Egberima-Ẹkwẹn 10 - FỊAFỊA BAỊBỤLỤ

Sọlọmọnị Gbaa Egberi ma

¹ Ma ma anie Sọlọmọnị egberi ma: Ye-nimi tụḅọ mịẹ tẹ ọ̀ ḍa ọ̀ kẹ ḅụụ-tọn-arị; oḅori-sọarị tụḅọ mẹ ḅioḅẹngbọ si dogi-ḅo mḅọ iyingiḅọ pịrịarị.

² Japụ mingirima ḅụ ị́ kọn-arị ngọ mẹ gbọrụ iḅi sọ kẹ ị́ mịẹ ḅịa; kụma jen-apụ mingirima-a inetẹ í ḍumo ḅọrọma ḅa.

³ KỊNỊNYANAḄỌ ḅe ḍụkụ tẹ iḅi atomi ḅuru-pọkọtarị ḅụ so ḅịa, kụma ọ̀ ḍụkụ tẹ si-sịḅịḅio-sụapụ in ḅiiarị ye nyana ḅịa.

⁴ Kọrịnama ḅụ ḅụụ-sarasara-a mịẹ tẹ í igoin ḅa, kụma kụrọma namakọrị mịẹ tẹ ị́ ngọ kọn ḅa.

⁵ Sịḅịḅio nyana tomḅọ ḅe ḍụọ ḅio ḍiḅi pakama ḅo aị ma kobiri wẹrịarị arị kpọọ tẹ ḅẹḅẹ; anị tọrụ-tuu ye sọm, fịaị soku sakị mamgba kẹ mono mẹ.

⁶ Iḅi tomḅọ boma nyana ḅa. Si-sịḅịḅio-sụa tomḅọ ḅe ori ẹkwẹn mamgba kụrọ-kụrọ amịẹaị arị ḅụ ḅin wararị.

⁷ Ini iḅi atomi kẹ ḅiokoroma ḅa Tamụnọ boma ḅara ḅụ, kụma Si-sịḅịḅio-sụa apụ ma ala-a tomi ịn kẹ ḅioḅọrọma ḅa.

⁸ Sịḅịḅio-nyana apụ iḅi toluma-ẹkwẹn daa-ọkịarị. Oḅori-sọ ḅara kẹ ẹkwẹn-arị apụ ma ḅo fa ḅio sọ ḅa.

⁹ Ja atomi mingirima-mingirima-a apụ ma in simearị anga ḅụ in la-la ye ofori, kụma jen-apụ mingirimarị apụ ma ini in kun ḅa.

¹⁰ Karakara mẹ ḅọịarị ḅọ mẹ ḅụụ-fụka dogi-ḅoarị, kụma ye-kikima-a ḅara kẹ ye sime na-iḅi ḅara ḍukoarị ḅọ dein kọrịnama kọrịarị.

¹¹ Iḅi tomḅọ kọn-arị ẹkwẹn ma anie ḍumo ngụngụḅa, kụma si-sịḅịḅio-sụa tomḅọ ḅe ẹkwẹn ma kụrọ-kụrọ amịẹaị arị ḅio emi.

¹² Ḍiki-ḅioḅu ḅẹrẹ dogi-ḅoarị, kụma ḅẹlẹ ma kịnị ịganịma aị mamgba ḍiki-tọrụsin-arị.

¹³ Iḅi sịḅịḅio nyana apụ nimi ẹkwẹn kọn-arị, kụma oḅori apụ ma fomu-ḅara kẹ ịn pịrị gbẹm.

¹⁴ Ye-nimiapụ ma ini ine-ye ine-ye ḍawọ ḍịn-arị; kụma oḅori-sọarị apụ ma ẹkwẹn sakị goyegoye, ḅẹrẹ kpeki wararị.

¹⁵ Pẹrẹ, kọnḅọ gbaịn ḅọrọmarị; igoin, igoinḅọ ḅaa-gulugulumarị.

¹⁶ Iḅi mịẹ ḅẹ gbẹẹ-ye anie ḍumo, kụma si tomḅọ dogi-mu jen si ḅio suuarị.

¹⁷ Ịn mịẹ-irima-ye ḅụ ịn daa-karakaramarị tẹ pokiarị apụ ma ḍumo ḅa, kụma ini mịẹ-irima tẹ mẹ minini ḍụkụ ḅịa apụ ma in ye kẹ ịn lama ḅẹ ye ḅio sọ ḅa.

¹⁸ Mḅọ kịnị ḍiki-ḅioḅuarị mẹ ḅọịarị ḅọ mẹ iruoḅọ. Ḅẹḅọ-ḅẹḅọ tẹ kịnị kẹ fiema ḅọrọarị ḅọ anie oḅori-ḅọ.

¹⁹ Ị́ ẹkwẹn pẹlẹ-a la ḅara la ḅara, anie ị́ pịkị si mịẹ mu la ḅarị ḅara, anị mịẹ-mịẹ ḅara ḅụ. Í ye-nimi ḅẹḅẹ, ị́ gbọsime ḅa.

²⁰ Iḅi tomḅọ kọn-arị ẹkwẹn ma jen ye kẹ gwa-a tẹ mịẹ seleḅa na kịkarị si-sịḅịḅio-sụa tomḅọ ḅe sụa ḅoarị akuroma ma kẹ mịẹ ḅụ suu-suu ye arị ḅụ ofori.

²¹ Iḅi tomḅọ kọn-arị ẹkwẹn ma sọye mị tọnwa-apụ pịrị ḅa, kụma í inetẹ ị́ ḅụụ ḅaa ḅa oḅori-sọ ḅụ.

²² KỊNỊNYANAḄỌ ḅe boma mie mịẹ tẹ í ngọ-kọn-arị. Kụrọ-kụrọ kọrịnama inetẹ mịẹ tẹ ị́ kọn anị ḅara nẹngị ḅịa.

²³ Ị́yẹrị oḅori-ḅọ, ị́ iri-ye mịẹ ḅụ ḍerekuarị ḅẹḅẹ. Iḅi sịḅịḅio nyana apụ nimi ḅụ tọrụ-ḅẹlẹ nyanarị.

²⁴ Karakaraye-mịẹapụ in ḅii ye nyanarị, kụma si-sịḅịḅio-sụapụ ma in gotẹ ḅalafa tẹịn ye mẹ, mie ịn nyana ḅarịye.

²⁵ Erise fie tẹ si-sịḅịḅio-sụapụ ma fọnọ soarị, kụma kịnị mingirima-apụ ma sakị mamgba ịn la-la ye ofori.

²⁶ Gbala-gbala kọrịnama ḅụ ḅụụ-sarasara nyana-a ḅọ ḅe ọkị tẹ ọ̀ nama kọrị ị́ pịrị ma viniga nwẹn-sịn ye mẹ kẹ aka-ḅumarị ḅara, anịanịa onwi ị́ atọrụngbọ ḅio sọ tẹ mịẹ-mịẹ ḅara, anie ọ̀ kẹ ị́ ḅụụ-sịnịsịnịma ḅarị ḅara.

²⁷ KỊNỊNYANAḄỌ ḅe ḅịḅị pokii, anịsakị í ḍumo nangwọ ḅa. Si-sịḅịḅio-sụapụ ma in ḍumo la ḅẹ sakị la-a ogbo fịị ḅa.

²⁸ Iḅi atomi kẹ ḅiokpọmarị aị ma ịn kẹ mu ḍereku lamarị, kụma si-sịḅịḅio-sụapụ ma kẹ tọrọkọ-jụ tọrụ-ḅaamarị gberie-sọ ofori.

²⁹ KỊNỊNYANAḄỌ ḅe kịnị-mingirima-a apụ ma gbaịn ḅọrọmarị, kụma iri-ye mịẹarị apụ ḅaa-gulugulumarị.

³⁰ Karakaraye-mịẹapụ ma sakị mamgba ịn la-la ye ofori, kụma si-sịḅịḅio-sụapụ ma in ḍumo sime ḅịa ama mẹ ḅio.

³¹ Karakaraye-mịẹapụ ma nimi ẹkwẹn kọn-arị, kụma siye ḍukoarị ḅẹlẹ mẹ anị daasịẹ ḅa.

³² Karakaraye-mịẹapụ ma nimi wararị, in ḍuko ḅẹ ye iḅiye, kụma si-sịḅịḅio-sụapụ ma sakị mamgba si kẹ kịnị mịẹ ḅẹ aị ḍukoarị.