Egberima-Ẹkwẹn 15 - FỊAFỊA BAỊBỤLỤ

¹ Dein pakịrị-ḅịḅị ịganị dasịẹmarị, kụma kụrọ pakịrị-ḅịḅị ịganị owimarị.

² Ye-nimi atomi ẹkwẹn-arị sakị ịn mịẹ tẹ ḍawọye ḅụụ-ḅẹlẹmarị, kụma apantu amẹẹ ma ye fie-a aị kẹ petei-peteima sararị.

³ KỊNỊNYANAḄỌ ḅe anga-anga ḅụ pakaye-pakaye ẹrịarị, Ọ̀ wa ẹbịarị, wa iḅiye mịẹ-o, wa siye mịẹ-o.

⁴ Iḅi ẹkwẹn ḍumo ọkị-ḅoarị, kụma kụrọ ẹkwẹn ma tẹmẹ ḅaarị.

⁵ Ị́ ḍa kẹ í toluma ye sakị anga pịrị anie oḅori mịẹye; ị́ ọ̀ kẹ ị́ daa-karakarama ye ọkị kụma í ye nimi tẹẹ.

⁶ Karakaraye-mịẹapụ ịna ngọ wẹrị kpaịnmarị, kụma si-sịḅịḅio-sụa atomi ma ịna aị fama tẹrẹmẹ ye-kụrọ-sakị laarị.

⁷ Ḍawọ ḍin mẹ ye-nimi atomi mie anị wasamarị, oḅori-sọarị apụ-a.

⁸ Anị KỊNỊNYANAḄỌ ḅe ḅụụ-ḅẹlẹ arị iḅi atomi tẹkẹarị sakị, kụma si-sịḅịḅio-sụapụ kẹ ḅo ọ̀ pịrịarị agbamịẹ-aị ma ò ḅioḅumarị.

⁹ KỊNỊNYANAḄỌ ḅe si-mịẹapụ mẹnjịarị etela ma ḍiki-ḅioḅuarị, kụma ò kuraye mịẹarị apụ ma ḅẹlẹmarị.

¹⁰ Í kura-aye mịẹ kụma, í opu fomuye da ḅa; ị́ daa-karakarama ọkị ḍụkụ-a kụma, ị́ fịị ḅa.

¹¹ Ḍuḅu sọ inetẹ KỊNỊNYANAḄỌ ḅe kiki ḅịa anị ḅio simearị ye nimi ḅụ; ọkọ kụma ndẹẹ tomḅọ inetẹ ò kuromarị aị kẹ Tamụnọ ḅọịma ḅẹ ḅara?

¹² Ḅụụ-gelemarị apụ ḅii-a kịnị ịn daa-karakarama, gbala-gbala in nimi ịn nẹngị apụ gbela tẹ ịn ḅẹrẹ ḍuko in toluma-toluma-a.

¹³ Tomi ḅioḅẹlẹarị sakị ịn ḍẹrịarị, kụma in kururuarị sakị in simini tẹ yaụ-simearị.

¹⁴ Sịḅịḅio nyana apụ ḅiiarị in ye-ḍawọ, kụma apantu amẹẹ ma in gberie-sọ nimi-a tẹ simearị ḅara mẹ ini na iḅi wararị.

¹⁵ Igoinḅọ ḅe kọn-arị ḍumo mẹ sakị mamgba nụnụ anị ḅụ emi, kụma ḅioḅẹlẹarị apụ sakị mamgba ḍumo tọrụ-ḅẹlẹ nyanarị.

¹⁶ Tomḅọ igoin tẹ KỊNỊNYANAḄỌ ḅe ḍiki-ḅalafarị iḅi mḅọ ngọ-kọn tẹ ḅụụ-fụka ḅio sọ nẹngịm.

¹⁷ Tomḅọ ọgụ ngẹrị kẹ ye-sọ fịarị tẹ kịnị ḅẹlẹma apụ na anga iḅi mḅọ ḍiki-ḅioḅu ḅio sime tẹ iḅi tẹịn nama pẹịarị nẹngịm.

¹⁸ Owi aḅioḅẹngbọ tọnwa aye-nụnụa dogi-ḅoarị, kụma ye-inema dein ọkị-ḅoarị.

¹⁹ Ị́ kọrịnama ḅụụ-lọkọ nyana wararị ḅẹḅẹ, í mu anga mu anga ye ị́ ḅụụ-fụkama ḅa, kụma ị́ kịnị mingirima-mingirima-a ḅẹḅẹ, ị́ ḅụụ-fụka nyana ḅịa.

²⁰ Ye-nimi tụḅọ mḅọ ḍaḅọ ḅio ḅẹlẹmarị. Oḅori-ḅọ kịngẹ mie mḅọ iyingiḅọ ḍiki-simarị.

²¹ Apantu amẹẹ ma sọarị oḅori mẹ ịna ḅioḅẹlẹmarị, kụma ye-nimiapụ ma kuraye mịẹ ḅa.

²² Í inetẹ nyana ḅẹ iḅi toluma ẹkwẹn goyegoye daa-ọkị, tẹ ye ị́ na iḅi ḅa; ọkọ-a kụma ị́ papaa ḅara ọlọ ḅa.

²³ Anị kpọma ḅioḅẹlẹ ọkị-ḅoarị ye sọ ḅa tomḅọ karakara ẹkwẹn ḍọkị ẹrị tẹ kọọn mẹ, karakara sakị ḅụ.

²⁴ Ye-nimiapụ iwo mu ḍumo la ḅẹ etela mẹnjịarị, ideri-mu fị la-la etela-a.

²⁵ KỊNỊNYANAḄỌ ḅe opu ẹkwẹn kọn-arị apụ sime ayọ kan guluguluma ḅa, kụma ò diḅọ-fịtẹ-ẹrẹḅọ ma warị gbaịn ḅọrọmarị.

²⁶ KỊNỊNYANAḄỌ ḅe si akuroma sụa ḅọ mẹ ḍiki-ḅioḅuarị, kụma ori iḅi ẹkwẹn kọn tomḅọ mẹ ḍiki-ḅioḅẹlẹarị.

²⁷ Í ḅụụkụrọma tẹ kịnị mingirima ḅara kẹ sọye mịẹarị ḅẹḅẹ, ị́ ị́ warị suku kẹ ḅụụ-fụka ḅio suu ḅa. Ọḅụ-fị ma, anịsakị í ḍumo nangwọtẹ.

²⁸ Iḅi atomi in kuroma tẹrẹmẹ mie ịn ḅẹrẹ pakịrịarị. Si atomi fọnya-fọnya pakịrịarị, kụma anị ḅụụ-fụka dogi-ḅoarị.

²⁹ Iḅi atomi tẹkẹarị sakị, KỊNỊNYANAḄỌ ḅe pokiarị, kụma ò si-mịẹapụ atẹkẹ kẹ ye-sịn-a.

³⁰ Ḍẹrịarị atọrụ-kuḅu mịẹ tẹ í ḅioḅẹlẹarị, tẹ iḅi-oku mịẹ tẹ ị́ ḅụụ iḅiarị.

³¹ Kịnị ị́ daa-karakaramarị tẹ ị́ kẹ ye-sịn-arị ḅẹḅẹ, ị́yẹrị ye-nimi ḅọ.

³² Ị́ ye-ḍawọ ḍụkụ-a ḅẹḅẹ, í si kẹ ị́ ḅụụ mịẹarị. Ị́ daa-karakarama daa-ọkịarị ḅẹḅẹ, í nimi tarị ḅara nẹngị ḅa.

³³ Kụn kẹ KỊNỊNYANAḄỌ ḅe pịrị mẹ kịngẹ sọ ye-ḍawọye. Ị́ ḅụụ-lẹgịma-a ogbo, í inetẹ kụn nyana akiri nyana ḅịa.