Egberima-Ẹkwẹn 4 - FỊAFỊA BAỊBỤLỤ

Nimi ḅụ Ḅoarị Iḅi-aị

¹ Ị̀ tụḅọ, ị́ ḍa kẹ í tolumarị ye pokii. Anị kẹ ye-sịn, anịsakị í yefieye naa nyana ḅa.

² À kẹ í tolumarị ye mẹ iḅim, ọkọ ẹrẹsị anịmgba kẹ ḅiokoromaa.

³ À paa kala wararị sakị ḅụ, ị̀ ḍa-na-iyingi-na ngẹrị tụḅọ ḅara ḅụ,

⁴ ị̀ ḍa ye kẹ ì toluma ḅẹ tẹ ḅẹẹ-ḅẹẹm, “À ḍukoarị ye kẹ ḅiokoromaa, gbala-gbala anị kẹ ḅioḅọrọma ma. Arị ị́ ḅẹ ḅara mịẹẹ, anị sakị í ḍumo ḅa.

⁵ Nimi na ye ḅio sime ye-lekiri na nyana-a! À ḍukoarị ye kẹ ḅioḅọrọma ma, anịanịa kẹ ye-sịn-a ḅara kẹ anị kẹ gbin koroma-so.

⁶ Nimi kẹ gbin koroma-so ma, anịsakị árị ị́ gbaịn ḅọrọma ḅa; á ḅẹlẹmaa, anịsakị árị í koko tẹ ye ḅarị ị́ la ḅịa.

⁷ Nimi nyana mẹ anie kụrọ nyana tẹịn ye tẹ í inetẹ mịẹ ḅarịye. Ḅẹẹ-jenye-jenye tẹ ị́ nyanarị ye goyegoye, yefieye lekiri nyana-a.

⁸ Nimi ḅẹlẹmaa, anịsakị árị ị́ mịẹ tẹ í opu sọ ḅa. Á fịnamaa, anịsakị á kụn ọkị-ḅo ị́ pịrị ḅa.

⁹ Árị ebube amada-sun sọ kẹ ị́ pịrị ḅa ị́ sịḅị ọgọnọ.”

¹⁰ Ị̀ tụḅọ, ì pokii. À ḍuko ị́ pịrịarị ye mẹ kẹ kụrọ-nyana wararị ye ḅara ọkị, anịsakị ị́ nangwọ ḍumo kọn ḅa.

¹¹ À nimi kẹ í toluma tẹẹ, pịkị ḍumo kọn-kọn karakara ḅara na.

¹² Í nimi ḅara kẹ mẹnjịarị ogbo kpọkpọ gberie-sọ ị́ dasịẹma ḅịa, tẹ ị́ mangị sakị ị́ pụmbụ ḅịa.

¹³ Sakị mamgba ị́ ḍawọ tẹ ye mẹ kẹ ḅiokoroma. Ị́ ḍawọ ḍịntẹ ye mẹ anie í ḍumo — anị koko kpaịnmaa.

¹⁴ Si atomi muarị anga mu ma. Si-sịḅịḅio-sụa apụ ma ḍumo mẹ ḍikima ma.

¹⁵ Mịẹ ma! siye ḅụ ị́ ḅụụ wẹrị ḅelema. Anị sịkị tẹ ị́ jụ muu.

¹⁶ Si-sịḅịḅio-sụa apụ atomi inetẹ mono-mono-a ini iri-ye mịẹ-a ogbo. In mono-a tẹ yaụ-sime nwenii in ḅo ye kẹ kịnị lamarị.

¹⁷ Si-sịḅịḅio-sụa amịẹaị na kụrọ-kụrọ amịẹaị na ịna ḅụ fịye na ḅuu-ḅuu ye na kịkam.

¹⁸ Karakaraye-mịẹapụ ma mẹnjị muarị etela mẹ saakị paka-ḅoarị ịrụa na kịkam, anị ḅịya kụrọ-kụrọ nwenii ḅo eneḅaka ogbo laarị.

¹⁹ Anị sime-ḅara sime-ḅara sọ, Si-sịḅịḅio-sụa apụ ma etela mẹ ḍin kanakana ḅara kanakana wararị. Ịn ḅịkịarị, kụma ini inetẹ ịna aḅụọ bịan tẹ ịn pụmbụ ye sọ ẹrị-a.

²⁰ Ị̀ tụḅọ, à ḍukoarị ye kẹ ye-sịn. Ị̀ ẹkwẹn ma pokii.

²¹ Gbala-gbala ḍụkụ tẹ arị ị́ ḅara pẹlẹ-so ma. Arị kẹ ḅiokoroma tẹ kẹ í ḅioḅẹngbọ ḅụ kokoo.

²² Arị ḍumo na obi ofori oju na kẹ ḅẹḅọ-ḅẹḅọ tẹ arị fiearị aị naarị ḅọ pịrị ḅa.

²³ Ị́ ḅẹrẹ kẹ ḅiokoromarị ḅara ẹbịị; í kuromarị arị mie í ḍumo kẹ anị simearị ḅara wẹrịarị.

²⁴ Gbala-gbala karakara-a gbọrụ ẹkwẹn sọ kọnma. Iruo aị na kịnị da-irimarị ẹkwẹn ma na gbọrụ mịẹ sọ nyana ma.

²⁵ Da-da tọrụ saakị tẹ kẹ tọrọkọ-jụ ḍikii, karakara ḅiokpọ ḅụ; ḍụkụ tẹ ḅụụ-jịrị ị́ sịḅị-tuu ma.

²⁶ Ẹbị ḅara kẹ ị́ mịẹ ḅẹ ye tọn pẹlẹ, tẹ ị́ mịẹarị ye mịẹarị ye ḅo kuraye sọ ḅarị ḅara.

²⁷ Siye kọkọrọ tẹ da-da mẹnjị tọrọkọ muu. Karakara etela mẹ ḅụ, gbọrụ ḅụọ sọ kẹ gbisini so ma.