Egberima-Ẹkwẹn 31 - FỊAFỊA BAỊBỤLỤ

Ḍuko Amadaḅọ Tolumaye

¹ Ma ma anie tẹmẹ-la ẹkwẹn ma tẹ Amadaḅọ Lẹmụwẹlị iyingi kọn ọ̀ pịrị aị ma:

² “Ị́yẹrị anie à furo ḅio iyi tẹ ị̀ ḅụụ yela wararị owiḅọtụḅọ ḅee, ị̀ atẹkẹ ma ḅẹ pakịrị-ḅịḅị. À tiye ḍuko ị́ pịrị ḅẹ?

³ Ị́ ịnyọ mẹmgba kẹ ere-ḍọkị ḅụ fama ma, pịkị í igbigi na ereme ḅụ na. Arị amadapụ guluguluma tẹ.

⁴ Lẹmụwẹlị, pokii. Amadapụ iru ḅuu na-iḅi-a, anịanịa ọfịrị-iru gotẹ lẹlẹ.

⁵ Ini iru ḅuu arị sakị ini oloko ma kẹ ḅioḅọrọmarị pịkị mịẹḅẹ-ọkụ-ofori apụ ma la akiri ḍiki-tọrụsin-arị.

⁶ Ọfịrị iru sime fịịarị apụ pịrịm, opu ḅụụ-ḅalaḅala ḅio emi apụ.

⁷ Yee in ḅuu tẹ ịna igoin na ḅioḅẹngbọ-si na kẹ ḅioḅọrọma.

⁸ “Pọkọ saakị tẹ ẹkwẹn inetẹ ẹkwẹn amịna aḅụụ pịrị-a apụ ma pịrịị. Ḍụkụ tẹ ḅarasụa pịrị apụ nyana-a apụ ma sime ịn pịrị aị fama ma.

⁹ Ẹkwẹn ịn pịrị tẹ karakara ḅẹrẹkọnḅọ sọọ. Ḍụkụ tẹ sime igoin-apụ na mịẹḅẹ-ọkụ-ofori apụ na pịrị aị ịna aḅara so ma.”

Taḅọ-ịnyọ nyana Ẹrẹḅọ Ma

¹⁰ Taḅọ-ịnyọ nyana ẹrẹḅọ ḍọkị-pakama-ḅo mẹ anị ḅụụ-fụkamam. Á kpọma yela opuma yela pọkọsụa-aị nẹngị faam!

¹¹ Á di ò ḅioḅẹngbọ kẹ á ḅụ gbanarị, gbala-gbala ọ̀ ḅarị igoin ḅịa.

¹² Á ḍumo laa ḅiri laa ḅiri, árị iḅiye kẹ ọ̀ mịẹarị, gbala-gbala ye kẹ ọ̀ lama ḅẹ ye-a.

¹³ Sakị mamgba á kọrịnama kọrị-kọrị tẹ nama-isuke kẹ ḅịtẹ ḍoriarị.

¹⁴ Ja apụ nimi lama-a ayọ mie á mu-mu tẹ fịye fẹ-fẹ warị ḅoarị, tuḅoni-arụ ala-jụ fịaị sịn ḅo-ḅo ḅara.

¹⁵ Ene amụ finji koro-a ogbo mie á saakị tẹ á warị-kpo mẹ fị ḅẹ fịye mịẹ tẹ pịkị á fịrịmẹnjị-eremịna-awọmẹ kọrị ḅẹ ye ḍuko ịn pịrịarị ye.

¹⁶ Á kiri ḍọkị tẹ fẹarị, tẹ árị ḅarana ḍọkị-ḅo igbigi kẹ kụrọ-sịn ḍiḅiarị.

¹⁷ Árị ma anie kụrọma kọrịnama kọrị ḍịn-ḅọ; á kụrọ-ḅara anie á pịkị kọrịnama kọrị tẹmẹ nyana ḅara.

¹⁸ Á kọrị pakama-ḅoarị ye goyegoye la ḅịḅị á nimi wararị, tẹ á kọrịnama kọrị nwenii ene ḍin-arị.

¹⁹ Árị ḅarana iri mịẹ tẹ kẹ á soku-ḅẹ ḅịtẹ ḍoriarị.

²⁰ Á ḅara sarasara wararị igoin-apụ na mịẹḅẹ-ọkụ-ofori apụ na ḅụ.

²¹ Árị oḅoku koro sakị gotẹ tẹmẹ lokolokoma-a, á warị-kpo mẹ oḅoku dee kapa nyana wararị ẹrẹsị.

²² Árị iḅila gbaịn aḅịtẹ mịẹ wararị, tẹ awụ tọrụ sụa iḅi akapa sụarị.

²³ Á di kịnị ò nimi lama wararị, ama ḅio opu atomi ma ḅẹ gbọrụḅọ.

²⁴ Á kapa na ḅiri-ponoaị na gbin-gbin tẹ kẹ tuḅoniapụ dẹrịarị.

²⁵ Á kụrọ wararị tẹ kụn nyana wararị, á pịkị ḅaa paka ḅẹ ye gotẹ ḅalafa-a.

²⁶ Deintẹ nimi mie á kẹ ẹkwẹn-arị; iḅi-yemịẹ-ḅara mie á pịkị kẹ kịnị tolumarị.

²⁷ Sakị mamgba á kọrịnama kọrịarị, pịkị á warị-kpo mẹ ḅiiarị aị kẹ ịn pịrịarị.

²⁸ Árị awọmẹ, ini á mịẹarị ye mẹ kẹ ye-sịn wararị ye mẹ ḍie-pakamarị, á di pịkị á tokiniarị.

²⁹ Ori mẹẹ, “Tọnwa iḅi sime-ereme emii, kụma ị́yẹrị iḅi tẹịn inimgba ḅụ.”

³⁰ Iḅi, sịḅịḅio simarị; anịsakị iḅi ịmaịn-faarị, kụma KỊNỊNYANAḄỌ ḅe mangịmarị ẹrẹḅọ ma kịnị á tokini ḅa.

³¹ Á mịẹarị aị mamgba kẹ á gotẹ ḍukoo. Ḅẹḅọ-ḅẹḅọ mangịma kẹ á pịrị na-iḅim.