Ditẹrọnọmị 5 - FỊAFỊA BAỊBỤLỤ

Mozizi Pịkị Oyia Oloko Ma Go Pakamam

¹ Mozizi Izirẹlị mẹmgba sịn kobiri tẹ ịn ḅẹẹm, “Izirẹlịapụ ó poki yee! Ọ́ kẹẹ wararị oloko ma na tọn-pịrị-aị ma na tẹ à mịmgba ọ́ naarị ḅara kẹ ḍuko ọ́ pịrịarị aị ma naa, anịsakị ọmịnị arị ḍawọ tẹ ḅụụ ẹbị-bịtẹ arị mịẹ ḅa.

² KỊNỊNYANAḄỌ wamịna Tamụnọ ḅe Orẹbụ (anie Sayịnayị Tụndụ) ḅụ wamịnị na ọḅọkụ fịm.

³ Wamịna aḍapụ ma ngẹrị KỊNỊNYANAḄỌ ḅe na mị ọḅọkụ mẹ fị-a, kụma wamịnị-mgba tẹ mịmgba mịanga ḍumo-sime wararị apụ ma sọ.

⁴ KỊNỊNYANAḄỌ ḅe tụndụ mẹ ḅụ ọmịnị na tọrụ kẹ dama-dama tẹ ẹkwẹnm, kọrị fịnị mẹ ogboku ḅụ.

⁵ Yẹrị nwẹnị KỊNỊNYANAḄỌ ḅe ẹkwẹn-ḅịḅị mẹ mịẹfinji ọ́ pịrị gotẹ anị sakị mẹ ḅụ KỊNỊNYANAḄỌ ḅe na ọmịnị na ogboku sịẹsimem; gbala ọ́ kọrị fịnị mẹ gotẹ ḅalafaarị tẹ sọma tụndụ mẹ dama-mua ẹrẹsị.” KỊNỊNYANAḄỌ ḅe ḅẹẹm,

⁶ Yẹrị anie KỊNỊNYANAḄỌ ọmịna Tamụnọ ḅe, tẹ Ijiputi ḅụ ọmịnị omoni-sọ anga mẹ ḅio ọ́ pakama-ḅo ḅọ ḅe.

⁷ Ì sikima tẹ ọ́ sunsin oru-atamụnọ pịrị ma.

⁸ Ọ́ gbọrụ oru-fụḅara sọ tẹmẹ ọmịna aḅụụ pịrị ma, ḅẹẹye-ḅẹẹye tẹ So-ḅio sime ye na kịkaye-o, anịanịa aniemẹ tẹ kiri suku-ḅio sime ye-o, anịanịa tọrụ-minji mẹ ḅio sime ye-o sọ.

⁹ Ọ́ sunsin arị pịrị ma, pịkị fịrịmẹnjị arị pịrị ma, kẹ gotẹ ọkọ ḅẹẹarị, yẹrị KỊNỊNYANAḄỌ ọmịna Tamụnọ ḅe anie afana Tamụnọ tẹ ḍapụ ma mịẹ-irima ye mẹ kẹ awọmẹ ma ọgọnọ gbanarị mu inima tẹ ì ḍiki-ḅioḅuarị apụ ma ḅụ tẹrẹị karama ḅụọ na, ini karama ḅụọ na laarị.

¹⁰ Kụma à jike-a ḅẹlẹma nyana kẹ ịna aḅụụ kịnị maa ẹndẹ oyia asi finji finji pịrịarị, inima tẹ ị̀ ḅẹlẹma tẹ ì oloko ma kokoarị apụ ma.

¹¹ Ọmịnị yẹrị KỊNỊNYANAḄỌ ọmịna Tamụnọ ḅe ẹrẹ ọkị tẹ kẹ papaaye mịẹ ma; kẹ gotẹ ọkọ ḅẹẹarị, à ḅẹrẹ-ḅarasii-a ḅara kẹ anị ḅọ mẹ tẹ ị̀ ẹrẹ kẹ papaaye mịẹ ḅọ mẹ wẹrịso ḅịa.

¹² Ọmịnị Ịnyọsara-Ene mẹ kẹ elekima sụa, anị wẹrị fịafịama ḅẹ ḅara, yẹrị KỊNỊNYANAḄỌ ọmịna Tamụnọ ḅe wẹrịtẹ tọn ọ́ pịrị ḅara.

¹³ Sonio aḍin mie ọ́ kẹ kọrịnama kọrị tẹ ọ́ mịẹ ḅarị aị mamgba mịẹ ḅarịye;

¹⁴ kụma sọnọma aḍin karama ene mẹ anie yẹrị KỊNỊNYANAḄỌ ọmịna Tamụnọ ḅe Ịnyọsara-Ene; anị ḅụ ọ́ ḅẹẹ kọrịnama kọrịnama sọ kọrị ma — ọmịnị, anịanịa ọmịna awọmẹ, anịanịa ọmịna omoniapụ, anịanịa ọmịna pootẹ-anambulo, anịanịa ọmịna yedogi-anama, anịanịa ḅe opu nama, opu nama tẹ ọ́ nyana ye, anịanịa ọmịna ama ma ḅio simearị igoniapụ sọ. Ọmịna omoniapụ ịnyọsara ḅa, ọmịnị sọ ịnyọsararị ḅara.

¹⁵ Ọ́ kẹ ḅiokoroma mịnẹ ọmịnị anie omoniapụ Ijiputi ama mẹ ḅio, tẹ yẹrị KỊNỊNYANAḄỌ ọmịna Tamụnọ ḅe ì opu kụrọ na ị̀ ịnyọ na kẹ anịjụ ọ́ pakama-ḅom. Miemẹ gotẹ anie à tọn ọ́ pịrịarị ọmịnị Ịnyọsara-Ene mẹ kokoo.

¹⁶ Ọmịnị ọmịna aḍapụ na, ọmịna iyingiapụ na kụụn, yẹrị KỊNỊNYANAḄỌ ọmịna Tamụnọ ḅe wẹrịtẹ tọn ọ́ pịrị ḅara, mịẹtẹ ọ́ nangwọ ḍumo kọn ḅẹ ḅara ama mẹ tẹ yẹrị KỊNỊNYANAḄỌ ọmịna Tamụnọ ḅe kẹ ọ́ pịrịarị ama mẹ ḅio.

¹⁷ Gbọrụḅọ-sọ amịna pembe tomḅọ ḅaa ma.

¹⁸ Gbọrụḅọ-sọ jụmọ taḅọ anịanịa jụmọ diḅọ na sẹfị ma.

¹⁹ Gbọrụḅọ-sọ jụmọ nye furu ma.

²⁰ Gbọrụḅọ-sọ iruo ogbo-sịẹḅọ sọ amịna pembe tomḅọ pịrị ma.

²¹ Gbọrụḅọ-sọ amịna pembe tomḅọ warị mọnị ma; mḅọ taḅọ anịanịa diḅọ, anịanịa omoniapụ, anịanịa mḅọ pootẹ-anambulo, anịanịa mḅọ yedogi-nama, anịanịa ḅẹẹye-ḅẹẹye tẹ sime mḅọ pịrị ye goyegoye sọ mọnị ma.

²² Mịna ẹkwẹn-aḅịḅị ma KỊNỊNYANAḄỌ ḅe opu pọkọ kẹ nwẹn kọn tomi ogbo mẹmgba pịrịm kọrị fịnị na, oḅuto na, furu-kịtịpụtẹ kanakana na ḅio tụndụ mẹ ḅụ, tẹ ọ̀ ḅarị jen kẹ arị ḅụ sụa-a. Tẹ ori arị kẹ maa ḍụḅarị apakịrị ọgọnọ kẹẹm, tẹ arị kẹ ị̀ pịrịm.

Tomi Ma Ḅalafaarị

²³ Mozizi nwẹnị pịkị ḅẹẹ: Kọrị fịnị mẹ tụndụ mẹ na kọrịarị ogbo, ọ́ kanakana mẹ ogboku pọkọ mẹ naa tẹso, ọmịna afuro ma ḅẹ sịḅịdapụ mamgba na, ọmịna omongiapụ ma na sọma ì kpekim;

²⁴ tẹ ọ́ ḅẹẹm: Ḍikii, KỊNỊNYANAḄỌ wamịna Tamụnọ ḅe ori ebube na, ori opu na kẹ wa ḍie tẹẹ, tẹ wa pịkị ọ̀ pọkọ naa tẹ kọrị fịnị mẹ ogboku, mịmgba wa Tamụnọ tomḅọ na ẹkwẹn tẹ tomḅọ paa ḍumo-sime wararị ẹrị tẹ.

²⁵ Anị-a kụma mịọkụ wa tiegotẹ fịị na-iḅi? Kẹ gotẹ ọkọ ḅẹẹarị, mị gburo-gburotẹ kọrị fịnị mẹ wa dọkịma ḅa; wa jen-maaịn kẹ KỊNỊNYANAḄỌ wamịna Tamụnọ ḅe pọkọ naa naa, wa fịị ḅa.

²⁶ Kẹ gotẹ ọkọ ḅẹẹarị, meni mamgba ḅụ tụḅọ emi tẹ wa naa tẹ ḅara kẹ kọrị fịnị ogboku ḅụ ḍumo wararị Tamụnọ ḅe ẹkwẹn-arị tẹ naa tẹ paa ḍumo-sime tẹ ḅọ?

²⁷ Sọma mu kpekii, tẹ KỊNỊNYANAḄỌ wamịna Tamụnọ ḅe ḍuko ḅẹ aị mamgba naa; tẹ KỊNỊNYANAḄỌ wamịna Tamụnọ ḅe ḍuko ị́ pịrị ḅarị aị mamgba ḍuko wa pịrị; anịsakị wa arị naa tẹ mịẹ ḅa.

²⁸ KỊNỊNYANAḄỌ ḅe ọmịna ẹkwẹn-aḅịḅị naam, ọmịnị ẹkwẹn ị̀ pịrị sakị; tẹ KỊNỊNYANAḄỌ ḅe nwẹnị ị̀ ḅẹẹ: À mịna atomi ma ẹkwẹn-aḅịḅị ma tẹ ịn kọn ị́ pịrị aị ma naa tẹ, ịn kọn ẹkwẹn mamgba kuram.

²⁹ Yei, ịn nwẹnị sakị mẹmgba ì mangịma tẹ ì oloko mamgba koko ḅẹ nwẹn sime ḅioḅẹngbọ nyana kụma, mimgbe anị iḅi ini na, ịna awọmẹ ma na pịrị gbamaso tẹẹ.

³⁰ Mu tẹ ịn ḅẹẹ, “Ọ́ pịkịma-so ọmịna akpụrụ-awarị muu.”

³¹ Kụma ị́yẹrị, mị anga ị̀ akaka sịẹsimee, anịsakị arị oloko mamgba na, kẹẹ wararị oloko ma na, kụrọ ḅara ḅio sime apụ sụa oloko ma na, tẹ ị́ kẹ ịn toluma ḅẹ aị ma ḍuko ị́ pịrị ḅa, mịẹtẹ ini arị mịẹ ḅẹ ḅara ama mẹ tẹ à kẹ ịn pịrị nyana ama mẹ ḅio.

³² Ọmịnị anịẹrẹsị ḅụụ ẹbị ḅa tẹ KỊNỊNYANAḄỌ ọmịna Tamụnọ ḅe wẹrịtẹ tọn ọ́ pịrị tẹ ḅara mịẹ ḅẹ ḅara; ọ́ tọrụ pịkị ama-ḅara, anịanịa ere-ḅara da ma.

³³ Etela mẹ tẹ KỊNỊNYANAḄỌ ọmịna Tamụnọ ḅe tọn ọ́ pịrị etela mẹmgba ḅụ mie ọ́ mẹnjị ḅarịye, mịẹtẹ ó ḍumo-sime, tẹ anị ọmịnị na iḅi ma mu, anịsakị ama mẹ tẹ ọ́ nyana ḅẹ ama mẹ ḅio ọ́ nangwọ ḍumo nyana ḅẹ ḅara.