Egberima-Ẹkwẹn 21 - FỊAFỊA BAỊBỤLỤ

¹ KỊNỊNYANAḄỌ sarasarama mẹnjịarị minji mẹ da anị mu ḅẹ anga pịrịarị ḅara mẹ, anie ọ̀ kẹ ḅẹrẹtọn amadaḅọ ḅe kuroma pịrịarị ḅara.

² Ẹbịsịya í kuroma ḅa mịnẹ ị́ mịẹarị ye goyegoye kuram, kụma kẹ ḅiokoroma mịnẹ KỊNỊNYANAḄỌ ḅe í gotẹ mịẹarị aị ma pekele-ḍikiarị.

³ Kuraye mịẹ na jụmọ la kiri kẹ mḅọ pịrị na mịẹẹ; aniemẹ mie KỊNỊNYANAḄỌ ḅe ḅioḅẹlẹma agba tan-tan ḅo ọ̀ pịrị nẹngịarị ye.

⁴ Si-sịḅịḅio-sụa apụ ma ịna ḅụụ-gelema na opu ẹkwẹn na mie ḅẹrẹtọn ịn pịrịarị, anịsakị mie mẹ si mịẹẹ.

⁵ Kpaịn ḅara kẹ ị́ mịẹ ḅẹ ye tọn tẹrẹmẹ mị, anịsakị ị́ tọnwa aị nyana ḅa; ị́ fọnya ḅaka ḅara kẹ mịẹ kụma, gbala-gbala ị́ nyana ḅo ḅẹ ye ḅo ḅịa.

⁶ Kịnị mingirima ḅụ ị́ kọn-arị ngọ mẹ ala-a faa ḅa, kụma anị tarị ị́ kẹ mu fịị amgba ḅio suu ḅa.

⁷ Si-sịḅịḅio-sụa apụ ma ịn fa tẹẹ, ịna kụrọ-kụrọ amịẹaị dogi-ḅo ye ḅụ; ịn ḍụkụ tẹ kuraye mịẹ-a.

⁸ Ḅẹrẹ-ḅarasii-apụ ma gboloki-gboloki tẹ etela ḅụ mẹnjịarị; kụma ḅara-fịafịa tẹ apụ ma kuraye mịẹarị.

⁹ Warị isun ọgọnọ anga iḅi ẹkwẹn pẹlẹ-pẹlẹ-a ẹrẹḅọ na gbọrụ warị ḅio anga nẹngịm.

¹⁰ Si-sịḅịḅio-sụapụ siye mịẹ sakị mamgba ḅuru pọkọ-tarị ḅara kẹ ịn tarịarị; ini ọkụrụkụrụ nyana pịrị-pịrị ḅọ ofori.

¹¹ Gbọrụ ḅụụ-gelema ḅọ amịna fomu-ḅara daarị sakị, kuroma nyana-a ḅọ sọ anị ḅụ ye-ḍawọarị. Ye-nimiḅọ mẹ ịn kẹ mḅọ toluma tẹ ye ḅụ ḅọrọ ye-ḍawọ ḅa.

¹² Tamụnọ, Karakaraye-mịẹḅọ ḅe, si-sịḅịḅio-sụapụ ma sime-ayọ ma ḅụ pakarị aị nimi wararị, tẹ ò si-sịḅịḅio-sụapụ ma sukuruma-gbin fa ḅio suu ḅa.

¹³ Í igoinḅọ ḅe kọn-arị owu mẹ naa ḍụkụ-a ḅẹḅẹ, ḅarasụa gotẹ kọn-arị owu mẹ sọ kịnị naa ḅịa.

¹⁴ Gbọrụḅọ ịganị nyana ị́ pịrị wararị ḅẹḅẹ, ḅọị ḅara kẹ mḅọ pịrị ḅarị ḍiepịrịye mḅọ deinma ḅa.

¹⁵ Karakara ḅẹrẹ kọọn tẹ ḅẹḅẹ, iḅi atomi ḅioḅẹlẹarị, kụma si-mịẹapụ ḅioḅẹngbọ-ḅịkị nyanarị.

¹⁶ Ḅẹḅọ-ḅẹḅọ tẹ iḅi sịḅịḅio ḅụ ikele-ikele faarị ḅọ mẹ, fị mḅọ koruarị.

¹⁷ Sakị mamgba opu igbigi la aị nyana ḅẹ ḍọkị na, iru ḅuu na, iḅi afịaị na mịẹ tẹ í gbala-gbala ngọ-kọn ḅịa.

¹⁸ Si-sịḅịḅio-sụa apụ ma ḅụụkụrọma tẹ kẹ iḅi atomi ma pịrị ḅẹ ḍọkịarị ḅụụ-fụka mẹ ini ọkị-ḅo amịna ọgọnọ gbanarị.

¹⁹ Mu ịkpa ḅio anga iḅi ẹkwẹn pẹlẹ-pẹlẹ-a, pịkị ye-ḍuko-sụa ma ḅọrọarị ẹrẹḅọ na anga nẹngịm.

²⁰ Ye-nimiapụ ngọ-kọn na opu ḅara kẹ ye-mịẹ ḍumo na kọn-arị, kụma apantu amẹẹ ma ini igbigi mẹ nyana ḅo sakị na ini anị fama sakị na gbọrụ sakị.

²¹ Iḅi ḅara kẹ jen-apụ na mịẹ, pịkị kịnị mingirima ma, anịsakị ị́ nangwọ ḍumo kọn ḅa jen-apụ pịkị ị́ mangịma tẹ ị́ la kiri kẹ ị́ pịrị ḅara kẹ ị́ na anga ḅa.

²² Aka nimi wararị ọmụ-alaḅọ inetẹ kụrọ atomi ḍụarị opu ama ọkị tẹ ịn kẹ ḅiokpọmarị onu ma kan-sara ḅa.

²³ Í ḅiiarị ị́ ḅụụ-fụka ḅio sọma ḅẹḅẹ, í ḍukoarị ye ẹbị.

²⁴ Ḅụụ-gelemaḅọ kẹ ì ḍie, tẹ yẹrị opu ẹkwẹn-kọn, opu-amịẹaị mịẹ tẹ jen-apụ kẹ kuroma ḅụ suu-suu-a ḅọ kẹ í ḍie ḅa.

²⁵ Kọrịnama kọrị ḅụụ-sarasara nyana-a tẹ ḍụkụ tẹ kọrịnama kọrị-kọrị-a ḅọ mẹ mḅọ mịẹarị ye jen-a, amịna ḅụụ ḅaa;

²⁶ ori nyana tẹ mịẹarị ye anie ọ̀ nyana ḅẹ ḅiiarị aị kẹ ḅiokoroma. Karakaraye-mịẹḅọ mẹ, anị sime-ḅara sime-ḅara sọ, inetẹ ye pịrị ḅa, ḅara ọlọ-a ḅara ḅụ.

²⁷ Si-sịḅịḅio-sụa apụ agbamịẹ-aị kẹ KỊNỊNYANAḄỌ ḅe pịrịarị sakị arị ò ḅioḅumarị, jen-a jen-a in si akuroma kẹ mịẹarị ḅẹḅẹ.

²⁸ Iruo ḅẹrẹ-kiri-simeḅọ ḅara kẹ ḍukoarị ye kịnị minini-minini-a, kụma gbọrụḅọ ye paka ḅara kuroma fama tẹ kọn-arị ẹkwẹn mẹ ini ọkịarị.

²⁹ Karakaraye-mịẹapụ ma amịna aḅụụ nimi wararị; kụma si-sịḅịḅio-sụapụ ma ini ine-ḅara ine-ḅara mịẹ tẹ in sime-a ḅara kẹ tomi ḍiearị.

³⁰ Tomina nimi-o, sarasarama ḍawọ ye ḍin-o, ye ḅio sime-ḅara lekiri-o — ma ma arị ḅarasụa ị́ pịrị ḅịa; KỊNỊNYANAḄỌ ḅe ị́ na ofori ḅẹḅẹ.

³¹ Í inetẹ asụ nyana saratẹ tẹlẹma kẹ ọmụ pịrị ḅa, kụma KỊNỊNYANAḄỌ ḅe mie owu-ḅara-iḅi mẹ pịrịarị.