Emọsị 7 - FỊAFỊA BAỊBỤLỤ

Igurube Ịkịan

¹ À Tẹịn-Ḅẹrẹtọn-Kụrọ-Nyana KỊNỊNYANAḄỌ ḅara ḅo ịkịan ẹrịm. Anị ḅio arị ẹrịm ori Igurube ogbo tẹmẹarị, anie ịn sime amadaḅọ ḅe pịrị opu anama koko osuka ma pẹlẹ fama tẹ ịwọ osuka saakị pakarị sakị ḅụ.

² Ị̀ ịkịan mẹ ḅio à ẹrịm Igurube ma ịwọ ịnyịnya goyegoye fị siinm amakiri mẹ ḅụ, anị tẹso à ḅẹẹm, “Tẹịn-Ḅẹrẹtọn-Kụrọ-Nyana KỊNỊNYANAḄỌ, si-wẹrịso ị̀ atomi pịrịị! Ndẹẹ ini inetẹ ḍumo sime ḅẹ ḅara? Ini ịrụ ḅakam, ịn pịkị ịnyọ nyana-a!”

³ KỊNỊNYANAḄỌ ḅe ó kuroma ḍima tẹ ḅẹẹm, “Ị́ ẹrị ye mẹ paka ḅịa.”

Kọrị-fịnị Ịkịan

⁴ À Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅara ḅo jen ịkịan ẹrịm. Anị ḅio ḅụ arị ori ẹrịm ọ́ tẹlẹma tẹ kọrị-fịnị kẹ ori atomi fomu ḅẹ-yearị. Fịnị mẹ kiri mẹ suku-ḅio simearị opu abajị mẹ dọkịma fama tẹ saakị amakiri mẹ dọkịmarị.

⁵ Anịtẹso à ḅẹẹm, “KỊNỊNYANA-TAMỤNỌ, dasịẹmaa! Ndẹẹ ị́ atomi inetẹ ḍumo sime ḅẹ ḅara? Ini ịrụ ḅakam, ịn pịkị ịnyọ nyana-a!”

⁶ KỊNỊNYANAḄỌ ḅe siin ó kuroma ḍima tẹ ḅẹẹm, “Miemẹ sọ paka ḅịa.”

Gononoye-tọn-ḍikiye Ịkịan

⁷ À KỊNỊNYANAḄỌ ḅe ḅara ḅo jen ịkịan ẹrịm. Anị ḅio ḅụ arị ori ẹrịm ọ́ warị akaka sịẹ wararị, anie ịn gononoye-tọn-ḍikiye kẹ nama ye, tẹ tọn ye ọ̀ ḅara emi.

⁸ Ori ì gbelam, “Emọsị, í tiye ẹrịarị?” Àrị ọ́ pakịrịm, “Gononoye-tọn-ḍikiye.” Anịtẹso ọ́ ḅẹẹm, “Àrị anị kẹ tọn tẹ kẹ ḍie-pakama ḅa mịnẹ ị̀ atomi penge tẹ warị akaka kịkarị. In fomu ḅụ à ḅarị jen kẹ ì kuroma ḍima ḅịa.

⁹ Ayịzịkị furo-ḅẹ-apụ sunsin Tamụnọ pịrịarị ayọ ma, in guluguluma ḅa. Izirẹlị ḅẹ fịafịa ayọ ma kaan tẹ koro-sime ḅa. Àrị Ama-da Jerobohamụ ama-da ọrụ mẹ kẹ ḅo kunoma lama ḅa.”

Emọsị na Amazaya na

¹⁰ Anịtẹso Amazaya, Bẹtẹlị ḅẹ agbamịẹḅọ ḅe nwẹnị fịrịma mu ḍuko Izirẹlị ḅẹ Amadaḅọ Jerobohamụ pịrị: “Tomi ma ogboku ḅụ Emọsị si ḅẹrẹ ḅịya ị́ pịrịarị. Ori ẹkwẹn ma bebe amakiri mẹ fama ḅa.

¹¹ Mie ó ḍukoarị ye: ‘Jerobohamụ ọmụ ḅio fịị ḅa, tẹ ini Izirẹlịapụ ma kun-so ḅa ịna amakiri ḅụ.’ ”

¹² Anịtẹso Amazaya ḅe Emọsị ḅẹẹm, “Ịkịankoroḅọ, iḅi tẹẹ! Pịkị-so Juda mu tẹ ị́ kọọn ḅẹ Tamụnọ ẹkwẹn mẹ kọn anị anga. Yee ini anị ḅẹ gbẹẹ-ye kẹ ị́ pịrị.

¹³ Ḅarị jen kẹ mịanga Bẹtẹlị ḅụ ịkịan kuro ma. Mie amadaḅọ ḅe sunsin Tamụnọ pịrịarị anga, sịẹ mẹ ḅẹ Tamụnọ-warị mẹ.”

¹⁴ Emọsị pakịrịm, “Yẹrị gbẹẹ-ye gotẹ ịkịankoroapụ ma ḅẹ gbọrụḅọ-a. Yẹrị nama-ḍikiḍikiḅọọ, tẹ à pịkị figi asịn sọ ḍikiḍikim

¹⁵ Kụma KỊNỊNYANAḄỌ ḅe ị̀ anana-ḍikiḍiki-kọrịnama mẹ ḅụ ị̀ ọkị tẹ tọn ị̀ pịrịm à mu ịkịankoro ori atomi Izirẹlị pịrị.

¹⁶ Mie ḅụ mịọkụ KỊNỊNYANAḄỌ ḅe ḍukoarị ye pokii. Ị́yẹrị ị̀ ḅẹẹarị à ḅarị ịkịan koro ma, tẹ maa-tọrụsụaḅọ ḅara kẹ ẹkwẹn Izirẹlị ḅẹ apụ pịrị dasịẹmaa.

¹⁷ Miemẹ ẹrẹsị, Amazaya, KỊNỊNYANAḄỌ ḅe ị́ ḅẹẹarị, ‘Ị́ ta ama-mẹnjị-ẹrẹḅọ sọ ḅa etela ma ḅụ, tẹ ị́ awọmẹ ọmụ ḅio fịị ḅa. Ini í kiri ḍie ja apụ pịrị ḅa, tẹ ḅioju oru nimi apụ amakiri ḅụ fịị ḅa. Tẹ piki-pikiye-ofori ḅara ḅụ ini Izirẹlị ḅẹ apụ ma kun-so ḅa ịna soku-ḅẹ amakiri ḅụ.’ ”