Egberima-Ẹkwẹn 25 - FỊAFỊA BAỊBỤLỤ

Sọlọmọnị Gbaa Egberi Ma Ḅẹ Jaị

¹ Ma ma anie Sọlọmọnị gbaa egberi ma ḅẹ jaị, Hẹzịkaya, Juda ḅẹ amadaḅọ ḅe ogigo ḅio ḅẹ ḍiri kẹ apụ ma kẹ pakama ḅo aị ma.

² Wa Tamụnọ kụn-arị ò kikimarị aị gotẹ; wa amadapụ kụn-arị in ḍuko finjiarị aị gotẹ.

³ Gbala-gbala í inetẹ amadaḅọ ḅe kuromarị aị nimi-a; ò kuromarị aị ma wa saḅa-ḅọrọm, arị kịkarị ye gele-faa So-tọrụ ḅọrọ ye, anịanịa pokolo ideri abajị owolo ḅọrọ ye.

⁴ Seleḅa oḅolo wararị muno ma siin-famaa, anịsakị ḅara-ḍịn ḅọ ḅe anị kẹ iḅiye tẹmẹ pakama-ḅo ḅa.

⁵ Amadaḅọ ḅe akaka ḍuko-toluma si-mịẹapụ mamgba wẹrị ḅelema fama, anịsakị kịnị ọ̀ ḅẹrẹtọn mẹ nimi ḅa mịnẹ anị aḍụa nyana-a.

⁶ Ị́ amadaḅọ ḅe tọrọkọ sịẹ wararị sakị ori ị́ kẹ opu tomḅọ ọkị ḅẹ ḅara kẹ ye mịẹ ma.

⁷ Kịnị ị́ ḅẹ tẹ í iwoma iḅi ini ị́ ḅẹ tẹ ị́ ị́ sime kiri kẹ ị́ nẹngị ḅọ pịrị nẹngịm.

⁸ Ị́ ẹrị tẹ ye gotẹ fọnya-fọnya mu ogbo-ogbo ma. Ḅẹrẹ mẹ kiri sime jụmọ ọḅụkọ ḅo tẹ ḍuko pakamam mịnẹ í kuraye mịẹ-a ḅẹ kụma, ndẹẹ ị́ mịẹ ḅẹ ọkụ anị sakị mẹ ḅụ?

⁹ Ị́ na kpeki tẹ angarị ḅọ ị́ na ịgbanị-a nyana wararị ḅẹḅẹ, ọ̀ mịẹ siin ọmịnị maa apụ ogboku, tẹ ḅọị aị kẹ ogboku koroma ma.

¹⁰ Ọkọ-a kụma ḅẹḅọ-ḅẹḅọ nimi ḅa í inetẹ ḅọị ye koko ḅịa, tẹ í inetẹ gbala-gbala anị ḅụụ-jịrị mẹ kẹ ḍumo sime ḅịa.

¹¹ Ḍuko na-iḅi ye mẹ ḍuko giregirema mẹ kịkarị ye anie golu sime-ḅara tẹ kẹ seleḅa ḅụ tẹmẹ ye.

¹² Ye mịẹ-mịẹ ḅara nimi ḅọ ḅeri-nụnụ-ẹkwẹn tẹ kẹ minini tẹ poki ḅarị ḅọ pịrị ye mẹ, yela ḅara-tụngbalị sụa agolu anịanịa iḅi tẹịn golu kẹ mịẹ ḅụụ-ḅirimaye nẹngịm.

¹³ Ḅioḅẹngbọ kẹ ḅụụ ḅụ gbana na-iḅi oku-mẹnjịḅọ mẹ ịwọ ịnyọ kẹ mḅọ kẹ fịrịmarị ḅọ pịrịarị, fịye-soku-sakị ḅẹ kọrịnama ọfịrị sakị ḅụ ḅuu minji ọkụ.

¹⁴ Gbala-gbala in minini kịnị pịrị aị pịrị-pịrị-a apụ ma kịkarị ye anie oḅuto na fẹrụ na tẹ eene koroma-a aị.

¹⁵ Ye-inema ḅụ kẹlẹkẹlẹ ẹkwẹn tomḅọ pịrị mẹ inetẹ mịẹ tẹ à ḍụkụ ḅịa ḅẹ tẹịnḅọ sọ ḅara-siin ḅa, tẹ anị pịkị inetẹ ḅẹrẹtọn-apụ aḅioḅẹngbọ sọ ḍima ḅa.

¹⁶ Gbala-gbala ị́ ḅẹm taḅa la na-iḅi ḅara saḅa-ḅọrọ ma; ẹbịsịya taḅa ḅụrama mẹ mịẹ tẹ ị́ ọsụ ḅa.

¹⁷ Tọnwa sakị kẹ ị́ na kpeki tẹ angarị ḅọ warị mu ma; ẹbịsịya ị́ ọ̀ pọkọ-tama tẹ ori í ḍiki-ḅioḅu ḅa.

¹⁸ Tomḅọ mịẹ-a ye kẹ mḅọ sịḅị sịn mẹ, anị okologie, anịanịa mgbele, anịanịa oḅuarị ḍiein kịnị-ḅaaḅa ḅara kẹ tomḅọ ḅaarị.

¹⁹ Ḅioḅẹngbọ kẹ ḅụụ ḅụ gbana na-iḅi-a ḅọ ḅụ sịrẹrẹ mẹ, tọrụ-ḅalaḅala sakị ḅụ, kịkarị ye anie ḅụụkụrọma tẹ jikearị aka kẹ ye tokuru, anịanịa ekeli wararị ḅụọ kẹ mẹnjị.

²⁰ Nume-su ḅioḅẹngbọ sii ḅụra tẹ ḅọ pịrị mẹ kịkarị ye anie oḅoku ene ḅụ ọ̀ ḅụụ kapa siin, anịanịa fụn kẹ ịnọ tọrụ sikiri su.

²¹ Ḅuru si kẹ ị́ tọn-arị ḅọ tarịarị ḅẹḅẹ fịye kẹ mḅọ pịrị fị; minji ḅuu mḅọ pọkọ-tarịarị ḅẹḅẹ, minji kẹ mḅọ pịrị ḅuu.

²² Ị́ mịẹ tẹ mḅọ ḅụụ-jịrị ḅa, tẹ KỊNỊNYANAḄỌ ḅe ị́ gbẹẹ ḅa.

²³ Tomḅọ kẹ ọḅụ ẹkwẹn kọn mẹ ịganị dogi-ḅoarị, anie ọgọnọ fẹrụ gbarị-a ḅara kẹ eene dogi-ḅo ḅara pembe ḅara.

²⁴ Warị-isun ọgọnọ anga iḅi ẹkwẹn pẹlẹ-pẹlẹ-a ẹrẹḅọ na gbọrụ warị mẹ ḅio anga nẹngịm.

²⁵ Kunoma, alatẹ ama ḅụ ḅo iḅi ḅẹrẹ naa kịkarị ye anie, ị́ pọkọ samụnọ tẹ minji ḅuu ị́ tarịarị sakị ḅụ í ḅuuarị oḅoku minji.

²⁶ Iḅi tomḅọ tẹ minini tẹ si wararị ḅọ jụ ḅọrọarị ḅọ kẹ í ḅiokoromarị ye anie minji sitẹ ngụngụḅa, anịanịa kịnị-ḅaaḅa ye kẹ sụatẹ suḅe.

²⁷ Ḅẹm taḅa ḅụrama iḅi ị́ pịrị-a ḅara anie ḅụụ-kọsị tẹ tokini ḍọkị ḅaka sọ iḅi-a ḅara.

²⁸ Ị́ inetẹ ị́ ịganị dasịẹma-a ḅẹḅẹ, anie ḅarasụa nyana-a onu gbori-a ama, finji owu kẹ anị paka ḅẹ apụ pịrị wararị ye.