Ẹfisọsị 3 - FỊAFỊA BAỊBỤLỤ

Pọlụ Kọrị Ja asịẹ Ḅẹ Apụ Ma Pịrị Kọrịnama

¹ Miemẹ gotẹ, yẹrị Pọlụ, Kịrayịsị Jizọsị ikoliḅọ ḅe, ọmịnị Ja asịẹ ḅẹ apụ ma sịḅị ẹrẹsị, Tamụnọ tẹkẹarị.

² Piki-pikiye-ofori ḅara ḅụ ọ́ naa tẹ mịnẹ Tamụnọ ò ḍiki-ḅụụjịrị ḅụ mị kọrịnama mẹ kẹ ị̀ pịrị tẹ à kọrị ọ́ pịrị, ọmịna iḅi gotẹ.

³ Tamụnọ ọ̀ tọn tẹ kikima sime ye mẹ mịẹfinji tẹ ị̀ mịẹtẹ arị anị nimi tẹ. (À kpụlụ ḅara kẹ mie mẹ gboloma ḍiri kẹẹ tẹ,

⁴ ọmịnị à kẹẹ ḍiri mẹ go kụma, ọmịnị inetẹ à Kịrayịsị gboloma aị tẹ kịnị aḅụụ kikima wararị aị ma nimi la tẹ ḅara ọ́ nwẹn ḍawọ ḅo ḅa).

⁵ Elemu sakị, mị kikimatẹ ye mẹ in ḍuko tomi pịrị-a, kụma mịọkụ Tamụnọ anị mịẹfinji ọ̀ fịafịa afịrịmẹnjịapụ na ịkịankoroapụ na pịrị tẹ, Tẹmẹ ḅe ḅụ.

⁶ Kikima sime ye mẹ anie, iḅi-oku mẹ ḅụ Ja asịẹ ḅẹ apụ ma ḅọrọ tẹ Juu-ḅẹ-apụ na sọ tẹ Tamụnọ aboma ma nyana tẹ; ịn gbọrụ ogbo mẹ ḅẹ apụ sọ tẹ, pịkị Kịrayịsị Jizọsị ḅụ ḅọrọ tẹ Tamụnọ minini ye mẹ ḅụ pịkị ḍiekiri nyana tẹ.

⁷ Tamụnọ karakara ḍiepịrịye mie mịẹtẹ àrị iḅi oku mẹ ḅẹ fịrịmẹnjịḅọ sọ yee, anie ọ̀ kụrọ mẹ kọrịarị kọrịnama mẹ ḅụ ọ̀ ḅọrọ tẹ kẹ ị̀ pịrị ye mẹ.

⁸ Yẹrị ḅe, àrị iderima Tamụnọ atomi mamgba ḅụ iderima tẹịn ḅọ nẹngịm; anịsọ Tamụnọ ò ḍiki-ḅụụjịrị ḅụ mị kụn mẹ kẹ ị̀ pịrịm, mịnẹ yẹrị Kịrayịsị kẹ tomi pịrịarị fa fa-a ngọ ma ḅẹ Iḅi-Oku mẹ ḍuko Ja asịẹ ḅẹ apụ ma pịrị ḅọ sọọ,

⁹ tẹ pịkị mịẹtẹ tomi mamgba Tamụnọ tọn koroma tẹ, kikima sime ye mẹ ẹrị mẹ, ḅo mịẹ tẹ ye sọ ḅẹ ḅara. Tamụnọ, ye mamgba Tẹmẹḅọ ḅe, ọ̀ tọn tẹ kikima wẹrị ye mẹ ḅọrọ tẹ aḅụọ mamgba ḅụ,

¹⁰ mịẹtẹ mị sakị mẹ ḅụ sọsị mẹ na, ḅẹrẹtọn-arị enjẹlị apụ ma na, so ama ḅẹ akụrọ ma na Tamụnọ nimi mẹ sime-ḅara ḍawọ ḅarị ḅara, kịrị-kịrị aḅara ḅụ.

¹¹ Tamụnọ miemẹ mịẹm anie sime gbamaso ye mẹ tẹ ọ̀ tọn wẹrị ye mẹ, ọ̀ nwẹnị Kịrayịsị Jizọsị wa Nyanaḅọ ḅe ḅụ, anị kọrị sịẹma.

¹² Kịrayịsị na gbọrụ ḅụ sime ḅụ, wa ọ̀ ḅụụ nyana minini ḅụ, wa ḅiokpọ tẹ Tamụnọ tọrọkọ mu ḅa, gbọrụ ḅalafa sọ ofori ḅara ḅụ.

¹³ Ọkọẹrẹsị, sisi àrị ọ́ tẹkẹm, àrị ó gotẹ ẹrịarị tọrụsiẹrị mẹ ọmịna ḅioḅẹngbọ lọkọma ma; anịmgba ọmịna iḅi.

Kịrayịsị Ḅẹlẹma Mẹ

¹⁴ Miemẹ ẹrẹsị, àrị ị̀ aḅụọ-kụkụ kẹ kparakị tẹ Ḍaḅọ ḅẹ tẹkẹarị,

¹⁵ anie ḅụụ ḅụ warị-kpo goyegoye, So-ḅio sime ye-o, kiri ḅio sime ye-o, ḅọrọ tẹ amịna karakara ẹrẹ fịarị ḅọ ḅe.

¹⁶ À tẹkẹarị mịnẹ Tamụnọ, ori opu ebube mẹ ḅụ, ọ̀ Tẹmẹ ḅụ ḅọrọ tẹ kụrọ kẹ ọ́ pịrị tẹ ọmịnị ọmịna aḅụụ ḅio ḅụ ịnyọ nyana,

¹⁷ tẹ à tẹkẹarị mịnẹ, minini ḅụ, Kịrayịsị ḅo ọmịna aḅioḅẹngbọ ḅụ anga ḅa. À pịkị tẹkẹarị mịnẹ, ọ́ ḅẹlẹma ḅụ kuno nyana,

¹⁸ mịẹtẹ ọmịnị na Tamụnọ atomi mamgba na gboloma tẹ inetẹ kụrọ nyana tẹ Kịrayịsị ḅẹlẹma mẹ finji na, nangwọ na, gele na, pokolo na nimi ḅarị ḅara.

¹⁹ Inn, à ḅiiarị ọ́ paa Kịrayịsị ḅẹlẹma mẹ nimi — karakaraye tomḅọ inetẹ anị nimi fama ḅịa sọ — mịẹtẹ Tamụnọ karakara sime-ḅara gbọrsịḅị ọmịna ḅụụ ḅin pampam ḅarị ḅara.

²⁰ Ori ḅe tẹ amịna kụrọ wamịna ḅụụ ḅio kọrịnama kọrịarị ḅọ ḅe, tẹ wa inetẹ ḅii, anịanịa kuroma, ḅẹ ḅara nẹngị lama ḅarị ḅara mịẹ ḅẹ ḅọ ḅe,

²¹ anie Tamụnọ ḅe ebube, sọsị mẹ ḅio na, Kịrayịsị Jizọsị ḅụ na, sime ọ̀ pịrị sakị mamgba mu ḅẹẹ-sakị ḅẹẹ-sakị la! Amẹnị.