Ditẹrọnọmị 4 - FỊAFỊA BAỊBỤLỤ

Mozizi Tọn Izirẹlị Ḅẹ Apụ Pịrịm Ịn Ḅịḅịpokii

¹ Izirẹlị, mịọkụ ọ́ kẹẹ wararị oloko ma na, kụrọ ḅara-ḅio sime apụ sụa ọ́ pịrị oloko ma na tẹ à kẹ ó toluma aị ma koko tẹ arị mịẹ; mịẹtẹ ó ḍumo tẹ mu KỊNỊNYANAḄỌ ọmịna aḍapụ ma Tamụnọ ḅe kẹ ọ́ pịrị ama mẹ ọkị nyana ḅẹ ḅara

² Ẹkwẹn mẹ tẹ arị ẹkwẹn tẹ tọn ọ́ pịrị ye mẹ ḅụ ó ye kẹ sụa, anịanịa ye sin ma; mịẹtẹ ọ́ KỊNỊNYANAḄỌ ọmịna Tamụnọ ḅe oloko ma tẹ à tọn ọ́ pịrị aị ma koko ḅẹ ḅara.

³ Ọmịna atọrụngbọ Balị-pẹyọ ḅụ KỊNỊNYANAḄỌ ḅe mịẹ ye ẹrị tẹ; kẹ gotẹ ọkọ ḅẹẹarị, KỊNỊNYANAḄỌ ọmịna Tamụnọ ḅe ọmịna ogboku ḅụ tomi ma tẹ Pẹyọ ḅẹ Balị ḍukamẹnjị apụ mamgba ḅaam,

⁴ kụma mịmgba ḅụ ọmịnị tẹ KỊNỊNYANAḄỌ ọmịna Tamụnọ ḅe ọlọ-sịẹma apụ mamgba ḍumo-sime wararị.

⁵ Ḍikii, KỊNỊNYANAḄỌ Ị̀ Tamụnọ ḅe tọn ị̀ pịrị ḅara ḅụ à kẹẹ wararị oloko na, kụrọ ḅara-ḅio sime apụ sụa oloko na kẹ ó toluma tẹ mịnẹ ama mẹ tẹ ọ́ sọ-mu ọkị nyana ḅẹ muarị ama mẹ ḅio ọmịnị arị mịẹ ḅa.

⁶ Ọmịnị arị koko tẹ arị mịẹ; kẹ gotẹ ọkọ ḅẹẹarị, aniemẹ ọmịna ye-nimi na, ọmịna yefieye naa na sọ ḅa tomi ma tọrụ ḅụ, inima tẹ mịna ọmịna kẹẹ wararị oloko mamgba naa ḅarị apụ ma arị naa ḅẹ sakị ịn ḅẹẹ ḅa: Tụkụma ḅara ḅụ mị gburo-gburotẹ opu sịẹ mẹ anie ye-nimi, tẹ yefieye naarị atomi.

⁷ Kẹ gotẹ ọkọ ḅẹẹarị, tọ gburo-gburotẹ opu sịẹ emi, tẹ oru-tamụnọ nyana tẹ KỊNỊNYANAḄỌ wamịna Tamụnọ ḅe wa ọ̀ sịn sakị sịn sakị ḅụ wamịnị na kpeki ḅara kẹ anị kpeki?

⁸ Anịsakị tọ gburo-gburotẹ opu sịẹ emi, tẹ oloko mẹ tẹ à kẹ mịmgba ọmịna tọrọkọ koroma wararị kẹẹ wararị oloko ma na, kụrọ ḅara-ḅio sime apụ sụa oloko ma na, mị oloko mẹmgba karakara ḅara karakara oloko nyana?

⁹ Ọ́ paa ḅụụ ẹbị nyana, tẹ ọmịna tẹmẹ kẹ ọkọ wẹrịị, anieofori ó ḅofa arị aị ma tẹ ọ́ tọrụngbọ kẹ ẹrị tẹ aị ma kẹ ḅioḅọrọmatẹ arị ḅofa ọmịna ḍumo ene mamgba ḅụ ọmịna ḅioḅẹngbọ ḅụ so; ọ́ mịẹtẹ ọmịnị na, ọmịna afuro ḅẹ apụ na arị nimi,

¹⁰ ọ́ wẹrịtẹ Orẹbụ ḅụ KỊNỊNYANAḄỌ ọmịna Tamụnọ ḅe tọrọkọ sịẹsime ḅara KỊNỊNYANAḄỌ ḅe ị̀ ḅẹẹm: Tomi ma kobiri ị̀ pịrị, mịẹtẹ ini ị̀ ẹkwẹn-ḅịḅị naa ḅẹ ḅara, mịẹtẹ ini ị̀ mangịma ḅẹ ḅara ḍawọ ḅarị ḅara ene mamgba tẹ ịn kẹ tomikiri ḅụ ḍumo-sime ḅẹ ene ma ḅụ, anịsakị ini anị ḅara kẹ ịna awọmẹ ma toluma ḅẹ ḅara.

¹¹ Ọ́ nwẹnị ḅo tụndụ mẹ suku kpeki tẹ sịẹsime, fịnị tụndụ mẹ ḅụ kọrị mu gbọrsịḅị so mẹ ḅio laarị, kanakana na, kpiti So-tọrụ na, oḅuto na, anị gbaịn wararị.

¹² Anịtẹso KỊNỊNYANAḄỌ ḅe kọrị fịnị mẹ ogboku ḅụ sime tẹ ẹkwẹn ọ́ pịrịm, ọ́ naam ẹkwẹn-aḅịḅị fiearị, gbọrụ pọkọ ngẹrị ngẹrị, kụma ye kịka gberie sọ ọmịnị ẹrị-a.

¹³ Ori ọḅọkụ mẹ tẹ ọ̀ tọn ọ́ pịrị ọ́ mịẹ ḅẹ ye mẹ mịẹfinji ọ́ pịrịm, aniemẹ anie Oyia Oloko ma; anịsakị ori arị kẹ ḍụḅarị maa apakịrị ọgọnọ kẹẹm.

¹⁴ KỊNỊNYANAḄỌ ḅe anị sakị mẹ ḅụ tọn ị̀ pịrịm à kẹẹ wararị oloko na, kụrọ ḅara-ḅio sime apụ sụa oloko na kẹ ó toluma, mịẹtẹ ama mẹ tẹ ọ́ saḅa-ḅọrọ mu nyana ḅẹ muarị ama mẹ ḅio ọmịnị arị mịẹ ḅẹ ḅara.

Ḅara Kẹ Mie Ye Tẹkẹ ma Ḅeri Nụnụ Ẹkwẹn

¹⁵ Anịẹrẹsị ọmịnị iḅi ḅara kẹ ḅụụ ẹbị nyana ọmịna aḅụụ pịrị. Anị ene mẹ tẹ KỊNỊNYANAḄỌ ḅe Orẹbụ ḅụ kọrị fịnị mẹ ogboku ẹkwẹn ọ́ pịrị sakị mẹ ḅụ ó ye kịka gberie-sọ ẹrị-a ḅẹẹ-sakị,

¹⁶ ọmịnị ọmịna aḅụụ ẹbị anieofori ó ḅofa owiḅọ, anịanịa ẹrẹḅọ ḅẹẹye-ḅẹẹye kịkama ye tẹmẹ ọmịna aḅụụ pịrị ḅụ si mịẹ ḅara kẹ ye mịẹ,

¹⁷ anị, ḅẹ nama, ḅẹ nama tẹ tomikiri ḅụ simearị ye na kịkaye, ḅẹẹye-ḅẹẹye tẹ pamba-sụa tẹ So-tọrụ mẹ ḅụ fiin-arị feni na kịkaye,

¹⁸ ḅẹ ye ḅẹ ye tẹ kiri mẹ ḅio ikiriarị ye na kịkaye, ḅẹẹye-ḅẹẹye tẹ ḅẹ inji, ḅẹ inji tẹ kiri mẹ suku-ḅio simearị minji mẹ ḅio simearị ye na kịkaye sọ.

¹⁹ Anịsakị ọmịnị ọmịna aḅụụ ẹbị anieofori ó ḅofa ọmịna atọrụ saakị So daa, tẹ So-ḅio sime aị mamgba — ịrụa mẹ na, akalụ mẹ na, lolia ma na — ẹrị sakị ó ḅofa pịkị tẹ sunsin tẹ fịrịmẹnjị arị pịrị. KỊNỊNYANAḄỌ ọmịna Tamụnọ ḅe mịna aị ma kẹ bebe So mẹ suku-ḅio simearị asịẹ mamgba pịrị tẹẹ.

²⁰ Kụma ọmịnị KỊNỊNYANAḄỌ ḅe ọmịna ọkị tẹ, Ijiputi ḅio ḅụ, ikulele orumo ḅio ọ́ pakama-ḅom, ó ḅo ò soku ḅụ ọ̀ nyana atomi sọ ḅẹ ḅara, anị wẹrịtẹ mịmgba sime-ḅara.

²¹ Anie sikima, KỊNỊNYANAḄỌ ḅe ọmịna sịḅị gotẹ ịganị ị̀ pịrịm, tẹ ò ye karịm mịnẹ à Jodanị mẹ saḅa ḅịa, anie ḅụ iḅi ama mẹ tẹ KỊNỊNYANAḄỌ ọmịna Tamụnọ ḅe kẹ ọ́ pịrị nyana ḅẹ ama mẹ ḅio à sọ-mu ḅịa.

²² Gbala à mị ama mẹ ḅio fịị nyanam, à Jodanị mẹ saḅa ḅịa ẹrẹsị; kụma ọmịnị saḅa-ḅọrọ ḅa tẹ anị iḅi ama mẹ ọkị nyana ḅa.

²³ Ọmịnị ọmịna aḅụụ ẹbị, anieofori ó ḅofa KỊNỊNYANAḄỌ ọmịna Tamụnọ ḅe ọḅọkụ mẹ tẹ ori ọmịnị na fị ye mẹ kẹ ḅioḅọrọma, tẹ ḅẹẹye-ḅẹẹye kịkama tẹmẹ ọmịna aḅụụ pịrị, aniemẹ tẹ KỊNỊNYANAḄỌ ọmịna Tamụnọ ḅe kẹ tọn-tọnye sọma ọ́ pịrị tẹ ye mẹ.

²⁴ Kẹ gotẹ ọkọ ḅẹẹarị, KỊNỊNYANAḄỌ ọmịna Tamụnọ ḅe anie ye gulugulumarị fịnị, afana Tamụnọ.

²⁵ Ọmịnị ama mẹ ḅio simetẹ omongi, tẹ awọmẹ na taa-awọmẹ na ile-awọmẹ na iyi sakị, ọ́ ḅẹẹye-ḅẹẹye kịkama tẹmẹ ḅụ si mịẹ ḅara kẹ ye mịẹ tẹ KỊNỊNYANAḄỌ ọmịna Tamụnọ ḅe ḍiki-tọrụ ḅụ siye mịẹ ma. Miemẹ anie siye tẹ ori ịganịma ḅa.

²⁶ À mịmgba ḅụ So na Kiri na sịnm, arị ogbo-sịẹ apụ sọ kẹ ọ́ pịrịị, mịnẹ ọmịnị ị̀ ḅịḅị poki-a ḅẹḅẹ, ala-a sakị ḅụ ama mẹ tẹ Jodanị mẹ saḅa ḅụ ọ́ nyana ḅẹ muarị ama mẹ ḅụ ọmịnị ịkatakirikọn-a-ḅara kẹ fịị fama ḅa; ọmịnị anị ḅụ sime alama ḅịa, kụma ịkatakirikọn-a-ḅara kẹ ọ́ fịị fama ḅa.

²⁷ Anịsakị KỊNỊNYANAḄỌ ḅe ọ́ gala-galama ḅa tomi ma ogbo-ḅio ḅụ, tẹ opu asịẹ ma ogbo-ḅio KỊNỊNYANAḄỌ ḅe ó dee mu suu ḅarị anga ḅụ ọmịna aḅụụ kirikọn ḅarị apụ kịẹn-ḅịḅị kịsị ḅa.

²⁸ Anịjụ ọ́ fịrịmẹnjị sịn na, ḍụḅarị na oru-atamụnọ pịrị ḅa, tomina aḅara ḅẹ kọrịnama tẹ ye ẹrị, anịanịa ye naa, anịanịa fịye fị, anịanịa ye fụrụ naa-a aị.

²⁹ Kụma anịjụ ḅụ ọ́ KỊNỊNYANAḄỌ ọmịna Tamụnọ ḅe ḍọkị ḅa, tẹ ọmịnị ọ̀ ḍọkị-ẹrị ḅa, ọmịnị ọmịna ḅioḅẹngbọ mẹmgba na, ọmịna tẹmẹ mẹmgba na kẹ ọ̀ ḍọkị ḍọkị.

³⁰ Ọ́ ḅụụ-fụka ḅio sọ, tẹ mịna aị ma kunoma ene ma ḅụ ḅo ọmịna ọgọnọ gbana sakị, ọ́ pịkịma KỊNỊNYANAḄỌ ọmịna Tamụnọ ḅe ḍọkụma-ḅo tẹ ọ̀ pọkọ poki ḅa,

³¹ kẹ gotẹ ọkọ ḅẹẹarị, KỊNỊNYANAḄỌ ọmịna Tamụnọ ḅe anie ọkụrụkụrụ Tamụnọ; ori ó pikirima, anịanịa ọ́ ḅaa, anịanịa ọḅọkụ mẹ tẹ ori ọmịna aḍapụ na fị tẹ ye karị ịn pịrị ye mẹ kẹ ḅioḅọrọma ḅịa.

³² Mịọkụ ọ́ ḅọrọtẹ amụ ọmịnị iyi-a sakị ḅẹ ene ma ḅụ mịẹ aị ma gbelaa, anị ene mẹ tẹ Tamụnọ tomikiri mẹ ḅụ tomi tẹmẹ eneḅaka kụra-ḅio. Tomikiri-ngisịẹ mamgba ḅụ ḍọkịị. Miemẹ pembema gburo-gburotẹ ye jen ene ḅụ paka tẹ, anịanịa kịnị ọkọ sime ye naa tẹ ḅoto?

³³ Jen ene tọ atomi gbọrụ oru-tamụnọ pọkọ naa tẹ kọrị fịnị ogboku ḅụ, ọ́ wẹrịtẹ naa tẹ paa ḍumo-sime wararị ḅara?

³⁴ Anịanịa jen ene tọ gbọrụ oru-tamụnọ mu jen opu sịẹ ogboku gbọrụ opu sịẹ ọkị amịna ḅụụ pịrị ḅara kẹ ye mịẹ tẹ tọnwa daaḍiki ḅụ na, tọnwa elekima ḅụ na, tọnwa ḅụụ-gbiripuma-aị ḅụ na, ọmụ ḅụ na, kụrọ na ịnyọ na, gburo-gburotẹ atẹmẹ-naịn-naịn ḅụ na; KỊNỊNYANAḄỌ ọmịna Tamụnọ ḅe ọmịna tọrụ-ogbo ḅụ wẹrịtẹ mịẹ ọ́ pịrị ḅara mamgba Ijiputi ḅụ?

³⁵ Ọmịnị mie ini anị kẹ ḍie ye, mịẹtẹ ó nimi ḅẹ ḅara mịnẹ KỊNỊNYANAḄỌ ḅe anie Tamụnọ; ò sikima jụmọ ofori.

³⁶ So-ḅio ḅụ ori ọ́ mịẹ tẹ ọmịnị ọ̀ pọkọ naam, mịẹtẹ ori ọmịna ḅioḅẹngbọ na, ọmịna ye-mịẹ-ḅara na datụkụma ḅẹ ḅara; tẹ tomikiri ḅụ ọ̀ mịẹ tẹ ọmịnị ò gburo-gburotẹ opu kọrị fịnị mẹ ẹrịm, tẹ ọmịnị ori ẹkwẹn-aḅịḅị naam kọrị fịnị mẹ ogboku ḅụ.

³⁷ Gbala ori ọmịna aḍapụ ḅẹlẹma tẹ ịn ḅọrọ tẹso, ịna aḅụụ ḅụ paka-ḅo apụ sẹlẹ-ọkịm ẹrẹsị, tẹ ò gburo-gburotẹ opu kụrọ ḅụ ḅarana sime tẹ Ijiputi ḅụ ọ́ pakama-ḅom,

³⁸ ọmịna tọrọkọ ḍụḅa ọ́ nẹngị-nẹngịtẹ pịkị kụrọ ọ́ nẹngị-nẹngịtẹ gburo-gburotẹ opu asịẹ deearị, ọmịnị ọkị sọ-ḅo, tẹ ịna ama ma kẹ ọ́ pịrị tẹ ọ́ kẹ sime-anga mịẹ ḅẹ ḅara, anị wẹrịtẹ mịmgba ḅụ sime-ḅara.

³⁹ Anịẹrẹsị mịmgba ó nimi tẹ kẹ ọmịna ḅioḅẹngbọ ḅụ sụa mịnẹ KỊNỊNYANAḄỌ ḅe anie Tamụnọ ọgọnọ-jụ simearị so mẹ ḅio na, suku-ḅio simearị kiri mẹ ḅio na ḅụ; jụmọ ofori.

⁴⁰ Anịẹrẹsị ọmịnị ori oloko kẹẹ wararị aị ma na, tọn koroma oloko ma tẹ mịmgba à tọn ọ́ pịrị aị ma na koko ḅa, mịẹtẹ anị ọmịnị na, ọ́ ḅọrọ tẹso, ọmịna awọmẹ na iḅi ḅẹ ḅara, mịẹtẹ ọmịnị ọmịna aḍin ma mịẹ nangwọma ḅe ḅara ama mẹ tẹ KỊNỊNYANAḄỌ ọmịna Tamụnọ ḅe kẹ ọ́ pịrị gbamaso ama mẹ ḅụ.

Jodanị Mẹ Ḅẹ Ịrụa-saakịarị-anga Ḅẹ Ḅụụ-ḅọị Opu Ama Ma

⁴¹ Anịtẹso Mozizi Jodanị mẹ ọgọnọ-jụ ịrụa-saakịarị-anga mẹ ḅụ tẹra opu ama sikimam,

⁴² mịẹtẹ kịnị-ḅaḅọ ḍumo-mangị kẹ anịjụ mu ḅẹ ḅara, inima tẹ ḅiotọn-a ḅara, ḅọrọtẹ sakị ḅụ ọmọnụba sụa mịnaḅọ pịrị-a tẹ bẹkẹma mịnaḅọ ḅaaḅọ ḍumo-mangị kọn mịna opu ama ma ḅẹ gberie mu ḅụ inetẹ ò ḍumo ḅọrọma ḅa.

⁴³ Ịkpa mẹ ḅio lẹsẹrẹtẹ tụndụ ọgọnọ mẹ ḅụ sime Rubẹnị furo-ḅẹ-apụ ma pịrị opu ama Biza, Gilẹdị ḅụ sime Gadi furo-ḅẹ-apụ ma pịrị opu ama Remọtị, anịsakị Basani ḅụ sime Manasẹ furo mẹ pịrị opu ama Golanị.

Tamụnọ Oloko Pịrị Mẹ Ḅẹ Suku-saakị

⁴⁴ Mie Oloko mẹ tẹ Mozizi kẹ Izirẹlị ḅẹ awọmẹ ma pịrị ye mẹ.

⁴⁵ Mịna aị ma anie mịẹ tẹ ḍuko-pakama aị ma na, kẹẹ wararị oloko ma na, kụrọ ḅara-ḅio sime apụ sụa oloko ma na tẹ Mozizi ḍuko Izirẹlị ḅẹ awọmẹ ma pịrị aị ini Ijiputi ama mẹ ḅio paka-ḅo sakị,

⁴⁶ Jodanị mẹ ọgọnọ-jụ Bẹtị-pẹyọ na dama-dama tụndụ ogboku mẹ ḅụ Siyọnị Amọrayịtị apụ ma amadaḅọ ḅe tẹ Ẹsịbọnị ḅụ sime ḅọ ḅe ama mẹ ḅio oriḅe tẹ Mozizi na Izirẹlị ḅẹ awọmẹ ma na ḅụụ ḅụ owu-ḅara-iḅi nyana ḅọ ḅe, ini Ijiputi ḅẹ ama mẹ ḅio paka-ḅo sakị.

⁴⁷ Ini ori ama mẹ na, Ogu, Basani ḅẹ amadaḅọ ḅe ama mẹ na, Amọrayịtị apụ ma maa amadapụ ma tẹ Jodanị mẹ ọgọnọ-jụ ḅụ ịrụa-saakịarị-anga mẹ ḅụ sime apụ ma ama ọkị nyanam.

⁴⁸ Arowa tẹ Anọnị ḅẹ Tụndụ Ogboku mẹ ḅẹ agara mẹ ḅụ simearị ye mẹ ḅụ ọkị mu Siriyọnị Tụndụ (anie pịkị Hamọnị Tụndụ) jụjụ-ḅio la,

⁴⁹ na Jodanị mẹ ḅẹ ịrụa-saakịarị-anga mẹ ḅụ Ịkpa ḅio ḅẹ Ele mẹmgba, ọkị mu Ịkpa ḅio ḅẹ Ele mẹ ḅẹ Opu Tọrụ mẹ sime jụjụ-ḅio la Pisiga Tụndụ ḅẹ tuma kiri mẹ suku-ḅio kẹ sụa.