Egberima-Ẹkwẹn 3 - FỊAFỊA BAỊBỤLỤ

Kẹ Asambịrịma Atomi Ḅeri Nụnụ Ḅẹ Ẹkwẹn

¹ À kẹ í tolumarị ye kẹ ḅioḅọrọma ma, ị̀ tụḅọ. À ḍuko ị́ pịrịarị ị́ mịẹ ḅẹ ye mẹ kẹ sakị mamgba ḅiokoromaa.

² Ì tolumaye mẹ nangwọ tẹ lọkọlọkọ ḍumo kẹ ị́ pịrị ḅa.

³ Ḅioḅẹngbọ-kẹ-sịrẹrẹ-niḅi ḍumo na karakaraye mịẹ na wẹrịso ma; arị kẹ mịẹ-mịẹye sọmaa, tẹ sakị mamgba arị mịẹ kẹ ḅiokoromaa.

⁴ Í miemẹ mịẹ kụma, Tamụnọ na tomi na í ḍiki-ḅioḅẹlẹ ḅa.

⁵ Í ḅioḅẹngbọ mẹmgba kẹ KỊNỊNYANAḄỌ ḅe sịrẹrẹẹ. Gbala-gbala í kuromarị í nimim ḅẹ ye ḅụ sịrẹrẹ ma.

⁶ Ị́ mịẹarị ye goyegoye ḅụ KỊNỊNYANAḄỌ ḅe kẹ ḅiokoromaa, tẹ ọ̀ karakara etela mẹ kẹ í ḍie ḅa.

⁷ Gbala-gbala ḍụkụ tẹ mịẹ kuroma mẹ ị́ ḅụ sọ ma mịnẹ í ye-nimi í nimi ḅara nẹngịm; paa KỊNỊNYANAḄỌ ḅe ḅịḅị pokii, tẹ ḍụkụ tẹ kura-aye mịẹ ma.

⁸ Ị́ ọkọ mịẹ-mịẹ, anị iḅi obi-gwọ-ḍiri kịka tẹ ị́ ịnọ ma gwọ tẹ ị́ fụka-aị ma deinma ḅa.

⁹ Kẹ KỊNỊNYANAḄỌ ḅe kụn ḅụ, í kiri pakama-ḅoarị aị ḅụ iḅitẹịn aị ma kẹ ḅo ọ̀ pịrịị.

¹⁰ Ị́ ọkọ mịẹ kụma, ị́ fịaị koko awarị ma ḅio mgbọlị fịaị ḅin ḅa, ị́ pịkị iru nyana ḅụrama tẹ ị́ ḅarị inetẹ anịmgba koko ḅịa.

¹¹ Ị̀ tụḅọ, KỊNỊNYANAḄỌ ḅe ị́ datụkụmarị sakị, kpọma kẹ ye-sịn ḅara kẹ anị ọkịị, tẹ kẹ ḅeri nụnụ ye sọma ị́ ḅụụ pịrị.

¹² KỊNỊNYANAḄỌ ḅe ọ̀ ḅẹlẹmarịapụ mie ọ̀ datụkụmarị, anie ḍaḅọ kẹ ọ̀ kẹ ḅụụ-tọn-arị tụḅọ datụkụma-tụkụma ḅara pembe ḅara.

¹³ Ḅioḅẹlẹ sime ḅo ye-nimi tẹ ḅọ mẹ pịrịm — anie yefieye nimi nyana tẹ ḅọ mẹ

¹⁴ Anị ḅe sọye seleḅa ḅụ sọye nẹngịm anị opu ḅara kẹ yela ị́ pịrị golu nẹngịm.

¹⁵ Nimi iḅiọkụ yela juwẹlị nwẹn-sịn ḅụụ-ḅirima ngọ ma nẹngịm; ị́ inetẹ ḅii ḅẹ ye tẹ kẹ anị tọnma ḅẹ ye ofori.

¹⁶ Nimi nangwọ ḍumo kẹ ị́ daarị, pịkị pẹrẹ na kụn na sọ.

¹⁷ Nimi inetẹ mịẹ tẹ í ḍumo ḅụụ-ḅẹlẹma ḅa, tẹ ị́ kẹ mu ye ị́ la ḅịa yọ ḅụ suu wẹrị ḅa.

¹⁸ Ḅo ye-nimi tẹ apụ ma in ḅioḅẹlẹ tẹ; nimi ḍumo kẹ ịn pịrị ḅa.

¹⁹ KỊNỊNYANAḄỌ ḅe ò nimi ḅụ ḅọrọ tẹ kiri mẹ tẹmẹm; ò ye-nimi ḅụ mie ọ̀ ḅọrọ tẹ So-tọrụ mẹ kẹ amịna kiri ḅụ wẹrị yee.

²⁰ Ò nimi mịẹ tẹ tọrụkuḅu ḅẹ minji mẹnjịarị, tẹ kpiti-so mẹ eene kẹ kiri ọgọnọ sararị.

²¹ Ị̀ tụḅọ, í nimi na í ye suku ḅio simearị ye lekiriarị ye mẹ na ọlọ-sịẹmaa. Gbala-gbala ḍụkụ tẹ arị ị́ ḅara pẹlẹ so ma.

²² Arị ḍumo ọkị-ḅo ị́ pịrị ḅa — ḅụụ gbẹẹtẹ ḅioḅẹlẹmarị ḍumo.

²³ Í inetẹ ye ị́ la-a ḅara kẹ í muarị anga mu ḅa, tẹ gbala-gbala pụmbụ kịngẹ sọ ị́ pụmbụ ḅịa.

²⁴ Í iḅila ọgọnọ mono ḅarị sakị ị́ ḅalafa ḅịa, ị́ pịkị mono ḅọrọ-so ḅa bebe ḍin mẹ ḅụ.

²⁵ Í ḅiotọn-a ḅara kẹ paka ḅarị siye gotẹ tẹmẹ-lokoloko nyana ḅịa, anie erise ḅara kẹ ḅo si-sịḅịḅio-sụapụ gbaịn-gbaịn ye mẹ.

²⁶ KỊNỊNYANAḄỌ ḅe í koko tẹ ye ị́ la ḅịa. Ọ̀ ḍụkụ tẹ ị́ ḍiein ḅio koro ḅịa.

²⁷ Í inetẹ ḅẹ sakị goyegoye ḅụ, iḅi kẹ ḅụụ-fụka ḅụ simearị apụ mịẹẹ.

²⁸ Gbala-gbala ị́ na kpeki tẹ angarị ḅọ ḅẹẹ ma: “koruu, ḅaa la sakị”, í inetẹ mịọkụ ḅarasụa ọ̀ pịrị ḅarị ḅẹḅẹ.

²⁹ Si kẹ ị́ na kpeki tẹ angarị ḅọ mịẹ ḅẹ gbọrụ siye sọ tọn ma; ori ị́ akaka angarị sakị goyegoye, ori í minini wararị.

³⁰ Ḅẹrẹ ofori ḅara kẹ gbọrụ tomḅọ sọ na ye-nụnụa ma, gbala-gbala amụ ò ye kẹ ị́ lama ḅẹ gberie-sọ kẹ ị́ mịẹ-a sakị goyegoye.

³¹ Ḅẹrẹ ḅioḅẹngbọ sụa kụrọ-kụrọ amịẹaị mịẹarị atomi pịrị ma, anịanịa tọn-pẹlẹ mịnẹ ị́ ịn mịẹarị ḅara mịẹ ḅa,

³² kẹ gotẹ ọkọ ḅẹẹarị, KỊNỊNYANAḄỌ ḅe siye mịẹarị atomi ḍiki-ḅioḅuarị, kụma karakaraye-mịẹapụ ḅụụ mie ọ̀ tẹmẹ kẹ gbana wararị.

³³ KỊNỊNYANAḄỌ ḅe wori-nume kẹ si-sịḅịḅio-sụa apụ ma sime ayọ ma ḅụ gbanarị, kụma ọ̀ karakaraye-mịẹapụ ma sime-ayọ ma bomarị.

³⁴ Ọ̀ ḅụụ-gelemarị atomi na mịẹ nyana-a, kụma ori iḅi kẹ ḅụụ-lẹgịmarị apụ ma mịẹarị.

³⁵ Ye-nimi atomi kụn nyana ḅara kẹ ereso ḅa, kụma oḅori-sọarị atomi ma mịẹ ḅarịye anie ịwọ ye kẹ ịna tọrụ-tuu mẹ ḅụ sụa.