Emọsị 6 - FỊAFỊA BAỊBỤLỤ

Izirẹlị Gulugulu Tẹẹ

¹ Anị kpọma ḅalafama ye sọ ọ́ pịrị ḅarị ḅara ḍikii, ọmịnị Zayọnị ḅụ ye ḅụụ-fụkama-a ḅara kẹ angarị apụ na ọmịnị Sameriya ḅụ sime tẹ wa la-la ye ofori ḅẹ ḅara kẹ simearị apụ na — ọmịnị mị opu sịẹ Izirẹlị mẹ ḅẹ opu atomi ọmịnị tẹ ḅarasụa gotẹ tomi ma dama-muarị apụ!

² Ó mu tẹ Kalịne opu ama mẹ ḍikii. Anịtẹso ọmịnị Hamatị opu ama mẹ mu tẹ ideri koro mu Filisiteni ḅẹ Gati opu ama mẹ la. Arị iḅi Juda na Izirẹlị na ḅẹ amada-yọ ma nẹngị nẹngị sakị emi? Ịna bebe amakiri mẹ ḍụḅa ọmịna nye nẹngị?

³ Ó minini ḍụkụ-a mịnẹ si ene ḅoarị, kụma ọ́ mịẹarị ye jen-a anị ene kẹ ḅo kpekima.

⁴ Anị kpọma ḅalafamaye sọ ọ́ pịrị ḅarị ḅara ḍikii, ọmịnị ọmịna yela-ḅụra wararị iḅi lẹgị aị ọgọnọ ḅụụ sụn-arị apụ, asambịrịma opu nama meni na anana awọmẹ na kẹ alalị fịarị apụ!

⁵ Ó nume pakama ḅẹlẹmarị, Devidi mie ḅara, tẹ kẹ ọbọ ma ḅụ farịarị.

⁶ Bọlị mie ọ́ kẹ waịnị iru sụa ḅinma-ḅinma tẹ ḅuuarị, tẹ iḅi tẹịn sẹntị asanarị, kụma Izirẹlị fa mẹ ó kururuma-a.

⁷ Mie ḅụ ọmịnị mie ịn tarị kun-so ḅarịye. Ọmịna alalị ma na ama-da opu gboloma fịaị ma na kuno ḅa.

⁸ Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe mị tẹmẹ-la ḅeri nụnụ ẹkwẹn mẹ kọn tẹẹ: “Arị Izirẹlị ḅẹ apụ ma ḅụụ-gelema mẹ ḍiki-ḅioḅuarị; ịna igbigi la ḅụratẹ iḅi awarị ma, ị̀ ḅụ gberie sọ la-a. Ịna sịḅịda opu ama mẹ na anị ḅio sime-ye sime-ye na à kẹ ini na fịya-a apụ pịrị ḅa.”

⁹ Gbọrụ warị-kpo ḅụ oyi owiapụ kiri kọn-kọn, ịn fịị ḅa.

¹⁰ Fịtẹ tomḅọ ḅe mịnaḅọ, sịḅịda tẹ ḍụẹịn mẹ ḍiḅi ḅẹ ḅọ ḅe, ḍụẹịn mẹ dogi paka ḅa warị mẹ ḅio. Mịnaḅọ ḅe nwẹnị warị mẹ ḅio paa emi ḅọ sịn tẹ gbela ḅa, “Paa ị́nịna emi ḅọ emi anịanga?” Gbọrụ pọkọ nwẹnị pakịrị ḅa, “Ẹn-ẹn!” Anịtẹso mịnaḅọ ḅe ḅẹẹ ḅa, “Yaụ-simee! Wa ẹbị nyana na-iḅim, KỊNỊNYANAḄỌ ḅe ẹrẹ gotẹ ḅụ.”

¹¹ KỊNỊNYANAḄỌ ḅe ḅịḅị mẹ pịrị sakị, opu awarị na kala awarị na paịn-gboloki sara ḅa.

¹² Asụ amẹẹ ịkụ ọgọnọ mangị-mangị? Tomi ḍụọ ḍiḅi kiri soku-soku anambulo kẹ abajị tọrụ soku-soku? Anịsọ ó tomḅọ la kiri kẹ mḅọ pịrị pịkị ḅo kịnị-ḅaaḅa ye sọma tẹẹ, pịkị ḅo kura-aye sọma tẹẹ.

¹³ Ọmịnị ó Lodeba (anị fiearị “papaaye”) ọkị ye kẹ ḅụụ bomarị. Ó bomarị, “Wa kụrọ la ḅara ḅụ wa Kanayịmụ ọkị tẹẹ.”

¹⁴ KỊNỊNYANA-TAMỤNỌ, Kụrọmamgba Nyanaḅọ ḅe ḅioju ḅẹẹarị, “Izirẹlịapụ, à jen sịẹ ḅẹ ọmụ-ogbo kẹ fịrịma ḅo ọmịna bebe amakiri mẹ ọkị ḅẹ-yearị. Anị ó ponoma ḅa, ọgọnọ-jụ Hamatị Tolu-ḅọrọ Anga ḅụ ọkị mu suku-jụ Araba tụndụ suku la.”