Ẹfisọsị 4 - FỊAFỊA BAỊBỤLỤ

Oju Mẹ Ḅẹ Gbọrụ ḅụ sime Mẹ

¹ Yẹrị, fịrịmẹnjị KỊNỊNYANAḄỌ ḅe pịrịarị ẹrẹsị in kun ikoli suu wararị ḅọ ḅe ọmịna ḅara ḅii lamarị: mịnẹ ọ́ Tamụnọ ọ́ sịn tẹ ọ́ kọn ḅẹ ḍumo mẹ kọn busunumaa.

² Ọ́ sakị mamgba, ḅụụ lẹgịma na gbene na, ye-inema na nyana-a. Ọ́ jụmọ-jụmọ bala ḅụ ọ́ nyana ḅẹlẹma ḍie-paka maa.

³ Ọmịnị ọmịnị inetẹ ḅara, inetẹ ḅara mịẹ, tẹ Tẹmẹ ḅe kẹ ḅo ọ́ pịrịarị dein mẹ ḅẹ gbọrụ ḅụ sime mẹ wẹrị kpaịnma, anie ọ́ kpọ gbolomarị ye mẹ.

⁴ Gbọrụ oju na gbọrụ Tẹmẹ na emi, anie pịkị gbọrụ ḅiokpọma ye tẹ Tamụnọ gotẹ ọ́ sịn ye mẹ sọ emi ḅara.

⁵ Gbọrụ KỊNỊNYANAḄỌ emi, pịkị gbọrụ mininiye na gbọrụ minji-sara na;

⁶ tomi mamgba gbọrụ Tamụnọ pịkị Ḍaḅọ, ori anie ye mamgba Nyanaḅọ, ye mamgba ḅụ kọrịnama kọrịarị, tẹ pịkị ye mamgba ḅio emi ḅọ.

⁷ Kịrayịsị ḍiepịrị-aị kẹ ọ̀ ḅara tọn wamịna-aḅụụ ọrụḅọ-ọrụḅọ so ḅẹ ye kẹ mḅọ pịrị tẹ.

⁸ Fịafịa Ḍiri mẹ ḅẹẹm, “Ori iwo fa so sakị, Ọ̀ tọnwa-apụ kun som; Ò ḍiepịrị-aị kẹ tomi pịrịm.”

⁹ Mịọkụ “ori iwom” mẹ ḅọrọ tiye fiearị? Anị fiearị ye, ọ̀ tarị ideri-ḅo tomikiri ḅẹ iderima tẹịn pokolo iri ma lam.

¹⁰ Mie ḅụ, ideri-ḅo ḅọ ḅe anie paa iwo mu So mamgba tolu ḅọrọ tẹ bebe So na Kiri na ḅụ anga-anga mamgba ḅụ emi ḅọ ḅe.

¹¹ Ori anie “ḍiepịrị-aị kẹ tomi pịrị ḅọ ḅe”; ọ̀ ja apụ tọnm ịn fịrịmẹnjịapụ sọọ, osi apụ ịkịankoroapụ, osi apụ iḅi-oku mẹ ḍuko wasama apụ, osi apụ Agbamịẹapụ na ye-tolumapụ na.

¹² Ò miemẹ mịẹtẹ kẹ Tamụnọ atomi ma tẹlẹma tẹ kẹ Kịrayịsị ḍukamẹnjịapụ fịrị mẹ mẹnjị ḅẹm, tẹ ịn warị nama ḅara kẹ Kịrayịsị oju mẹ nama sịẹma ḅẹ ḅara.

¹³ Mị-ḅara ḅụ, wamịnị-mgba ḅo gboloma ḅa, wa nyana minini na, wa Tamụnọ Tụḅọ ḅe nimi ḅara ḅẹ gbọrụ ḅụ sime ḅụ; wa ḍụḅa paka-ḅo tọrụ ye nimi tẹ atomi sọ, tẹ gbọrsịḅị Kịrayịsị sime-ḅara sime fama ḅa.

¹⁴ Anịsakị wa ḅarị ḍọkọḍọkọ kala awọmẹ kịka tẹ tomi ḅịḅị finji tẹ ḍuko ye ḍuko ye, ọnụngọ na fẹrụ na sọ tẹ wa kẹ gbin ama-ḅara na ere-ḅara na da ḅịa, anie oḅori kẹ kịnị sịn ye tolumapụ, tẹ ịna aka na epele na ḅụ ja apụ da irimarị apụ ma kuroma ḅoarị aị ma.

¹⁵ In mịẹarị ḅara mẹ nakara, wa ḅẹlẹma tẹmẹ ḅụ karakara mẹ ḍuko pakama kụma, wa ḅọkọ, ḅọkọ mamgba ḅụ, Kịrayịsị wamịna Sịḅịdaḅọ ḅẹ ḅụ ḍụḅa paka-ḅo ḅa.

¹⁶ Ori ḅẹrẹtọn anị pịrịarị, tẹ oju mẹ ḅẹ kịrị-kịrị apakịrị mamgba kpesi tẹ bebe, anda na, iko na ma ọkọ kẹ eleke-eleke ma kpọ gboloma tẹ oju mẹ gberie mịẹ tẹ. Mie ḅụ, gbọrụ pakịrị iḅiọkụ amịna kọrịnama kọrịarị ḅẹ kụma, bebe oju mẹ ḍụḅa paka-ḅo tẹ amịna ḅụụ nama sịẹma ḅa, ḅẹlẹma ḅụ.

Kịrayịsị Ḅụ Kọn-arị Ịwọ Ḍumo Mẹ

¹⁷ Ọkọẹrẹsị, KỊNỊNYANAḄỌ ḅe ẹrẹ ḅụ àrị ọmịna ḅeri nụnụarị: ọ́ ḅarị jen kẹ oru nimi apụ ḍumo kọnma, papaa akuroma nyana wararị apụ ma,

¹⁸ tẹ kanakana ịna aḅioḅẹngbọ gbaịn wararị. Tamụnọ kẹ ori atomi pịrịarị ḍumo mẹ ḅụ in ḍiekiri nyana-a, in gberie sọ nimi-a, tẹ pịkị kọngọ kụrọmarị ẹrẹsị.

¹⁹ Ịn ḅarị ḅụụ-jịrị nimi-a; ini ịna aḅụụ kẹ si amịẹaị dẹrịma tẹ ḅụụ-ọlọ-a ḅara kẹ sịḅị-ngụngụnma amịẹaị na kpelekiarị.

²⁰ Ọ́ Kịrayịsị ḅụ ọkọ sime ye ḍawọ-a!

²¹ Piki-pikiye-ofori ḅara ḅụ, ọmịnị ò gboloma ye naa tẹ, anịsakị ò ḍukamẹnjịapụ ḅara ḅụ ịn pịkị Jizọsị ḅụ ḅẹ karakara mẹ kẹ ó toluma tẹ.

²² Mie ḅụ, ọmịnị ọmịna elemu ḅụụ mẹ sịkịị, anie ọ́ mịẹtẹ ọmịnị ọ́ tarị kọn sime ḍumo mẹ kọn ye mẹ — anị elemu ḅụụ mẹ tẹ anị dogi-ḅo ḅo, oḅori kẹ ḅụụ sịn sọlịma aị ma ḅụ, ó guluguluma sime ye mẹ.

²³ Ọ́ gbọrsịḅị ọmịna aḅioḅẹngbọ ma na ọmịna akuroma ma na mịẹ ịwọma famaa,

²⁴ tẹ ịwọ ḅụụ mẹ kẹ kapa sọma tẹ sụa, anie Tamụnọ kẹ ò sime-ḅara ḍikima tẹmẹ ye mẹ, anie karakaratẹ, tụkụ sịẹ wararị tẹ pịkị fịafịa tẹ ḍumo mẹ tẹ amịna ḅụụ mie ḅelema ye mẹ.

²⁵ Ọkọẹrẹsị, ọ́ ḅarị iruo ma! Ọrụḅọ-ọrụḅọ karakaraye mẹ ḍuko mḅọ pembema Kịrayịsị minini ḅọ pịrịị, wamịnị-mgba gbọrụ ḅụ ḅụ Kịrayịsị oju mẹ ḅụ emi ẹrẹsị.

²⁶ Ọmịnị ịganị ịganị, ọ́ ḍụkụ tẹ ọmịna ịganị mẹ ó dogi-mu si ḅio suu ma, ọ́ pịkị bebe ene mẹ kẹ ịganị ma.

²⁷ Ó kiri ḅelema Ekwesu ḅe pịrị ma.

²⁸ Furu-furuḅọ ḅarị furu ma, tẹ saakị kọrịnama kọrịị, mịẹtẹ mḅọ karakara ḅọkọ ḅụ mḅọ kẹ amịna ḅụụ ḍikiḍiki ḅẹ ye nyana tẹ pịkị inetẹ ḅarasụa igoin-apụ pịrị ḅẹ ḅara.

²⁹ Ó si kẹ ja apụ mịẹ ḅẹ ẹkwẹn kọn ma, kụma iḅi ẹkwẹn tẹ ḅarasụa tomḅọ pịrị ḅẹ ye, mịẹtẹ ọ́ kọọn ḅarị ẹkwẹn mẹ nama sịẹmarị ye sọ tẹ anị naa apụ iḅima ḅarị ḅara.

³⁰ Tẹ ọ́ pịkị Tamụnọ Fịafịa Tẹmẹ ḅe kururuma ḅarị ye mịẹ ma; kẹ gotẹ ọkọ ḍukoarị, Fịafịa Tẹmẹ ḅe anie Tamụnọ ọ́ nyanam mẹ ḅẹ elekima, ori anie pịkị sịẹ ọ́ pịrị wararị ḅọ, mịnẹ Ene ḅo ḅa Tamụnọ omoni ḅara-ḅio ọ́ pakama-ḅo ḅarị sakị mẹ.

³¹ Ó siye kẹ jụmọ mịẹ ḅẹ ḍọkị ḅioḅẹngbọ na, ye gotẹ lẹlẹ tẹmẹ na, ịganị na sịkịị. Oloku na, kịnị mịẹ-sima na, kịnị ḍiki-ḅioḅu akuroma na ḅẹ gberie-sọ ḅarị jen kẹ ó gboloma ma.

³² Mịna aị ma nakara, ọmịnị iḅiye mịẹ ḅara na, sarasara ḅioḅẹngbọ na nyana jụmọ-jụmọ pịrịị, tẹ si-wẹrịso jụmọ-jụmọ pịrịị, Tamụnọ sọ Kịrayịsị ḅụ ḅọrọ tẹ si-wẹrịso ọ́ pịrị tẹ ḅara.