Egberima-Ẹkwẹn 7 - FỊAFỊA BAỊBỤLỤ

¹ Ị̀ tụḅọ, à ḍukoarị ye kẹ ḅiokoromaa, tẹ gbala-gbala arị ị́ ḅẹẹm mịẹ ḅẹ aị ma kẹ ḅioḅọrọma ma.

² À ḍukoarị ye mịẹẹ, anịsakị í ḍumo ḅa. Ị̀ kẹ ị́ atọrụngbọ bala tẹ arị gbaịn ḅọrọmarị ḅara mẹ kẹ ì toluma ye mẹ bala tẹ anị ḍiki-mẹnjị.

³ Sakị mamgba ì toluma yee kẹ ị́ ḅụụ kpekimaa; anị kẹ í ḅiokoromaa, sakị mamgba.

⁴ Nimi kẹ ị́ mịnaḅọ ẹrẹḅọ ḅara ọkị, tẹ ye ḅio sime ye lekiri kẹ ị́ na kpeki tẹịn ikiaḅọ sọmaa.

⁵ Arị ja owiapụ ereme ḅụ ị́ wẹrị ḅelema ḅa, pịkị kịnị toluma fama ẹkwẹn nyana wararị ereme ma ḅụ.

Ama-mẹnjị-ẹrẹḅọ Ma

⁶ Gbọrụ sakị arị ị̀ warị ḅio sime tẹ ikiḅa-ḅọkọ ḅụ ḍiki pakamarị,

⁷ tẹ tọnwa asambịrịma apụ, tẹ amụ ye sime-ḅara nimi-a apụ ẹrịm, kụma ịna ḅụ ḅẹ gbọrụḅọ à nwẹn kẹ elekima-sụam, ori oḅori ḅara kẹ ye mịẹarị.

⁸ Ori ngẹrị etela mẹ ḅẹ gbọrụ ịkọlị, tẹ gbọrụ ẹrẹḅọ angarị warị kpeki anga ḅụ mẹnjị muarị. Ọ̀ mẹnjị á warị mẹ ḅọrọ ḅẹ ḅara mịẹ simem

⁹ ḅoḅiri-so ḅụ, ene ḅo furu tẹ anị sakị mẹ ḅụ.

¹⁰ Anie ḅụ á nwẹnị ori na bịama; ama-mẹnjị-ẹrẹḅọ ḅara mie á kẹ ye-ḅiri yee, tẹ á mịẹ ḅẹ ye kẹ ḅiokoromarị.

¹¹ Árị ma anie ḅiokpọ tẹ ḅụụ-jịrị nwẹn sịn ye nimi-a ẹrẹḅọ, tẹ etela mẹ ḅụ mẹnjịarị,

¹² anịanịa gbọrụ ịkọlị jụ, ja sakị etela karakara ogbo mẹ, ja sakị pịkị ogumaḅiri ḅụ.

¹³ Á nwẹnị asatụḅọ ḅe fịnama, ọ̀ ḅịḅị nọnjị, da-da ọ̀ tọrụ ḅio ḍiki tẹ ḅẹẹ,

¹⁴ “Mịmgba mie àrị ị̀ agba mịẹ yee, tẹ à minini ịlọ suma yee.

¹⁵ Mie ḅụ à paka-ḅo ị́ ḍọkị simem, à ḅiim àrị ị́ ḍọkị ẹrị, tẹ mie ị́yẹrị!

¹⁶ Ijiputi ḅụ ḅo kịrị-kịrị tọrụ sụa ḅịtẹ mie à kẹ ì iḅila dẹẹ wararị.

¹⁷ À maha na alosi na sịnamọnị na nwẹn-sịn kụnụaị kẹ mịẹ sẹntị kẹ anị asana tẹẹ.

¹⁸ Ḅoo! Yee wa ḅelema tii kọn gboloma mị bebe ḍin ḅụ. Wa ḅioḅẹlẹ ḅa jụmọ-jụmọ kuḅu ḅio ḅụ.

¹⁹ Ì di warị ḅio ofori. Ò so ala jụ mu wararị.

²⁰ Ọ̀ tọnwa igbigi ọkị tẹ kẹ mum, tẹ ọ̀ pịkị-ḅo ḅịa ngei aḍin fa jei la ḅa.”

²¹ Mie ḅụ á nwẹnị ọ̀ sịḅịḅio sima, árị iḅi na ẹkwẹn-ḅịḅị ḅẹlẹ ḅụ na, tẹ ọ̀ nwẹnị ḅịkị á pịrị.

²² Anị-gbọrụ-kirikiri, ò gbere-gberema árị na muarị ḅara, gbala ịn kẹ ḅaa ḅẹ-muarị nambulo ọkụ, gbala tụḅara tẹ ḍosi ma-mu ḍiein ḅio koro ḅẹ-yearị ye ọkụ,

²³ anie ịn ḍiein kẹ ò ḅioḅẹngbọ tẹịn tolu ḅẹ yọ mẹ. Ọ̀ kịkaye anie mu ịgbọ-tolu ḅio sụka ḅẹ muarị feni — ò nimi-a mịnẹ ò ḍumo mu fa ḅio sọ ḅẹ-muarị.

²⁴ Mịọkụ ọkọ ẹrẹsị, ị̀ awọmẹ, ọmịnị ì pokii. Ọmịnị à ḍukoarị ye kẹ ye-sịn.

²⁵ Ḍụkụ tẹ ọkọ sime ẹrẹḅọ í ḅioḅẹngbọ fẹ nyana ma; á gotẹ mẹnjị ikelema-ikelema tẹ á ḍọkị ma.

²⁶ Á tọnwa-apụ fama-fama tẹ, pịkị mịẹ tẹ kịẹnkịẹn-ọkụ-ofori atomi fịị tẹẹ.

²⁷ Ị́ á warị muarị ḅẹḅẹ, ị́ mẹnjị fị simearị etela sọ tẹẹ. Anị anie pẹlẹma ḅọrọ mu ala-a fịị laarị anga.