Ẹfisọsị 2 - FỊAFỊA BAỊBỤLỤ

Fịị Ḅụ Ḅọrọ Mu Ḍumo Ḅụ Sọ

¹ Ọmịna ḅịḅịpoki-a na ọmịna asi na gotẹ, ḅọrọtẹ sakị mẹ ḅụ ọ́ tẹmẹ ḅụ fịịm.

² Anị sakị mẹ ḅụ tomikiri ḅẹ si etela mẹ mie ó ḍukamẹnjị sime ye; ọ́ ḅẹrẹtọn So-tọrụ simearị tẹmẹ akụrọ ma pịrịarị ḅọ ḅe, tẹ mịọkụ ḅẹrẹtọn Tamụnọ ḅịḅịpoki-a apụ ma pịrịarị tẹmẹ ḅe, ḅịḅịpokim.

³ Karakaraye ḍuko ḅụ, wamịnị-mgba ịn mịẹ ḅara mịẹ tẹ tomḅọ si sime-ḅara mẹ ḅụ wa ḅiiarị aị ma ḍiki angam, wamịna meni-oju na wamịna akuroma na ḅụụ-ḅẹlẹ aị mịẹ ḅụ. Wamịna tomḅọ si sime-ḅara mẹ ḅụ wa ḅẹ tomḅọ, tomḅọ na kịka ḅara ḅụ; wa sime Tamụnọ ịganị pịrịm.

⁴ Kụma Tamụnọ ọkụrụkụrụ mẹ ḅaka ḅara na, ọ̀ nyana wa pịrị ḅẹlẹma mẹ ḍụḅa la ḅara na

⁵ mịẹtẹ wa ḅịḅịpoki-a ḅụ tẹmẹ ḅụ fịị wararị ogbo ọ̀ wa kẹ Kịrayịsị ḅụ sụa ḍumomam. Tamụnọ ḍiki-ḅụụjịrị ḅụ mie ọ́ ḅọrọma ye.

⁶ Wa Kịrayịsị Jizọsị na gbọrụ ḅụ sime ye ḅụ, ọ̀ wa kẹ ori na sụa saakịmam, wa ori na So-ḅio ḅụ ḅẹrẹtọn ḅẹ ḅara.

⁷ Ò gotẹ miemẹ mịẹ ye, kẹ kịnị ḍie mu ḅẹẹ-sakị ḅẹẹ-sakị la, kẹ Kịrayịsị Jizọsị ḅụ ọ̀ kẹ wa ḅẹlẹma ye mẹ ḍie-pakama, ọ̀ ḅakatẹ, inetẹ go ḅịa opu ḍiki-ḅụụjịrị ḅẹlẹma mẹ ḅụ.

⁸ Kẹ gotẹ ọkọ ḍukoarị, Tamụnọ ḍiki-ḅụụjịrị ḅụ mie ọ́ ḅọrọ tẹ ḅọrọma ye, minini nyana ḅụ, ọmịna aḅụụ ḅụ ḅo ye-a, kụma Tamụnọ ḍiepịrịye;

⁹ kọrịnama ḅụ-a, mịẹtẹ gbọrụḅọ-sọ inetẹ ḅụụ boma ḅịa ḅara.

¹⁰ Tamụnọ wa kẹ wa simearị ḅara mẹ wẹrịm, tẹ Kịrayịsị Jizọsị na gbọrụ ḅụ sime ḅụ, ọ̀ wa tẹmẹ tẹ kẹ iḅi amịẹaị ḍumo pịrị tẹẹ, anie ọ̀ tẹlẹma wẹrị wa pịrị tẹ wa mịẹ ḅẹ aị ma.

Kịrayịsị Ḅụ Wamịnị-mgba Gberie

¹¹ Ọmịnị Ja asịẹ ḅẹ apụ ma, ọmịnị iyi ḅara ḅụ — Juu-ḅẹ-apụ ma kẹ ọ́ sịn-arị ye anie, “tarị-ḅụụ sin-a apụ”, tẹ nwẹnị “tarị-ḅụụ sin apụ” kẹ ịna aḅụụ sịn-arị (anie tomi kẹ ịna ameni-oju ma mịẹarị ye gboloma ye) — ọ́ ḅọrọ tẹ sakị ḅụ ó sime-ḅara kẹ ḅiokoromaa.

¹² Anị sakị mẹ ḅụ ọ́ Kịrayịsị ḅụ ḅele wararị. Ọmịnị Ja asịẹ ḅẹ apụ, tẹ ọ́ pịkị sime Tamụnọ sẹlẹ-ọkị tẹ apụ ma ogbo mẹ pịrị-a. Ọḅọkụ ma ḅụ sọ ó kiri nyana-a, anie Tamụnọ minini ori atomi pịrị aị ma ḅụ sịrẹrẹ aị ma, anịsakị mị tomikiri mẹ ḅụ ḅiokpọma ye ofori ḅara na Tamụnọ nyana-a ḅara na mie ọ́ kẹ anga ye.

¹³ Kụma mịọkụ, ọmịnị ala-jụ sime, sime apụ ma, Kịrayịsị fịị ọ́ kẹ ḅo kpekima tẹ, ọ́ Kịrayịsị Jizọsị na gbọrụ ḅụ sime tẹẹ.

¹⁴ Kẹ gotẹ ọkọ ḍukoarị, Kịrayịsị ḅarana dein ọkị-ḅo wa pịrị tẹ, Juu-ḅẹ-apụ na Ja asịẹ ḅẹ apụ na kẹ ḅo gbọrụ atomi mịẹ ḅụ. Ori oju mie ọ̀ kẹ kiki-pẹlẹ onu mẹ tẹ in puu-ḅelema tẹ ịn kẹ fịya-a apụ sọma sime ye mẹ sukuruma gbin ye.

¹⁵ Ò Juu-ḅẹ-apụ Oloko mẹ, anị ḅio ịn sụa kịrị-kịrị oloko ma na, ịn tọn koroma aị mamgba na, kẹ kụrọ nyana-a kiri ḅụ wẹrịm, mịẹtẹ ọ̀ maa tomi aḅara ma kẹ gbọrụ ịwọ atomi sọma ḅẹ ḅara, ò ḅioju na ini na gbọrụ ḅụ sime ḅụ, mị ḅọkọ ḅụ nwẹnị dein mịẹ.

¹⁶ Ori ẹngbẹsẹ-sịn ọgọnọ kọn fịị mie Kịrayịsị kẹ fịya-a mẹ kan sin ye. Ẹngbẹsẹ-sịn mẹ ḅụ mie ọ̀ ḅọrọ tẹ maa kịrị-kịrị atomi ma kẹ gbọrụ oju mịẹ ye, tẹ mịẹtẹ ịn pịkịma Tamụnọ ḍọkụma-ḅo ye.

¹⁷ Mie ḅụ Kịrayịsị ḅo tẹ dein Iḅi Oku mẹ ḍuko kịnị mamgba pịrịm-o ḍuko ọmịnị Ja asịẹ ḅẹ apụ tẹ Tamụnọ ḅụ ḅele fa sime apụ ma pịrị, pịkị ḍuko Juu-ḅẹ-apụ tẹ ó kpeki sime apụ pịrịị.

¹⁸ Kịrayịsị ḅụ mie wamịnị-mgba, Juu-ḅẹ-apụ na Ja asịẹ ḅẹ apụ na, inetẹ gbọrụ Tẹmẹ ḅe ḅụ ḅo Ḍaḅọ ḅe tọrọkọ laarị.

¹⁹ Anie ḅụ, ọmịnị Ja asịẹ ḅẹ apụ ma, ḅarị jen kẹ kịnị tọrụ nimi-a apụ-a, anịanịa bịan apụ-a; mịọkụ ó ḅo Tamụnọ atomi ma na gbọrụ ama ḅẹ apụ na Tamụnọ warị-kpo mẹ ḅẹ apụ na sọ tẹ.

²⁰ Ọmịnị sọ warị nama aḍụḅarị sọ tẹ fịrịmẹnjịapụ ma na ịkịankoroapụ ma na saakị warị-suku mẹ ọgọnọ nama tẹ, anie Kịrayịsị Jizọsị ḅioju ịkọlị palị ḍụḅarị sọ pịrị wararị warị mẹ.

²¹ Ori anie bebe warị mẹ ọlọ kpesi wararị ḅọ, tẹ anị mịẹtẹ anị gele paka-ḅo Tamụnọ fịafịa warị sọ tẹ, saakị sikima KỊNỊNYANAḄỌ ḅe pịrị tẹ ye sọarị ḅọ.

²² Ori na gbọrụ ḅụ sime ḅụ ọmịnị sọ, ini ọ́ kẹ osi apụ mamgba na sụa nama gbolomarị tẹ anị ḅo Tamụnọ ọ̀ Tẹmẹ ḅe ḅụ ḅọrọ tẹ angarị warị sọarị.