Egberima-Ẹkwẹn 16 - FỊAFỊA BAỊBỤLỤ

¹ Ẹbịsịya wa inetẹ wa mịẹ ḅẹ aị tọn ḅa, kụma kunoma ḅịḅị mẹ, Tamụnọ nyanam.

² Ẹbịsịya í kuroma ḅa ị́ mịẹarị ye kuram, kụma KỊNỊNYANAḄỌ ḅe í gotẹ mịẹarị aị ma kọn-arị.

³ KỊNỊNYANAḄỌ ḅe tẹkẹ tẹ ori ị́ tọn-arị aị ma boma, anịsakị ị́ arị mịẹarị sakị arị ḅo bebe aị sọ tẹẹ.

⁴ KỊNỊNYANAḄỌ ḅe ọ̀ tẹmẹ ye goyegoye kẹ kunoma ḅẹ ye tọn wararị; tẹ si-sịḅịḅio-sụa apụ ma kunoma anie fịị gulugulu.

⁵ KỊNỊNYANAḄỌ ḅe opu ẹkwẹn kọn-arị ḅọ goḅọ-goḅọ ḍiki-ḅioḅuarị; gbala-gbala ọ̀ ḍụkụ tẹ fomu-ḅara ịn gbarị ḅịa.

⁶ Sịḅị-tuu tẹ pịkị ḅioḅẹngbọ kẹ ḅụụ ḅụ gbana na-iḅi ḅara simee, tẹ Tamụnọ í si-wẹrịso ḅa. KỊNỊNYANAḄỌ ḅe ḅịḅị pokii, anịsakị gbọrụ siye sọ ị́ ḅụụ paka ḅịa.

⁷ Ị́ mịẹ ye KỊNỊNYANAḄỌ ḅe ḅụụ-ḅẹlẹarị ḅẹḅẹ, í inetẹ mịẹ tẹ si kẹ ị́ tọn-arị apụ í ikiapụ sọ ḅa.

⁸ Kịnị mingirima-a ḅara kẹ nyana ḅo ḅo-a kalịye mẹ iḅi mingirima ḅọkọ ḅụ nyana ḅo tọnwa aị nẹngịm.

⁹ Ẹbịsịya ị́ ị́ mịẹ ḅẹ aị tọn sara ḅa, kụma Tamụnọ mie mịẹ aị ma datụkụma ḅarịye.

¹⁰ Amadaḅọ ḅe Tamụnọ kẹ ọ̀ pịrị kụrọ mie ọ̀ kẹ ẹkwẹn-arị; ori tọn pẹlẹ tẹ ye mẹ sakị mamgba kuram.

¹¹ KỊNỊNYANAḄỌ ḅe ḅiiarị mịnẹ ye-tọnye goyegoye mingirima anị ḅụ mịẹ ma, tẹ dẹrịye goyegoye anị la na-iḅi ḅịḅị la.

¹² Amadapụ inetẹ siye daa-ọkị ḅịa, karakara mịẹ anie ama-da kọrịnama mẹ mịẹ tẹ anị sịẹarị ẹrẹsị.

¹³ Amadaḅọ ḅiiarị ọ̀ karakara mẹ naa, tẹ ori iḅi ḅara kẹ anị ḍukoarị ḅọ na mịẹ ḅa.

¹⁴ Ye-nimi tomḅọ ḅụụkụrọma tẹ amadaḅọ ḅe ḅioḅẹlẹma ḅa; amadaḅọ ḅe ịganị-ịganị, ẹbịsịya gbọrụḅọ fịị ḅa.

¹⁵ Amadaḅọ kẹ kịnị tọn-arị iḅi mẹ kịkarị ye anie kụra aya-ḅịḅị ḅụ eene ọkị-ḅoarị oḅuto — anịanga ḍumo emi.

¹⁶ Nimi na ḍawọye na nyana kpọma iḅi golu na seleḅa na nyana nẹngịm.

¹⁷ Ini tẹ iḅi wararị apụ ma ịn ḅọrọ ye-muarị etela ḅụ in siye kọkọrọarị; mie ḅụ í muarị anga ẹbịị — anị í ḍumo ḅọrọma ḅa.

¹⁸ Ḅụụ-gelema tomḅọ ḅọrọma mu gulugulu fịị ḅio suu-suum, tẹ opu ẹkwẹn tomḅọ ḅịkịma gbereima koroma-koromam.

¹⁹ Ḅụụ-iderima tẹ igoin tẹ koro-sime iḅi Opu ẹkwẹn-kọn-apụ ma ḅẹ gbọrụḅọ-sọ tẹ ịn fọịn ḅo-aị ma ḅụ ḍiekiri nyana nẹngịm.

²⁰ Ịn kẹ í toluma tẹ ye mẹ kẹ ye-sịn, anịsakị ye ị́ na iḅi ḅa; KỊNỊNYANAḄỌ kẹ ḅiokpọmaa, anịsakị í ḅioḅẹlẹ ḅa.

²¹ Ye-nimi wararị tẹ tomḅọ-la tẹ ḅọ mẹ mḅọ kẹ yefieye naarị ḅara mie ịn kẹ mḅọ nimiarị. Ori ẹkwẹn ḅụụ-ḅẹlẹma la ḅara anie ọ̀ pịkị kẹ tomi fẹ-fẹ ḅụụ pịrị ḅakarị ḅara.

²² Ye-nimiapụ ḅụ nimi anie ḍumo ngụngụḅa, kụma ḅụụ-kọsị tẹ ye kẹ apantu amẹẹ ma toluma mẹ anie sakị fama mịẹ.

²³ Sịḅịḅio nyana apụ ma in kuroma tẹrẹmẹ mie ini ẹkwẹn-arị; ọkọ ẹrẹsị in ḍukoarị ye mẹ nwẹnị kịnị fẹ ịna ḅụụ pịrị ḅakarị.

²⁴ Dein tẹ iḅi ẹkwẹn ma ḅẹm na kịkarị — ḅịḅị-ḅio ḅẹlẹarị, pịkị ḍumo iḅimarị.

²⁵ Í kuromarị karakara etela nwẹn ḅẹẹ ye mẹ, ẹbịsịya ị́ ḅọrọma mu fịị ḅio suu ḅa.

²⁶ Kọrịnama-kọrịḅọ ḅe ọ̀ fị ḅẹ ye gotẹ kụrọma namakọrị tọrọkọ-tọrọkọ muarị, ọ̀ fị furo ḅinma ḅẹ ḅara.

²⁷ Si atomi in ye kẹ jen-apụ lama ḅẹ aḅọkọ ḍọkịarị; ịn kọn-arị ẹkwẹn ma ngẹrị ḅụ sọ si kọrị pakarị, fịnị ọkụ.

²⁸ Si-sịḅịḅio-sụa atomi mie ọḅụ-ẹkwẹn kẹ ama-kan-arị; ịn ḅụụ-fụka dogi-ḅo tẹ ikiapụ kan-arị.

²⁹ Kụrọ-kụrọ amịẹaị mịẹarị apụ oḅori kẹ ịna ikiapụ sịn tẹ ịn ḅọrọma mu ḅụụ-fụka ḅio suuarị.

³⁰ Aka-fanga tẹ si-tọrụ kẹ í ḍikiarị apụ ma ẹbịị; ịn gbọrụ siye kuroma ị́ pịrị tẹẹ.

³¹ Nangwọ ḍumo anie sime karakaraye-mịẹapụ pịrị gbẹẹ-ye mẹ, iḅulu anie ebube nyana amada-sun.

³² Ye-inema iḅi opu kụrọ nyana nẹngịm. Ị́ ị́ ḅụụ-ọlọ sịẹma mẹ iḅi ḅẹrẹtọn bebe opu ama-ama pịrị nẹngịm.

³³ Tomi apịan-sụarị ịn Tamụnọ ḅiiarị ye nimi ḅẹ ḅara; kụma Tamụnọ mie ḅarana ye sime ḅẹ ḅara tọn-arị.