Emọsị 4 - FỊAFỊA BAỊBỤLỤ

¹ Ó miemẹ pokii, ọmịnị Sameriya ḅẹ ereme, tẹ Basani ḅẹ anambulo tẹ ini iḅiọkụ kokoarị aị kịka tẹ tim-tim wararị apụ, si ḅara kẹ ịnyọ nyana-a apụ na mịẹarị apụ, igoin-apụ ma ponomarị, tẹ ịgbanịarị mịnẹ ọmịna diapụ sakị mamgba ọfịrị-iru kẹ ọ́ pịrị ḅuu!

² Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe anie fịafịaḅọ ḅara ḅụ, ò minini tẹẹ, “Ene ma ḅoarị ini inji-ḅaa-arị kẹ ọ́ fọnọ so ḅarị sakị mẹ; ọmịna ḅụ ọrụḅọ-ọrụḅọ arị ḅịḅị sụka wararị inji kịka ḅa.

³ Ini ọ́ fọnọ mu onu mẹ ḅụ kpeki tẹịn kaantẹ anga la tẹ ọ́ kẹ wakị pakama ḅa.”

Izirẹlị inetẹ ye ḍawọ ḅo-a

⁴ Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹarị, “Izirẹlịapụ, ọ́ Bẹtẹlị ḅẹ tọn-tọn yọ mẹ mu tẹ si mịẹ, ọmịnị ọkọ mịẹ ḅa ḅẹḅẹ! Ó Giligalị mu tẹ ọmịna opu kụrọ mamgba kẹ si mịẹ! Ó mu ma-mu tẹ nama amẹẹ ọkị-ḅo kẹ dede gbarị-a ḅara kẹ agba mịẹ, tẹ ọ́ nyana-oyi-ḅụụ-gberie kẹ ḅoo, tẹra aḍin karama ene goyegoye ḅụ.

⁵ Ó mu ma-mu tẹ ọmịna fịturu kẹ ịmịẹtẹ kẹ Tamụnọ ḅẹẹ, tẹ jaị-jaị tẹ ọ́ kẹ ḅo gbanama ḅẹ aị ma kẹ ḅụụ boma! Mie pembema ye mie ọ́ ḅẹlẹma tẹ mịẹ-mịẹ ye.”

⁶ “Yẹrị anie ḅuru-kụrọ kẹ ọmịna opu ama mamgba pịrị yee, anịsọ ọ́ pịkị ị̀ ḍọkụma-ḅoa.

⁷ Yẹrị eene mẹ ọlọ-sịẹmam ó ḍiḅi aị ma anị ḅii tẹịn sakị ḅụ. Àrị eene kẹ gbọrụ opu ama fịrịmam, kụma osi ye à fịrịma-a. Eene gbọrụ ḍụọ ḅụ saram, kụma osi ḍụọ samụnọm.

⁸ Minji ḅuu pọkọ-tarị ḅụ ịnyọ-fa tẹẹ, tọnwa opu ama ḅẹ apụ gbọrụ opu ama mum ini anịjụ minji nyana ḅẹ ḅiokpọ ḅụ, kụma inimgba ḅuu ḅẹ ḅara la-a. Anịsọ ịn paa pịkị ị̀ ḍọkụma-ḅoa.”

⁹ “Àrị ọfịrị ḅụra tẹ fẹrụ kẹ fịrịma tẹ soku-ḅẹ afịaị ma samụnọma famam. Igurube ọmịna warị akaka ḅẹ aḍụọ ma na vaịnị aḍụọ ma na fị siinm, ọmịna figi asịn ma na olivu-asịn ma na. Anịsọ ọ́ pịkị ị̀ ḍọkụma-ḅoa.”

¹⁰ À si obi kẹ ọ́ fịrịmam, à kẹ Ijiputi fịrịma ye pembe ye. Àrị ọmụ kiri ḅụ ọmịna asawọ ma ḅaam, tẹ ọmịna asụ ma ọkị-som. Ọmịna akpụrụ awarị ma tẹ ó sime tẹ paka-paka mu ọmụgbin-gbin aị ma ḅio fịtẹ oju-oju-oju fụrụ ọmịna anini ḅinmam. Anịsọ ọ́ paa pịkị ị̀ dama-ḅoa.

¹¹ “Àrị ọmịna ḅụ ja apụ ḅaa gulugulumam, à kẹ Sọdọmụ na Gomora na ḅaa guluguluma ḅara pembe ḅara. Anịsọ ọ́ pịkị ị̀ dama-ḅoa,” KỊNỊNYANAḄỌ ḅe ḅẹẹarị.

¹² “Anịtẹso, mie ḅụ, Izirẹlịapụ, àrị ó fomu ḅẹ-yearị. À miemẹ mịẹ ḅẹ-yearị ẹrẹsị, ọ́ tẹlẹma tẹ ì fomu-ḅara daa!”

¹³ Tamụnọ anie tụndụ ma mịẹ ḅọ ḅe ori pịkị fẹrụ ma tẹmẹm. Ọ̀ mịẹ tẹ tomḅọ ori akụrọ ma nimiarị; ori eneḅaka ḍima ḅo ḍin sọmarị. Kiri mẹ ọgọnọ-jụ ma ḅụ mie ọ́ mẹnjịarị. Mịẹ ori ẹrẹ: KỊNỊNYANA-TAMỤNỌ, Kụrọmamgba Nyanaḅọ!