀ sịḅị gbana tẹ fọnya so ọ̀ warị mum.

¹³ Tẹ Emanị nwẹnị ọ̀ ḅụụ paka aị ma goyegoye ḅẹlẹma ọ̀ ta Zirẹsị na, ori ikiapụ mamgba na pịrị. Anịtẹso ò ye-nimi owiapụ ma na, ọ̀ ta Zirẹsị na nwẹnị ọ̀ ḅẹẹ, “Anị ḅọ ḅe tọrọkọ tẹ ị́ saakị ḅịkị tẹ ḅọ ḅe nwẹnị Mọdịkaya ḅẹḅẹ, anie Juu-ḅẹ-apụ ma ḅẹ ḅọ, ị́ inetẹ ọ̀ nẹngịma ḅịa, kụma gbarị-a ḅara ḅụ ị́ ọ̀ tọrọkọ ḅịkị ḅa.”

Ịn Emanị Ḅaa Tẹ

¹⁴ Ịn paa ori na ẹkwẹn-arị ogbo kụma, amadaḅọ ḅe pootẹ fịrịmẹnjị-opuḅọ ḅo tẹ fọnya ḅara kẹ Emanị ọkị kẹ fịaị ma tẹ Ẹsịta tẹlẹma sara afịaị ma fị anga mu tẹ.