Egberima-Ẹkwẹn 26 - FỊAFỊA BAỊBỤLỤ

¹ Oḅori-ḅọ tokini mẹ, anie mịẹ-mịẹ ye-a; anị kịkarị ye anie ịrụa kụra ḅụ sararị eene-mgbọ So-tọrụ ḅụ, anịanịa fịaị soku-sakị ḅụ koroarị eene.

² Wori-anume inetẹ ị́ ịnọ ḅịa arị ị́ kịkarị sikima. Arị kịkarị aị anie fiin ḅọrọarị tẹ gbala-gbala sịẹsime-a afeni.

³ Ị́ asụ fomu nyanam; ị́ yedogi-nama ḅịḅị kpọọ nyanam; í oḅori-ḅọ fomu-kọsịma nyanam.

⁴ Ị́ ofori-ofori-aị ḍukoarịḅọ gbela ye pakịrịarị ḅẹḅẹ, ị́yẹrị sọ anị gbela ḅọ ḅe ofori-ofori aị ḍukoarị ḅọ sime-ḅara mẹ sime tẹẹ.

⁵ Ofori-ofori pakịrị ḅịḅị kẹ ofori-ofori gbela ye mẹ pịrị, anịsakị gbela ḅọ mẹ nimi ḅa mịnẹ mḅọ kuromarị mḅọ aka ḍin lamam ḅẹ ḅara mẹ mḅọ ọkọ sime-a.

⁶ Ị́ mịẹ tẹ oḅori-ḅọ oku mu ị́ pịrịarị ḅẹḅẹ, ị́ gbọrsịḅị ị́ aḅụọ pẹlẹ-siin ḅarịya; ḅụụ-fụka anie í dogi-ḅo ị́ ḅụụ pịrịarị.

⁷ Oḅori-ḅọ inetẹ egberi kẹ mịẹ ḅụ suu ḅarị ḅẹḅẹ ngụrọ-kọnḅọ sọ ori aḅụọ kẹ mẹnjị ḅa.

⁸ Oḅori-ḅọ tokini mẹ ye ḅụụ ofori ḅara anie, ḍụḅarị kẹ ị́ katapọtị ḅụ kpọọ tẹ tẹịn ye ḅụụ ofori ḅara.

⁹ Oḅori-ḅọ nimi ẹkwẹn kẹ ori ẹkwẹn ḅụ sụarị kụma anị kẹ í ḅiokoromarị ye anie, iru ḅuu tọrụ-ḅaama wararị tomḅọ ḅarana ọ̀ ḅara temi wararị nangị siin pakama-ḅo ḅẹ ḍọkịarị ọkụ.

¹⁰ Kọrịnama nyanaḅọ ori ẹrị oḅori-ḅọ oḅori-ḅọ ọkọarị ḅẹḅẹ ọ̀ ḅụụ-fụka dogi-ḅo kọrịnama mẹ gboloma ḅọ gboloma ḅọ pịrịarị.

¹¹ Oḅori-ḅọ pịkị siin ọ̀ mịẹ ḅọrọtẹ oḅori ye mịẹ mẹ kịkarị ye anie, obiri pịkịma-so mu ori ọsụ-sara aị mẹnị.

¹² Apantu sọ tẹịn oḅori-ḅọ mẹ iḅi kẹ gbọrụḅọ tẹ kuromarị mḅọ ye nimim, kụma ọkọ sime-a ḅọ mẹ nẹngịm.

¹³ Anị ḅọrọ ḅo tọ sakị la sakị kọrịnama ḅụụ-lọkọ nyana tomḅọ ḅe warị ḅio saakị paka ḅẹ? Ó gotẹ ḅalafaarị ye ḅọrọ tiye? Ọkụkụ mụnọọ?

¹⁴ Kọrịnama ḅụụ-lọkọ nyanaḅọ mẹ iḅila ọgọnọ pịkị-pịkị koroarị. Ọ̀ saakị paka mu la ḅẹ anga anie ḅọkọ anị sịẹ anga sime tẹ finji mu laarị anga.

¹⁵ Ja atomi ḅụụ-lọkọ nwenii fịye saakị ịna aḅịḅị ḅio sụa sọ ịn nẹngịarị.

¹⁶ Kọrịnama-ḅụụ-lọkọ nyana tomḅọ kuromarị mịnẹ ọ̀ sịḅịḅio nyana sọnọma owiapụ, tẹ iḅi kuroma nyana apụ, nẹngịm.

¹⁷ Kịnị mḅọ gboloma-a mịẹ ḅụ ye nụnụarị tẹ ḅụụ kẹ suuarị ḅọ mẹ kịkarị ḅọ anie etela mẹnjịarị tẹ obiri ẹrị tẹ ori aḅeri ḅụ ò kun sịẹma ḅọ.

¹⁸ Nọmụḅọ tẹ biin-a fịnị-aḅịḅị na, ḍiein na, kịnị-ḅaaḅa ye na kẹ gbin-gbin tii-arị ḅọ ọkụ.

¹⁹ Anie tomḅọ tẹ epele kẹ jụmọ tii tẹ ḅẹẹarị, “À papaa kẹ tii-arị” nwẹn ḅẹẹ ḅọ sime-ḅara.

²⁰ Tuḅu na fịnị-apakịrị na ofori, fịnị ala-a biin-arị; ọḅụ-ẹkwẹn ofori ḅẹḅẹ, kamụ ala-a pẹlẹarị.

²¹ Amụ biin-a anyịmgbọ mịẹ tẹ fịnị paa kọrịarị, pakịrị mịẹ tẹ fịnị paa kọrịarị, tẹ ḅẹrẹ dogi-ḅoarị apụ ḍụkụ tẹ ye-nụnụa pẹlẹ-a.

²² Ọḅụ-ẹkwẹn ḅẹlẹ ḅụram! Wa anị sama-mẹnị ḅẹlẹmarị ḅara ḍikii!

²³ Ḅioḅẹngbọ sime-ye kịrị tẹ kọn-arị ẹkwẹn mẹ, karakarama tẹ í kuromarị ye kikimarị mẹ, kịkarị ye anie ferefere tẹ gịlasị kẹ yela-a aḅaịn-ḅẹlẹ ọḅụjụ gbaịn.

²⁴ Mịẹ-kịnị-ḍie-ḅọ ḅe ò ḍiki-ḅioḅu mẹ kikimarị ọ̀ kịnị-furuma ẹkwẹn ma ọḅụjụ.

²⁵ Arị ḅeri ḅụ ḅẹlẹ ḅa, kụma ò minini ma, ò ḅioḅẹngbọ ḍiki-ḅioḅu ḅin pampam wararị ẹrẹsị.

²⁶ Ẹbịsịya ori ò ḍiki-ḅioḅu mẹ kẹ jen kịkama ḅa, kụma ḅẹḅọ-ḅẹḅọ ọ̀ mịẹarị si-amịẹaị ma ẹrị ḅa.

²⁷ Ḍiein tuu jen-apụ pịrịarị apụ ma ini mie anị ḅio koroarị. Mịẹ tẹ kiri paịn-arị apụ ma anị paịn in ponoma ḅa.

²⁸ Í iruo aị kẹ ye kẹ jụmọ lama ḅẹ ḍọkịarị ḅẹḅẹ ị́ tarị mḅọ ḍiki-ḅioḅu ḅa. Ḅioḅẹngbọ sime ye kịrị tẹ kọn-arị ẹkwẹn fa sikima anị jen dogi-ḅoa.