Egberima-Ẹkwẹn 23 - FỊAFỊA BAỊBỤLỤ

6

¹ Ị́ lẹgị sime tẹ opu tomḅọ na yefịarị sakị, ọ̀ laa kiri kẹ ḅioḅẹngbọ ḅụ wẹrịị.

² Í opu ḅara kẹ ye fị-fịm ḅẹḅẹ, ị́ ḅụụ ọlọọ.

³ Opu-pọkọḅẹngbọ sụa ọ̀ dẹẹ-sara iḅi afịaị ma pịrị ma; ẹbịsịya ọ̀ kẹ í tuu ḍiki ḅẹ ḍọkịarị.

7

⁴ Ye-nimi tẹ nimii mịnẹ, ị́ ị́ ḅụụ ḅaa ngọ-kọn pịrị ḅịa.

⁵ Í igbigi inetẹ fiin so ḅa, gbala anị pamba-sụa tẹ igo kịka tẹ fiin som pembe ḅara.

8

⁶ Ịmụkụ ḅọ dẹbịlẹ ḅụ yefị ma, anịanịa opu-pọkọḅẹngbọ sụa ọ̀ pakama-pakama-ḅoarị iḅi afịaị ma pịrị.

⁷ Ọ̀ ḅẹẹarị, “Ḅoo, tẹ jen ọkịị,” kụma ori ọ̀ mịẹ ḅẹ ye ḍuko-a. Ò kuromarị ḅara mẹ anie sụntẹ ò sime-ḅara.

⁸ Ị́ fị tẹ ye mẹmgba sọ ị́ ọsụ pakama-ḅo ḅa, tẹ ị́ kẹ ò furumatẹ ye mẹmgba ḅo papaa fa ye sọ ḅa.

9

⁹ Sịḅịḅio-nyanaḅọ ḅara kẹ ẹkwẹn oḅori-ḅọ pịrị ma; ori anị ḅẹ iḅi ḅara lekiri ḅịa.

10

¹⁰ Gbala-gbala elemu sakị ịn sụa kiri elekima siin ma, anịanịa ḍapụ na iyingi apụ na fịtẹ-apụ kiri ọkị í nye sọma.

¹¹ KỊNỊNYANAḄỌ ḅe anie ịna kụrọtẹ ḍụaḅọ, tẹ ori anie ị́ na dama tẹ ịna aḅịḅị ḍuko ḅarịye.

11

¹² Ye kẹ í tolumarị ḅọ kẹ ye-sịn, tẹ í inetẹ ḅẹ aị mamgba ḍawọ.

12

¹³ Tụḅọ da karakarama ḅẹ fomuye ḅụ ḅio-maaịn-tọn ma. Mịẹ na-iḅi ḅara ḅụ ị́ kẹ pịaị-pịaịma tụḅọ fomu ḅarịye mḅọ ḅaa ḅịa.

¹⁴ Karakara ye ḍuko ḅụ, ẹbịsịya anị ò ḍumo ḅọrọma ḅa.

13

¹⁵ Tụḅọ, í ḅo ye-nimi kụma à kpọma ḅioḅẹlẹ ḅa.

¹⁶ Arị ị́ kẹ ḅụụ-tọn ḅa í nimi ẹkwẹn kọn-arị tẹ à naa sakị.

14

¹⁷ Si atomi mọnị ma. Yee KỊNỊNYANAḄỌ ḅe mangịma mẹ ị́ ḅụụ ḅẹrẹ ye sọ í ḍumo ḅụ.

¹⁸ Anị ọkọ sime wararị ḅẹḅẹ, ḅaa mẹ iḅi ị́ pịrị tẹ.

15

¹⁹ Pokii, ị́ tụḅọ, ye-nimi tẹ í ḍumo kọn-arị ḅara kẹ kpọma kuroma ḅụ suu.

²⁰ Ị́ ḅụụ kẹ iru ḅuu ḅụramarị, anịanịa fịye kẹ ḅụụ-pikiarị apụ na gboloma ma.

²¹ Iru ḅuu ḅụrama na opu afịaị na kẹ mịẹ-mịẹye sọma wararị apụ ini igoin ḅa. Ị́yẹrị nyanatẹ mịẹarị ye mamgba fị tẹ mono ḅẹḅẹ, ala-a ị́ kanị-kanịtẹ aị ḅiri ḅa.

16

²² Ị́ ḍa ḍukoarị ye pokii; ori ofori namịna í ḍumo sime ḅịa. Í iyingi omongi sakị árị ị́ ḅụụ yela ḅara kẹ á ḍie.

²³ Karakara na, nimi na, ḍawọye na, pịkị iḅi sịḅịḅio na — ma ma gotẹ igbigi fama na-iḅim; kụma arị ị́ ḅụụ yela-ḅụra ḅaka gotẹ arị dẹrị ma.

²⁴ Karakara mịẹarị tomḅọ ḍaḅọ gotẹ tẹ ḅioḅẹlẹ ḅẹ ye emi. Í inetẹ ye-nimi tụḅọ kẹ ḅụụ-tọn ḅa.

²⁵ Mịẹẹ, ị́ ḍa na í iyingi na ị́ kẹ ḅụụ tọn; anị ḅioḅẹlẹ mẹ kẹ í iyingi pịrịị.

17

²⁶ Ị̀ tụḅọ, iḅiọkụ tọrụ Kireinma tẹ ì ḍumo kẹ ị́ kẹ ḍiki angarị ye mịẹẹ.

²⁷ Akụnakụna amẹẹ na si ḍumo kọn-arị ereme na kịnị-ḅaaḅa ḍiein sọ wararị.

²⁸ Ịn kụrọ-ḅara kẹ furuarị apụ ḅara kẹ í koruarị, tẹ ịn tọnwa owiapụ mịẹ tẹ ịn ḅarị ḅioḅẹngbọ-kẹ-sịrẹrẹ-niḅi ḅara sime-a.

18

²⁹ Opu ḅụụ-fụka nyanaḅọ tụḅọ? Kururu nyanaḅọ tụḅọ? Owu sọarị ḅọ ḅe tụḅọ? Ḍuko-sụa ma nyanaḅọ tụḅọ? Ye ḅụụ la na-iḅi-a sakị ḅụ yela ḅọ tụḅọ? Amịna atọrụngbọ ma pulo ḅịyarị ḅọ tụḅọ?

³⁰ Arị apụ ma anie iru suku sakị-sakị-a apụ ma, anie gwa tẹ kiri iru bọlị sime-anga sime-anga muarị apụ ma.

³¹ Ḍụkụ tẹ iru í toluma fama ma, anị awụ ḅịya ḅara ḅịyarị sọ, anị kọpụ mẹ ḅio tẹịn-tẹịn pakarị sọ, anị deinma ideri koro ḅa.

³² Ḅaa ene mẹ ḅụ í oju ị́ na sime ḅarị ḅara anie si-oronwi ị́ gbọn ye ọkụ.

³³ Ị́ tọrụ ḅẹlẹgị ḅa, tẹ ị́ pịkị inetẹ ḅẹrẹ kuroma, anịanịa giregirema ẹkwẹn ḅịa.

³⁴ Ị́ ḅụụ ḅio kẹ ị́ na sime ḅarị ḅara gbala ị́ abajị ḅio ye mu wararị tẹ tọrụ-minji ḅẹ obi ị́ la tẹẹ, tẹ ọnụngọ í dogi iwo-na-ideri-naarị, arụ mẹ ḅẹ jike ḅụ.

³⁵ Ị́ ḅẹẹ ḅa, “In ye kẹ ì fomum; kịnị ì fomu kọsịma-a so ḅịa, kụma à kẹ ḅiokoroma-a (anị mịẹ sakị). Tiye ẹrẹsị arị inetẹ saakị-a? À jen iru ḅiiarị.”