Ditẹrọnọmị 7 - FỊAFỊA BAỊBỤLỤ

KỊNỊNYANAḄỌ Ḅe Soku-ḅẹ Atomi

¹ KỊNỊNYANAḄỌ ọmịna Tamụnọ ḅe ọmịnị ọkị-ḅo tẹ ama mẹ tẹ ọ́ sọ-mu anị ọkị nyana ḅẹ muarị ama mẹ ḅio suu, tẹ ọmịna tọrọkọ tọnwa opu asịẹ, Itayịti apụ ma na, Gagasayịtị apụ ma na, Amọrayịtị apụ ma na, Kenanị ḅẹ apụ ma na, Pẹrịzayịtị apụ ma na, Hivayịtị apụ ma na, Jebusayịtị apụ ma na, gburo-gburotẹ, kụrọ nyana ọ́ nẹngị-nẹngịtẹ sọnọma opu asịẹ ọfịn sin sakị.

² KỊNỊNYANAḄỌ ọmịna Tamụnọ ḅe ịn ḅọrọma ọ́ pịrị tẹ ọmịnị ịn nẹngịma sakị, ọmịnị ịkatakirikọn-a-ḅara kẹ ịn ḅaa nyanam; ọmịnị ini na gbọrụ ọḅọkụ sọ fị tẹ ọkụrụkụrụ nyana ịn pịrị ḅịa.

³ Ọmịnị ini na ere-sime pịrịa-pịrịa ma, ọmịna eremịna-awọmẹ kẹ ịna owiapụ-awọmẹ pịrị, anịanịa ịna eremịna-awọmẹ ọkị ọmịna owiapụ-awọmẹ pịrị ma.

⁴ Kẹ gotẹ ọkọ ḅẹẹarị, ini ì ḍukamẹnjị ḅụ ọmịna owiapụ-awọmẹ ma pịkị tẹ ịn fịrịmẹnjị oru-atamụnọ pịrị ḅa, anịrẹ KỊNỊNYANAḄỌ ḅe ịganị kẹngẹma ọmịna ọgọnọ sara tẹ ọ̀ fọnya ọ́ ḅaa ḅa.

⁵ Kụma mị-ḅara mie ọ́ kẹ ini na mịẹ ḅarịye: ọmịnị ịna ebeka ma kan-sara, tẹ ịna ịḅalị ma kẹ ye fomu pakịrị-pakịrị puu, tẹ ịna oru-fụḅara Asirimu pẹlẹ-gbiin, tẹ fịnị kẹ ịn kẹ ye kịkama tẹmẹ ḅụụ pịrị aị ma dọkịmaa.

⁶ Gbala ọmịnị anie fịafịa tẹ sime KỊNỊNYANAḄỌ ọmịna Tamụnọ ḅe pịrị gbọrụ atomi ẹrẹsị. KỊNỊNYANAḄỌ ọmịna Tamụnọ ḅe ọ́ sẹlẹ-ọkị tẹ kẹ gbọrsịḅị ori atomi tẹ sime ọ̀ pịrị apụ sọma tẹẹ, bebe tomikiri mẹmgba ḅụ.

⁷ Kịẹn-ḅịḅị ḅụ ọ́ ja atomi nẹngịm ẹrẹsị KỊNỊNYANAḄỌ ḅe ọ̀ ḅẹlẹma kẹ ọmịnị ọgọnọ gbana tẹ ọ́ sẹlẹ-ọkịm ọkọ-a, kẹ gotẹ ọkọ ḅẹẹarị, tomi mamgba ḅụ ọmịnị boowa tẹịnm.

⁸ Kụma gbala KỊNỊNYANAḄỌ ḅe ọ́ ḅẹlẹmam tẹ tẹmẹ la ḅarasụa minini ye tẹ ò ye karị ḅara kẹ minini ọmịna aḍapụ ma pịrị ye mẹ koko ḅụ, mie KỊNỊNYANAḄỌ ḅe kẹ kụrọ nyana opu ḅara kẹ ọ́ pakama-ḅo tẹ ye, omoni-sọ anga mẹ ḅio, Fero Ijiputi ḅẹ amadaḅọ ḅe ḅara ḅio.

⁹ Ọkọẹrẹsị ó nimi mịnẹ KỊNỊNYANAḄỌ ọmịna Tamụnọ ḅe anie Tamụnọ, minini nyana Tamụnọ, tẹ ọḅọkụ koko tẹ jike-a ḅẹlẹma nyana kẹ inima tẹ ọ̀ ḅẹlẹma tẹ ori oloko koko apụ ma pịrịarị mu ḅụọ maa ẹndẹ oyia asi finji finji laarị,

¹⁰ anịsakị inima tẹ ò ḍiki-ḅioḅu apụ ma ori ịna tọrụ-ogbo ḅụ ịn mịẹye mẹ kẹ ịn gbẹẹarị ịn ḅaa guluguluma ḅụ, anịsakị ori oriḅe tẹ ò ḍiki-ḅioḅuarị ḅọ ḅe ḅụ ọ̀ ḅara foofoma ḅịa, ọ̀ tọrụ-ogbo ḅụ ọ̀ mịẹye mẹ kẹ ọ̀ gbẹẹ ḅụ.

¹¹ Ọmịnị anịẹrẹsị ḅụụ ẹbị-bịtẹ oloko mẹ na, kẹẹ wararị oloko ma na, kụrọ ḅara ḅio sime apụ sụa oloko ma na tẹ mịmgba à tọn ọ́ pịrị aị ma mịẹ ḅa.

Ḅịḅịpoki Ḅụ Ḅẹ Aboma

¹² Anịsakị ọ́ mịna kụrọ ḅara-ḅio sime apụ sụa oloko ma koko, tẹ arị mịẹ ẹrẹsị, KỊNỊNYANAḄỌ ọmịna Tamụnọ ḅe ọmịnị na, ọḅọkụ mẹ na jike-a ḅẹlẹma mẹ na, tẹ ò ye karị ḅara kẹ minini ọmịna aḍapụ pịrịm ịn koko ḅẹ ye mẹ, koko ḅa.

¹³ Ori ọ́ ḅẹlẹma ḅa, ó boma ḅa, tẹ mịẹtẹ ọ́ kama ḅa; tẹ ọ̀ pịkị mịẹtẹ ọmịna oju ḅe mgbọlụ na, ọmịna kiri ḅio ḅẹ mgbọlụ na, ọmịna sịnmgbọlị na, ọmịna iru na, ọmịna pulo na, ọmịna opu anama ma kịẹn-ḅịḅị mịẹ ḍụḅama ḅẹ aị ma na, ọmịna anana na oḅori na ogbo mẹ ḅẹ asambịrịma aị ma na boma ḅa anị ama mẹ tẹ ọ̀ kẹ ọmịna aḍapụ ma pịrị ḅẹ ye karị ḅara kẹ minini wararị ama mẹ ḅio.

¹⁴ Ọmịnị boma tomi-kụlọkụlọ mamgba nẹngị ḅa; ọmịna ogbo-ḅio, anịanịa ọmịna opu anama ḅụ furo-pụụntẹ iyi ḅịa owiḅọ anịanịa ẹrẹḅọ, owi anịanịa ịyọrọ paka ḅịa.

¹⁵ Anịsakị KỊNỊNYANAḄỌ ọmịna aḅụụ obi mamgba saakị-siin ḅa; tẹ Ijiputi ḅẹ si obi tẹ ó nimi aị ma gberie-sọ ḅo ọ́ la ḅịa, kụma ori arị kẹ inimgba tẹ ó ḍiki-ḅioḅu apụ mamgba ọgọnọ gbana ḅa.

¹⁶ Tomi-kụlọkụlọ tẹ KỊNỊNYANAḄỌ ọmịna Tamụnọ ḅe saḅama ọ́ pịrị ḅarị apụ goyegoye ọmịnị ịn ḅaa ḅa, ọmịnị ịn ḍiki sịḅị-jịrị ma, ọ́ pịkị fịrịmẹnjị ịna oru-atamụnọ pịrị ma, kẹ gotẹ ọkọ ḅẹẹarị, aniemẹ ḍiein sọ ọ́ pịrị ḅa.

¹⁷ Ọmịnị ọmịna ḅioḅẹngbọ ḅụ ḅẹẹm: Mịna opu asịẹ ma ḍụḅa ị̀ nẹngịm, à tọ-ḅara kẹ inetẹ ịn nyana ye ọkị ḅẹ ḅẹḅẹ?

¹⁸ Ọmịnị ịn ḍiki-ḅalafa ma; kụma ọ́ KỊNỊNYANAḄỌ ọmịna Tamụnọ ḅe kẹ Fero na, Ijiputi mamgba na mịẹ ye kẹ ḅiokoroma ḅa.

¹⁹ Gburo-gburotẹ adaa-ḍiki ma na, elekima ma na, ḅụụ-gbiripuma aị ma na, kụrọ nyanatẹ opu ḅara mẹ na, sụụn paka tẹ ḅara-kọngọ mẹ tẹ KỊNỊNYANAḄỌ ọmịna Tamụnọ ḅe kẹ ọ́ pakama-ḅo ye mẹ tẹ ọmịnị ẹrị ye mẹ kẹ ḅiokoroma ḅa; mị ḅara mie KỊNỊNYANAḄỌ ọmịna Tamụnọ ḅe kẹ tomi-kụlọkụlọ ma tẹ ó ḍiki-ḅalafarị apụ ma mịẹ ḅarị ḅara.

²⁰ Anie sikima, KỊNỊNYANAḄỌ ọmịna Tamụnọ ḅe ḅịlagbin kẹ ịna ogbo-ḅio fịrịma ḅa, nwenii inima tẹ kirikọntẹ ọmịna aḅụụ ịna aḅụụ ḅọị apụ ma fịị fama ḅa.

²¹ Ọmịnị ịn ḍiki-ḅalafa ma, kẹ gotẹ ọkọ ḅẹẹarị, KỊNỊNYANAḄỌ ọmịna Tamụnọ ḅe ọmịna ogbo-ḅio emi, gburo-gburotẹ tẹmẹ-naịn-naịnmarị Tamụnọ.

²² KỊNỊNYANAḄỌ ọmịna Tamụnọ ḅe ọmịna tọrọkọ kẹlẹkẹlẹ mịna opu asịẹ ma ọfịn sin fama ḅa; ó kirina-kirina gbọrsịḅị ini ọfịn mu kunoma ḅịa, anieofori piri-ḅio-ḅẹ anama ma kịẹn-ḅịḅị ḅofa ọmịna aḅụụ ḅaka.

²³ Kụma KỊNỊNYANAḄỌ ọmịna Tamụnọ ḅe ịn saḅama ọ́ pịrị ḅa, tẹ ịn kẹ gburo-gburotẹ tọrụ-ḅalaḅala ḅio gbin su ḅa, nwenii ịn fịị fama ḅa.

²⁴ Ori ịna amadapụ kẹ ọmịna ḅara-ḅio ọ́ pịrị ḅa, tẹ ó so mẹ suku-ḅio ḅụ ịna ẹrẹ guluguluma fama ḅa; gbọrụ tomḅọ sọ inetẹ ọmịna kuḅu sịẹ ḅịa nwenii ọmịnị ịn ḅaa fama ḅa.

²⁵ Ịn kẹ ye kịkama tẹmẹ wararị ịna oru-atamụnọ ma ọ́ fịnị kẹ arị dọkịma ḅa, arị ọgọnọ simearị seleḅa, anịanịa golu mẹ ọ́ nwẹn mọnị ma, anịanịa arị ọkị ọmịna aḅụụ pịrị; anieofori anị ḅofa ḍiein sọ tẹ ó tuu koroma; kẹ gotẹ ọkọ ḅẹẹarị, anị tọn-tọnye sọ KỊNỊNYANAḄỌ ọmịna Tamụnọ ḅe pịrị wararị.

²⁶ Anịsakị ọ́ tọn-tọnye ọkị-ḅo ọmịna warị ḅio suu tẹ ḅo anị wori ḅara wori ma; ọ́ gbọrsịḅị anị sịkị tẹ anị tọn ḅa, kẹ gotẹ ọkọ ḅẹẹarị, aniemẹ anie wori tẹ ye.