Egberima-Ẹkwẹn 2 - FỊAFỊA BAỊBỤLỤ

Nimi Gbẹẹ Aị Ma

¹ Ị̀ tụḅọ, à kẹ í tolumarị ye ḍawọọ, tẹ gbala-gbala à ḍuko ị́ pịrịarị mịẹ ḅẹ ye kẹ ḅioḅọrọma ma.

² Nimi nyana ye pokii, tẹ ḅụụkụrọma tẹ anị fiearị ye naa.

³ Inn, ḍawọye gotẹ tẹkẹẹ; yefieye lekiri ịgbanịị.

⁴ Kụrọma nimi ḍọkịị, gbala í seleḅa anịanịa ḅọị wararị ngọ ḍọkịarị ye ọkụ.

⁵ Ị́ ọkọ mịẹ kụma, ị́ KỊNỊNYANAḄỌ ḅe mangịma tẹ ọ̀ ḅịḅị poki fiearị ye nimi tẹ Tamụnọ gboloma ye ḍawọ ḍịịn ḅa.

⁶ KỊNỊNYANAḄỌ ḅe mie nimi kẹ tomi pịrịarị-ḅọ. Ọ̀ ḅara ḅụ mie nimi na yefieye-naa na sime tẹ paka-ḅoarị.

⁷ Ori mie ḅarasụa na gbaịn ḅọrọma na kẹ karakara mịẹarị, pịkị mingirima mịẹ-mịẹ-a atomi ma pịrịarị.

⁸ Ori anie jen-apụ la kiri kẹ ịn pịrịarị apụ gbaịn ḅọrọmarị, pịkị ò minini tẹ ọ̀ ḅụụ sịrẹrẹ wararị apụ ma koko gbaịn-arị.

⁹ Ị́ ị̀ ḅịḅị poki kụma, í kuraye na, karakara na, jụmọ la kiri kẹ mḅọ pịrị na nimi ḅa. Ị́ ị́ mịẹ na-iḅi ye nimi ḅa.

¹⁰ Í ḅo ye-nimi ḅa, tẹ ị́ ḍawọ ḍin ye mẹ nwẹnị tọrụ-ḅẹlẹ kẹ ị́ pịrị ḅa.

¹¹ Ye ḅio sime-ḅara nimi na yefieye naa na nwẹnị ị́ gbaịn ḅọrọma,

¹² tẹ í kiki tẹ ị́ ḅarị kura-aye mịẹ ḅịa. Arị ị́ wẹrị ḅelema ḅa, ẹkwẹn ye ḅụ ḅẹrẹ dogi-ḅoarị apụ ḅụ;

¹³ tomi tẹ karakara mịẹ ḍumo ḍiki-tọrụsin tẹ si kanakana ḅio angarị apụ,

¹⁴ tomi tẹ iri-aị mịẹ tọrụ-ḅẹlẹmarị apụ, tẹ ịn mịẹarị asi-aị ḅụ ḍerekuarị apụ,

¹⁵ kịnị ḅụụ ḅụ sịrẹrẹ na-iḅi-a atomi, tẹ inetẹ ḅioḅẹngbọ kẹ ḅụụ ḅụ gbana ḅịa apụ.

¹⁶ Ị́ inetẹ ḅẹẹ ama-mẹnjị-ẹrẹḅọ ẹrẹḅọ sịkị ḅa, anie arị ine-ḅara ine-ḅara mịẹ tẹ í toluma fama ḅẹ ḍọkịarị ḅọ ma ḅịḅị-ḅẹlẹ ẹkwẹn ḅụ,

¹⁷ anie ḅioḅẹngbọ kẹ ḅụụ ḅụ gbana na-iḅi-a ḅara sime tẹ ḅọ ma, á di ḅụụ ḅụ, tẹ á karị fịafịa ye mẹ kẹ ḅioḅọrọma tẹ ḅọ ma.

¹⁸ Ị́ á warị mu-mu, ị́ mẹnjị mu ị́ fịị ḅẹ etela sọ tẹẹ. Tọrụ kẹ anịanga da-mu anie mu Ḍuḅu ḅio kpeki.

¹⁹ Á warị sọ tẹ pịkị so-so gbọrụḅọ-sọ ofori. Gbala-gbala ọ̀ pịkị mu ḍumo etela sọ-sọa.

²⁰ Mie ḅụ iḅi atomi elekima mẹ ḍiki mẹnjị kẹ ị́ mịẹ-mịẹye sọmaa, tẹ karakara mịẹ ḍumo kọn.

²¹ Karakara mịẹarị atomi — tụkụ sịẹ wararị ḍumo nyana apụ — anie mịẹ wamịna ama mẹ ḅio anga ḅarịye.

²² Kụma Tamụnọ ama mẹ ḅẹ si-sịḅịḅio-sụa atomi ma ḅaa ḅa, tẹ anị ḅụ si-mịẹapụ nụnụ-pakama ḅa, kịrị ḅio ḍiḅi wararị asịn pembe ḅara.