Emọsị 9 - FỊAFỊA BAỊBỤLỤ

KỊNỊNYANAḄỌ ḅe Aḅẹrẹkọn ma

¹ À KỊNỊNYANAḄỌ ḅe ẹrịm ori agbamịẹ-anga mẹ akaka sịẹ wararị. Ọ́ nwẹnị kụrọ pịrị, “Kụrọma Tamụnọ warị mẹ ḅẹ ḅeriye ma ọgọnọ-jụ ḅakụ tẹ bebe mẹnjị ḅọrọ sọ mu tarị ḅio mẹ jike. Arị kan-siin tẹ arị ḅịkị tomi ma asịḅị ọgọnọ sara. À kirikọn apụ ma ḅaa ḅa ọmụ ḅio ḅụ. Mangị-so ḅẹ gbọrụḅọ-sọ ofori; gbọrụḅọ-sọ pụkọ-so ḅịa.

² In kiri soku tẹ ideri-mu ḍuḅu ḅio la sọ, àrị in kun ḅa. Ịn kpọlị iwo mu So la sọ, àrị ini ọkị ideri ḅo ḅa.

³ Kamẹlị Tụndụ ọgọnọ-jụ ḅụ ịn ḅọị sọ, arị ịn ḍọkị tẹ in kun ḅa. Ini abajị suku-ḅio ḅụ à ḅarị ini ẹrị ḅịa ḅara gotẹ ḅọị sọ, à kụrọ kẹ abajị mamataḅaye ḅe pịrị tẹ ori aka kẹ in onwi ḅa.

⁴ Ini na fịya-a apụ in kun so-so à tọn ịn pịrị tẹ ini ịn ḅaa ḅa. À tọn pẹlẹ tẹ àrị ịn ḅaa guluguluma ḅa, à ḅarasụa ịn pịrị ḅịa.”

⁵ Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe, Kụrọmamgba Nyanaḅọ, ḅara kẹ kiri mẹ lamarị, tẹ anị jikearị; anịanga angarị apụ mamgba kururuarị. Bebe tomikiri mẹ saakị gele tẹ ḅịkịarị Nayịlị Tọrụ mẹ mịẹ ḅara.

⁶ KỊNỊNYANAḄỌ ḅe So-ḅio ò sime yọ namarị, tẹ So-tọrụ mẹ kẹ fongolo koro tẹ isun sọma tẹ kẹ kiri mẹ gbaịn wararị. Ori abajị aminji ma sịn ọkị tẹ arị kẹ ọsụma kiri mẹ ọgọnọ sararị. Ori ẹrẹ anie KỊNỊNYANAḄỌ ḅe!

⁷ KỊNỊNYANAḄỌ ḅe ḅẹẹarị, “Izirẹlị ḅẹ apụ, arị ọ́ kẹ ḅiokoromarị gbọrụ ḅara mẹ mie à kẹ Sudanị kẹ ḅiokoromarị. Yẹrị anie Filisiteni ma ọkị-ḅo yee, Kiriti ḅụ pịkị Siriya ḅẹ apụ ma Kiri ḅụ, àrị Ijiputi ḅụ ọmịnị ọkị-ḅo gbọrụ ḅara mẹ.

⁸ Yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe mie si-si-si mịẹarị Izirẹlị ḅẹ ama-da yọ mẹ ẹbịarị, tẹ àrị anị fama ḅa tomikiri mẹ ḅụ. Kụma à Jekọbụ furo-ḅẹ-apụ mamgba ḅaa fama ḅịa.”

⁹ “À kụrọ mẹ pịrị tẹ Izirẹlịapụ ma jike ḅa, ye-guguye ḅio mbịaka jike ḅara. Àrị in jike ḅa sịẹ ma ogboku tẹ ye-ḅụ-sọ-a si-mịẹapụ ma ḅelema ḅa.

¹⁰ Ị̀ atomi ma ogboku simearị si-mịẹapụ ma ọmụ ḅio ịn fịị ḅa — inimgba tẹ ḅẹẹarị apụ ma, ‘Tamụnọ ḍụkụ tẹ ye kẹ wa lama ḅẹ gbọrụ siye sọ wa kpeki ḅịa.’ ”

Tọrọkọ-jụ Izirẹlị sime ḅẹ ịwọ ḅara mẹ

¹¹ “Anị ene mẹ ḅụ, à siin Devidi ama-da yọ mẹ pakama-ḅo ḅarị sakị mẹ, anie kaan-sara tẹ warị kịkarị ye mẹ. À siin anị ḅẹ onu ma tẹlẹma tẹ anị tarị ḅara mẹ sime ḅa. À siin anị nama tẹ anị mịẹ tẹ anị iḅere-iḅerea kụra ḅio ḅara mẹ sime ḅa.

¹² Anịtẹso Izirẹlịapụ ma Idọmụ amakiri ḅụ kirikọn anga mẹ nyana ọkị ḅa, na sịẹ-sịẹ mamgba tẹ sakị ḅẹ gbọrụ sakị ḅụ sime ị̀ pịrị aị ma.” Miemẹ mịẹtẹ anị paka ḅarị KỊNỊNYANAḄỌ ḅe ọkọ ḅẹẹm.

¹³ KỊNỊNYANAḄỌ ḅe ḅẹẹm, “Ene ma ḅoarị, tẹ mbịaka-mgbọlụ sarama so-paka kẹ tomḅọ inetẹ arịḅẹ kpọọ tẹ aị pẹlẹ warị suu nẹngị ḅẹ sakị; tẹ girepu-asịnmgbọlụ sarama so-paka kẹ tomḅọ inetẹ arịḅẹ ḅịya tẹ aị kẹ waịnị mịẹ nẹngị ḅẹ sakị. Tụndụ ma ḅụ ḅẹlẹarị waịnị tọịn-tọịnma sara ḅa tẹ anị tụndụ ma ogboku ḅụ ogilolo mịẹ tẹ puu ḅọrọ ḅa.”

¹⁴ “À siin ị̀ atomi ma ọkị-ḅo ịna amakiri lama ḅa. Ini ịna kaantẹ opu ama ma nama tẹ arị ḅio ḅụ anga ḅa, ịn vaịnị aḍụọ ḍiḅi-ḍiḅi tẹ waịnị mẹ ḅuu ḅa. Ịn warị akaka ḅẹ aḍụọ ḍiḅi-ḍiḅi tẹ in ḍiḅi pakama-ḅo ye fị ḅa.”

¹⁵ “Àrị ị̀ atomi kẹ à kẹ ịn pịrị amakiri ḅụụ ḍiḅi ḅa, tẹ kịnị ḅarị jen kẹ in soku pakama-ḅo ḅịa.” KỊNỊNYANAḄỌ ị́ Tamụnọ ḅe ọkọ ḅẹẹm.