Ditẹrọnọmị 9 - FỊAFỊA BAỊBỤLỤ

Tomi Ma Ḅịḅịpoki-a Mẹ

¹ Yei Izirẹlị, ọ́ naa! mịmgba ọ́ mị Jodanị mẹ saḅa-ḅọrọ tẹ mu ḍụḅa ọ́ nẹngị pịkị ịnyọ nyana ọ́ nẹngị-nẹngịtẹ opu asịẹ ḅara ḅụ ịn nyana ye ọkị ḅẹ muarị, gburo-gburotẹ ini ọmụ gotẹ mịẹ kụrọma kụrọma mu so lama wararị opu ama ma.

² Ḍụḅatẹ gele-geletẹ atomi, ḍụḅa tomi nẹngị-nẹngịtẹ atomi ma owiapụ-awọmẹ inima tẹ ọmịnị sọ nimi wararị apụ ma, inima tẹ ó naam, anị mẹẹ: Tụḅọ inetẹ Enakị owiapụ-awọmẹ ma tọrọkọ sịẹ ḅẹ? kẹ ḅẹẹ apụ ma.

³ Anịẹrẹsị mịmgba ó nimi mịnẹ oriḅe tẹ ọmịna tọrọkọ tarị ye guluguluma kọrị fịnị ḅara kẹ saḅa ḅọ ḅe anie KỊNỊNYANAḄỌ ọmịna Tamụnọ ḅe; ori ịn ḅaa ḅa, tẹ mịẹtẹ ịn sịḅị-tuu ḅa ọmịna tọrọkọ, anieḅụ ọmịnị in dee pakama ḅa, tẹ mịẹtẹ ịn fọnya fịị fa ḅa, KỊNỊNYANAḄỌ ḅe kẹ wẹrịtẹ ọ́ karịma tẹ ḅara.

⁴ KỊNỊNYANAḄỌ ọmịna Tamụnọ ḅe ọmịna tọrọkọ in sukuruma pakama tẹ so so, ọmịnị ọmịna ḅioḅẹngbọ ḅụ ḅẹẹ ma: Ị̀ karakara mie KỊNỊNYANAḄỌ ḅe kẹ ì ọkị-ḅo su ye à ḅo mị ama mẹ nyana kụma mịna opu asịẹ ma si sịḅịḅio mie KỊNỊNYANAḄỌ ḅe gotẹ ọmịna tọrọkọ ịn dee pakamarị ye.

⁵ Ọmịna karakara, anịanịa ọmịna ḅioḅẹngbọ ḅụ ọ́ kọn karakara ḍumo gotẹ ọ́ sọ ịna ama mẹ nyana ḅẹ mu-a; kụma mịna opu asịẹ ma si-sịḅịḅio mie KỊNỊNYANAḄỌ ọmịna Tamụnọ ḅe gotẹ ọmịna tọrọkọ in dee pakamarị ye, mịẹtẹ ẹkwẹn mẹ tẹ KỊNỊNYANAḄỌ ḅe ye karị ḅara kẹ kọn ọmịna aḍapụ Ebira-amụ pịrị, Ayịzịkị pịrị, Jekọbụ pịrị ẹkwẹn mẹ ori anị mịẹ kụrọma ḅẹ ḅara.

⁶ Anịẹrẹsị ó nimi mịnẹ KỊNỊNYANAḄỌ ọmịna Tamụnọ ḅe ọmịna karakara gotẹ mị iḅi ama mẹ kẹ ọ́ nyana ḅẹ tẹ ọ́ pịrị-a, kẹ gotẹ ọkọ ḅẹẹarị, ọmịnị anie kịnị na kura-a atomi.

⁷ Ọ́ sịḅị-kụrọma kụrọma KỊNỊNYANAḄỌ ḅe pịrịm ọmịnị Ijiputi ḅẹ ama ḅio paka-ḅo ene, nwenii ó ḅo mịanga la sakị la, ọ́ kẹ ịkpa mẹ ḅio KỊNỊNYANAḄỌ ọmịna Tamụnọ ḅe ịganị sịn saakị tẹ ori ịganị ḅara kẹ ḅiokoroma tẹ anị kẹ ḅioḅọrọma ma.

⁸ Orẹbụ ḅụ sọ ọ́ KỊNỊNYANAḄỌ ḅe ịganị sịn saakị tẹ ori ịganịm; tẹ anị KỊNỊNYANAḄỌ ḅe ḅụụ-ḅẹsọ tẹ ori ọ́ ḅaa ḅẹ tẹlẹmam.

⁹ À tụndụ mẹ kpọlị iwo tẹ ye kẹẹ aḍụḅarị ma ọkị ḅẹ mu sakị, ọḅọkụ mẹ ḅẹ ye kẹẹ aḍụḅarị ma tẹ KỊNỊNYANAḄỌ ḅe ọmịnị na mịẹ ye mẹ; arị eneḅaka amesi na ḍin amesi na kẹ tụndụ mẹ ọgọnọ simem; à fịye fị-a, à minji sọ ḅuu-a.

¹⁰ Tẹ KỊNỊNYANAḄỌ ḅe Tamụnọ ḅara-tụngbalị kẹ ọgọnọ ḅụ ye kẹẹ wararị maa ye kẹẹ aḍụḅarị ma kẹ ị̀ pịrịm, anịsakị arị ọgọnọ mie ẹkwẹn-aḅịḅị mamgba tẹ KỊNỊNYANAḄỌ ḅe tụndụ mẹ ọgọnọ kọrị fịnị mẹ ogboku kobiri ene mẹ ḅụ ọmịnị na kọn tẹ ẹkwẹn ma kẹẹ wararị ye.

¹¹ Anịsakị eneḅaka amesi na, ḍin amesi ma na kunoma ḅụ KỊNỊNYANAḄỌ ḅe ọḅọkụ mẹ ḅẹ ye kẹẹ maa aḍụḅarị ma kẹ ị̀ pịrịm.

¹² Anịtẹso KỊNỊNYANAḄỌ ḅe nwẹnị ị̀ ḅẹẹ: Saakịị! mịanga fọnya kuro soo, kẹ gotẹ ọkọ ḅẹẹarị, ị́ atomi inima tẹ Ijiputi ḅụ í ọkị-ḅo tẹ atomi ma ịn si ḅara kẹ ye mịẹ tẹ; etela mẹ tẹ à tọn ịn pịrị ye mẹ ḅụ ịn fọnya tọrụ-pịkị akaka da tẹ; in ye kịkama tẹmẹ amịna ḅụụ pịrị tẹ.

¹³ KỊNỊNYANAḄỌ ḅe nwẹnị pịkị siin ị̀ ḅẹẹ: Mịna atomi ma àrị ịn ẹrị tẹẹ, anịsakị ḍikii, ini anie kịnị na kura-a tomi.

¹⁴ Ị̀ wẹrịsoo, mịẹtẹ àrị ịn ḅaa fama mị so mẹ suku-ḅio ḅụ tẹ ịna ẹrẹ kọrọrọ-siin; anịsakị à ḍụḅa in nẹngị, kụrọ in nẹngịtẹ opu sịẹ pakama ị́ pịrị ḅa.

¹⁵ Anieḅụ à tụndụ mẹ ọgọnọ ḅụ tuuideri ḅom, anịsakị fịnị tụndụ mẹ ḅụ kọrịarị; tẹ ọḅọkụ mẹ ḅẹ ye kẹẹ maa aḍụḅarị ma ị̀ ḅara-ḅio simem.

¹⁶ À nwẹnị ḍiki tẹ ẹrị mịnẹ ọ́ KỊNỊNYANAḄỌ ọmịna Tamụnọ ḅe ḅụụ si mịẹ tẹẹ; ọmịnị asambịrịma nambulo tẹmẹ ọmịna aḅụụ pịrị tẹ; etela mẹ tẹ KỊNỊNYANAḄỌ ḅe tọn ọ́ pịrị ye mẹ ḅụ ọ́ fọnya tọrụ-pịkị akaka da tẹ.

¹⁷ Anieḅụ ọmịna tọrụ-ogbo ḅụ à maa ye kẹẹ aḍụḅarị ma ọkị ọlọm tẹ ị̀ maa aḅara ḅụ arị kẹ kiri gbin tẹ arị pakịrị-pakịrị pum.

¹⁸ Anịtẹso à nwẹnị ị̀ tọrụkuḅu kẹ KỊNỊNYANAḄỌ ḅe tọrọkọ àrị iḅo-ḅo ḅara kẹ eneḅaka amesi na ḍin amesi na kẹ iḅo; à fịye fị-a, à minji sọ ḅuu-a, si mamgba tẹ ọ́ mịẹ tẹ aị ma gotẹ KỊNỊNYANAḄỌ ḅe ḍiki-tọrụ ḅụ siye mẹ tẹ ọ́ mịẹ tẹ kẹ ori ịganị ḅẹ ḅara ḅụ ori ịganị sịn saakị ye mẹ.

¹⁹ Kẹ gotẹ ọkọ ḅẹẹarị, ịganị mẹ na, ye ḅụụ-ḅẹsọ mẹ na tẹ KỊNỊNYANAḄỌ ḅe nyana ọ́ pịrị ye mẹ ị̀ ḅalafamam, anieḅụ ori ọ́ ḅaa ḅẹ tẹlẹmam. Kụma anị sakị mẹ sọ KỊNỊNYANAḄỌ ḅe ị̀ naam.

²⁰ KỊNỊNYANAḄỌ ḅe kẹ ịganị Erọnị pịrị ḅara, ori ọ̀ ḅaa ḅẹ tẹlẹmam, tẹ à tẹkẹ Erọnị sọ pịrịm anị gbọrụ sakị mẹ ḅụ.

²¹ Anịtẹso arị asambịrịma nambulo mẹ, siye mẹ tẹ ọ́ tẹmẹ ye mẹ ọkịm, tẹ fịnị kẹ anị dọkịma tẹ anị kọsịmam. Àrị anị gbẹẹ tẹ anị ḅẹ mgbọlị ịrụ lama nwenii anị fọọn ḍọkọḍọkọ ḅara ḍọkọḍọkọm; tẹ à fọọn mẹ kẹ kuroro mẹ tẹ tụndụ mẹ ḅụ puu ideriarị minji mẹ ḅio ngumam.

²² Tabera ḅụ na, Masa ḅụ na, Kibirọtị-hatava ḅụ na sọ ọ́ KỊNỊNYANAḄỌ ḅe ịganị sịn saakị tẹ ori ịganịm.

²³ KỊNỊNYANAḄỌ ḅe Kadẹsị-Baniya ḅụ ó fịrịma tẹ ḅẹẹm: Ọmịnị iwo mu tẹ anị ama mẹ tẹ à kẹ ọ́ pịrị tẹ ama mẹ ọkị nyana-a ḅẹ sakị, anị sakị rẹ mie ọ́ sịḅị kụrọma KỊNỊNYANAḄỌ ọmịna Tamụnọ ḅe tọn ye mẹ pịrị tẹ ò minini-a, anịanịa ọ̀ pọkọ poki ḍụkụ-a ye.

²⁴ Ene mẹ tẹ à saakị ọ́ nimi kụra-ḅio ọ́ sịḅị-kụrọma KỊNỊNYANAḄỌ ḅe pịrịarị.

²⁵ “Anieḅụ mịna eneḅaka amesi ma na ḍin amesi ma na ḅụ mie à KỊNỊNYANAḄỌ ḅe tọrọkọ àrị iḅo-ḅo tẹ tẹkẹarị ḅara, gbala KỊNỊNYANAḄỌ ḅe ḅẹẹ tẹ ori ọ́ ḅaa ḅa ẹrẹsị.

²⁶ Tẹ à nwẹnị KỊNỊNYANAḄỌ ḅe tẹkẹ: Yei KỊNỊNYANA-TAMỤNỌ, ị́ atomi tẹ ị́ kẹ ínye mịẹ tẹ apụ ma, inima tẹ ị́ í opu ḅụ pakịrị ọkị tẹ apụ ma, inima tẹ Ijiputi ḅụ ị́ kụrọ nyanatẹ opu ḅara kẹ ọkị-ḅo tẹ apụ ma ḅaa fama ma ị́ na.

²⁷ Ị́ afịrịmẹnjịapụ Ebira-amụ na, Ayịzịkị na Jekọbụ na kẹ ḅiokoroma; mịna atomi ma kịnị na kura-a mẹ, anịanịa ịna si-sịḅịḅio, anịanịa ịna si kẹ ye-sịn ma.

²⁸ Anie ofori ama mẹ tẹ ị́ wa ọkị-ḅo ama mẹ ḅofa ḅẹẹ, KỊNỊNYANAḄỌ ḅe ḅarị inetẹ ini ọkị-ḅo ama mẹ tẹ ọ̀ kẹ ịn karịma ama mẹ ḅio suu-a, tẹ ịn ḍiki-ḅioḅum ẹrẹsị ori ini ọkị-ḅo ḅaa ḅẹ ḅom ịkpa mẹ ḅio.”

²⁹ Kẹ gotẹ ọkọ ḅẹẹarị, inima anie ị́ atomi, tẹ ị́ kẹ ínye mịẹ tẹ apụ ma, inima tẹ ị́ ị́ opu kụrọ na sụụn-paka tẹ ḅara-kọngọ na ḅụ pakama-ḅo apụ ma.