Egberima-Ẹkwẹn 8 - FỊAFỊA BAỊBỤLỤ

Kẹ Nimi Tokiniarị Ye

¹ Ó pokii! Nimi kịnị mamgba sịịn-olokuarị. Sịḅịḅio-kịẹn mịẹ tẹ kịnị á pọkọ naarị.

² Tụndụ ma ọgọnọ-jụ ḅụ etela mẹ kpeki anga, tẹ etela ḅo jen-jen saḅa-ḅọrọ wararị yọ mẹ ḅụ á sịẹsime wararị.

³ Ḅọrọ ama mẹ sọarị yọ mẹ ḅụ, onu aḅọkọ ma akaka, á sịn-arị:

⁴ Tomikiri ḅẹ atomi, àrị ọ́ tẹkẹarị, tomikiri sime-ḅọ sime-ḅọ à sịn-arị.

⁵ Amụ ọ́ ḍụḅa paka-ḅo tomi la-a? Ọ́ ḍụḅa paka-ḅo tomi la tẹ ḅara simee. Ọmịnị oḅori-sọarị aro? Ọ́ ḍawọ tẹ sịḅịḅio nyanaa.

⁶ Ọmịnị ì iḅi ẹkwẹn ma pokii; à ḍuko ọ́ pịrịarị aị mamgba kuram.

⁷ Karakara ye mẹ mie à ḍukoarị; arị iruo aị ḍiki-ḅioḅuarị.

⁸ À ḍukoarị ye goyegoye karakaram; anị ḅụ iruo ye anịanịa kịnị da-irima arị gberie-sọ ofori.

⁹ Ye ḅio sime ye lekiriarị ḅọ mẹ ḅụ, arịmgba giregire wararị; ye ḍuko pịrị lamatẹ ḅọ mẹ ḅụ, anị banabana wararị.

¹⁰ Seleḅa nakara à ḍuko ị́ pịrịm mịẹ ḅẹ ye mẹ sẹlẹ-ọkịị; iḅi tẹịn golu nakara ḍawọye ḍin sẹlẹ ọkịị.

¹¹ Yẹrị Nimi, arị iḅiọkụ iḅi yela ḅiriaị nẹngịm ó ḅiiarị ye tẹ ọ́ kẹ ị̀ tọnma ḅẹ gberie-sọ ofori.

¹² Yẹrị Nimi, à pịkị ye ḅio sime ye lekiri nyana wararị; à ḍawọ ye ḍin wararị, tẹ karakara ḅẹrẹkọn-arị.

¹³ KỊNỊNYANAḄỌ ḅe mangịma mẹ anie siye ḍiki-ḅioḅu; à ḅụụ-gelemarị apụ na opu ẹkwẹn kọn-arị apụ na ḍiki-ḅioḅuarị, si etela ma na iruo ẹkwẹn ma na.

¹⁴ À ye kuroma ḅo-ḅo tẹ arị mịẹ-mịẹ pakama ḅoarị. À yefieye naarị, à pịkị kụrọ wararị.

¹⁵ À ḅarasụa amadapụ pịrị tẹ ini ama-daarị pịkị ḅẹrẹtọn apụ mịẹ tẹ ini iḅi oloko sụarị.

¹⁶ Tomikiri ḅụ ḅẹrẹtọn-arị apụ mamgba ị̀ ḅarasụa ḅụ ḅẹrẹtọn-arị; ama-ḍikiḍiki kụrọ-ḅara ḅụ simearị apụ na ama ḅẹ opu atomi na sọ gbọrụ ḅara mẹ.

¹⁷ Àrị ị̀ ḅẹlẹmarịapụ ḅẹlẹmarị; ị̀ ḍọkịḅọ-ḍọkịḅọ inetẹ ị̀ ḍọkị-ẹrị ḅa.

¹⁸ Àrị ngọ na kụn na nyana tẹ kẹ kịnị pịrịarị, lolo na mịẹ ye ḅara-ḅẹsọ na.

¹⁹ Ị́ ị̀ ḅara nyanarị ye mẹ iḅi iḅitẹịn golu mẹ nẹngịm; iḅi gwaye gbala-gbala ofori seleḅa mẹ nẹngịm.

²⁰ Karakara mịẹ etela mie à mẹnjịarị; aḍụa ofori ḅẹrẹkọn etela ma mie à ḍuka-muarị,

²¹ Ị̀ ḅẹlẹmarịapụ ma kọnmarị, ngọ tan-tan ịna awarị ḅinmarị.

²² KỊNỊNYANAḄỌ ḅe tarị ị̀ tẹmẹm ye-mẹmgba ḅụ, iḅere-iḅerea kụra-ḅio ọ̀ kọrị akọrịnama ma ḅẹ tarị ye.

²³ Gbọrsịḅị sukuyọ-saakị mẹ ḅụ mie ori ị̀ mịẹ ye, tarị pịrị-pịrị mẹ ḅụ, tẹrẹmẹ tomikiri mẹ saakịm.

²⁴ Yẹrị iyi tẹrẹmẹ abajị ma iyim, ngụngụḅa minji amụ paka-a sakị.

²⁵ Yẹrị iyi tẹrẹmẹ tụndụ ma iyim, tẹrẹmẹ ịn tụndụ ma kẹ arịḅẹ akiri ḅụ sịẹmam,

²⁶ tẹrẹmẹ Tamụnọ kiri mẹ na anị ḅẹ aḍụọ ḍiḅi anga ma na mịẹm, anịanịa tarị lịka tẹ ḅara-kuḅu ḅin ḅẹ ye.

²⁷ Ò So-tọrụ mẹ kẹ anị ḅẹ sime kiri wẹrịarị sakị à simem, Ò So-tọrụ mẹ nụnụ finji abajị mẹ ọgọnọ gbaịn-koro sakị,

²⁸ Ori oḅuto kẹ So-tọrụ koroma sakị, ori abajị mẹ ḅẹ minji aḅọkọ ma finji sakị

²⁹ tẹ tọnm tọrụ mẹ ḅẹ aminji ma iwo ori ḅẹẹ ḅara nẹngị ma. À simem ò tomikiri mẹ ḅẹ asuku ma saakị sakị.

³⁰ Arị ori akaka simem warị nama aka ḍin ḅọ pembe ḅara, ene-ḅaaene-ḅaaene ori ì gotẹ ḍerekum, sakị mamgba à ḅioḅẹlẹm ọ̀ tọrọkọ

³¹ Ò tomikiri mẹ gotẹ ḅioḅẹlẹm, Ọ̀ tẹmẹ atomi ḅụ tọrụ-ḅẹlẹ nyanam.

³² “Mịọkụ, asawọ, ọmịnị ì pokii. Ọmịnị à ḍuko ḅara mịẹẹ, anịsakị ó ḅioḅẹlẹ ḅa.

³³ Ọmịnị ịn kẹ ó toluma ye mẹ pokii. Nimi ḅara simee; ọmịnị anị ḍiki-tọrụsin ma.

³⁴ Ì pokiarị ḅọ ḅioḅẹlẹ ḅa, ene-ḅaaene-ḅaaene ị̀ ḅọkọ anga simearị ḅọ mẹ, ḅọrọ ị̀ sime-yọ sọ-sọ anga mẹ ḅụ koruarị.

³⁵ Ị̀ ḍọkị ẹrịarị ḅọ ḍumo ḍọkị ẹrịarị, tẹ KỊNỊNYANAḄỌ ḅe mḅọ ḍiki-ḅioḅẹlẹ ḅa.

³⁶ Ị̀ ḍọkị ẹrị-a ḅọ mẹ, si kẹ amịna ḅụụ mịẹarị; ì ḍiki-ḅioḅuarị ḅọ goḅọ-goḅọ, fị ḅẹlẹmarị.”