Ẹsịta 5 - FỊAFỊA BAỊBỤLỤ

Ẹsịta Kopini Afịaị Sọọtẹ Amadaḅọ Ḅe Na Emanị Na Sịnm

¹ Tẹrẹị karama ene mẹ ḅụ Ẹsịta nwẹnị arị ama-da ḅiriaị ḅiri tẹ amadaḅọ ḅe ama-da opu warị mẹ ḅẹ kala-ḅio mẹ ḅẹ sara-sime anga mẹ ḅụ amadaḅọ, ḅe opu sara-sime anga mẹ na dama-dama tẹ sịẹsime. Amadaḅọ ḅe ama-da opu warị mẹ ḅio mẹnjị ama-da opu warị mẹ soarị anga mẹ na dama-dama ḅụ ori ama-da emine ọgọnọ lẹgị-sime wararị.

² Amadaḅọ ḅe Amadaḅọ Ta Ẹsịta sara-sime ḅio mẹ ḅụ sịẹsime wararị tẹ árị ẹrị tẹso, á nwẹnị ò ḍiki-tọrụ ḅụ ḍiki-ḅụụjịrị ḍọkị-ẹrị, tẹ ọ̀ nwẹnị golu-golu kụrọ mkpara mẹ tẹ ọ̀ ḅara-ḅio sime ye mẹ ọlọ pakama Ẹsịta da. Anịtẹso Ẹsịta nwẹnị mẹnjị sọma mu tẹ ḅara kẹ mkpara mẹ sịḅị lama.

³ Amadaḅọ ḅe nwẹnị á gbela, Ama-da Ẹrẹḅọ Ẹsịta “Tiye paka, í tiye ḅiiarị? Ị́ ị̀ ama-da kụrọ la anga kẹ maa anga ḍiya ḅẹ gbọrụ pakịrị ḅii sọ arị anị kẹ ị́ pịrị ḅa.”

⁴ Ẹsịta nwẹnị ḅẹẹ, “Anị nwẹnị amadaḅọ ḅe ḅụụ-ḅẹlẹ ḅẹ namịna, mị ḅoḅiri amadaḅọ ḅe na, Emanị na ḅo anị à tẹlẹma amadaḅọ ḅe pịrị fịye mẹ fị tẹ.”

⁵ Anịtẹso amadaḅọ ḅe nwẹnị ḅẹẹ, “Ó fọnya-fọnya Emanị ọkị-ḅoo, mịẹtẹ wa Ẹsịta ḅii ḅara mịẹ ḅẹ ḅara.” Anieḅụ amadaḅọ ḅe na Emanị na nwẹnị Ẹsịta tẹlẹma ḅoḅiri fịye mẹ fị ḅe ḅo.

⁶ Ini iru ḅuuarị ogbo, amadaḅọ ḅe nwẹnị Ẹsịta ḅẹẹ, “Í tiye ḅii ḅẹ-ḅiiarị mọ? Arị anị kẹ ị́ pịrị ḅa. Í tiye ḅiiarị? Ị́ ị̀ ama-da kụrọ mẹ la anga kẹ maa anga ḍiya ḅẹ gbọrụ pakịrị ḅii sọ à kẹ ị́ pịrị ḅa.”

⁷ Kụma Ẹsịta nwẹnị pakịrị, “À ḅii ḅẹ ḍọkịarị tẹ ḅiiarị ye mẹ anie:

⁸ árị amadaḅọ ḅe ḍiki-tọrụ ḅụ ḍiki-ḅụụjịrị ḍọkị-ẹrị, tẹ amadaḅọ ḅe à ḅii ḅẹ ḍọkịarị tẹ ḅiiarị ye mẹ kẹ ị̀ pịrị ọ̀ ḅụụ ḅẹlẹ-ḅẹlẹ, yee amadaḅọ ḅe na, Emanị na ḅaa ḅụ ḅo à tẹlẹma ịn pịrị ḅarị ḅoḅiri fịye mẹ fị, anịsakị ḅaa ḅụ àrị amadaḅọ ḅe kẹ ị̀ ḅẹẹ ḅara mịẹ ḅa.”

Emanị, Mọdịkaya Ḅaa Ḅẹ Ḅẹrẹ Ḅiyam

⁹ Emanị anị eneḅaka ḅụ ḍereku na, ḅioḅẹngbọ ḅẹ ḅioḅẹlẹ na ḅụ mẹnjị paka-som. Kụma Emanị amadaḅọ ḅe ogigo mẹ ḅio Mọdịkaya ẹrịm mịnẹ ọ̀ saakị sịẹ-a, anịanịa ọ̀ tọrọkọ ḅụ ḅụụ-sẹkị nyana-a ḅẹ ye ḅụ, ịganị nwẹnị ọ̀ ḅụụ ḅio ḅin Mọdịkaya pịrị.

¹⁰ Anịsọ Emanị amịna ḅụụ ọlọ-sịẹmam, tẹ so ọ̀ warị mum; tẹ nwẹnị fịrịma ori ikiapụ na, ọ̀ ta Zirẹsị na ọkị-ḅo ọ̀ ḅụụ sụa.

¹¹ Emanị nwẹnị ori ngọ-kọn la ḅara na, ori iyi owiapụ-awọmẹ kịẹn-ḅịḅị na, amadaḅọ ḅe kẹ kụn kẹ ọ̀ pịrị ḅụ ọ̀ saakị-gelema mu lama tẹ akiri mamgba na, ori ori ọkị kẹ amadapụ owiapụ awọmẹ ma na, amadaḅọ ḅe afịrịmẹnjịapụ ma na nẹngịma ḅara na boma sara ịn pịrị.

¹² Emanị kẹ sụam mịnẹ, “Amadaḅọ Ta Ẹsịta sọ yẹrị ḅe sikima ḍụkụ tẹ gbọrụḅọ-sọ ḅo amadaḅọ ḅe na à sọọ sara afịaị ma fị-a. Anịsakị ḅaa ḅụ sọ arị ị̀ sịn amadaḅọ ḅe ḅụụ sụa wararị.

¹³ Anịsọ mie mẹmgba gbọrụ iḅi sọ kẹ ị̀ mịẹ-a, à Mọdịkaya amadaḅọ ḅe ogigo mẹ ḅio lẹgị-sime wararị ẹrịarị sakị goyegoye.”

¹⁴ Anịtẹso ọ̀ ta Zirẹsị na, ori ikiapụ mamgba na nwẹnị ọ̀ ḅẹẹ, “Yee tesi oyia aḅụọ-kuḅu finji na sọnọ na (22 m) kẹ geletẹ kịnị-kpọḅaaye mịẹ wẹrị, anịsakị dede-ḅio ḅụ ḍuko amadaḅọ ḅe pịrị tẹ ọ̀ Mọdịkaya kpọ-ḅaa anị ọgọnọ; anịtẹrẹmẹ í ḅioḅẹlẹ ḅara kẹ amadaḅọ ḅe ḅụụ sọ tẹ ḅoḅiri fịye mẹ fị muu.” Mị toluma ye mẹ nwẹnị Emanị ḅụụ ḅẹlẹ tẹ ọ̀ nwẹnị kịnị-kpọḅaaye mịẹ sịẹma wẹrị.