Ẹsịta 3 - FỊAFỊA BAỊBỤLỤ

Ẹmanị Juu-ḅẹ-apụ Ma Ḅaa Ḅẹ Ḅara Kẹ Ḅẹrẹ-ḅiyam

¹ Ma aị ma ḅọrọ fama tẹso, Amadaḅọ Ayasụrọsị nwẹnị Emanị Egagị ḅẹ ḅọ, Amẹdata owiḅọtụḅọ ḅe saakị gelema ò kiri ḅụ, tẹ ọ̀ lẹgịye kẹ sịḅịdapụ mamgba tẹ ori na sime apụ ma ọgọnọ-jụ ḅụ koroma.

² Amadaḅọ ḅe afịrịmẹnjịapụ mamgba tẹ amadaḅọ ḅe ogigo-ḅọkọ sime apụ ma sịḅị-tuu tẹ kụn kẹ ọ̀ pịrịm, anị kẹ gotẹ ọkọ mịẹ ye, amadaḅọ ḅe ọkọ kẹ ò gboloma ye tọnm. Kụma Mọdịkaya sịḅị-tuu-a anịanịa kụn kẹ ọ̀ pịrị.

³ Anịtẹso fịrịmẹnjịapụ ma tẹ amadaḅọ ḅe ogigo-ḅọkọ ḅụ sime apụ ma nwẹnị Mọdịkaya ḅẹẹ, “Í tiegotẹ amadaḅọ ḅe tọn ye mẹ ḅụ mịẹ irimarị?”

⁴ Ene-ḅaaene-ḅaaene ḅụ ini ẹkwẹn ọ̀ pịrị-pịrị tẹ ori ịn poki-a tẹ ḍuko ịn pịrịarị ori Juu-ḅẹ-ḅọ mẹ. Ịn nwẹn ḍuko Emanị pịrị, Mọdịkaya kọn ẹkwẹn mẹ, ọ̀ wẹrịso ọ̀ pịrị ḅarị ḅoto.

⁵ Emanị, Mọdịkaya sịḅị-tuu ọ̀ pịrị-a anịanịa kụn kẹ ọ̀ pịrị-a mẹ ḅẹ ịganị nwẹnị ọ̀ ḅụụ ḅio ḅin.

⁶ Kụma ọ̀ nwẹnị ḅara kẹ Mọdịkaya ngẹrị ọgọnọ gbana mẹ ḍiki-sima. Anieḅụ ịn mịẹtẹ ọ̀ Mọdịkaya ḅụụ ḅẹ atomi nimi ḅara ḅụ, Emanị nwẹnị bebe Ayasụrọsị ama-da kụrọ ikelema-koro ḅụ sime Mọdịkaya ḅụụ ḅẹ atomi, Juu-ḅẹ-apụ mamgba ḅaa ḅẹ ḍọkị.

⁷ Amadaḅọ Ayasụrọsị ama-da tẹ oyi maa kụra finji karama kụra mẹ ḅẹ tarị akalụ mẹ tẹ ịn kẹ Nizanị sịn akalụ mẹ ḅụ ene-ḅaaene-ḅaaene Emanị tọrọkọ ini apịan sụam, ịn kẹ anị sịn ye “pọọ”; akalụ-akalụ ini anị sụa nwenii anị mu kụra ḅe oyi maa akalụ finji karama akalụ mẹ tẹ ịn kẹ adà sịn akalụ mẹ ḅẹ oyi tẹra aḍin finji karama ene ḅụ korom, ori ò ḅiotọn siye mẹ mịẹ ḅẹ akalụ mẹ na ene mẹ na.

⁸ Anịtẹso Emanị nwẹnị Amadaḅọ Ayasụrọsị ḅẹẹ, “Gbọrụ atomi ḅara ị́ ama-da kụrọ mẹ ḅụ gala-gala itu-itu mamgba ḅio tomi ma ogbo ḅio sọ tẹ emi; ịna oloko ma ja atomi go apụ, go apụ oloko ḅụ kịrịm, tẹ ini amadaḅọ ḅe oloko ma koko-a, anieḅụ ịn wẹrịso tẹ ịn sime mẹ sọye mịẹ amadaḅọ ḅe pịrị-a.

⁹ Anị amadaḅọ ḅe ḅụụ ḅẹlẹ-ḅẹlẹ, yee anị oloko sọ, mịnẹ ịn mịnapụ ma ḅaa, anịsakị à seleḅa puku oyia asi mesi oyi finji ofori puku oyi ẹndẹ (30,000,000) kẹ amadaḅọ ḅe tuḅokọn onyo mẹ sẹịn apụ ma aḅara-ḅio gbẹẹ su tẹ ịn kẹ amadaḅọ ḅe ngọ-koko-aḅio ma ḅio suu ḅa.”

¹⁰ Anieḅụ amadaḅọ ḅe nwẹnị ọ̀ ḅara-tụngbalị ḅụ ori elekima emi gulu sin tẹ anị kẹ Emanị, Amẹdata owiḅọtụḅọ, Egagị ḅẹ ḅọ tẹ Juu-ḅẹ-apụ ma na fịya-a ḅọ ḅe pịrị.

¹¹ Tẹ amadaḅọ ḅe nwẹnị Emanị ḅẹẹ, “Igbigi mẹ, na tomi ma na sọ ịn kẹ ị́ pịrị tẹ, ị́ ḍikitẹ kẹ ini na mịẹ na-iḅi ḅara kẹ ini na mịẹ.”

¹² Anịtẹso tarị akalụ mẹ ḅẹ oyi tẹra aḍin finji eneḅaka ḅụ ịn nwẹnị amadaḅọ ḅe ḍiri kẹẹ apụ ma sịn kobiri, tẹ Emanị wẹrịtẹ tọn ḅara mamgba kẹ oloko mịẹ tẹ kẹẹ tẹ kẹ amadaḅọ ḅe ḅẹrẹtọn-apụ ma na, itu-itu ma ḅẹrẹtọn apụ mamgba na, tomi mamgba sịḅịdapụ ma na fịrịma, ọrụ itu-itu amịna soku-ḅẹ ḍiri kẹẹ ḅara na, tomi ma fiearị ama-ḅịḅị na ḅụ. Amadaḅọ Ayasụrọsị ẹrẹ ḅụ ini anị kẹẹm tẹ amadaḅọ ḅe gulu kẹ anị ponom.

¹³ Gbọrụ ene ḅụ,, oyi maaịn finji karama akalụ tẹ ịn kẹ Adà sịn akalụ mẹ ḅẹ oyi tẹra aḍin finji eneḅaka ḅụ ịn Juu-ḅẹ-apụ mamgba asambịrịma apụ na, omongitẹ apụ na, ereme na, awọmẹ na ḅaa, in ninii, tẹ ịna tọrụ-famaa, tẹ ịna ngọ ma fọịn ọkị ḅẹ aḍiri ma karakara ḅara kẹ fọnya oku-mẹnjịapụ ḅara ḅụ ini arị kẹ amadaḅọ ḅe itu mamgba fịrịmam.

¹⁴ Kẹẹ wararị ḍiri mẹ ḅẹ gberie-gberie ịn nwẹn kẹ oloko ḅara ḅụ gbọrụ itu-itu fịrịmatẹ kẹ kpo-kpo gbolo tẹ tomi mamgba pịrị tẹ ịn ḅụụ tẹlẹma anị ene mẹ pịrị ḅẹ ḅara.

¹⁵ Karakara ḅara kẹ fọnya oku-mẹnjịapụ ma amadaḅọ ḅe tọn ḅara ḅụ fọnya ḅara kẹ mum tẹ Suza, sịḅịda ama mẹ ḅio oloko mẹ paka-ḅom. Amadaḅọ ḅe na, Emanị na lẹgị-sime tẹ iru ḅuum kụma Suza opu ama mẹ ḅụụ-ḅalaḅalarị.