Egberima-Ẹkwẹn 14 - FỊAFỊA BAỊBỤLỤ

¹ Ye-nimi ẹrẹḅọ anie nimi kẹ iḅi furo-warị mịẹ pakama-ḅoarị, kụma oḅori-sọarị ẹrẹḅọ á furo-warị kan guluguluma sararị.

² Kịnị mingirima-mingirima-a ḍumo kọn, tẹ ḍie pakama mịnẹ ị́ KỊNỊNYANAḄỌ ḅe ḅịḅịpokiarị; ị́ kịnị mingirima ḍumo kọn-arị ḅẹḅẹ, ị́ ḍie-pakama tẹ mịnẹ ị́ ọ̀ ḅịḅịpoki-a.

³ Oḅori-ḅọ ḅe ḅụụ-gelema ọ̀ mịẹ tẹ ori ẹkwẹn ḅakarị; ye-nimi tomḅọ ḅe ori ẹkwẹn ọ̀ gbaịn ḅọrọmarị.

⁴ Ḍụọ ḅio kiri-sokuye mẹ fọnọ mẹnjị ḅẹ anambulo ofori ḅẹḅẹ ị́ fịaị koko warị papaa foo-sime ḅa, kụma arị emi ḅẹḅẹ mbịaka anị ḅio ḅin ḅa.

⁵ Ḅioḅẹngbọ kẹ ḅụụ ḅụ gbana na-iḅi ḅara sime ḅẹrẹ-kiri-simeḅọ sakị mamgba karakara mẹ ḍukoarị, kụma ọkọ sime-a ḅọ mẹ iruo ye sikima mḅọ jen ḍuko-a.

⁶ Ḅụụ-gelemarị apụ inetẹ gbala-gbala ḅo ye-nimiapụ sọ ḅịa, kụma sịḅịḅio nyana apụ sarasarama ye ḍawọ ḅoarị.

⁷ Oḅori-sọarị atomi ḅụ ị́ ḅụụ wẹrị ḅelemaa; ịn nyana tẹ kẹ í toluma ḅẹ gberie-sọ ofori.

⁸ Tiye ẹrẹsị aka-nimiḅọ ye-nimiḅọ sọarị? Ori ọ̀ mịẹ ḅẹ ye nimi wararị ẹrẹsị. Tiye ẹrẹsị oḅori-ḅọ ḅe oḅori-sọarị? Ọ̀ papaa kuromarị ò nimi ye emi.

⁹ Oḅori-sọarị atomi ịn bala-a in si mịẹarị sọ, kụma iḅi atomi ḅiiarị in si-wẹrịso ịn pịrị.

¹⁰ Ị́ kọn-arị ḍereku mẹ í nye; ị́ nyanarị ḅioḅẹngbọ-si mẹ sọ í nye. Ị́ na arị nyana gboloma ḅẹ ḅọ ofori.

¹¹ Iḅi tomḅọ warị mẹ paa sịẹsime ḅa, in si tomḅọ warị mẹ kan-kọsịma tẹ sọ.

¹² Í kuromarị karakara etela mẹ ẹbịsịya ị́ kẹ mu fịị ḅio suu ḅa.

¹³ Ḍẹrị ẹbịsịya kururu ḅọị ḅa. Ḅioḅẹlẹ sọ tẹ ḅẹḅẹ, kururu sakị mamgba emi.

¹⁴ Si atomi sime ịn pịrị gbẹẹ-ye nyana ḅa. Iḅi atomi ịna mịẹ-aị ḅẹ gbẹẹ-ye nyana ḅa.

¹⁵ Oḅori tomḅọ ḅẹẹye-ḅẹẹye minini ḅa; sịḅịḅio nyana apụ ịna amẹnjị-ḅụọ ẹbịarị.

¹⁶ Ye-nimiapụ balarị ịn ḅụụ-fụka ḅio sọ ḅịa ḅara, kụma apantu amẹẹ ma bala-a ḅara kẹ fọnya ḅaka ḅara kẹ ye mịẹarị.

¹⁷ Owi ḅioḅẹngbọ nyana apụ oḅori amịẹaị mịẹarị; ye-nimi ịn nẹngị apụ nwẹnị yaụ-simearị.

¹⁸ Gberie-sọ nimi-a apụ ma ịna oḅori-sọ dogi-ḅo ịn pịrị ye nyanarị, kụma aka nimi apụ ma ịn ḍawọ ḅo ye kẹ gbẹẹ-ye ḅara ọkịarị.

¹⁹ Si-mịẹapụ karakaraye-mịẹapụ ma tọrọkọ iḅo tẹ ḅụụ-iderima ḅara kẹ ịn tẹkẹ ḅa, ini paa iḅi kẹ ịn mịẹẹ.

²⁰ Gbọrụḅọ-sọ, ọkị-ḅo ori na kpeki tẹ angarị ḅọ la, igoinḅọ ḅe ḅẹlẹma-a, kụma ngọ-kọn ḅọ ḅẹ tọnwa ikiapụ nyana wararị.

²¹ Í ḅioḅẹlẹ ḅẹ-ḅiiarị ḅẹḅẹ, iḅiọkụ igoin-apụ na angaa; ḅẹḅọ-ḅẹḅọ ḍiki-sima mẹ anie sii.

²² Í iḅiye gotẹ namakọrịarị ḅẹḅẹ, ja atomi ḅioḅẹngbọ kẹ ị́ ḅụ gbana tẹ pịkị kụn kẹ ị́ pịrị ḅa; í siye gotẹ nama kọrịarị ḅẹḅẹ í kura-aye mịẹarị.

²³ Kọrịnama kọrịị, anịsakị ị́ ị́ kẹ anga ḅẹ ye nyana ḅa; ị́ papaa lẹgị-lẹgị tẹ ḅịḅị-ḅẹlẹmarị ḅẹḅẹ, í igoin ḅa.

²⁴ Ye-nimiapụ ma ini ngọ kẹ gbẹẹ-ye ḅụ ịn pịrịarị, kụma oḅori-sọarị atomi ma ịna oḅori-sọ mie kịnị kẹ ịn nimiarị ye.

²⁵ Ḅẹrẹ-kiri sime-ḅọ karakara mẹ ḍukoarị sakị ọ̀ kịnị ḍumo ḅọrọmarị; ori iruo aị ḍukoarị sakị ọ̀ kịnị kẹ jen-apụ tọrọkọ dẹrịmarị.

²⁶ Kụn kẹ KỊNỊNYANAḄỌ ḅe pịrị mẹ ḅiokpọ kẹ tomḅọ pịrịarị, anị pịkị mịẹ tẹ mḅọ na mḅọ warị-suku na ye ḅụụ la-a tẹ simearị.

²⁷ Í ḅiiarị ị́ fịị kọkọrọ? KỊNỊNYANAḄỌ ḅe kụn mẹ anie ḍumo ngụngụḅa.

²⁸ Amadaḅọ opu sịrẹrẹ wararị anga anie ọ̀ ḅẹrẹtọn pịrịarị apụ kịẹn-ḅịḅị la ḅara; ini ofori kụma ori papaa ye.

²⁹ Ị́ yaụ-simearị ḅẹḅẹ, ị́yẹrị ye-nimi ḅọ, kụma í owi ḅioḅẹngbọ nyana ḅẹḅẹ, í jen mịẹ-a, í oḅori-sọ la ḅara kẹ tomi ḍiearị.

³⁰ Ḅioḅẹngbọ ḅẹ dein mịẹ tẹ tomḅọ ḅarị obi-a, kụma afana kịkarị ye anie oju ḅio pẹị kọsịmarị si obi.

³¹ Í igoin-apụ ponomarị ḅẹḅẹ, ị́ ịn tẹmẹ Tamụnọ ḅe mịẹ-simarị; kụma í iḅi kẹ igoin-apụ mịẹarị mẹ anie í sunsin Tamụnọ pịrịarị.

³² Si-sịḅịḅio-sụa apụ ma ịna si amịẹaị mie ịna ḅịkị dogi-ḅoarị, kụma iḅi-apụ ma ịna gasịtẹ ḍumo mie ịn gbaịn ḅọrọmarị.

³³ Sịḅịḅio nyana wararị ḅọ kuromarị ye goyegoye ḅụ nimi emi; apantu amẹẹ ma nimi nwẹn-sịn ye sọ in nimi-a.

³⁴ Karakara mịẹ anie sịẹ-sịẹ kẹ opu kiri koromarị; kụma si anie tọrụ-tuu dogi-ḅo ḅẹ tomi-tomi pịrịarị.

³⁵ Amịna akọrịnama kọrị kpaịnmarị fịrịmẹnjịapụ mie amadapụ ḅioḅẹlẹmarị; kụma in fomu-ḅara kẹ in ḅii ḅara mịẹ-a apụ pịrịarị.